Luka 18
18
Dvrá vjì nv̀ng memàmè kàshvbóng
1Tiqni taq, kàshvbóng kèní Yesuí Àng coqcv́nrì sv̀ng kadvgvp gø nøt mvtìn dø vjú røtshìlv́m shvngøtnòe. #Rom. 12:12; Kol. 4:2; 1Te. 5:16-18 2“Wamà tiqlòng taq, Gvray kaq gø màsvre, vsv̀ng kaq gø màpǿò we dvrá vjì tiqpè vle. 3Wewamà taqni, memà tiqmè vle. Àng nø wepè yv́ngsv̀ng nv̀nnv̀n di nø̀, ‘Ngà kaq vtù pè nv̀ng ngà dvhø̀ dvrá dø èwv́ngangà,’ wa røtshìe.
4Nv̀mlat dvgvp nø, dvrá vjìpèí mvtáaò. Íwe lv̀ngdø̀m taq, ‘Ngà nø Gvray kaq gø màsvreng, vsv̀ng kaq gø màpǿngònø̀ng gø, 5memà yamèí ngà sv̀ng bø̀nlu èmvn rvtnø̀, ngàí àng dvpvt dvrá dø wáalv́m íe. Mø̀ínì àng vrøshì ra weí mvzán lóngò pà íe,’ wa dvda:mòe,” a:lòe. #Luk. 11:7-8
6Wekvt Kàngpèí, “Mvdø̀ngman we dvrá vjìpèí shø̀:nò kà sv̀ng dèdvmnø̀ng. 7Gvrayí nø Àng kaq vyáng yaqdø̀ng kórshì we rvcv́ngshaq rì dvpvt téwa dvrá dø wáa daqò we mø̀í má? À:ngí àngmaq kaq dvbvnglv́m lòng shøt mvn lú:ngò ni má? 8Ngàí vla:tnìni, À:ngí nø àngmaq dvpvt dvrá dø cancan ni wáa daqòe. Íwe Vsv̀ng Àngcèpè di daq kvt, rvgaqtø̀m taq kv́mnøt vl vsv̀ng lá lún lú:ngò má?” a:lòe.
Parisipè nv̀ng kùyà gúnshú pè kàshvbóng
9Vdè nø døngmane, wa dvdutshì nø̀, dvgá vsv̀ng kaq yv́ng mvtv̀mvm we vsv̀ng tiqmaq kaq Yesuí kàshvbóng yalòng shø̀:nòe. 10“Vsv̀ng vnígǿ nø vjú røtshìlv́m Noqngø̀m Tø̀ngnø sv̀ng ngangá:mì. Tiqpè nø Parisi, tiqpè nø kùyà gúnshú íe. 11Parisipè nø àng wa rip sórí, ‘Gvrayé, ngà nø dvgá vsv̀ngrì dø, tølvm vsv̀ng, màdøngman vsv̀ng, dvchap vsv̀ng nv̀ng kùyà gúnshú yapè dø gø mvǿngà rvt, Nà sv̀ng oqà. #Mat. 23:23; Luk. 16:15 12Ngà nø tiqnár taq vníkvt màv́m vnatshø̀nge. Ngàí lúnò we shvngbe taqkèní tiqcéwál tiqwál vtv̀ngòe,’ wa vjú røtshìe.
13Íwe kùyà gúnshú pè nø, vrúm yv́ngø ripme. Àng nø muqlàng kaq dvjaq mvkvmshì nø̀ gv̀ng vnv́lshì sórí, ‘Gvrayé, mvrà vl pè ngà sv̀ng dvshá èzang dakngà,’ wae.
14Ngàí vla:tnìni, chø̀m sv̀ng àngní loá:mì kvt, Parisipè nø mø̀í dø, kùyà gúnshú pèí lè døngman dvdut lún bǿà. Kadø íe wani shvringshì gǿ sv̀ng nø cip lú:ngòe, íwe cipshì gǿ sv̀ng nø shvring lú:ngòe,” a:lòe. #Mat. 23:12; Luk. 14:11
Cv̀mrécèrì Yesu yv́ng shøla:tnà we
Mat. 19:13-15; Mak. 10:13-16
15Wedvgvp vsv̀ngrìí nø cv̀mrécèrì sv̀ng Yesuí laq shupma:tnò wa nø̀ Àng yv́ng shøla:tnà. Coqcv́nrìí yv̀ng bǿà kvt àngmaq sv̀ng nga:nòe. 16Íwe Yesuí cv̀mrécèrì sv̀ng goò nø̀, “Cv̀mrécèrì Ngà yv́ng laq di ra, àngmaq sv̀ng mènàgámnø̀ngni. Pàwá wani Gvray móngdàn nø yadø í rì dvpvt íaòe. 17Ngàí jø̀ngjǿng vla:tnìni, kagǿ í nìgø cv̀mrécèí vtoò dø Gvray móngdàn sv̀ng mènàtonø̀ng nìnø we móngdàn sv̀ng góng mvlúnshì,” a:lòe. #Mat. 18:3
Mvgàmrì muqlàng móng góng rvzaq we
Mat. 19:16-29; Mak. 10:17-30
18Yuda vsv̀ngrì shølshú tiqpèí Yesu sv̀ng, “Shvla we svrapèá, dvciqlvpat gø̀nshaq lúnlv́m rvt ngàí kapà wá rànge má?” wa rø:tnòe.
