Buă Ngă 2
2
Yang Bơngăt Hiam r̂ai dŏ ngŏ môt hyĕn tui
1Tơl r̂ơi ngă yang r̂ơi ti ma pluh,#2:1 R̂ơi ngă yang r̂ơi ti ma pluh nŭn r̂ăng yap ma pluh r̂ơi tô̆ mơ̆ng r̂ơi ƀŏng nŭmpăng a bĭ čĕ pơi, r̂ơi r̂ăng hơdŏl glaĭ mơ̆ng buă Ơi Adai ba biă môt Israel mơ̆ng čal Êjĭp. An Lêwi 23:15-21. bih môt hyĕn tui pơtŭm gŏp gơñu ha ƀon. 2Pah anŭn, phŏ, hmĭ ñi mơ̆ng adai dih hla ti angĭn lơbŭ kơtang, hmĭ ñi bŏ tăm sang gơñu dŏ ben nŭn. 3Jr̂ŏng nŭn gơñu ƀôh hla ti glah phui pơklah phar̂a, nao dŏ ngŏ môt gơñu ha r̂ăng ha r̂ăng. 4Bih-tih gơñu bŏ mơ̆ng Yang Bơngăt Hiam, jr̂ŏng nŭn gơñu thâo pơhiăp boh hiăp sô̆n-sat pơkŏn-pơkŏn#2:4 Boh hiăp sô̆n-sat pơkŏn-pơkŏn Krĭk laĭ «Glah phar̂a-phar̂a.» tui Yang Bơngăt pha br̂ơi gơñu hiăp.#An Biă 40:34-35; 1Pơtao 8:10-11; Mat 3:11; Buă 1:4-5, 8.
5Pah anŭn, tăm plơi Yêrusalĕm hmâo mơ̆n mơnuih sô̆n-sat Yuđa pơkŏn dŏng, gơñu r̂ai mơ̆ng tơgr̂ư̆ čal dŏ gah yô̆ adai, gơñu nŭn mơnuih huĭ pơpô̆ Ơi Adai. 6Tơl gơñu hmĭ jua r̂ai nŭn, nŭn gơñu nao pơtŭm gŏp gơñu lô-lĭn, gơñu kơtuă hyŏl, yua gơñu hmĭ môt hyĕn tui hiăp boh hiăp sô̆n-sat môt gơñu ha r̂ăng ha r̂ăng. 7Gơñu kơtuă dăp hr̂ŭk-hr̂ăk tăm bŭt-tai, jr̂ŏng nŭn gơñu laĭ: «Hiư̆m, bih-tih mơnuih pơhiăp ne, bĭ djơ̆ mơnuih r̂ai mơ̆ng ƀon Galilê ôh? 8Yua yĕt ta ha r̂ăng ha r̂ăng hmĭ gơñu hiăp boh hiăp sô̆n-sat čal a pơpôn ta lĕ? 9Môt ta ne, pơanah r̂ai mơ̆ng ƀon Phathôh, Mêđi, dăp Êlăm, pơanah dŏng dŏ pơ Mêsôpô-tamie, pơanah r̂ai mơ̆ng Yuđa, dăp Kapa-đôkie, pơanah dŏng r̂ai mơ̆ng Pô̆ntôh, dăp Asi, 10pơanah r̂ai mơ̆ng Prikie, dăp Pam-philie, Êjĭp, dăp plơi pơkŏn-pơkŏn dŏ mơ̆ng ƀon Liƀi jĕ plơi Kirên, môt ta pơanah r̂ai mơ̆ng plơi Rôm (dăp mơnuih sô̆n-sat Yuđa, dăp mơnuih mŭt sô̆n-sat Yuđa he mơ̆n), 11pơanah r̂ai mơ̆ng Krêt, pơanah dŏng r̂ai mơ̆ng Arăp. Ta hmĭ gơñu pơhiăp boh hiăp sô̆n-sat ta, gơñu pơhiăp mơ̆ng klơi kơtang myang Ơi Adai ngă.» 12Bih môt nŭn hr̂ŭk-hr̂ăk dăp tuêl tăm bŭt, wŏt kơña nao r̂ai gŏp gơñu: «Buă ne hiư̆m pă hah?» 13Plai hmâo mơnuih pơanah dŏng pơhiăp pơmat laĭ: «Môt ne măt pai mih#2:13 Pai mih lơ «Pai phr̂âo.» đơč.»
