Lyenta 21
21
Bulus a pɨrə humwa ka omotɨ dan a wudə Urshelima
1Ka otə hina gə mi kpan-kpani Afisus kwasatə a ɗakarən a pɨrə koombotə a hwul haa kpəkəkə a nggɨrə ɓayatɨ vɨra Kos. Hina bə haa kɨɗa hina pɨra zə Rodis, dɨ Rodis hina zə Batara. 2A hangɨn hina pa itɨ koomboti ite ɓa fukə a nggɨrə ɓayatɨ Finikiya, hina pɨrə koombotɨngɨn a muɗə. 3Hine a vor koombotə, hina niyə a naa luutɨ Sepɨrus a haa ɓongətə, hina pɨrgə luutɨngɨn a basa lyekɗe, a zə vor njiya Siriya. Hina zə a kpasə kwa gərə vɨra Taya, gəkɨlə a hangɨn koombote shikenə ɓa jangadə sɨtɨre. 4Hina ɗilə ji-kotte a vor vɨra Taya, hina nza hakarən bətə tukolukpe. Ite Pitɨ Ɗəmɗəmtə a byelə ka ji-kotte a vor vɨra Taya, təna nyisə Bulus atɨ ɓe ndaa pɨrə a wudə Urshelima. 5Beetɨ bətə tukolukpe, hina dɨmə a kɨt tɨfe, mbiɗitɨ ji-kotte a hangɨn kat ka mandingrən ka je a dɨmgə hwoɗye a raadenə a zə kwa gəre, a hangɨn hina gyerə tiye a ɗa hiwtə. 6Ite hina gə sə kwasatə kat, hina pɨrə koombotə, tən mgban təna mɨnə hwoɗye.
7Hina ɗaka kwa gərə Taya a pɨrə humwa ka omotə a dɨ kpasə kwa gərə vɨra Butolimayis. A hangɨn hina bə hiɗə a wanaka ji-kotte də. 8Ite haa kɨɗa, hina ɗaka hangɨn a pɨrə a tɨlə Kesariya, hina janga a hwoda a nzə-kotti mya wa atɨ Filibus nzə-hiwatə. Sɨnə hiɗə dɨ vor myee tukolukpe mya ga nggɨlə vor Urshelima gə ɓyana sɨzɨmtə.#21.8 Naasə: Lyenta 6.1-6. 9Filibus nə ka ji-mandye fwat, tənaa nda nzaa hwoɗye, ji-mandingɨn a dɨ kpalə a bwe le da Həmɨnpwa.
10Hine a vor Kesariya, hina ɗɨm nzɨ bətə a hangɨn, a kpalə a dɨma dɨ vor njiya Yawudiya, kwakɨngɨn nə Agabus. 11Ite nda shi hakenə, nda nggur hinwe da Bulus a ɓwe tyefingɨn kat ka mbwayingɨn ka hinwongɨn. Nda kpalə atɨ, “Pitɨ Ɗəmɗəmtə a sa atɨ, ‘Yang mgban Yawudee a vor Urshelima ɓa ɓwe həmɨ hinwanə. Təna shea kɨttən a vədən a tɨfə myee aa Yawude.’ ”
12Hin ɓe kɨlə she, hin kat ka myee a hangɨn a nyisə Bulus atɨ ɓe ndaa pɨrə a wudə vor Urshelima. 13Bulus a luwa a sa, “Ɓə mɨnə ɗa hwuna dɨ ɗa she? Hwuna dɨ təwo ɓa ɓiya kala yikɨtshi ma? Aa ɓweti mya ɓweri ɓəmbə, hɨn mwa a mya ɓɨlti a vor Urshelima gə kwakɨ Yesu Həmɨmiye.” 14Ite hina niyə hinaa dɨ mban a mbɨrtən, hina ɗakan ɗəng, hina sa atɨ, “Anda kanata Həmɨnpwa nə, a nda nzasə.”
