रोमी 11
11
इस्राएलीकुङ पाप र परमेश्वरौ दया
1होट हो डेनाङ ही परमेश्वरै इस्राएलीकोलाक स्वीकार माजाट्च न हो ट? होइन, ङा ङाल्हा न र अब्राहामौ वंशाङ जन्मडीस्च बेन्यामिन कुलुङ काट इस्राएली हो। 2परमेश्वरै सुरुलकीङ न चीन्डीच लहो भर्मीकोलाक अस्वीकार माजाट्नने। धर्मशास्त्राङ एलिया अगमवक्तौ बारेयाङ रीक्च कुरा च नाखुरीककी थाहा न ले। एलियै इस्राएलीकुङ विरोधाङ इटजाट्न परमेश्वरकी बिन्ती जाट्नन्या, 3“प्रभु, होखुरीकै नाकुङ अगमवक्ताकोलाक साटा अनि बलि चढडीच वेदीको भत्कडीम याहा, जीवाच चहिँ ङा मट्टै हो र ङाकीर होखुरीकै साट्की पामन ले।”#१ राजा १९:१०,१४ 4परमेश्वरै होसकी डेया, “ङै ङाल्हौ लागि बाल देवताकी पूजा माजाट्च सात हजार भर्मीकोलाक जोगडीम डामे।” 5इटजाट्न न चाहाँ र परमेश्वरौ अनुग्रहै भाक्च होसकोकी विश्वास जाट्च इस्राएलीकुङ मार्जा समुह अझै र बाँकी ले। 6इसे परमेश्वरौ अनुग्रहै छान्च हो, होखुरीकै सेछ काम जाट्च बाटै होइन, होखुरीकुङ काम लकीङ हो डेनाङ च परमेश्वरौ अनुग्रह व्यर्थ छान्च लेया।
7होट हो डेनाङ इच्यौ अर्थ ही छाना ट? इस्राएलीको परमेश्वरौ म्याहासाङ धर्मी ठहरीस्की पानाङ र होखुरीक धर्मी ठहरीस्की माह्योका, तर होसकै भाक्च थोरै इस्राएलीको मट्टै धर्मी ठहरीसा। अरु इस्राएलीको चहिँ कठोर छानार होसकुङ कुरा सेन र मासेया। 8धर्मशास्त्राङ रीक्ङने, “परमेश्वरै होखुरीककी हीर थाहा माढीन्च आत्मा याम्हने।” अनि “मीमीककी डाङ र माडाङ्च र मेनेकेपकी सेर मासेच खास्न याम्हने र होखुरीक चाहाँसम्म र होङ्च न ले।”#व्यवस्था २९:४; यशैया २९:१०
9इटजाट्न न दाऊद राजा डेले,
“होखुरीकुङ भोज पासो र धराप छान्ख्यो,
र होखुरीकुङ भोज दण्ड याछ कुरा छान्ख्यो।
10होखुरीकुङ मीमीकको डाङ्की माह्योक्च जाट्न अन्धा छान्ख्यो,
र होखुरीकुङ मीचारी सधैँभरियो लागि कुप्रो छान्न ङुख्यो।”#भजनसंग्रह ६९:२२-२३
11होटबाटै ङा डेले, ही इस्राएलीको सोकी न माह्योक्च जाट्न कुह्रुछ होट? अ हँ होइन। तर इस्राएलीकुङ पापै जाट्नाङ अन्यजातिकै मुक्ति डुप्मने र इस्राएलीकै इसे डाङार डाह जाट्ख्यो डेच परमेश्वरौ इच्छा लेया। 12इस्राएलीकै पाप जाट्च बाटै संसारुङ भर्मीकै कह्राङ्छ आशिष डुपा, अनि होखुरीकै मुक्तिकी इन्कार जाट्च बाटै अन्यजातिकै मुक्ति डुपा डेनाङ पट्ट न इस्राएलीकै मुक्ति डुप्की हो डेनाङ च झन् वास्टै आशिष राछ लेया औला।
अन्यजातिकुङ मुक्ति
