Lyenta 27
27
Bulus dilə muɗə Roma
1Ite le a kangə nə sate atɨ hin ɓa pɨrə koombotə a nə gbɨnuwtɨ sɨkorən a zə njiya Italiya, mya vədə Bulus kat ka mbiɗitɨ ji-gbərəwye a tɨfə a gyana nyate mya wa atɨ Jiliyos. Ndi Jiliyos, sɨne hiɗə dɨ vor ji-gyelmbuta Makpane Kaisar dɨ Italiya. 2Hina pɨrə itɨ koomboti ite dɨma dɨ vɨra Adramitiya, ite dɨ muɗi dɨ vɨre som-som a njiya Asiya, hina dɨmə nə gbɨnuwtɨ sɨkorən. Aristakus a dɨ vɨra Tasalonika a njiya Masɨdoniya nee ɓwaa kenə.
3A kpeyə bətə, hina tɨla a kpasə kwa gərə Sidon. Jiliyos a gwadə Bulus a ɗakan nda nggɨrgə kwa gəre a pɨrə vor vɨratə a haka yə ndewegən gə təna gwadən. 4Dɨ hangɨn hina mɨna pɨrə koombotə a koɗə luutɨ Sepɨrus. Gəkɨlə hawe aa mwenə le, hina kul hawe a muɗə. 5Hina lyembərə a ɗaka ɓayatɨ Silisiya ka Pamfiliya a kpasə kwa gərə Mira a njiya Lisiya. 6A hangɨn, ndi gyana nyatɨngɨn a pa itɨ koomboti ite dɨma dɨ Alezandiriya a njiya Ijip dɨ muɗə njiya Italiya, nda pɨrdenə hina koɗə koombotɨngɨn. 7Hina lyembərə nə gbɨnuwe ɓuk-ɓuk a nggur bətə furi-furi gəkɨlə koombotɨ denə a dɨ hwul hawa dɨ tawa. Kat ka angɨn hina kwaa ɓərə a zə gbyel ka vɨra Kinidu a kpasə də. Gəkɨlə hawa dɨ tawa kultenə, hinaa yə mba lyembəre a pɨrə humwa, hina lyembərə a zə gbyel ka sɨtɨ luutɨ Kɨret ite gbyel ka Salmoni. Hina gapə gyengə luutɨngɨn a koɗə nyisərə a padenə gə hawa muɗi dɨmə vor gbɨnuwtə. 8Hina gapə gyengə luutɨngɨn a kwaa ɓərə kɨr-kɨr a lyembərə a zə ɓukza mya wa atɨ Kwagərə Wulatə, a haa koombye a dɨ kpasə də, gbyel ka vɨra Lasiya.
9Omotə a jemgbɨrəngə a ɓongə gə hawe, lyembəre a nə gbɨnuwe a gəə sə kala, gəkɨlə sɨkwalə gone ka por-njiya da Yawude pɨrə. Səngɨn ɗa Bulus a fyel-kwaki myee a vor koombotɨngɨn 10atɨ, “Hwun minə ganə kat, na dɨ niyə omotɨnə dam nə ɓa hasə kɨr-kɨr, mye ɓa ɗongə koombotə, ka sɨtɨre kat ka myensəm mgban.” 11Ndi gyana nyatɨngɨn aa bəgə la Bulus a boyo myenti, nda koɗə kormi nzə-mgbe ndi ma dɨ lyembər koombotə, ka həmɨ koombotɨngɨn. 12Gəkɨlə ɓukza koombotə a kpasə də aa dɨ wula ka hangɨratə a ite hawe a dɨ təwo nə gbɨnuwe kɨr-kɨr. Hakpanə myee a vor koombotə mwa atɨ təna ɗaka hangɨn a dɨmə nə gbɨnuwe ndəng tən ɓa mba lyembəre a zə vɨra Fonis. A kwa gərəngɨn təna dɨ mwo atɨ təna kpasə a nza a kula hangɨratə. Kwaka gərə Fonis nee bi dɨmə vor gbɨnuwtɨ sɨkorən a təfəgye kpe, basa hiɗə a lyekɗe, basa hiɗə mgban a zɨme dɨ luutɨ Kɨret.
