Nʋnʋlii 18

Pɔɔlʋ yɛ ‑mä Kolɛɛtɩ glɔ 'mö mö

1Pɔɔlʋ 'bhööä ‑mä Atɛɛnɩ, ‑glɔ 'kɔdʋ ‑mumuu ‑bhlʋ wa laa Kolɛɛtɩ 'n ɔ yiɛ ‑mä mö. 2‑Mä ‑glɔ 'la 'mö, ‑mä ɔ ghlɩɛ Zwiiföyi ‑bhlʋ, ɔ nglɩɛ Akilasɩ, ɔ 'lɛnglɛ a nglɩɛ Plisilɩ. Azii‑bhölɩɩ 'mö a pɩɔ wa laa Pɔɔ, ‑mä wa gwälɩnɩɛ Akilasɩ. 'Lili 'wʋ ɔ yiɛ. Yitalii‑bhölɩɩ 'mö a ‑glɔ 'kɔdʋʋ wa laa Ghlɔɔmö, ɔ ‑nyɛ 'ɔ 'lɛnglɛ 'sɔ ‑mä wa glɩ a‑a. ‑Maa ‑mä a 'bhlɩlowli 'kɔdɔɔ wa laa Klodɩ, ɔ lɛ Zwiiföwaa 'wuë nɩ 'bhöö mä Ghlɔɔmö, zaa, ɔ ‑nyɛ ɔ 'lɛnglɛ 'sɔ, 'n wa yiɛ ‑mä Kolɛɛtɩ yi, 'n Pɔɔlʋ yuëë ‑mä ghlɩnɩ. 3Akilasɩ, ‑gligbïï wa zʋä nɩmakwi 'wluu, 'mö ɔ sɩbhää. Libho 'la 'mö Pɔɔlʋ ‑yimöä zaa, Akilasɩ a 'ligbë 'mö ‑lɛ ɔ glɩnɩa'aa, ɔ ‑nyɔɔ 'sɔ 'n wa nʋä libho. 4‑Maa sɛɛ ‑gwlɛnɩzlɩ ghlɛɛ 'yize, ‑mä a Zwiiföwaa 'a Lagɔbuduu 'mö, 'n Pɔɔlʋ möä ‑mä, ‑wa yiɛ ‑mä Lagɔ bʋbɔɔ, ɛ yi Zwiiföwa oo, ɛ yi Glɛköwa oo, wa 'wuë 'n ɔ nyʋää Lagɔ 'a wɛlɩɩ, wa 'kä Zezwii a ‑nʋä zʋ. 5Sa'a ‑këë Silasɩ ‑nyɛ Timotee 'sɔ, 'n wa yia'aa ‑mä Masedʋanɩ 'bhöö, 'n wa yiɛ ‑mä Kolɛɛtɩ yi. Wa yiɛ, 'n Pɔɔlʋ yiɛ ‑bhlɛ ‑gligbïsɩbhälibhoo kɛ'mö ‑sɛ, ɔ 'kä Lagɔ 'a wɛlɩɩ a 'yize bhïla. Sɛ'ɛ ɔ nyɛɛ gbëaa Zwiiföwaa 'dɩ nɩɩ, Zezwii mɔɔ glɩnɩɛ Puënyɔɔ Lagɔ ‑sɛɛ ‑lɛ. 6‑Maa Pɔɔlʋ 'kʋä ‑sɩbhä 'dɩ 'nyɛɛ, wa lɛ yio ɔ kää 'n wa bhïlanɔ'ɛɛ wɛlɩzoku, ‑sɩbhä a za 'n ɔ yiɛ 'ɔ ‑banɩɩ 'mö ‑sɛ 'n ɔ yiɛ 'mö vïti, ɔ lɛ naa: «Lagɔ 'a 'pʋpʋɛ, ɛ 'nanyɩ 'wʋ ghlɛ a ‑kä tʋʋ, ɛ'ɛ ‑bhö na gbʋ, a 'yize a ‑liɛ. 'Bhöönɩa'a ‑sɩkaa dɛ'ɛ, ‑waaa Zwiiföwa glɩnɩ 'mö n 'käa'aa Zezwii 'a wɛlɩɩ 'nyɛɛ mö.» 7Ɔ 'nyʋä sa'a 'dɩ 'wëë, 'n ɔ yiɛ ‑mä Lagɔbuduu 'mö 'wlʋ. Glɛköyi ‑bhlʋ ‑ɔ bʋbɔmöä Zwiiföwaa a saa Lagɔ, 'n ɔ yiɛ ‑lɛ ɔ da'a glɩnɩɛ mö. Nɩkpɛ 'la, ɔ nglɩɛ Titusɩ Zwitusɩ, 'ɔ ‑buduu ‑lɛ ‑wʋ ‑wʋä Zwiiföwaa 'a Lagɔbuduu yɔwʋ. 8Ɔ glɩ ‑lɛ, ‑mä a Lagɔbuduu a 'yukugänɩnyɔɔ wa laa Klipusɩ, ɔ ‑nyɛ 'ɔ ‑kosuu yɔwʋ a ‑nʋa 'wuë 'sɔ, 'n wa yiɛ Zezwii a ‑nʋä 'zʋ. ‑Mä Kolɛɛtɩ a nɩkpa ‑mumuë a ‑bɛ, ‑wa ‑pʋnɩmöä Pɔɔlʋ 'a Lagɔwɛlɩɩ 'yukwlii, 'n wa yiɛ Zezwii a ‑nʋä 'zʋmö. Wa 'wuë 'n Pɔɔlʋ yuëë 'wlu wɔlʋ.