13ङा चाहाँ नाखुरीक अन्यजातिकोलाक डेमन ले। ङा अन्यजातिकुङ लागि भाक्च प्रेरित छान्चबाटै ङा ङौ कामकी पूरा जाट्की ह्योक्ठर बल जाट्ले। 14ङा याङ्च र आशा जाट्ले, ङै जाट्च काम डाङार ङौ लहो न इस्राएली जातिकोलाक डाह सेयार कोइ-कोइ परमेश्वर पट्टी ल्हेस्की ह्योक्ले की? 15हीजैडेनाङ इस्राएलीकै परमेश्वरकी इन्कार जाट्नाङ संसारुङ भर्मीको होसकोखाटा खाट्की राहा डेनाङ परमेश्वरै इस्राएलीकोलाक लहो न खास्नाङ झन् सीचकै जीवन डुप्नाङ लेखा न छान्ने।
16पहिला जोच काट रोटो भेटीयो रुपाङ परमेश्वरकी चढडीया डेनाङ होसे पट्ट न रोटो पवित्र छान्ने। होङ्च न सीङौ म्यार्टुङौ जरा पवित्र ले डेनाङ पट्ट न हाँगाको र पवित्र छान्ने। 17कुडीक हाँगाको ग्याहार नुङ्नाङ लेखा न कुडीक इस्राएलीको र परमेश्वरकी डासार नुङा। तर नाखुरीक अन्यजातिको चहिँ जङ्गली जैतूनौ हाँगाकी कलमी जाटार असल जैतूनौ हाँगाङ छ्याछबाटै होसे असल जैतूनौ म्यार्टुङौ जरा लकीङ न शक्ति र जीवन डुप्मने। 18होटबाटै होसे ग्याहार नुङ्च हाँगाको ल्याक्च यहूदीको डेनाङ कान सेछ ले डेयार घमण्ड माजाट्नी। हीजैडेनाङ नाखुरीक न्हुइङ छ्याछ हाँगाको मट्टै हो, नाखुरीकै जराकी माढान्नने, तर जरै चहिँ नाखुरीककी ढान्नने।
19तर नाखुरीक डेले औला, “ङा कलमी छ्याखी डेयार न होसे हाँगाको ग्याम्हन्या।” 20इसे कुरा साँचो हो, यहूदीकै परमेश्वरकी विश्वास माजाट्चबाटै होखुरीक ग्याहार नुङ्च हाँगाको लेखा छान्च हो। तर होखुरीकुङ ठावाङ नाखुरीकै विश्वास जाटा र कलमी छ्याम्हने। होटबाटै घमण्ड माजाट्नी बरु परमेश्वरखाटा बीह्रीनी। 21परमेश्वरै साँचो हाँगाकोलाक च बाँकी माडासा डेनाङ नाखुरीककी र बाँकी माडास्ले। 22परमेश्वर कुडीक दयालु ले र कुडीक कठोर र ले डेच कुरा सेम्हजा विचार जाट्नी। होसको विश्वास माजाट्चकुङ लागि कठोर ले। तर नाखुरीक होसकुङ अनुग्रहाङ ङुम ङुवा डेनाङ होसको दयालु ले। नभा च नाखुरीककी र चेम लोछ हाँगाकी लेखा न लोम्हकाले। 23होटजाट्न न इस्राएलीकै होखुरीकुङ अविश्वासकी डासार विश्वास जाटा डेनाङ, पहिला होखुरीक लेच ठावाङ न परमेश्वरै कलमी छ्याक्ले, हीजैडेनाङ परमेश्वरखाटा पहिला लेच ठावाङ न फेरि छ्याक्की ह्योक्च शक्ति ले। 24नाखुरीक अन्यजाति भर्मीको चहिँ जङ्गली जैतूनौ म्यार्टुङ लकीङ चेम राक्च हाँगा लेखा न ले। होट छान्नाङ स्वभाव माखाट्नाङ र बारीयाङ रोप्डीच असल जैतूनौ हाँगाङ कलमी छ्याम्हने। इस्राएलीको चहिँ बारीयाङ रोप्डीच असल जैतूनौ हाँगा ल्याक्च न हो। होटबाटै होखुरीककी फेरि राकार लहो न म्यार्टुङाङ कलमी छ्याक्की परमेश्वरकी झन् सजिलो छान्ने।