Hawe
13Ite hawa dɨ təwi a mbɨra ta zakana, dɨ itɨ ɓayati a basa lyekɗe, ɓwaare a ngguro atɨ hawe sara, haa ɓa wula omotə, təna daɗa gə nggaki koombote kɨr tiye a tiya lyembəre a nə gbɨnuwtə, tən ta gapə sɨtɨ luutɨ Kɨret. 14Tee ɗəng hawe a nzaa maɗa ɓətɨ hawo ɓoolə ka gyeɗətə kɨr-kɨr a nə haɓye. Mya dɨ wa Hawongɨn atɨ, “Hawo zɨme dɨ beetɨ mwe.” Hawongɨn a dɨma dɨ luutɨ Kɨret. 15Hawe a jipa koombotə a ngguro a dɨmə kaarə a nə gbɨnuwtə, hina ɗaka lyembəre, hawe a nggutenə ka koombotə a muɗə. 16Hawe a jinə ka koombotə a gyengə luutɨ Kawda, ite padenə gə hawe. A hangɨn hina kwa ɓərə a ɗadə ɓwe nji-koombotɨ ɓyeləngte hina ɓoyo sɨtɨ koombotɨ kpantə. 17Ite təna nggəl koombotɨ ɓyeləngtɨngɨn a nggɨradə a nə koombotɨ kpantə, təna shea por salakye a ɓwe koombotɨ kpantə a tyeltɨrə kərəng-kərəng gə ɓe hawe aa falarə. Itɨngɨn mgban kala nee dɨ gərən atɨ ndəng hawe ɓa nggur koombotə ngga dɨ yefə nə omo tiya ɓo mgba haɓye a gbɨnuwtɨ Sirtis. Gə-angɨn təna jengdə kaɓa nggaktɨ koombotə a vor haɓye gə koombotə a jinə dɨsərə hamama. 18Ɗogoli hawa a nə gbɨnuwe ta lyeb koombotə, nggi ta ɗyanggara kɨr-kɨr ta kana haɓye, gə ləngɨn ite haa kɨɗa, mya tiya por sɨtɨra a vor koombotə ta kəjidərən a haɓye. 19A vor mwaakɨnə bətə, təna kəjidə shi-lyente a vor koombotə tən ka nənəngrən. 20Bətə hananang hinaa naa fəre, hinaa naa tyekəlye, hawe mgban pɨrə humwa dɨ tawa kɨr-kɨr. Hina ɗong myensenə atɨ taa ndəng ma a vorsenə ɓa mbə.
21Ite ɓwaare a bə hananang tənaa zɨmshe. Bulus a maɗə a kangə wakasərən a sarən atɨ, “Ɓwaare, na hwun nda sardə kwakingəwnə koɗə kormi atɨ, ɓe myaa lyembərə nə gbɨnuwe a pɨragə luutɨ Kɨret. Myaa dɨ nda pɨrə wule tənətɨnə kat ka shee mya ɗongərən. 22Ɓəgəng hɨnə dɨ nyisəwnə, bəmdə hubosəwnə, gəkɨlə nagi hiɗə ama aa dɨ mbɨrə vorsəwnə. Koombotɨnə nə ɓəmbə mya ɗongərə. 23Tukong ka tukotə, malyene da Həmɨnpwa, a Həmɨnpwa de, a na dɨ koɗən a kangə gyenga a byelə ke 24a sa atɨ, ‘Bulus ɓe kala aa gu. Gəkɨlə mbak-mbak hye ɓa kangə humwa Həmə kpane Kaisar, gə-angɨn nə Həmɨnpwa a mwo nanga a ɗakəw kat ka mbiɗitɨ myee hye gə kaarən a vor koombotə asə aa dɨ gə ama.’ 25Gə-angɨn ɓwaare, bəmdə hubosəwnə, hɨn mwadiyale ka Həmɨnpwa atɨ asə aa dɨ ɗa nagi kəng-kəng ɓətɨ nda boyi. 26Kat ka angɨn mbak-mbak hawe a nggur koombotə a jinə kaarə, a nggɨrə kaarə a itɨ luuti.”