19Yesuí àng sv̀ng, “Nàí Ngà sv̀ng pàwálv́m shvla we èvlà má? Shvla we nø Gvray tiqpè wa mø̀í nìnø, dvgá màvl. 20‘Vsv̀ng svma dvchap mvdaq, vsv̀ng shvt mvdaq, kǿ mvdaq, mvdìng we shvkse wáshì mvdaq, nvpè nvmè sv̀ng vpǿ ràe,’ wa we dvkv́mkàrì sv̀ng nàí gø èsháòe,” a:lòe. #Bng. 20:12-16; Drd. 5:16-20
21Wepèí, “Yadv́ng pv̀n shvngbe nø cv̀mré ni kèní cv̀nò we íe,” a:lòe.
22Yesuí tá bǿà kvt, “Nà taq rà we tiqpv̀n shini vle. Nà nàdá dv́ngte èna:mò dá:ngí dvshà rì sv̀ng nàwálaò. Wekvt muqlàng taqlapmø pø̀hvp èv́la dae. Wedá:ngí Ngà mèpvng ècv̀n ra,” a:lòe. #Mat. 6:20
23Àng nø gvzà mvgàm we tiqpè íe. Wervt, kà yarì tá bǿà kvt, àng nøt gvzà dvshàá:mì. 24Wekvt Yesuí wepè sv̀ng dvjaqò sórí, “Mvgàmrérì nø Gvray móngdàn gònglv́m pàshaqí rvzaq ráì! 25Mvgàm tiqgǿ Gvray móngdàn gònglv́m lòng nø, còngmè shvni hwáng taq golawu tiqgo léshìlv́m lòng mvdv̀m té rvzaqe,” a:lòe.
26Wekà táò rìí, “Íni, kagǿí nø chutchv́ng we lún daqe má?” wae.
27Yesuí, “Vsv̀ng lapkèní bǿn mvdaq lòng nø Gvray lapkèní bǿn daqe,” a:lòe.
28Wekvt Piterí, “Ku, nøngmaq nø vdáì rì là:ngì nø̀ Nà mèpvng cà:nìe,” a:lòe.
29Yesuí àngmaq sv̀ng, “Ngàí jø̀ngjǿng vla:tnìni, Gvray móngdàn dvpvt, chø̀m nv̀ng døngkumè, vdè àngnvmrì, àngpè àngmè, mø̀íni àngcèrì sv̀ng là:ngò gǿ nø, 30yabàn taq gø mvme dvtv̀ng mvzv́n lú:nò nø̀, tuq ra bàn taq gø dvciqlvpat gø̀nshaq lúnlv́m íe,” a:lòe.
Yesu shì nø̀ zun long dang méshø̀m kvt dvtáò we
Mat. 20:17-19; Mak. 10:32-34
31Wekvt Yesuí Tiqcé Vnípè sv̀ng goò dá:ngí, “Ètánø̀ng, nøngmaq nø Yerusalem sv̀ng nga:ngìe. Vsv̀ng Àngcèpè dang kàdvtutshúrìí vru yà:ngà rì shvngbe nø vhøm longe. 32Àng sv̀ng nø wv́ngzàrì kaq tvle bǿòe. Àngmaqí Àng sv̀ng dvshá dvcø a:lò nø̀ shvraq chaqò nø̀ tø:lí vpí lú:ngòe. 33Vrá, àngmaqí Àng sv̀ng vdi:pmò nø̀ shvt bǿòe. Ínìgø, vshø̀mni wani taq Àng zun longe,” a:lòe.