पट्टको मीटाक परमेश्वरौ दया
25ङौ विश्वासी डाजेभाइको र डैबहिनीको, काट रहस्य नाखुरीककी थाहा छान्ख्यो डेम ङा मीमन जाट्ले। होसे नाखुरीककी थाहा छाना डेनाङ नाखुरीकै लहो न लागि घमण्ड माजाट्ले। रहस्य याङ्च ले, अन्यजातिको परमेश्वर लेठाङ राखी पर्च जति राम्ह माभ्याठर यहूदीकुङ हृदय कठोर छान्ने। 26होटै न्हुइङ पट्ट न इस्राएली जातिको जीवाले। धर्मशास्त्राङ रीक्ङने,
“सियोन लकीङ मुक्ति याछ राल्हे,
याकूबौ वंशकी दुष्ट काम लकीङ ल्हेटाक्ले।”#यशैया ५९:२०
27अनि परमप्रभु डेले,
“होखुरीकुङ पापकी क्षमा जाटार ङै होखुरीकखाटा छ्याक्च करारकी पूरा जाट्ले।”#यर्मिया ३१:३३-३४
28सेछ समाचारकी विश्वास माजाट्चबाटै इस्राएलीको परमेश्वरौ दुश्मन छान्नने। होट छान्नाङ नाखुरीक अन्यजातिकोलाक फाइदा छान्च हो। तर होखुरीकुङ पुर्खाकोलाक परमेश्वर लहे न भाक्चबाटै होसकै चाहाँसम्म र होखुरीककी प्रेम जाट्नने। 29हीजैडेनाङ परमेश्वरै याछ आशिष माल्हेट्ले र होसकै आर्घाचकोलाक सेन र माडास्ले। 30खायाक नाखुरीक अन्यजातियुङ भर्मीको परमेश्वरौ आज्ञाकी मामन्डीचको लेया, तर चाहाँ इस्राएलीकै आज्ञा मामन्डीचबाटै परमेश्वरौ दया नाखुरीकै डुप्मने। 31चाहाँ परमेश्वरौ आज्ञा मामन्डीच इस्राएलीकै र न्हुइङ चहिँ दया डुप्की ह्योक्ख्यो डेम परमेश्वरै नाखुरीककी दया टान्हाक्च हो। 32पट्ट भर्मीकै दया डुप्ख्यो डेम परमेश्वरौ आज्ञा मामन्डीच होखुरीक पट्टकी अटेरी छान्न ङुकी डास्न याहा।
परमेश्वरकी महिमा
33आहा! परमेश्वरौ धन कुडीक वास्टै! होसकुङ बुद्धि र ज्ञान कुडीक गहिरो ले! होसकै जाट्च निधो सुये बयान जाट्की ह्योक्ले? होसको ह्वाच लाम सुये वार्खी ह्योक्ले?#यशैया ५५:८
34परमप्रभुओ मीमनकी सुये वार्न्हे र?
होसकोकी सल्लाह याखी ह्योक्च सु ले र?#यशैया ४०:१३
35सुये होसकोकी हीर ठोक याम्हने
अनि होसकै न्हुइङ सुकी ल्हेट्की पर्ले र?#अय्यूब ४१:११
36पट्ट ठोक होसकुङ न सृष्टि हो। होसे पट्ट न ठोक होसको लकीङ र होसकुङ लागि न हो। होसकुङ सधैँभरि महिमा छान्न ङुख्यो। आमेन।#१ कोरिन्थी ८:६
S'ha seleccionat:
रोमी 11: EMGP
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2025 by Mother Tongue Translators Society and Wycliffe Bible Translators, Inc.