Migani 17
17
Obwîrhonzi
1Ecikâmbi c’omugati mûmu omuntu alya n’omurhûla, co cikulu aha nyumpa eyunjwîre nyama z’enterekêro y’omu mbaka.
2Omushizi mwenge ye mukulu hali bene nnakâ basirhe, âyishishangîra akashambala haguma nabo.
3Omuliro gurhangula amarhale, n’ecibêye amasholo. emirhima yôhe Nyakasane oyirhangula.
4Omumînya akanwa kabî ko ayumvîrhiza, n’omurhebanyi kanwa kanywesi ayumvîrhiza.
5Oshekera omukenyi erhi Omulemi wâge agayisize, n’oshekera ohanyagîre, arhabula kuhanwa.
6Ecimanè c’abashosi: bâna b’abâna bâbo, okukengwa kw’abâna erhi îshe.
7lderha lirhakwânana musirhe, nalwo lulimi lunywesi, lurhahimwa kushuha omuluzi
8Omu masù g’oyihâbirwe, entanda ebà njuma ya citwîro cidârhi.
9Obwikira ecibî c’owundi erhi bwîra akomire, ci ojà aderha ecibî ca bene anashombanye abà ayinjibine.
10Okukalihirwa kuyumvîsa omwenge, n’eminyuli ikumi ebule buyumvîsa idâga.
11Omubî arhalonza oburhali bugoma, ci muganda mumînya banamurhumira.
12Aha omuntu ankashigâna omusirhe ogurusire. ankabugâna mpunga banyazire abâna.
13Ogalula obubî oku bwinjà, obuhanya burhankarhenga aha mwâge.
14Okuzûsa olubanja kubà kufukulira amîshi, onacîzibuke lwo lurhacikula.
15Okulîka omugoma, n’okutumuza omwêru-kwêru, bibirhi Nyakasane ashomba ebyo.
16Obugale omu nfune z’omuhwinja erhi bwa bici? Ka mpu agule mwo oburhimanya? Ci arhajira irhwe!
17Mwîra wa muntu ôbà amuzigire ngasi mango, kw’anabà nka mwene wâbo omuntu omu mbaka.
18Ali muhwinja omuntu oshiga haguma n’owâbo agalibà ye cihana yêne ncungura.
19Okusîma akadali kubà kusîma empîmbo, n’olengeza izù erhi kushâba alonza. 20Ow’omurhima mubî arhabêrwa, n’ow’akalimi kuhanyagala ahanyagala.
Obuhwinja burhabukwa
21Oburha omuhwinja mutula aburhira, ntà kushagaluka kw’îshe w’ecingolo-ngolo.
22Omurhima gurhwangûsire, bufumu nkana, murhima-ali mungo, anayumye omuntu orhuvuha.
23Endyâlya enalye bufûnda-fûnda, entânda y’okuhabula obushinganyanya, 24Entagengwa ebwa burhimanya eyerekeza amalanga, amasù g’omuhwinja gôhe, kuzimêra gazimêra enyuma ly’ebihugo.
25Omwâna muhwinja mutula gw’îshe, gwo na mungo gw’omuzîre wamuburhaga. 26Kurhabà kwinjà okuhôngesa omushinganyanya, n’okushûrha abarhambo kuciri kubî kulusha.
27Omuntu ogera ebinwa byâge erhi amanyire, n’ow’omurhima mwîrhonzi ye mwenge.
28Ciru n’omusirhe akahulika naye anabonekane nka mugula, orhabumbwîre akanwa anabonekane nka mwenge.
Mashi Bible © BUKAVU Archdiocese of Bukavu, 2024.