9'Ylɩ ‑bhlʋ 'mö, sɛ'ɛ sabʋsɛ, 'n Pɔɔlʋ 'a yilaa yiɛ do, 'n ‑Alowli yoo 'ylimö ghlɛ, ɔ lɛ naa: «Pɔɔlʋ, tɩ ngänɩ, bhïla 'na wɛlɩɩ 'yize, tɩ 'wʋ gɔɔ. 10‑Maa na'bhë n ‑nyɛmö ‑bhlinɩ 'wʋ, mä'ä glɔ nɩ 'mö, ‑bɛ 'naa ‑kamö kɛ 'wʋ fä. Nɩkpaa ‑wa glɩnɩɛ na ‑nʋä, wa ‑zu mä'ä tenyii.» 11Pɔɔlʋ glɩ ‑mä Kolɛɛtɩ a ‑glɔ 'la 'mö ‑këë 'ylʋba ‑bhlʋ 'kïbhë. Sɛɛ zila zɩɛ 'yize, ‑sɩbhä ɔ 'cɩaa ‑mä a ‑nʋa Lagɔ 'a wɛlɩɩ.

Zwiiföwaa yɛ Pɔɔlʋ 'klɛ

12‑Lɛ a 'tɛnyɩ 'la 'mö, 'n nɩkpɛ ‑mɔmɔɔ yiɛ Akayii‑bhölɩɩ a 'kämanɩnyɔ 'zʋ. Nɩkpɛ 'la, ɔ nglɩɛ Galiɔɔ. Ɔ 'tɛnyɩ 'mö, 'n Zwiiföwaa yiɛ mä ‑bhʋlʋ gwë 'paanɩ. 'N wa yiɛ Pɔɔlʋ ‑lɛ ‑zijlituwaa a 'yila 'klʋ kwä. 13Wa lɛ naa: «Nɩkpɛ nɩ ɔ yɩbhä ɔ 'kä nɩkpa 'wlumö nyima, sɛɛ ‑a'a gböö 'nɩɛ gbää, wa 'kä ‑sɩbhä Lagɔ bʋbɔ.» 14‑Maa Pɔɔlʋ lɛ 'kɩ a ‑gömö ‑sɛ cuu, 'n Galiɔɔ yiɛ 'wʋ ‑sɔ, ɔ lɛ naa: «Zwiiföwanyɩ, n 'kɩ 'nʋ, ‑maa ɛ ‑kä a 'kulɩbhägbʋʋ, ɛ ‑kä a 'yɛ wɛlɩ 'kädɩ ‑mimii, n yeanyɩ a 'yukwli ‑pʋnɩ. 15‑Maa Lagɔwɛlɩ a kpɛnɩɛ 'mö 'n a kpɛnɩɛ 'päpänglɩ 'mö, 'a gböö a wɛlɩɩ, 'n a kpɛni'ɛɛ 'mö zaa, ‑mi'la, anyɩgäsɛ a nɩ ‑dɩni 'mö, ‑maa n'n‑ä ‑mä 'kïbhë ‑kä.» 16'N ɔ yuëë ‑lɛ ‑zijle 'wʋ kpëti. 17Ɔ kpëtuëë 'wëë, nɩkpaa 'wuë ‑wa suä ‑lɛ, Zwiiföwaa 'a Lagɔbuduu a 'yukugänɩnyɔɔ wa laa Sɔsɩtɛɛnɩ 'n wa yoo 'wʋ sɛ 'sulo, ‑lɛ ‑zijlituwaa a 'yila 'klʋ a'bhë, 'n wa yoo ‑lɛ bhɔtɔnɩ. ‑Maa Galiɔɔ 'nuëë tɛkäsɛ ngli pälɩ 'lɩlɩlɩ.

