मत्ति 1
1
इसु ख्रिस्टको खालगेलाइ
(लुका ३:२३-३८)
1इसु ख्रिस्ट आब्राहाम रो दाउद खालको हिघाखे। इता इसु ख्रिस्टको आजुखालको मिङ इस्का हि: 2आब्राहामको चान इसहाक हिघाखे। इसहाकको चान याकुब, याकुबको चानगेलाइ यहुदाको वाको दादाओनेगेलाइ हिघाखे। 3यहुदाको तामारपाहाको चानगेलाइ फारेस रो जाहेर हिघाखे। फारेसको चान हेस्रोन, हेस्रोनको चान आराम, 4आरामको चान आम्मिनादाब, आम्मिनादाबको चान नहसोन, नहसोनको चान सल्मोन, 5सल्मोनको राहाबपाहाको चान बोआज हिघाखे। बोआजको रुथपाहाको चान ओबेद, ओबेदको चान इसाइ 6रो इसाइको चान राजा दाउद हिघाखे। दाउदको चान सोलोमन हिघाखे। सोलोमनको आमाइ बेथसेबा उरियाहको बेअ् हिघाखे।#२ राजा २४:१४-१५; २ इतिहास ३६:१०; यरमिया २७:२०
7सोलोमनको चान रहबाम, रहबामको चान आबिया, आबियाको चान आसा, 8आसाको चान यहोसापात, यहोसापातको चान यहोराम, यहोरामको चान उज्जियाह, 9उज्जियाहको चान योताम, योतामको चान आहाज, आहाजको चान हिजकिया, 10हिजकियाको चान मनस्से, मनस्सेको चान आमोन रो आमोनको चान योसियाह हिघाखे। 11योसियाहको चान यकोनियास रो इङकोको ओनेगेलाइ बुङ हिघाखे। एम्बालाइ बेबिलोनता यहुदिगेलाइहेङ रिमतेङ चुमपुका पहर लाम्फा जोलोम जेङका हिघाखे।
12बेबिलोनता रिम्तेङ चुमपुकान्हुअ्सो: यकोनियासको चान सालतिएल जोलोम जेङहि, सालतिएलको चान यरुबाबेल, 13यरुबाबेलको चान आबिउद, आबिउदको चान एल्याकिम, एल्याकिमको चान आजोर, 14आजोरको चान सादोक, सादोकको चान आखिम, आखिमको चान एलिउद, 15एलिउदको चान एलाजार, एलाजारको चान मत्तान, मत्तानको चान याकुब, 16याकुबको चान योसेफ हिघाखे। योसेफचाहिँ इसु ख्रिस्टको आमाइ मरियमको केअ् हिघाखे। इदोङ मरियम ख्रिस्ट दोअ्का इसुहेङ जोलोम पिहि।
17एसापा आब्राहामसो दाउदथिकापा तेद्या खाल जेङखे रो दाउदसो इस्राएलिगेलाइ बेबिलोनता चुमपुका पहरथिकापा तेद्या खाल दोङ जेङखे। कालाउ इङको पहरसो ख्रिस्ट जोलोम जेङका पहरथिकापा आरोङ तेद्या खाल दोङ जेङलि लोखे।
इसु ख्रिस्टको जोलोम
(लुका २:१-७)
18इसु ख्रिस्टको जोलोम एसापा जेङहिः वाको आमाइ मरियमको योसेफदोफा बिहु जेङका काथा पालि दोका हिघाहि। ओबालाइको बिहु जेङकाखान्तेङ लाम्फा मरियम पुनित हाङसासो न्हेजिउको जेङका हिघाहि।#लुका १:२७ 19योसेफ धरमाति द्याङ हिघाखे। एन्साजेङलाउ वा द्याङको आगाता मरियमहेङ मारेम्का माज्याको दोअ्तेङ सिपापा लाअ्लि बिचार पाहि। 20इस्का बिचार पातेङहिलाउ परमप्रभुको स्वरगदुत वाको सोपोन्दाता देखाल पितेङ एसा दोअ्हि, “दाउदको खाल योसेफ, ना मरियमहेङ चुमालि माथि, हाइदोनु जाइ वाको हेमुङता हि, वा पुनित हाङसासो हि। 21इङको एलोङ चान जोन्मायावा रो ना इङकोको मिङ इसु ताअ्ताना, हाइदोनु वा ताइको द्याङगेलाइहेङ एम्बालाइको पापसो सिन्हुपावा।”#लुका १:३१
22परमेस्वर पाहासो धुइका बचन पोङघालि दोङ इदोइ गोताङ जेङका: 23“खाङ, बिहु माजेङका बेजान न्हेजिउ जेनावा, वा एलोङ चान जोलोम जेनावा, वाको मिङ इम्मानुएल ताअ्तावा” जाइको माने “परमेस्वर केलाइदोफा” जेङखे।#यासाइया ७:१४
24कालाउ योसेफ निन्धासो नाङघाहि रो स्वरगदुत वासेहेङ दोअ्का भाइपा वा मरियमहेङ ताइको बेअ् दोअ्तेङ र्हुहि। 25कालाउबुङ मरियम चान जोलोम माजेम्पाधाउ योसेफ वाकोदोफा माजिम्हि। मरियम चान जोलोम जेङकान्हुअ्सो योसेफ इङको जामालको मिङ इसु ताअ्हि।#लुका २:२१
S'ha seleccionat:
मत्ति 1: DHIM
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2025 by Nepal Bible Society and Wycliffe Bible Translators, Inc.