34Íwe coqcv́nrìí tiqkà gø mvcí:ngò. Kà yarì àng lvjøm nø àngmaq dvpvt vmáshaq íe. Wervt Yesuí shø̀:nò kàrì nø pà sv̀ng wa we àngmaqí mvcí:ngò.#Mak. 9:32
Nemàn pè sv̀ng dvba:nò we
Mat. 20:29-34; Mak. 10:46-52
35Yesu nø Yeriko wamà sv̀ng tuqlv́m wa dvgvp, nemàn tiqpè nø tvrà shvnvng rung nø̀ røtnvme. 36Vsv̀ng loksok tiqmvdò di we sv̀ng à:ngí tá bǿà nìnø, kapà bø̀ná:mì we sv̀ng rø:tnòe. 37Àngmaqí àng sv̀ng, “Nazaretpè Yesu vlevme,” wa dvtáòe.
38Wekvt àng nø, “Dawi Pvlí Pvlaqpè Yesué, dvshá èzangàé!” wa vkiqe.
39Vzv̀ngzv̀ng di rìí àng sv̀ng, “Dø màwá èvl!” wa nga:nòe. Íwe àng nø, “Dawi Pvlí Pvlaqpèé, ngà sv̀ng dvshá èzangàé!” wa dvshàshà vkiqe.
40Wekvt Yesu rip nø̀ wepè Àng yv́ng lvshøla:tnò dø dvká:mòe. Tvp tuq ráì kvt Yesuí, 41“Ngàí nà dvpvt pà wv́ngangnø̀ng má?” wa rø:tnòe.
À:ngí, “Kàngpèá, ngà ne yvngshì mvyǿnge,” wa vtá:nòe.
42Wekvt Yesuí, “Neí leq yv̀ng lú:ngò. Nà kv́mnø:tní nà sv̀ng dèban bǿì,”#18:42 Mø̀íni, “èchv́ng bǿì.” a:lòe. 43Wela:ngí wepè neí yv̀ng lú:ngà nø̀, Gvray dvgùng shvri:ngò sórí Yesu mèpvng cv̀n bǿà. Vsv̀ng shvngbeí yalòng sv̀ng yv̀ng bǿà kvt, Gvray kaq shvri:ngòe.
S'ha seleccionat:
Luka 18: GSM
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2025 Rvcv́ngcè Kàru Gomidi Kristu Shvngø̀mré. All Rights Reserved.
Luka 18
18
Dvrá vjì nv̀ng memàmè kàshvbóng
1Tiqni taq, kàshvbóng kèní Yesuí Àng coqcv́nrì sv̀ng kadvgvp gø nøt mvtìn dø vjú røtshìlv́m shvngøtnòe. #Rom. 12:12; Kol. 4:2; 1Te. 5:16-18 2“Wamà tiqlòng taq, Gvray kaq gø màsvre, vsv̀ng kaq gø màpǿò we dvrá vjì tiqpè vle. 3Wewamà taqni, memà tiqmè vle. Àng nø wepè yv́ngsv̀ng nv̀nnv̀n di nø̀, ‘Ngà kaq vtù pè nv̀ng ngà dvhø̀ dvrá dø èwv́ngangà,’ wa røtshìe.
4Nv̀mlat dvgvp nø, dvrá vjìpèí mvtáaò. Íwe lv̀ngdø̀m taq, ‘Ngà nø Gvray kaq gø màsvreng, vsv̀ng kaq gø màpǿngònø̀ng gø, 5memà yamèí ngà sv̀ng bø̀nlu èmvn rvtnø̀, ngàí àng dvpvt dvrá dø wáalv́m íe. Mø̀ínì àng vrøshì ra weí mvzán lóngò pà íe,’ wa dvda:mòe,” a:lòe. #Luk. 11:7-8
6Wekvt Kàngpèí, “Mvdø̀ngman we dvrá vjìpèí shø̀:nò kà sv̀ng dèdvmnø̀ng. 7Gvrayí nø Àng kaq vyáng yaqdø̀ng kórshì we rvcv́ngshaq rì dvpvt téwa dvrá dø wáa daqò we mø̀í má? À:ngí àngmaq kaq dvbvnglv́m lòng shøt mvn lú:ngò ni má? 8Ngàí vla:tnìni, À:ngí nø àngmaq dvpvt dvrá dø cancan ni wáa daqòe. Íwe Vsv̀ng Àngcèpè di daq kvt, rvgaqtø̀m taq kv́mnøt vl vsv̀ng lá lún lú:ngò má?” a:lòe.