Pɔɔlʋ yɛ ‑mä Atiɔsɩ 'bɩwʋ mö

18Pɔɔlʋ gwälɛ ‑mä Kolɛɛtɩ 'tɩɩ. 'N ɔ yia'aa Zezwii a ‑nʋa ‑wa ‑wʋä ‑mä kɩnɩ, 'n ɔ yiɛ batoo 'wʋ 'libhï, ɔ ‑nyɛ Akilasɩ ‑nyɛ Plisilɩ 'sɔ, wa 'kä ‑mä Silii‑bhölɩɩ 'mö mö. ‑Maa Pɔɔlʋ, Lagɔ 'mö ɔ 'zʋ a‑a wɛlɩ 'yukwli 'mö, zaa wa lɛ 'kää batoo 'wʋ 'libhïë yii, ‑glɔ wa laa Saklee, ‑mä wa kpälɩnɔɔ 'wlu 'wë, 'n wa yiɛ mö. 19Wa möä, glɔ ‑bhlʋ wa laa Efɛɛzɩ, 'n wa yiɛ ‑mä ghlɛ. ‑Mä ‑glɔ 'la 'mö, ‑mä Pɔɔlʋ tɩa'aa Akilasɩ ‑nyɛ Plisilɩ 'sɔ, ɔ 'kä mö. ‑Maa ɔ 'kää ‑mä 'bhööä yii, ‑mä a Zwiiföwaa a Lagɔbuduu 'mö, ‑mä ɔ möä ɔ ‑nyʋä 'sɔ 'n wa yiɛ 'dɩ ‑sɛ. 20Ɔ 'nyʋää 'sɔ wa ‑sɛɛ 'dɩ 'wëë, wa lɛ ɔ nɩ ‑sɛ ‑mä 'ylɩya, ‑maa ɔ'ɔɔ 'wʋ nglu. 21Ɔ lɛ naa: «N yɛɛ mö, ‑maa Lagɔ ‑kä ngluu, n yi zɩla'a 'wʋ 'sɔ yinɩ.» 'N ɔ yia'aa batoo 'wʋ 'libhï 'n ɔ yiɛ ‑mä Efɛɛzɩ 'bhöö. 22Ɔ möä, ‑mä Sezalee glɔ 'mö, ‑mä batoo 'sibhanɔɔ sɛ, 'n ɔ yiɛ ‑mä Zeluzalɛɛmö mö, Zezwii a ‑nʋa ‑wa ‑wʋä ‑mä, ɔ 'kʋä bhälɩ. Ɔ bhäluë 'wëë, 'n ɔ yiɛ Atiɔsɩ mö. 23Ɔ ‑sɛ ‑mä 'ylɩya, 'n ɔ yiɛ 'wʋ ‑sɔ, 'n ɔ yiɛ mö. Galatii‑bhölɩɩ ‑nyɛ Flizii‑bhölɩɩ 'sɔ 'mö, 'n ɔ yiɛ ‑mä ghlɛnɩ. Zezwii 'a ‑gänɩwaa 'wuë ‑wa ‑wʋä ‑mä, ‑sɩbhä ɔ pʋää swɩ nyɛmʋ 'mö.