Pêtrôih r̂ă r̂oi br̂ơi nă plơi lan
14Pah anŭn Pêtrôih gŭ đĭ dŏ dŏng hr̂ŏm môt pluh sa r̂ăng, nŭn ñu pơhiăp đĭ čiăng r̂ă r̂oi br̂ơi gơñu: «Ơ nă plơi lan Yuđa, dăp bih mơnuih dŏ tăm plơi Yêrusalĕm, br̂ơi gô-ih kơmŏng klơi kâo pơhiăp wŏ, gô-ih mơ̆ng thâo kr̂ăn klơi ne. 15Môt ne bĭ djơ̆ măt pai, hla ti gô-ih pơdjăm nŭn ôh, yua nêne pah mông duapăn mơ̆ng guah đơč. 16Klơi gô-ih ƀôh ne yơh, djơ̆ klơi Yô-el pô ba pơhiăp Ơi Adai r̂ă čr̂oh hlâo, hla ne:
17“Ơi Adai laĭ,
Tơl r̂ơi nŭč dơdơi ti hmâo klơi ne,
Kâo ti tuh tr̂ŭn Yang Bơngăt kâo mơ̆ng tơgr̂ư̆ mơnuih,#2:17 Mơnuih Krĭk laĭ «Săl đeh.»
Nŭn nă đahkơi nă đahmơi gô-ih,
Ti ba pơhiăp nŏ gơñu hmĭ mơ̆ng kâo,
Tăm môt gô-ih, môt dơdăm ti ƀôh klơi kâo pơƀôh br̂ơi,
Dăp môt tha-lơma ti lơpơi ƀôh.
18Wŏt dah môt hlŭn đahkơi hlŭn đahmơi kâo ơ mơ̆n,
Mơ̆ng r̂ơi nŭn kâo ti tuh tr̂ŭn Yang Bơngăt kâo mơ̆ng gơñu he mơ̆n,
Jr̂ŏng nŭn gơñu ti ba pơhiăp nŏ gơñu hmĭ mơ̆ng kâo.
19Kâo ti ngă klơi kơtang myang mơ̆ng adai dih,
Dăp buă myang mơsêh mơ̆ng lŏn kơnah ne,
Ti hmâo dr̂ah, hmâo phui, dăp hơyuh săp phui he mơ̆n.
20Yang r̂ơi ti jr̂ŏng glaĭ kơnăm-hyeng,
Dăp blan ti jr̂ŏng dr̂ah,
Hlâo ti tơl r̂ơi Khua Yang,
R̂ơi nŭn r̂ơi gơdr̂ih-gơdr̂ŏng pr̂ŏng.
21Pah anŭn lơi pô iâo ƀŏ Khua Yang,
Ti hmâo klơi pơklaih.”#Klơi ne tô̆ mơ̆ng Yôel 2:28-32.
22«Ơ môt Israel, br̂ơi hmĭ klơi pơhiăp ne wŏ! Yêsu plơi Nasaret, ñu mơnuih Ơi Adai br̂ơi gô-ih thâo kr̂ăn jel, yua mơ̆ng klơi kơtang myang dăp buă myang mơsêh gô-ih ƀôh Ơi Adai ngă tui tam Yêsu ti năp gô-ih, buă nŭn gô-ih thâo kr̂ăn boih. 23Yêsu ne yơh, a mop lôi pơ gô-ih, djơ̆ tui klơi Ơi Adai pơkă čr̂oh dăp klơi ñu thâo lôi hlâo,#An Êsai 53:10. nŭn gô-ih yua ngan mơnuih bĭ hmâo klơi juăt Ơi Adai,#2:23 Mơnuih bĭ hmâo klơi juăt Ơi Adai nŭn čiăng laĭ môt sô̆n-sat pơkŏn. čiăng pŏng pơdjai lôi ñu pơ kơyâo pơkăl.#An Lŭk 24:20. 24Plai Ơi Adai bơdĭp glaĭ ñu, dăp pơklaih ñu mơ̆ng klơi wă-nuă klơi djai,#2:24 Pơklaih ñu mơ̆ng klơi wă-nuă klơi djai lơ «Kleh lôi wĕ klơi djai.» An Doh 18:4. yua klơi djai bĭ anăm pơkŏng čr̂oh ñu ôh.#An Mat 28:5-6; Mak 16:6; Lŭk 24:5. 25Yua Đawit pơhiăp mơ̆ng Yêsu, ñu laĭ:
“Kâo ƀôh Khua Yang dŏ ti năp kâo kơtă-kơtă,
Yua ñu dŏ gah nuă kâo,
Nĭng nŭn yơh kâo bĭ djĕk-djŏk ôh.