Parisipè nv̀ng kùyà gúnshú pè kàshvbóng
9Vdè nø døngmane, wa dvdutshì nø̀, dvgá vsv̀ng kaq yv́ng mvtv̀mvm we vsv̀ng tiqmaq kaq Yesuí kàshvbóng yalòng shø̀:nòe. 10“Vsv̀ng vnígǿ nø vjú røtshìlv́m Noqngø̀m Tø̀ngnø sv̀ng ngangá:mì. Tiqpè nø Parisi, tiqpè nø kùyà gúnshú íe. 11Parisipè nø àng wa rip sórí, ‘Gvrayé, ngà nø dvgá vsv̀ngrì dø, tølvm vsv̀ng, màdøngman vsv̀ng, dvchap vsv̀ng nv̀ng kùyà gúnshú yapè dø gø mvǿngà rvt, Nà sv̀ng oqà. #Mat. 23:23; Luk. 16:15 12Ngà nø tiqnár taq vníkvt màv́m vnatshø̀nge. Ngàí lúnò we shvngbe taqkèní tiqcéwál tiqwál vtv̀ngòe,’ wa vjú røtshìe.
13Íwe kùyà gúnshú pè nø, vrúm yv́ngø ripme. Àng nø muqlàng kaq dvjaq mvkvmshì nø̀ gv̀ng vnv́lshì sórí, ‘Gvrayé, mvrà vl pè ngà sv̀ng dvshá èzang dakngà,’ wae.
14Ngàí vla:tnìni, chø̀m sv̀ng àngní loá:mì kvt, Parisipè nø mø̀í dø, kùyà gúnshú pèí lè døngman dvdut lún bǿà. Kadø íe wani shvringshì gǿ sv̀ng nø cip lú:ngòe, íwe cipshì gǿ sv̀ng nø shvring lú:ngòe,” a:lòe. #Mat. 23:12; Luk. 14:11
Cv̀mrécèrì Yesu yv́ng shøla:tnà we
Mat. 19:13-15; Mak. 10:13-16
15Wedvgvp vsv̀ngrìí nø cv̀mrécèrì sv̀ng Yesuí laq shupma:tnò wa nø̀ Àng yv́ng shøla:tnà. Coqcv́nrìí yv̀ng bǿà kvt àngmaq sv̀ng nga:nòe. 16Íwe Yesuí cv̀mrécèrì sv̀ng goò nø̀, “Cv̀mrécèrì Ngà yv́ng laq di ra, àngmaq sv̀ng mènàgámnø̀ngni. Pàwá wani Gvray móngdàn nø yadø í rì dvpvt íaòe. 17Ngàí jø̀ngjǿng vla:tnìni, kagǿ í nìgø cv̀mrécèí vtoò dø Gvray móngdàn sv̀ng mènàtonø̀ng nìnø we móngdàn sv̀ng góng mvlúnshì,” a:lòe. #Mat. 18:3
Mvgàmrì muqlàng móng góng rvzaq we
Mat. 19:16-29; Mak. 10:17-30
18Yuda vsv̀ngrì shølshú tiqpèí Yesu sv̀ng, “Shvla we svrapèá, dvciqlvpat gø̀nshaq lúnlv́m rvt ngàí kapà wá rànge má?” wa rø:tnòe.
19Yesuí àng sv̀ng, “Nàí Ngà sv̀ng pàwálv́m shvla we èvlà má? Shvla we nø Gvray tiqpè wa mø̀í nìnø, dvgá màvl. 20‘Vsv̀ng svma dvchap mvdaq, vsv̀ng shvt mvdaq, kǿ mvdaq, mvdìng we shvkse wáshì mvdaq, nvpè nvmè sv̀ng vpǿ ràe,’ wa we dvkv́mkàrì sv̀ng nàí gø èsháòe,” a:lòe. #Bng. 20:12-16; Drd. 5:16-20
21Wepèí, “Yadv́ng pv̀n shvngbe nø cv̀mré ni kèní cv̀nò we íe,” a:lòe.
22Yesuí tá bǿà kvt, “Nà taq rà we tiqpv̀n shini vle. Nà nàdá dv́ngte èna:mò dá:ngí dvshà rì sv̀ng nàwálaò. Wekvt muqlàng taqlapmø pø̀hvp èv́la dae. Wedá:ngí Ngà mèpvng ècv̀n ra,” a:lòe. #Mat. 6:20
23Àng nø gvzà mvgàm we tiqpè íe. Wervt, kà yarì tá bǿà kvt, àng nøt gvzà dvshàá:mì. 24Wekvt Yesuí wepè sv̀ng dvjaqò sórí, “Mvgàmrérì nø Gvray móngdàn gònglv́m pàshaqí rvzaq ráì! 25Mvgàm tiqgǿ Gvray móngdàn gònglv́m lòng nø, còngmè shvni hwáng taq golawu tiqgo léshìlv́m lòng mvdv̀m té rvzaqe,” a:lòe.