Apolɔsɩ yɛ ‑mä Efɛɛzɩ ‑nyɛ Kolɛɛtɩ 'sɔ 'mö

24‑Lɛ a 'tɛnyɩ 'la 'mö, ‑mä Efɛɛzɩ glɔ 'mö, Zwiiföyi ‑bhlʋ mɔɔ yiɛ ‑mä. ‑Mä Ezipötɩ‑bhölɩɩ 'mö a ‑glɔɔ wa laa Alɛzadlii, ‑mä wa gwälɩnɔɔ, ɔ nglɩɛ Apolɔsɩ. Nɩkpɛ 'la, ɔ ‑kä bhïlaa, 'ɔ wɛlɩɩ dlɩ yɩ pluä. Lagɔ 'a 'bɔgʋʋ 'mö a wɛlɩɩ, ɔ ‑yii tenyii. 25‑Alowli Zezwii 'a 'yioo, wa 'cɩamɔ'ɛ wʋ wɛlɩɩ, ɔ ‑kɩɩ bhïlaa, ku'mösusɛ ɔ bhïliɛ, sɛ ɔ ‑yiiɛ, ‑sɩbhä ɔ 'cɩɩɛ 'tɩɩ. ‑Maa Zaa 'a 'wluwɔlʋwlɛɛ a 'yize 'mö ɔ ‑yiɛ. 26Ɔ ghlɛɛ ‑mä, ‑mä a Lagɔbuduu 'mö, Zezwii 'a wɛlɩɩ, 'n ɔ yiɛ ‑mä gbëaa bhïlanɩ. Ɔ ‑wiiɛ bhïla dɔ'wʋʋ, Plisilɩ ‑nyɛ Akilasɩ 'sɔ, wa ‑pʋnɩmɔɔ a 'yukwli. Zaa, ɔ bhïlaa 'wëë, 'n wa yoo wäzɩ, 'n wa yoo Lagɔ 'a 'yioo a wɛlɩɩ sasɛ dlɩ ‑gömö ‑sɛsɛnɩ. 27Yɩ 'plɩɛ sa'a 'wëë, Apolɔsɩ lɛ naa, ɔ 'kä ‑mä Akayii‑bhölɩɩ 'mö mö. Zezwii 'a ‑gänɩwaa ‑wa ‑wʋä ‑mä Efɛɛzɩ lɛ naa, ‑n ‑kä ‑mä möö, yɩ nɛnɩ. 'N wa yiɛ Zezwii a ‑nʋa ‑wa ‑wʋä ‑mä Akayii‑bhölɩɩ 'mö 'bɔgʋ 'wʋ 'cɛlɩ, wa 'kä sasɛ Apolɔsɩ päla. Ɔ ghlɛɛ ‑mä, Lagɔ a'bhë 'pɔ 'nyu zaa, Zezwii a ‑nʋa ‑wa ‑wʋä ‑mä, 'n ɔ yuëë tenyii swɩ nyɛmʋ 'mö 'pä. 28Miɛ nɩɩ, nɩkpabhë a 'yila 'klʋ, ‑lɛ ɔ tulanɩɛ Zwiiföwaa 'ylimö nɩɩ, Lagɔ 'a wɛlɩɩ 'a 'bɔgʋʋ wa ‑suä wa'bhïï, mʋʋ zʋä Zezwii 'a wɛlɩɩ kɛ ‑gömö nɩɩ, Puënyɔɔ Lagɔ ‑sɛɛ ‑lɛ 'mö ɔ glɩnɩɛ. ‑Maa ɔ ‑kä bhïlaa, 'ɔ wɛlɩɩ dlɩ yɩ pluä zaa, kïbhë ‑ma Zwiiföwaa 'kɩɛ ‑gömö 'zʋʋ, a'aa ‑bhölɩ.

S'ha seleccionat:

Nʋnʋlii 18: bet

Subratllat

Copia

Compara

Comparteix

Vols que els teus subratllats es desin a tots els teus dispositius? Registra't o inicia sessió

Més informació sobre BdG2

Nʋnʋlii 18

Versets bíblics populars de
Nʋnʋlii 18

Escolta Nʋnʋlii 18

La Bíblia:

Bété, Guiberoua

Versió: BdG2 - bet

Nʋnʋlii 18

Nʋnʋlii 18

Versets bíblics populars de Nʋnʋlii 18

Escolta Nʋnʋlii 18

La Bíblia:

Bété, Guiberoua

Versió: BdG2 - bet

Nʋnʋlii 18

Versets bíblics populars de
Nʋnʋlii 18