Nʋnʋlii 17

Pɔɔlʋ ‑nyɛ Silasɩ 'sɔ wa yɛ ‑mä Tesaloniikö glɔ 'mö ghlɛ

1Pɔɔlʋwa 'bhööä ‑mä Filiipö, ‑gwlɩ ‑mimii 'sɔ, ‑mu a nglɩɛ Afipoliisɩ, ‑mu a nglɩɛ Apolonii, yɩ 'mö 'n wa yiɛ ‑mä 'wʋ 'tʋ, glɔ ‑bhlʋ wa laa Tesaloniikö, 'n wa yiɛ ‑mä ghlɛ. ‑Mä ‑glɔ 'la 'mö, Zwiiföwa a Lagɔbudu ‑wʋ ‑mä, 2‑gwlɛnɩzlɩ ghlɛɛ, 'n Pɔɔlʋ yiɛ 'ɔ 'kwädlɩ a saa ‑mä Lagɔbuduu 'mö mö, nɩkpabhë a 'yila 'klʋ 'n ɔ zɛlɩnɩɛ ‑lɛ Lagɔ 'a wɛlɩɩ a 'bɔgʋʋ 'mö, ɔ ‑nyɛ Zwiiföwaa 'sɔ 'n wa kpɛnɩɛ Lagɔwɛlɩɩ 'mö. Ɔ 'zʋnɩ ‑sɩbhä Zwiiföwaa a ‑gwlɛnɩzila ta 'mö. 3'N ɔ yuëë sʋlʋnɩ nɩɩ, sɛɛ Lagɔ 'a wɛlɩɩ gbää a dɔ'wʋ, Puënyɔɔ Lagɔ ‑sɛɛ ‑lɛ, ɔ kä ɔ 'kä 'zwɩ a ‑bɛ zi, ɔ 'kä 'ku, ɔ 'kä glu 'wlʋ ‑sɩbhä Lagɔ 'yɩbhɩɛ. ‑Lɛ a Puënyɔ 'la, 'mö wa laa Zezwii. N 'kanyɩ ɔ 'dɩ 'nyɛ, nza n yiɛ. 4Pɔɔlʋ gbää sa'aa, Zwiiföwaa a gla'mö a ‑mumuë 'n wa yiɛ 'ɔ wɛlɩɩ 'wʋ nglu, 'n wa yiɛ Pɔɔlʋ ‑nyɛ Silasɩ 'sɔ ‑gömö yinɩ. Glɛköwa ‑mumuë ‑wa bʋbɔmöä Zwiiföwaa a saa Lagɔ, wa gla'mö a ‑nʋä a ‑bɛ, 'n 'nglɩmöngwlɩ ‑mumuë a ‑bɛ 'yɛ, wa 'wuë 'n wa yiɛ ‑sɩbhä Zezwii a ‑nʋä zʋ.

5‑Maa Zwiiföwa ‑muë'la wabhlɩ, wa 'yiɛ 'ylɩmöö, 'yli yɩ këluëë tenyii. 'Fʋ a nɩkpazoku ‑mumuë ‑wa nɛmöä ‑mä 'ywii 'wʋ, 'n wa yuëë 'wʋ 'libhï, wa ‑nyʋä 'sɔ 'n wa yiɛ ‑glɔɔ glu ‑sɛ. Zwiiföwa 'la, Zezwii a ‑nɔ ‑bhlʋ wa laa Zazɔɔ 'n wa yiɛ ‑mä 'ɔ 'ligbë 'mö Pɔɔlʋwa yɩlɩɛ mö, wa 'kʋä ‑mä ‑bʋbʋʋ a 'yila 'klʋ kwä. 6Wa möä, wa 'nuë ‑mä ghlɩ zaa, 'n wa yiɛ Zazɔɔ ‑nyɛ Zezwii a ‑nʋä ‑mumuë 'sɔ 'wʋ gbulo, 'n wa yuëë ‑mä ‑zijlituwaa a 'yila 'klʋ kwä. Wa lɛ naa: «Nɩkpa 'la, wa yɛ ‑gwlɩɩ 'wuë glu ‑sɛ 'wë, ‑sɩkaa a dɔ'wʋ, wa yɛ mä'ä ‑a'bhele ghlɛ. 7Zazɔɔ mɔɔ pölʋää. Wa kii 'wuë, 'wa 'zʋzʋsaa 'mö, 'bhlɩlowli 'kɔdɔ 'a ‑lɔɔ 'mö wa sɛɛ 'klʋkpamö, wa lɛ 'bhlɩlowli ‑mɔmɔɔ ‑bhölɩ, 'mö wa laa Zezwii.» 8Wa gbää sa'aa, ‑wa 'titanɩɛ ‑lɛ 'wluu, wa ‑nyɛ ‑zijlituwaa 'sɔ, 'n yɩ yuëë dila ‑didi päla. 9'N wa yiɛ Zazɔɔ ‑nyɛ Zezwii a ‑nʋä ‑muë'la 'sɔ 'dɩ 'nyɛ nɩɩ, wa nɩ 'pɛnɩ moni. Wa 'pɛnɛɛ 'wëë, 'n wa yuëë 'yi 'tatinɩ.

