Izaya 55
55
Yishi mweshi mwe mugwêrhwe n’enyôrha
1Mweshi mwe mugwêrhwe n’enyôrha, muyishe ebwa mîshi;
ciru na ninyu mwe murhagwêrhi nsaranga, muyishe!
Mugule munanywe amamvu n’amarhà buzira nsaranga na buzira kulyûla bici!
2Cirhuma muheza ensaranga oku gurhali mugati munarhindibukire ebirhayîgusa?
Munyumvîrhize lyo mukaz’irya ebinunu, munacîshinge omu kulya ebishushagîre.
3Murhege okurhwiri munayishe emunda ndi; muyumvîrhize lyo mubona akalamo!
Nafundika endagâno y’ensiku n’amango#55, 3 Endagâno y’ensiku n’amango: yo ndagâno mpyâhya: Lolà muli Yer 31, 31. haguma ninyu,
yo mihigo erhakahingûlwa nalaganyagya Daudi.
4Loli oku ye nayimanzize, namujira muhamîrizi w’amashanja,
muluzi w’okurhambula embaga.
5Alà oku wahamagala ishanja orhayishi,
n’ishanja lirhakuyishi lyakulibirhira
erhi Nyakasane Nyamuzinda wâwe orhuma,
Mutagatîfu w’Israheli, ye wakuhîre irenge.
6Mulongereze Nyakasane oku aciri aboneka,
mumushenge oku aciri hôfi.
7Omubî aleke okwâge, na nyankola-maligo akabulire enkengêro zâge,
agaluke emwa Nyakasane, naye amubabalira,
agaluke emwa Nyamuzinda wîrhu,
bulya abà wa bwonjo bunji.
8Bulya enkengêro zâni zirhali zo nkengêro zinyu,
n’enjira zâni zirhali zo njira zinyu, kwo adesire Nyakasane
9Nka kula amalunga gali kulî enyanya ly’igulu,
kwo enjira zâni ziri kulî n’enjira zinyu,
kwo n’enkengêro zâni ziri kulî enyanya ly’enkengêro zinyu.
10Nka kula enkuba n’olubula birhoga emalunga birhanagalukayo birhanaj’ibombêza idaho n’okuliyêza n’okumezâmwo emburho, lihe omurhwêzi emyâka n’oshalisire eci alya, 11ntyo kwo nalo luli oluderho lurhenga omu kanwa kâni: lurhankangalukira busha, ci lwanajira eci nalonzagya, lunayûkirize oku lwarhumagwa. 12Nêci, mwâgenda muyunjwire bushagaluke munaje nwayêrekwa enjira y’omurhûla; entondo n’orhurhondo byâkaz’immukomera kagasha, n’emirhi yoshi y’erubala ekûbize. 13Ahantu harhasâg’imera mishûgi hakola hamera ensindani, n’ahantu hàmeraga olushusha hakola hamera omurhi gw’obukù. Lyâbà irenge kuli Nyakasane na cimanyîso cirhazâzika ensiku n’amango.
Mashi Bible © BUKAVU Archdiocese of Bukavu, 2024.