26Yua nĭng nŭn yơh, bŭt kâo mơ-ak,
Dăp glah kâo pơhiăp hôk-blôk,
Ha tô̆ dŏng dr̂ơi-jĕn#2:26 Dr̂ơi-jĕn Krĭk laĭ «Săl đeh.» kâo ti dŏ mơ̆ng klơi čang-mang mơ̆n.
27Yua ih bĭ klaih lôi bơngăt kâo tăm plơi tâo djai ôh,
Wŏt bĭ br̂ơi mơnuih lơgoh hiam ih br̂ŭ le.
28Ih br̂ơi kâo thâo kr̂ăn glan klơi hơdĭp,
Ih ngă br̂ơi kâo hmâo klơi ak-oi bŏ blai,
Yua ih dŏ hr̂ŏm kâo.”#Klơi ne tô̆ mơ̆ng Doh 16:8-11.
29«Ơ yŏng dơi, kâo r̂ă br̂ơi gô-ih dơdi laĭ, Đawit ơi don ta, ñu djai boih, nŭn r̂ăng dŏl lôi ñu,#An 1Pơtao 2:10. pơsat ñu dŏ hr̂ŏm ta khă tơl r̂ĭm r̂ơi ne mơ̆n. 30Đawit, ñu pô ba pơhiăp Ơi Adai,#An 2Săm 23:1-2. ha tô̆ dŏng, ñu thâo kr̂ăn laĭ Ơi Adai uăn hr̂ŏm ñu, Ơi Adai ti br̂ơi mơnuih ha r̂ăng mơ̆ng djuoi Đawit, dŏ ben mơ̆ng gr̂e pơtao ñu,#An 2Săm 7:12-13; Doh 132:11. 31nĭng nŭn yơh, Đawit pơhiăp mơ̆ng klơi ñu ƀôh lôi hlâo, mơ̆ng buă Yang Krih ti dĭp glaĭ, ñu laĭ, Ơi Adai bĭ klaih lôi Yang Krih tăm plơi tâo djai ôh, wŏt dr̂ơi-jĕn ñu bĭ br̂ŭ le. 32Yêsu ne yơh, Ơi Adai bơdĭp glaĭ ñu. Bih-tih môt mơi yơh ƀôh jel, dăp r̂ă pơthâo mơ̆ng buă ne.#An Buă 1:8. 33Nĭng nŭn yơh, Ơi Adai pô̆ đĭ Yêsu br̂ơi dŏ gah nuă ñu, jr̂ŏng nŭn Yêsu tô̆ Yang Bơngăt Hiam mơ̆ng Ma ñu, tui klơi Ma ñu uăn,#AnLŭk 24:49. nŭn ñu tuh tr̂ŭn Yang Bơngăt Hiam hla ti gô-ih ƀôh dăp hmĭ he mơ̆n. 34Yua Đawit bĭ đĭ nao pơ adai dih ôh, plai ñu pơhiăp laĭ:
“Khua Yang pơhiăp hr̂ŏm khua kâo, ñu laĭ,
‘Br̂ơi ih dŏ ben gah nuă kâo,
35Khă tơl kâo čr̂oh môt ayăt ih,
Jr̂ŏng gôl đăl plă le ih.’”#Klơi ne tô̆ mơ̆ng Doh 110:1.
