Hechos 6
6
Win'ijxku̶xy juxtujk je̱'e̱ pube̱jtpu̶du̶jk
1Je̱'e̱ mu̶'it tiempo, je̱'e̱ mu̶bu̶jkpu̶du̶jk ni'igyu̶ najty je̱'e̱ ñimayu̶y'adu̶u̶tzku̶xy. Mu̶'it je̱'e̱ mu̶dyiibu̶ je̱'e̱ griego ayuuk kápxku̶xpu̶ñ tyu̶gu̶y naymyu̶kmu̶gápxu̶gu̶xpu̶ mu̶u̶d je̱'e̱ mu̶dyiibu̶ je̱'e̱ judío ayuuk kápxku̶xpu̶ñ, myu̶naangu̶xy ko je̱'e̱ griego ku'o'ogytyo'oxyu̶jktu̶jk kaayu̶ñ uuku̶ñ najty kipxyjyaty jaboom jaboom ka'apaatku̶xy mu̶u̶d je̱'e̱ judío ku'o'ogytyo'oxyu̶jktu̶jk.#6.1 Adaa texto je̱' adaa du'un tyijpy je̱'e̱ judío ja'ay mu̶dyiibu̶ wiingnaax adzu̶naaygyu̶xpu̶ñ, mu̶dyiibu̶ je̱'e̱ griego ayuuk najty kápxku̶xpu̶ñ. Abu̶ky je̱'e̱ judío ja'ay mu̶dyiibu̶ palestina naaxjooty tzu̶naaygyu̶xpu̶ñ mu̶dyiibu̶ je̱'e̱ arameo ayuuk kápxku̶xpu̶ñ, mu̶dyiibu̶ nandu'un yajtijpu̶ñ hebreo ma je̱'e̱ Nuevo Testamento. 2Mu̶'it je̱'e̱ nimajmé̱tzkpu̶ apóstolestu̶jk je̱'e̱ mu̶bu̶jkpu̶du̶jk ku̶xyu̶ yajnaymyujktaayu̶, y chi nu̶maaygyu̶xy:
—Ka'p du'un y'óyu̶ch ko u̶u̶ch je̱'e̱ Dios ayuukkapxwa'kxu̶u̶ n'u̶xmádzu̶ch ajku̶xy y nú̶kxyu̶ch je̱'e̱ kaayu̶ñ uuku̶ñ n'okyajwa'kxku̶xpu̶. 3Paady miich mu̶gu'uktu̶jk, win'ijxku̶x ma miich ajku̶xyu̶ñ juxtujk je̱'e̱ ja'ay mu̶dyiibu̶ oy m'ixy'ajtku̶xypyu̶ñ, mu̶dyiibu̶ joot winma'añ oy yajxón mu̶dajtku̶xpu̶ñ y mu̶dyiibu̶ je̱'e̱ Espíritu Santo mu̶dajtku̶xpu̶ñ, wan adaa tuung túnu̶ch ajku̶xy. 4U̶u̶ch ajku̶xy Dios u̶u̶ch nmu̶bu̶jktzo'adu̶'u̶dzaangu̶xypy y nyaj'u̶xpu̶jk'adu̶'u̶dzaangu̶xyu̶ch je̱'e̱ Dios y'ayuuk tyu̶y'ajt.
5Nigu̶xyu̶ je̱'e̱ ayuuk ku'umaaygyu̶xy, y chi je̱'e̱ Esteban win'ijxku̶xy mu̶dyiibu̶ je̱'e̱ mu̶bu̶jku̶ñ mu̶k mu̶dajtpu̶ñ y mu̶daty je̱'e̱ Espíritu Santo, y je̱'e̱ Felipe, je̱'e̱ Prócoro, je̱'e̱ Nicanor, je̱'e̱ Timón, je̱'e̱ Parmenas y je̱'e̱ Nicolás, je̱'e̱ mu̶dyiibu̶ Antioquía tzombu̶ñ y jékyu̶p je̱'e̱ judío ja'ay kyostumbre najty ju̶jptu̶gu̶yu̶u̶yñu̶. 6Chi je̱'e̱ win'ixyjya'ay yajnú̶kxku̶xy ma je̱'e̱ apóstolestu̶jku̶ñ, y chi je̱'e̱ apóstolestu̶jk Dios mu̶bu̶jktzoogu̶xy y kyu̶'u̶ni'ixáju̶gu̶xy.
