Be ya a Roma 5

Mò a zǝno adgye ngge Ehwya vǝ bwa anga

1Adia bè swa ara je nè bwe je nga ara be nobǝ esese chafya mo Ehwya a chu chaebi mo je ángá, je no a tswa adgye ngge Ehwya efka mo Yeso Kristi Etsodwe je. 2Adi efka mbwe, jè ben efwa kwashi adi esese a je no a tswa mo nó asuswana a chu chaebi a je no ngge nó a chu ye ángá. Efwe je shánju anga a chu shwa enyim jan ja ben edgwa a zǝn Ehwya. 3Kpwà ye ena tete ra, je shánju adi ekan engǝm mo je, adia je yi jan ekan engǝm hon du je je chifǝ, 4fǝechim hon vǝ fukèn esese bwa, fukèn esese hon du nobǝ nyishwa a chu mo mò hon. 5Ano je chungǝ́ tén echungǝm, ebgenju a fu ye je ra, adia Ehwya no ara je edgyan mbwe àywá a tsuruku mo je, adi efka mo Engǝ́ mbwe a gè no je ángá.

6Adia atan a jè chà bwe ti je mò akan ra, adi ekpengga edefǝfǝ, Kristi è fǝ fǝ a chu je, be ya ebgen. 7A mò ebwedwadwa a ende akan a chadwa jan ge e fǝ fǝ a chu nobǝ e no esese a chafya mo Ehwya. Bi adi ehwyà nobǝ a chadwa, ge e fǝ fǝ a chu ende e bwe be nobǝ esese ángá. 8Tea ena abu Ehwya è tú je edgyan mbwe àywá, atan a je chà no be ya ebgen ángá, Kristi è fǝ fǝ a chu je.

9Adia asuswana be jan-gwa ara je a chu ngǝ mbwe na, ge no kenm be ti a vǝ́ je a bu mo engo mo Ehwya adi efka mbwe. 10Adia atan a jè chà no be ya eze mo Ehwya, bè kpèntswa ara fwa mo je ngge ge adi efka mo Nwen ye è fǝ fǝ a chu je ángá. Asuswana adia je no zǝno adgye anga ngge Ehwya, ge no ara jan Nwen ye e no angǝ ángá a ti a vǝ́ je. 11Fwa ye jan mò ena no enò kpwà ara ra, tea je séfǝ́ anga a chu Ehwya gaten a tswa mo Etsodwe je Yeso Kristi, nwene adi efka mbwe, asuswana be kpèntswa ara fwa mo je ngge Ehwya.

Adamo è vǝ fǝ bwa, Kristi è vǝ nya bwa

12No enona, abu ebgen è kwashwa a tswa zǝnchaje adi efka mo nobǝ akan ángá, fǝ è bwa adi efka mo ebgen, ngge ena a abu fǝ hon è bwa a chu be nobǝ binbin, adia binbin mo be nobǝ hon è bwe ara ebgen, 13adia atan a bè chà ti edon no be be nobǝ ra, ebgen è no a tswa zǝnchaje. Bi adi enò, Ehwya è ti ye ebgen jan na mò akan ra, atan a edon è chà fwa ye ra ángá. 14Tke adi ekpengga mo Adamo ti bwangga adi ekpengga mo Mosa, fǝ è dwatì no a chu be nobǝ, tangge a chu be nobǝ ya e bwe be edan mo edon edipinm abu Adamo e bwe ángá ra. Adamo è no abu Ende akan a Ehwya è senvǝ jan ga bwa ángá.

15Tea edwe hon ena a Ehwya dwe ángá, fwa ye abu ebgen mo Adamo ra. Adia ano be nobǝ embo è fǝ fǝ a chu ebgen ebwem mo ende akan, esese ngge edwe e bwa anga adi efka mo nobǝ akan hon, Yeso Kristi, a mbo a bin be nobǝ embo hon. 16Efwe ba ti edwe mo Ehwya hon a mbwà be ngge ebgen mo nobǝ akan ra. Kǝ́n ekpènm è ba ebgen mo nobǝ akan nè vǝ kǝ́nfǝ ekpènm bwa, tea edwe mo Ehwya hon è ba be ebgen àywá a bè bwe ángá nè vǝ ejan-gwam bwa. 17Adia ano a chu ebgen mo nobǝ akan hon, Adamo, fǝ è bwa a chu be nobǝ embo, be mbwà a di be mò ena ngge mò a Yeso è bwe anga ra. Be nobǝ ya a cha esese àywá a Ehwya a bwe ngge edwe mo ebitete a chafya mbwe ángá, a no angǝ na dwatì efka mo nobǝ akan hon, Yeso Kristi.

18Abu ebgen akan è vǝ kǝ́nfǝ ekpènm bwa a chu binbin mo be nobǝ ángá, enò gaten ebitete ebwem akan, vǝ ejan-gwam ngge nya a bwa be nobǝ binbin. 19Adi edon hon a nobǝ akan è tse ye ra ángá, è du be nobǝ embo nga ya e bwe ara ebgen. Ba nona, adi efka mo nobǝ nwene e tse edon hon, be nobǝ embo a nga ya ebitete chafya mo Ehwya.

20Bè ti edon bwa evǝa ebgen ge e tu e bi. Tea zǝn a ebgen è tubi ángá, esese mo Ehwya è tubi àywá, 21evǝa abu ebgen è dwatì no a chu be nobǝ binbin, nè vǝ fǝ bwa ángá, enò gaten esese mo Ehwya a dwatì a chu be nobǝ adi efka mo ebitete evǝa ge e no be nya e no a fwa efwam ángá adi efka mo Yeso Kristi Etsodwe je.

S'ha seleccionat:

Be ya a Roma 5: ICH

Subratllat

Copia

Compara

Comparteix