Ap'u 39
39
A Susev' iv'i m'ertu na parei arna nut a Itsip
1V'eti atuirv'a sarei a Susev' arna nut a Itsip. Laha, dui iamk a Itsip, nahan iv'i a Putiva, iv'i m'ertuan a Veru kav'i mlinar m'rnuran a Veru, hin iuli asnr arm'ertu a Ismail la avuirv'a atlera ha. 2#Parei 7:9.V'eti a Mlin Eia ilak m'ei a Susev' dav'a parian ip'as istudau, kalak al nmahan a mlinan, iv'i dui a Itsip. 3Laha, a mlinan irndu ti a Mlin Eia ilak m'ei kala ti a Mlin Eia imhmah ani arna si udlani iani. 4Laha, irn ip'as an a Susev' kamhmah ani, kani iv'i m'ertuan, kani ima kav'i dui ip'aur si udlani al nmahan, katu sian udlani al lm'an a ti ipap'auri. 5Sarei, naran ip'aur nmahan m'a sian udlani iv'i nkan, dav'a ti a Mlin Eia imhmah a nmaha dui a Itsip lera sanan a Susev'. A Mlin Eia imhmah a sian udlani al nmahan m'a sian udlani iter al pitvet. 6Itu sian udlani al lm'an a Susev', iav'ahur sian kinkin ml. Iv'ahur tim'ah ihani nakl uaki. Hin a Susev' p'akn ip'as, nahn ip'eset.
7Dav'a, itauatah a si lera, tav'etan a mlinan ip'ei a Susev' kavr ani, kavr ti a, “Pam'atr m'a kana.”
8V'eti hin ivr ti iarni, kavr an a tav'etan a mlinan kavr ti a, “Parni, a mlinak iav'ahur si kinkin iter al lm'ak al nmah, kattu sera sian udlani al lm'ak. 9M'ertu ihei al nmah laha ilil kasiv' kana. Hin iauada si kinkin a ti nkauei v'eti nakm uaki, sena ti kv'i tav'etan. ?Inap'i hin p'en si stu lil lera kan si stu arna nahn Atua?”
10Dav'a, arna napn udlani iv'ana m'ei a Susev', v'eti hin iam'ahu a ti ipam'atr m'ei, v'aha kalak m'ei.
11V'eti arna napn iamk iv'a al nmah a ti ipan parian, v'eti dui na m'akarien kinkin ialak al nmah. 12Laha, tav'et nen iuada klusan kavr ti a, “Pam'atr m'a kana.” V'eti hin iln klusan al lm'an karuh kadav'a av'aran. 13Naran tav'et nen ila ti iln klusan karuh kadav'a av'aran, 14iv'ara anr dui udlani al nmahan kavr anr kavr ti a, “Pavlei, hin ituirma sera dui a Isrel asnd a ti ipasner nakd. Ima eim karn ti ipam'atr m'a kana, v'eti nv'ara eia a nadl lil. 15Sarei, naran irn ti ntakal kav'ara eia, iln klusan asnk karuh kadav'a av'aran.”
16Laha, itu klusan asnn dav'a ti a mlinan ima al nmahan. 17Sarei, iv'ana m'ei inap'i laha kavr ti a, “Dui a Isrel lera iv'i dui na m'akarien, la nakm kuirma asnd ha, hin ima eim asnk a ti ipatu mamihien kutakm a kana. 18Dav'a, naran ntakal kav'ara eia, hin iln klusan asnk karuh kadav'a av'aran.”
19Sarei, naran a mlinan irn v'nen tav'etan ivr ani, kavr ti a, “Dui na m'akarienam iani inap'i lera m'a kana,” iani ti nln irer istudau. 20Sarei, a mlinan a Susev' ilav'i kataui al p'resin, iv'i nut atu m'ertu la a mlin lil ilep'lar ha. Laha, hin ilak atlera al p'resin. 21#Parei 7:9.V'eti a Mlin Eia ilak m'ei a Susev' kav'iv'en vtmienan ani kani ti dui ip'aur p'resin ilap'as ani. 22Dav'a dui ip'aur p'resin itu m'ertu udlani, la avp'resin atlera ha, al lm'an a Susev'. Parei udlani avani al p'resin lera, a Susev' ip'auri uaki. 23Dui ip'aur p'resin iav'ahur si kinkin a Susev' iani, sena ti a Mlin Eia ilak m'ei. Si udlani a Susev' iani, a Mlin Eia iani ti ima kap'as.
S'ha seleccionat:
Ap'u 39: nmb
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2023 Presbyterian Reformed Church of Australia