7Je̱'e̱ Dios y'ayuuk tyu̶y'ajt ni'igyu̶ najty je̱'e̱ wya'kx'adu̶'u̶ch, y je̱'e̱ mu̶bu̶jkpu̶du̶jk ni'igyu̶ najty je̱'e̱ ñimayu̶y'adu̶u̶tzku̶xy jim Jerusalén. Y u̶xtu̶ je̱'e̱ judío teedy najty nimay mu̶bu̶jkku̶xp.
Esteban majch ajku̶xy
8Je̱'e̱ Esteban myu̶dajtypy najty je̱'e̱ Dios myu̶k'ajt y kyunukx'ajtu̶ñ, y tyuumby najty je̱'e̱ mu̶jwinma'añ y ijxpe̱jt ma je̱'e̱ ja'ay ajku̶xyu̶ñ. 9Mu̶'it nije̱' mu̶dyiibu̶ ñaymyujktaakt xu̶u̶'ajtku̶xpu̶ñ je̱'e̱ tuumbu̶ ni'idoogypyu̶ ajku̶xy, mu̶dyiibu̶ tu̶ y'awa'adzpu̶dzu̶u̶mgu̶xnu̶ju̶ñ, kipxy mu̶u̶d je̱'e̱ cirene ja'ay nije̱', je̱'e̱ alejandría ja'ay, je̱'e̱ Cilicia ja'ay, y mu̶dyiibu̶ jim Asia naaxjooty tzóngu̶xpu̶ñ, ñay'amayu̶ydyu̶gu̶u̶yu̶ ajku̶xy mu̶u̶d je̱'e̱ Esteban; 10peru̶ ka'p najty mu̶madaakku̶xy, je̱' ko je̱'e̱ wij'ajt ke̱j'ajtu̶ñ najty mu̶u̶d kyapxy mu̶dyiibu̶ je̱'e̱ Espíritu Santo najty mooyu̶bu̶ñ. 11Mu̶'it je̱'e̱ ja'ay nije̱' mu̶juuygyu̶xy mu̶dyiibu̶ je̱'e̱ Esteban mu̶baad ni'iwaambe̱jtku̶xy ko najty tu̶ mu̶doogu̶xy tu̶ mu̶gapxtu̶goy je̱'e̱ Moisés y je̱'e̱ Dios. 12Du'un je̱'e̱ kajptja'ay oy yajjootma'ttaaygyu̶xy, je̱'e̱ amu̶jja'aydyu̶jk ajku̶xy y je̱'e̱ escribu̶ ja'ay ajku̶xy, chi oy du'un mu̶madaakku̶xy, majtzku̶xy je̱'e̱ Esteban y yajnú̶kxku̶xy ma je̱'e̱ judío ja'ay myu̶jjúntu̶ ajku̶xyu̶ñ. 13Chi je̱'e̱ ja'ay u̶xtaay ajku̶xy mu̶dyiibu̶ ni'iwaambé̱tu̶bu̶ñ, myu̶naañ ajku̶xy:
—Adayaaba ja'ay ju̶bu̶k axu̶u̶g adaa wa'adzpu̶ mu̶jtzajptu̶jk nigapxy nimu̶dya'agy y nandu'un je̱'e̱ Moisés y'ane̱'e̱mu̶ñ tyu̶y'ajt. 14U̶u̶ch tu̶ nmu̶doogu̶xy ko du'un myu̶na'añ ko je̱'e̱ Jesús je̱'e̱ Nazaretpu̶ jida'añ je̱'e̱ mu̶jtzajptu̶jk y ko je̱'e̱ kostumbre yajtu̶gatza'añ mu̶dyiibu̶ je̱'e̱ Moisés tu̶ xymyooyu̶mu̶ñ ajku̶xy.
15Je̱'e̱ judío tuungmu̶u̶dpu̶du̶jk y ku̶xyu̶ je̱'e̱ ja'ay mu̶dyiibu̶ najty jim u̶ñaaygyu̶xpu̶ñ, ko je̱'e̱ Esteban win'ijxpe̱jtku̶xy, chi je̱'e̱ wyiin jyu̶jp ijxu̶ ajku̶xy neby je̱'e̱ ángel wyiin jyu̶jpu̶ñ.