26Wekà táò rìí, “Íni, kagǿí nø chutchv́ng we lún daqe má?” wae.
27Yesuí, “Vsv̀ng lapkèní bǿn mvdaq lòng nø Gvray lapkèní bǿn daqe,” a:lòe.
28Wekvt Piterí, “Ku, nøngmaq nø vdáì rì là:ngì nø̀ Nà mèpvng cà:nìe,” a:lòe.
29Yesuí àngmaq sv̀ng, “Ngàí jø̀ngjǿng vla:tnìni, Gvray móngdàn dvpvt, chø̀m nv̀ng døngkumè, vdè àngnvmrì, àngpè àngmè, mø̀íni àngcèrì sv̀ng là:ngò gǿ nø, 30yabàn taq gø mvme dvtv̀ng mvzv́n lú:nò nø̀, tuq ra bàn taq gø dvciqlvpat gø̀nshaq lúnlv́m íe,” a:lòe.
Yesu shì nø̀ zun long dang méshø̀m kvt dvtáò we
Mat. 20:17-19; Mak. 10:32-34
31Wekvt Yesuí Tiqcé Vnípè sv̀ng goò dá:ngí, “Ètánø̀ng, nøngmaq nø Yerusalem sv̀ng nga:ngìe. Vsv̀ng Àngcèpè dang kàdvtutshúrìí vru yà:ngà rì shvngbe nø vhøm longe. 32Àng sv̀ng nø wv́ngzàrì kaq tvle bǿòe. Àngmaqí Àng sv̀ng dvshá dvcø a:lò nø̀ shvraq chaqò nø̀ tø:lí vpí lú:ngòe. 33Vrá, àngmaqí Àng sv̀ng vdi:pmò nø̀ shvt bǿòe. Ínìgø, vshø̀mni wani taq Àng zun longe,” a:lòe.
34Íwe coqcv́nrìí tiqkà gø mvcí:ngò. Kà yarì àng lvjøm nø àngmaq dvpvt vmáshaq íe. Wervt Yesuí shø̀:nò kàrì nø pà sv̀ng wa we àngmaqí mvcí:ngò.#Mak. 9:32
Nemàn pè sv̀ng dvba:nò we
Mat. 20:29-34; Mak. 10:46-52
35Yesu nø Yeriko wamà sv̀ng tuqlv́m wa dvgvp, nemàn tiqpè nø tvrà shvnvng rung nø̀ røtnvme. 36Vsv̀ng loksok tiqmvdò di we sv̀ng à:ngí tá bǿà nìnø, kapà bø̀ná:mì we sv̀ng rø:tnòe. 37Àngmaqí àng sv̀ng, “Nazaretpè Yesu vlevme,” wa dvtáòe.
38Wekvt àng nø, “Dawi Pvlí Pvlaqpè Yesué, dvshá èzangàé!” wa vkiqe.
39Vzv̀ngzv̀ng di rìí àng sv̀ng, “Dø màwá èvl!” wa nga:nòe. Íwe àng nø, “Dawi Pvlí Pvlaqpèé, ngà sv̀ng dvshá èzangàé!” wa dvshàshà vkiqe.
40Wekvt Yesu rip nø̀ wepè Àng yv́ng lvshøla:tnò dø dvká:mòe. Tvp tuq ráì kvt Yesuí, 41“Ngàí nà dvpvt pà wv́ngangnø̀ng má?” wa rø:tnòe.
À:ngí, “Kàngpèá, ngà ne yvngshì mvyǿnge,” wa vtá:nòe.
42Wekvt Yesuí, “Neí leq yv̀ng lú:ngò. Nà kv́mnø:tní nà sv̀ng dèban bǿì,”#18:42 Mø̀íni, “èchv́ng bǿì.” a:lòe. 43Wela:ngí wepè neí yv̀ng lú:ngà nø̀, Gvray dvgùng shvri:ngò sórí Yesu mèpvng cv̀n bǿà. Vsv̀ng shvngbeí yalòng sv̀ng yv̀ng bǿà kvt, Gvray kaq shvri:ngòe.
S'ha seleccionat:
:
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2025 Rvcv́ngcè Kàru Gomidi Kristu Shvngø̀mré. All Rights Reserved.