15Beetɨ ləməginə kat, hina por shee denə a pɨrə a nggɨrə vor Urshelima. 16Imi dɨ vor ji-kotte a Kesariya a raadenə a Urshelima, təna zəkenə a vor hwoda Manason, a haa hin ɓa janga də. Ndi Manason ɓə ɓongə vor kottə, sɨnə dɨ luutɨ Sepɨrus.
Bulus a tɨlə Urshelima
17Ite hina tɨla a vor Urshelima, ji-kotte də a wayadenə pepe ka hanɨngtə. 18Hin ɓe bə haa kɨɗa, Bulus kat ka mbiɗisenə a wudə haka Yakubu makpane da ji-kotte də gə hina byelə kan, mbiɗitɨ mi kpan-kpani ji-kottə nee peyə hangɨn mgban. 19Bulus a wunakarən, nda boyərən mbwayi wesən a nə wule shee Həmɨnpwa a ɗa a waka myee aa Yawude dɨ hakan.
20Ite təna kɨl ləməgingɨn, təna ɓondi Həmɨnpwa. Də təna boyə Bulus atɨ, “Zə niyi, nzə-nuwo, hye leyə atɨ Yawude hananang virwa mwadiyale ka Yesu, tən mgban kat tənə ka hɨmnə koddə ɓashita Musa. 21Mye boyərən ləmə wule shee hye kənə Yawudee nzaa waka myee aa Yawude. Tən kɨl ləməgyee hye dɨ boyərən atɨ a təna virwa a ɗaka wule kəndəshe da Musa ka ɓashitɨ dan, ka ləməgyee hye dɨ boyo atɨ, ɓe tənaa jengdə jingrən a lakəwne, ɓe tənaa koɗə kwale da Yawude mgban. 22Bə ya mya ɗa? Ɓəgəng tən ɓa kɨlə atɨ hye shi pɨra a vor Urshelima. 23Gəngnə ɗa sa hin ɓa boyu. Ganə a hanəkenə, hinə ka ɓwaare fwat, a myee gbi ka Həmɨnpwa. 24Zə pedə nanga ka minə dɨ fwaɗə, hwuna koɗə kwale a gə ɗəmɗəm a humwa Həmɨnpwa, hye mbwagə taa da mingɨn gə təna sawgə shewo nəngrən. Ɓwaare kana nəwnə a vor kwaləngɨn, tən ɓa leyə atɨ ləməgyee mya dɨ boyə nanga jeronyi, taa diyalə də. Mingɨn ɓa leyə atɨ hyene dɨ koddə ɓashita Musa ite Yawude a dɨ koddə. 25Ji-kotte aa Yawude virwa por-njiya, hin lyenərənshe ka malɨmtə boyərən atɨ təna təkəsə ka wule sɨzɨmte mya həm pɨle kaarən a kangaa dərən a kɨritə. Ɓe tənaa zɨm zaambə sɨgɨrtə, ɓe tənaa zɨm hara wule sɨgɨrte mya tyeɓəl wurangrən, ɓe tənaa ɗa sharawne mgban.”
26Sə mgban Bulus a koɗə ləməgyee mi kpan-kpanye da ji-kottə a boyo, ite haa kɨɗa nda por mingɨn, təna tiya kwalə suɓwagə nəngrən ɗəmɗəm. Nda pɨrə vor Kwa-Shafe gə nda boyərən atɨ, ɓə tiya kwale, tən mgban təna lee bəte tən dɨ fwaɗə ɓa ɗa, təna ɓə vədə həmtə darən a naadə kwaale.