S'ha seleccionat:
Hechos 6: MIXE
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005
Hechos 6
6
Win'ijxku̶xy juxtujk je̱'e̱ pube̱jtpu̶du̶jk
1Je̱'e̱ mu̶'it tiempo, je̱'e̱ mu̶bu̶jkpu̶du̶jk ni'igyu̶ najty je̱'e̱ ñimayu̶y'adu̶u̶tzku̶xy. Mu̶'it je̱'e̱ mu̶dyiibu̶ je̱'e̱ griego ayuuk kápxku̶xpu̶ñ tyu̶gu̶y naymyu̶kmu̶gápxu̶gu̶xpu̶ mu̶u̶d je̱'e̱ mu̶dyiibu̶ je̱'e̱ judío ayuuk kápxku̶xpu̶ñ, myu̶naangu̶xy ko je̱'e̱ griego ku'o'ogytyo'oxyu̶jktu̶jk kaayu̶ñ uuku̶ñ najty kipxyjyaty jaboom jaboom ka'apaatku̶xy mu̶u̶d je̱'e̱ judío ku'o'ogytyo'oxyu̶jktu̶jk.#6.1 Adaa texto je̱' adaa du'un tyijpy je̱'e̱ judío ja'ay mu̶dyiibu̶ wiingnaax adzu̶naaygyu̶xpu̶ñ, mu̶dyiibu̶ je̱'e̱ griego ayuuk najty kápxku̶xpu̶ñ. Abu̶ky je̱'e̱ judío ja'ay mu̶dyiibu̶ palestina naaxjooty tzu̶naaygyu̶xpu̶ñ mu̶dyiibu̶ je̱'e̱ arameo ayuuk kápxku̶xpu̶ñ, mu̶dyiibu̶ nandu'un yajtijpu̶ñ hebreo ma je̱'e̱ Nuevo Testamento. 2Mu̶'it je̱'e̱ nimajmé̱tzkpu̶ apóstolestu̶jk je̱'e̱ mu̶bu̶jkpu̶du̶jk ku̶xyu̶ yajnaymyujktaayu̶, y chi nu̶maaygyu̶xy:
—Ka'p du'un y'óyu̶ch ko u̶u̶ch je̱'e̱ Dios ayuukkapxwa'kxu̶u̶ n'u̶xmádzu̶ch ajku̶xy y nú̶kxyu̶ch je̱'e̱ kaayu̶ñ uuku̶ñ n'okyajwa'kxku̶xpu̶. 3Paady miich mu̶gu'uktu̶jk, win'ijxku̶x ma miich ajku̶xyu̶ñ juxtujk je̱'e̱ ja'ay mu̶dyiibu̶ oy m'ixy'ajtku̶xypyu̶ñ, mu̶dyiibu̶ joot winma'añ oy yajxón mu̶dajtku̶xpu̶ñ y mu̶dyiibu̶ je̱'e̱ Espíritu Santo mu̶dajtku̶xpu̶ñ, wan adaa tuung túnu̶ch ajku̶xy. 4U̶u̶ch ajku̶xy Dios u̶u̶ch nmu̶bu̶jktzo'adu̶'u̶dzaangu̶xypy y nyaj'u̶xpu̶jk'adu̶'u̶dzaangu̶xyu̶ch je̱'e̱ Dios y'ayuuk tyu̶y'ajt.
5Nigu̶xyu̶ je̱'e̱ ayuuk ku'umaaygyu̶xy, y chi je̱'e̱ Esteban win'ijxku̶xy mu̶dyiibu̶ je̱'e̱ mu̶bu̶jku̶ñ mu̶k mu̶dajtpu̶ñ y mu̶daty je̱'e̱ Espíritu Santo, y je̱'e̱ Felipe, je̱'e̱ Prócoro, je̱'e̱ Nicanor, je̱'e̱ Timón, je̱'e̱ Parmenas y je̱'e̱ Nicolás, je̱'e̱ mu̶dyiibu̶ Antioquía tzombu̶ñ y jékyu̶p je̱'e̱ judío ja'ay kyostumbre najty ju̶jptu̶gu̶yu̶u̶yñu̶. 6Chi je̱'e̱ win'ixyjya'ay yajnú̶kxku̶xy ma je̱'e̱ apóstolestu̶jku̶ñ, y chi je̱'e̱ apóstolestu̶jk Dios mu̶bu̶jktzoogu̶xy y kyu̶'u̶ni'ixáju̶gu̶xy.