Fəlta koombotə
27A vor bətə bəw a mbiɗi-fwat, koombotə nee a nə jintə kenə, hawe mgban nee dɨ verewdenə a nə Sɨkorəntɨ Adriya, ka vor tukotə ji-lyembər koombotə a naa asə, təna kana atɨ zangti gbyel kenə. 28Təna ɓwe sə diksɨke a kwaamɨ salake a ɗongə vor haɓye gə təna kana kuɓuktɨ haɓye, təna pa kuɓuktɨ hangɨn nee mbwaye haru hiɗə ka bəwtə kpe. Ite təna kula ɓyeləng, təna mɨna kana kuɓuktə, təna niyə mbwaye bəwtə dombiɗə. 29Tən ɓe niyə tee, kala a gərən atɨ koombotə nə ɓa giɓə a dɨ nggɨrə nə fara, təna ɗongdə nggakye fwat dɨ mgba koombotə gə ngga kangə, tən ta hɨma atɨ giɓaa haa kɨɗa. 30Imi dɨ vor ji-lyembər koombotɨngɨn a ɗa kuta gə təna sargə koombotə a mbə nəngrən, təna para nji-koombotɨ ɓyeləngtə, a ɗa ɓətɨ nggaki koomboti tən ɓa jengdərən dɨ nə koombotə. 31Bulus ɓe naa ləngɨn, nda sa gyana nyatɨngɨn ka ji-lyembəre atɨ, “Hye kana niyə ji-lyembəre a sargə koombotə, taa ama a vorsəwnə ɓa mbə.” 32Də ji-pakawatə a bənggə salaki nji-koombotɨ ɓyeləngtə ngga jinə a muɗə.
33Haa ɓa dɨ kɨɗa, Bulus a nyisərən kat atɨ təna zɨmshe. Nda sarən atɨ, “Gəngnə gə kala, bətə bəw a mbiɗi-fwat hwunaa zɨmshe, asə aa pɨrə kwaamɨngəwnə. 34Gə-angɨn hɨnə dɨ nyisəwnə, zə zɨməmshe. Ɓə wula asə a gə yedingəwnə hwuna gə dwat. Nagi kəng-kəng asə aa dɨ gə ama a vorsəwnə, nagi showonə ama aa dɨ fukə njiya a yerə ɓaa.” 35Ndi ɓe boyərən tee nda nggur buroditə a hiwo a ɗa Həmɨnpwa usəkətə a humwaasərən kat, nda ɓyata buroditɨngɨn a tiya tuultə. 36Tən ɓe niyəshe, sɨsərən a mɨnakarən təna tiya zɨmshe. 37Hin myee a vor koombotə kat, hinə haru kpe ka bəwtə tukolukpe a mbiɗi-tukoltaka. 38Ite təna zɨmshe a hyaɓa kat, təna kəjidə sɨtɨrə sɨzɨmte a vor koombotə gə nggagə fafɨlak a nə haɓye.
39Ite haa ta bwang, ji-gyelmbutɨngɨn aa lee njiya haa təna gə də, a hangɨn mgban təna naa ɓukze ka tiya koombotə ɓa kpasə də, təna mwo atɨ koombotə a giɓə a dɨ nggɨrə nə tiyəngɨn. 40Təna bənggə salaki nggakyee kɨt koombotə, təna paragə salaki binawyee a mgba koombotə. Də təna maddə sheltə a pwa, gə hawe a nggəl koombotə a nggɨrə kaarə a kwaka tiye. 41Koombotə aa nda tɨlə kwakatə a nə tiye, ngga ka a tiye a yefə, nggaayə virwo, ɗogoli hawa dɨ tawa a lyeb mgba koombotə a falarə nyatak-nyatak.
42Ite ji-pakawatə ɓe niyəshe, təna kər ji-gbərəwye kat ɓa ɓəltɨrən, gəkɨlə ɓe tənaa sarə haɓye a nggəɗə a kyepə. 43Ndi gyana nyatɨngɨn aa mwo ləngɨn, ndaa mwo atɨ mya ɓɨl Bulus, gəkɨlə ləngɨn nda kərə ji-gyelmbutɨngɨn sa təna dɨ mwa atɨ təna ɗa. Nda sarən atɨ, “Myee ɓa mba nggəɗe maa təna sarə haɓye a nggəɗə a nggɨrə kwakatə.” 44Nda sa myee mbiɗi atɨ, a təna leyə nə galbee fəli, təna pukə nəngrən a koɗə hawe a zə kwakatə. She mgban təna ɗa kat a nggɨrə kwakatə ka myentə.
S'ha seleccionat:
Lyenta 27: bcy
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.