Mye kɨt Bulus
27Ite bətə tukolukpe ɓa dɨ naa, i Yawude dɨ njiya Asiya a naa Bulus a vor Shafe. Təna gəəshe, a maddə mwanatə a waga ɓwaare, təna pedə Bulus a kɨsə. 28Təna maddə kormingrən a gəəshe atɨ, “Mi Israila, gwamdenə kɨr manə, sɨnə ma dɨ woyi mbəgə hee kat, sɨnə dɨ kənə ɓwaare shee atɨ ɓe tənaa koddə ɓashitɨ dam, nda mɨna dɨ bwe ləməgi hashe a nə Shafanə. Sɨnə ɓə pɨra ka myee aa Yawude a vor Kwa-Shafe gələ nda tukutan a yakan.” 29Mingɨn a boyo sə gəkɨlə a vor bəte pɨri tən naa Bulus dɨ woyə vor Urshelima ka Trofimus ndi Helinə dɨ vor vɨra Afisus, təne dɨ kana atɨ sɨnə Bulus a pɨra kan a vor Kwa-Shafəngɨn.
30Haa peyə a tukuttə kat ka vor Urshelima, ɓwaare a gyaɓa ta paya dɨ hee som-som. Təna pedə Bulus a gbaamə, təna fuwo a dɨmə kan gə vor Kwa-Shafe, tee gbyel təna gbəə kwaami Shafe. 31Ite təne ɓəri ɓa ɓɨl Bulus, ləngɨn a tɨlə a pɨrə kwaki gyana kpanaa dɨ nidə ji-gyelmbuta mi Roma kat 'ye a vor Urshelima, atɨ nyatə maɗə vor Urshelima kat. 32Gyanangɨn a nggɨl imi tan-tan dɨ vor gyane nyatə kat ka i ji-gyelmbuti, təna gyeɓə a jengə a pɨrə vor təkə-təkətɨ ɓwaare. Naya ɓwaare ɓe naarən, təna ɗaka lyeb Bulus.
33Gyana kpanəngɨn a kɨt Bulus, nda ɗɨkə mya ɓwe Bulus ka mali kɨsa kpe. Nda ɓə shea ɗiyə ɓwaare atɨ, “Wonə mangɨn, mɨnə sa nda ɗa?” 34Imi dɨ vor təkə-təkətɨ ɓwaare a maddə kormingrən ta bwe ləməgye som-som, minə ɓa nda bwe lanə, mirə mgban ta bwe arə som. Ite gyana kpanəngɨn aa kɨl diyalə sa ɗa gəkɨlə ɓwaare a dɨ ɗaw-kwaame kɨr-kɨr, nda ɗɨkdərən təna muɗə ka Bulus a lure da ji-pakawatə. 35Ite Bulus a tɨlə mgbəngte ndi ɓa mwagərə a nggɨrə, ji-gyelmbutɨngɨn a nggur Bulus a pwa gəkɨlə ɓwaare hananang a maddə gəəshe ka muune. 36Təkə-təkətɨ ɓwaare a pɨrə humwa ka gəəshe ta sa atɨ, “Muɗəm kan! Ɓɨləmrən!”
Bulus a byelə ka təkə-təkətɨ ɓwaare
37Ite ji-pakawatə a zə ɓa pɨrə ka Bulus a vɨne, nda ɗiyə gyana kpane atɨ, “Hye ɓa mwa na boyu le?”
Gyanangɨn a luwa a san, “Hye dɨ bwe kwa-Heline ma? 38Aa hyenə nzə-njiya Ijipte gi maddə mwanatə ganə dɨmi ka ji-ɓəl wogye haru bəwtə fwat a vor kaake?”
39Bulus a luwa a san atɨ, “Ə'ə, hɨn Yawuda, hɨnə dɨ vor vɨra Tarsus, a njiya Silisiya, aa vɨra swati. Hɨn sɨkəw vi humwatə na bwe le ka ɓwaare.”
40Də gyanangɨn a vən humwatə atɨ a nda bwe le. Bulus a kangə nə mgbəngte mya dɨ nggɨrəsə, nda maɗə ɓwaare də tɨfəngɨn a pwa. Ite haa talə, nda bwe le ka kwa-Yawude.#21.40 A itɨngɨn Yawude hananang ka Israila a dɨ bwe kwa-Aramayi. Sɨnə kwaama Bulus a byelə kan.
S'ha seleccionat:
Lyenta 21: bcy
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.