7Je̱'e̱ Dios y'ayuuk tyu̶y'ajt ni'igyu̶ najty je̱'e̱ wya'kx'adu̶'u̶ch, y je̱'e̱ mu̶bu̶jkpu̶du̶jk ni'igyu̶ najty je̱'e̱ ñimayu̶y'adu̶u̶tzku̶xy jim Jerusalén. Y u̶xtu̶ je̱'e̱ judío teedy najty nimay mu̶bu̶jkku̶xp.
Esteban majch ajku̶xy
8Je̱'e̱ Esteban myu̶dajtypy najty je̱'e̱ Dios myu̶k'ajt y kyunukx'ajtu̶ñ, y tyuumby najty je̱'e̱ mu̶jwinma'añ y ijxpe̱jt ma je̱'e̱ ja'ay ajku̶xyu̶ñ. 9Mu̶'it nije̱' mu̶dyiibu̶ ñaymyujktaakt xu̶u̶'ajtku̶xpu̶ñ je̱'e̱ tuumbu̶ ni'idoogypyu̶ ajku̶xy, mu̶dyiibu̶ tu̶ y'awa'adzpu̶dzu̶u̶mgu̶xnu̶ju̶ñ, kipxy mu̶u̶d je̱'e̱ cirene ja'ay nije̱', je̱'e̱ alejandría ja'ay, je̱'e̱ Cilicia ja'ay, y mu̶dyiibu̶ jim Asia naaxjooty tzóngu̶xpu̶ñ, ñay'amayu̶ydyu̶gu̶u̶yu̶ ajku̶xy mu̶u̶d je̱'e̱ Esteban; 10peru̶ ka'p najty mu̶madaakku̶xy, je̱' ko je̱'e̱ wij'ajt ke̱j'ajtu̶ñ najty mu̶u̶d kyapxy mu̶dyiibu̶ je̱'e̱ Espíritu Santo najty mooyu̶bu̶ñ. 11Mu̶'it je̱'e̱ ja'ay nije̱' mu̶juuygyu̶xy mu̶dyiibu̶ je̱'e̱ Esteban mu̶baad ni'iwaambe̱jtku̶xy ko najty tu̶ mu̶doogu̶xy tu̶ mu̶gapxtu̶goy je̱'e̱ Moisés y je̱'e̱ Dios. 12Du'un je̱'e̱ kajptja'ay oy yajjootma'ttaaygyu̶xy, je̱'e̱ amu̶jja'aydyu̶jk ajku̶xy y je̱'e̱ escribu̶ ja'ay ajku̶xy, chi oy du'un mu̶madaakku̶xy, majtzku̶xy je̱'e̱ Esteban y yajnú̶kxku̶xy ma je̱'e̱ judío ja'ay myu̶jjúntu̶ ajku̶xyu̶ñ. 13Chi je̱'e̱ ja'ay u̶xtaay ajku̶xy mu̶dyiibu̶ ni'iwaambé̱tu̶bu̶ñ, myu̶naañ ajku̶xy:
—Adayaaba ja'ay ju̶bu̶k axu̶u̶g adaa wa'adzpu̶ mu̶jtzajptu̶jk nigapxy nimu̶dya'agy y nandu'un je̱'e̱ Moisés y'ane̱'e̱mu̶ñ tyu̶y'ajt. 14U̶u̶ch tu̶ nmu̶doogu̶xy ko du'un myu̶na'añ ko je̱'e̱ Jesús je̱'e̱ Nazaretpu̶ jida'añ je̱'e̱ mu̶jtzajptu̶jk y ko je̱'e̱ kostumbre yajtu̶gatza'añ mu̶dyiibu̶ je̱'e̱ Moisés tu̶ xymyooyu̶mu̶ñ ajku̶xy.
15Je̱'e̱ judío tuungmu̶u̶dpu̶du̶jk y ku̶xyu̶ je̱'e̱ ja'ay mu̶dyiibu̶ najty jim u̶ñaaygyu̶xpu̶ñ, ko je̱'e̱ Esteban win'ijxpe̱jtku̶xy, chi je̱'e̱ wyiin jyu̶jp ijxu̶ ajku̶xy neby je̱'e̱ ángel wyiin jyu̶jpu̶ñ.
S'ha seleccionat:
:
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005