36«Nĭng nŭn yơh, br̂ơi bih-tih phung-wang Israel thâo kr̂ăn jel, Yêsu ne yơh, pô gô-ih pŏng lôi pơ kơyâo pơkăl, Ơi Adai bơdŏ br̂ơi ñu jr̂ŏng Khua Yang dăp jr̂ŏng Yang Krih.»
37Tơl gơñu hmĭ klơi nŭn, gơñu glih bŭt-tai, jr̂ŏng nŭn gơñu kơña Pêtrôih dăp môt r̂ă tang Yêsu pơkŏn dŏng: «Ơ yŏng dơi, hiư̆m mơi ti ngă?» 38Pêtrôih til glaĭ: «Br̂ơi tơgr̂ư̆ gô-ih pơlih bŭt-tai wŏ, dăp tô̆ klơi ñŭk ƀatem mơ̆ng ƀŏ Yêsu Krih, čiăng Ơi Adai klaih lôi klơi glaĭ gô-ih, nŭn Ơi Adai ti pha br̂ơi gô-ih Yang Bơngăt Hiam. 39Yua klơi uăn nŭn, Ơi Adai Khua Yang ta uăn ti br̂ơi tơgr̂ư̆ mơnuih ñu iâo,#An Yôel 2:32. dăp gô-ih, dăp nă čo gô-ih, wŏt bih-tih mơnuih dŏ taih#An Êsai 57:19. he mơ̆n.» 40Ñu r̂ă pơthâo lô klơi pơkŏn dŏng, dăp hiăp pơto alôm gơñu: «Br̂ơi gô-ih tô̆ klơi pơklaih wŏ, gô-ih mơ̆ng klaih mơ̆ng nôk mơnuih wĕ-wŏ ne.» 41Jr̂ŏng nŭn, mơnuih pă ngư̆ tui klơi pơhiăp ñu, môt gơñu tô̆ klơi ñŭk ƀatem. Nĭng nŭn yơh, mơ̆ng r̂ơi nŭn, hmâo mơnuih ngư̆ ai-ñu klâo bâo r̂ăng, mŭt thim dŏng. 42Môt gơñu khŏm djă čr̂oh klơi môt r̂ă tang Yêsu pơto gơñu, dăp klơi bơgop gŏp gơñu, wŏt klơi wŏk nŭmpăng ƀŏng huă hr̂ŏm gŏp gơñu, dăp klơi iâo-laĭ he mơ̆n.
Klơi hơdĭp mơnuih ngư̆
43Tơgr̂ư̆ gơñu hmâo bŭt-tai huĭ pơpô̆, yua lô buă myang mơsêh dăp klơi kơtang myang, Khua Yang ngă tui tam môt r̂ă tang Yêsu. 44Bih mơnuih ngư̆, gơñu hmâo ha bŭt ha tai,#2:44 Hmâo ha bŭt ha tai lơ «Pơtŭm gŏp gơñu.» dăp bih dr̂ăm-gơnăm gơñu hmâo, gơñu yua hr̂ŏm gŏp gơñu mơ̆n.#An Buă 4:32-35. 45Gơñu ƀuo lôi dr̂ăm pơđŏk, dăp nŏ yĕt-yĕt gơñu hmâo, pha br̂ơi gŏp gơñu, tui tam klơi gơñu tŏng-kan ha r̂ăng ha r̂ăng. 46R̂ĭm r̂ơi, gơñu hmâo ha bŭt ha tai pơtŭm gŏp gơñu khŏm-khŏm tăm lan sang yang, dăp gơñu wŏk nŭmpăng ƀŏng huă hr̂ŏm gŏp gơñu tăm sang gŏp gơñu ha r̂ăng ha r̂ăng, mơ̆ng bŭt ak-oi dăp bŭt kơmah, 47wŏt gơñu pơpô̆ bơni Ơi Adai. Bih-tih nă plơi lan bơyom gơñu. R̂ĭm r̂ơi, Khua Yang thim mơnuih phr̂âo, tô̆ klơi pơklaih.
S'ha seleccionat:
Buă Ngă 2: JKB
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2024, Wycliffe Bible Translators, Inc.