Romye 2
2
Ɓashitɨ diyale da Həmɨnpwa
1Hye tam ka mgbaale hye ɓashiyə ama a nə səhasa nda dɨ ɗa. Nagi ndo ɓashiti hye ɓashiyə ama, hyenə dɨ lɨbadə nanga, gəkɨlə shee hye dɨ ɓashiyə ama a nəngrən, hye nee dɨ ɗa shingɨn. 2Mye leyə kat atɨ a nə diyale Həmɨnpwa a dɨ ɓashiyə myee dɨ ɗa wule shingɨn. 3Ɓə hye mgban, a hye ɓwaara kpamləmɨntə, hye dɨ niyə ɓətɨ Həmɨnpwa ɓa ɓashiyə myee dɨ ɗa wule səhasa hye dɨ ɗa, hyenə hye ɓa mbəgə ɓashitɨ dan? 4Hii! Hye dɨ ushi gbaktɨ fyemta Həmɨnpwa ka kɨt sɨtə ka mbasɨtɨ dan kəw ma, tee leyi atɨ nda dɨ bɨlu fyemtɨ dan gələ nda gwada a vu humwatə hye por-njiya ma?
5Shezə gəkɨlə mgbɨləha dəw ka hubo ɗongə por-njiya dəw, hyene dɨ pedə yedi-kɨtta Həmɨnpwa a nanga, baa a tɨlə fəra ɓwaare ɓa naa ɓashitɨ diyale da Həmɨnpwa kan. 6A fərə ɓashitɨngɨn, Həmɨnpwa “ɓa və nagi ndo ma moone dan a kana ka wule lyente mangɨn a ɗa.” 7Kat myee dɨ tuula a vor lyentɨ pepetə, tənə myee dɨ ɨl fukatə ka ndukoha ka myente aa dɨ yə gaa mbəə a haka Həmɨnpwa, ndi ɓa vərən myente kaaru-kaaru. 8Wule myee mgban mwo nəngrən, kwo diyale virwi dɨ koɗə səhase darən, yedi-kɨtta Həmɨnpwa kat ka ɓashitɨ dan nee a nəngrən. 9Tənətə kat ka sɨtɨ otə nee nza nə myee kat dɨ ɗa səhase, angɨn ɓa tiya ka Yawude a zə nə myee aa Yawude. 10Shezə fukatə ka ndukoha ka ɗoltɨ da Həmɨnpwa ɓa nza nə myee dɨ ɗa səfeme, angɨn ɓa tiya ka Yawude a zə nə myee aa Yawude. 11Həmɨnpwa aawa bɨldə mwonəha.
12Kat myee ɗa səhase a nə ɗongə lee ɓashita Musa, Həmɨnpwa ɓa ɓashiyərən a nə ɗongə lee ɓashitɨngɨn. Sə mgban, myee ɗa səhase a nə lee ɓashita Musa, Həmɨnpwa ɓa ɓashiyərən dɨ vor ɓashitɨngɨn. 13Gələ aa kɨl ɓashita Musa ka kwakye nə ɓa gwadə ma nda gəə ɓwaara pepeyə a humwa Həmɨnpwa, soɓwo daasə myee dɨ kɨl ɓashitɨngɨn dɨ koddə, tənə myee Həmɨnpwa ɓa naarən mi pepeyi a humwasən. 14Ka diyale tən myee aa Yawude, a tən myee tam ka ɓashita Musa, tən kana ɗa sa ɓashitɨngɨn a boyo a vor ɗongə leetə, tən bɨldə sate atɨ tən lee sa kana təna ɗa, ka sa aa kana təna ɗa. 15Gəkɨlə lyentɨ darən bɨldə sate atɨ sa ɓashitə a boyo, mye nzadən a hubosərən, səɗə-yedye darən mgban nee dɨ bɨlərən atɨ səfemə təna dɨ ɗa, ɗyangale darən nee dɨ bɨlərən səhasa ka səfema təna dɨ ɗa. 16A fəra Həmɨnpwa ɓa ɓashiyə dɨ haka Yesu Ma Həmɨnpwa a Yaɓwarən də, ndi ɓa dɨmaadə shee ɓwaare a dɨ ɗatɨrən a ɓotə, ɓətɨya ləmə fema na dɨ hiwa kan a boyo.
Yawude ka ɓashita Musa
17Ɓə hye mgban, a hye ma dɨ sa ka nanga atɨ hye Yawuda, hye tingɨrə ɓashita Musa, hye dɨ nggorkonye atɨ hyenə hɨnggə Həmɨnpwa? 18Hye sa atɨ hye lee sa Həmɨnpwa a dɨ mwo atɨ hye ɗa, sə mgban hye lee sa kana ɓwaara a ɗa gəkɨlə ɓashita Musa kənu səngɨn. 19Anda hye mwaka nanga atɨ hyenə dɨ kɨsə welye kada, hyenə tikɨle da myee a vor kulitə, 20hye sa atɨ hyenə dɨ kənə dəɗye shee, hyenə mgban dɨ kənə ji-kurkurye shee, gəkɨlə ɓashita Musa a peyudə lele ka diyale. 21Ɓə hye ma dɨ kənə ɓwaare shee, mɨnə ɗa teewa kənə nanga shee? Hye ma dɨ hiwa atɨ ɓe tənaa hɨrə, teewa hɨri? 22Hye ma dɨ sa ɓwaare atɨ ɓe təna ɨl mandye a ɗa sharawne, teewa ɗa sharawne? Hye sa atɨ hye kwo pɨle, tee dɨ koɗərən, hye tam dɨ ɗashi takɨmye? 23Hye dɨ məndaranye a nə ɓashita Musa, ɓə mɨnə ɗa hye dɨ kɨɗa kwakɨ Həmɨnpwa dɨ ha ɓiya ɓashitɨ dan? 24Angɨn nə ɓətɨ wule la mya doro atɨ, “Gəkɨlə le dəw mya dɨ kɨɗa kwakɨ Həmɨnpwa a waka myee aa leerən.”#2.24 Naasə: Ishaya 52.5; Ezikiyel 36.22.
25Anda hye koddə ɓashita Musa, lakəwne dəw ɓa gə ka fukatə. Anda hye ɓiya ɓashitɨngɨn, angɨn gə ɓətɨ myaa tiyaa jengda a lakəwne. 26Anda myee myaa jengdərən a lakəwne ɗa sa ɓashita Musa a boyo, myaa dɨ nidə mingɨn ɓətɨ mye jengdərən a lakəwne? 27Ndi ma myaa jengdən a lakəwne, shezə nda dɨ koddə ɓashita Musa, ɓə wulagu hye ma ka ɓashitɨngɨn, mya mɨna jengda lakəwne atɨ gə hye Yawuda, di hye nzə-ɓiya ɓashiti.
28Aa gəkɨlə mya jengda a lakəwne, angɨn a mɨnda Yawuda diyalə a humwaa Həmɨnpwa. 29Ə'ə di Yawuda diyale nee a hubota, sɨnə wule ma Pitɨ Ɗəmɗəmtə a viriwdə hubosən, aa ma dɨ nggur ɓashitə dɨ kanyi kaarə nə. Wule mangɨn, aa ɓwaare dɨ humwan, Həmɨnpwa nə dɨ humwan.
S'ha seleccionat:
Romye 2: bcy
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.