Pɔɔlʋ ‑nyɛ Silasɩ 'sɔ wa yɛ ‑mä Belee glɔ 'mö ghlɛ

10Yɩ 'plɩɛ sa'aa 'wëë, ‑lɛ a sabʋ ‑bhʋlʋ ‑kpɔ 'la 'mö, Zezwii a ‑nʋa ‑wa ‑wʋä ‑mä Tesaloniikö 'n wa yiɛ Pɔɔlʋ ‑nyɛ Silasɩ 'sɔ 'yio 'nyɛ, ‑glɔ ‑bhlʋ wa laa Belee 'n wa yiɛ ‑mä mö. Wa ghlɛɛ ‑mä, ‑mä a Zwiiföwaa 'a Lagɔbuduu 'mö, 'n wa yiɛ ‑mä mö. 11‑Maa Belee a Zwiiföwaa wabhlɩ, wa päla sasɛ Pɔɔlʋ ‑nyɛ Silasɩ 'sɔ, wa zi Tesaloniikö a ‑nʋa 'wʋ. Sasɛ wa ‑pʋnɩɛ Lagɔ 'a wɛlɩɩ 'yukwli. Sɛɛ zila zɩɛ 'yize, Lagɔ 'a wɛlɩɩ a 'bɔgʋʋ 'mö wa zɛlɩɛ 'mö. Wɛlɩɩ Pɔɔlʋ nyʋää, wa 'kɩ 'ylɩmö, yɩ ‑kä ‑tiamö a ‑li glɩnɩ wa 'kä sɛ ‑yi. 12Wa gla'mö a nɩkpa a ‑bɛ, 'n wa yiɛ Pɔɔlʋwa 'a wɛlɩɩ 'wʋ nglu. ‑Mä Glɛköwaa gla'mö, ngwlɩ a 'kɔkɔmlɛ ‑wa kää dɛsɛ 'n nyɩbhɛlɩ a ‑bɛ kökä, mʋa ngluä Lagɔwɛlɩɩ 'wʋ. 13‑Maa ‑mä Tesaloniikö a Zwiiföwaa, wa 'nʋä nɩɩ, ‑mä Belee glɔ 'mö Pɔɔlʋ ‑wʋ'ɛ ‑mä Lagɔwɛlɩɩ bhïlanɩ dɔ'wʋʋ, 'n wa yiɛ ‑mä yi. Wa ghlɛɛ ‑mä, 'n wa yiɛ ‑mä a nɩkpaa Pɔɔlʋ ngli 'zʋnɩ 'n wa yi'ɛɛ ‑mä a ‑glɔɔ glu ‑sɛ. 14‑Sɩbhä a za, Zezwii a ‑nʋa ‑wa ‑wʋä ‑mä, yɛ'mötɩtasɛ 'n wa yiɛ Pɔɔlʋ 'wʋ 'libhï, ‑mä gïnyɛ yɔwʋ a 'bɛyɩ 'n wa yoo ‑mä 'yio 'wʋ kwä ɔ 'kä batoo 'wʋ 'libhï ɔ 'kä mö. ‑Maa Silasɩ ‑nyɛ Timotee 'sɔ, ‑mä wa tʋʋä Belee. 15‑Wa kwää Pɔɔlʋ 'yio 'wʋʋ, wa ‑nyɔɔ 'sɔ wa möä ‑këë, ‑glɔ 'kɔdʋ ‑bhlʋ wa laa Atɛɛnɩ, 'n wa yiɛ ‑mä ghlɛ. ‑Mä wa tɩa'aa Pɔɔlʋ, 'n wa yiɛ 'wlu sɩbhä 'n wa yiɛ ‑mä Belee 'bɩwʋ mö. ‑Maa wa 'kää 'wlu sɩbhää yii, sɛ'ɛ Pɔɔlʋ suluëë 'dɩ nɩɩ: «A ‑kä möö, Silasɩ ‑nyɛ Timotee 'sɔ, a nɩ 'nyʋä dɩ, wa nɩ 'päpänɩ 'wʋ wa 'kä yi.»

Pɔɔlʋ yɛ ‑mä Atɛɛnɩ glɔ 'mö mö

16Silasɩ ‑nyɛ Timotee 'sɔ 'nɩɛ ‑bhlɛ yi zaa, Pɔɔlʋ ‑kʋnuë ‑mä Atɛɛnɩ 'yize. Ɔ ‑wʋ ‑mä, ‑mä a ‑nʋa, 'wa 'fʋ a ‑lagwɩɩ wa bʋbɔɔ, ɔ 'yɩɛ yɩ zunɔɔ 'ylɩmöö, 'n nyɛmʋ a'bhë yoo 'wʋ lu. 17‑Mä a Zwiiföwaa 'a Lagɔbuduu 'mö, nɩkpaa ‑wa yiɛ ‑mä Lagɔ bʋbɔɔ, ‑wa glɩnɩɛ Zwiiföwa oo, ‑waaa Zwiiföwa glɩnɩ oo, wa 'wuë, ‑sɩbhä ɔ sɛsɛnuëë Lagɔ 'a wɛlɩɩ dlɩ ‑gömö. ‑Mä Lagɔbuduu 'mö a 'yize ‑mä ɔ 'niɛ bhïlanɩ. ‑Maa sɛɛ zila zɩɛ 'yize, nɩkpaa ɔ ‑nyɛɛ gbanɩɛ ‑mä 'du 'mö 'wʋʋ, ‑sɩbhä ɔ 'nyɛmuënyɩɛ. 18‑Mä ‑glɔ 'la 'mö, 'bɔgʋyiwa 'kädɩ a ‑zɩkpö 'sɔ ‑wʋ a‑a ‑mä, ‑mämaa a nglɩɛ Epikulɩwa, ‑mämaa a nglɩɛ Sɩtoyiwa. ‑Zɩkpö 'la 'sɔ ‑kpɔ 'mö a nʋä ‑mumuë, 'n wa ‑nyɛ Pɔɔlʋ yiɛ kpɛnɩ. Wa gla'mö a ‑mumuë, wa lɛ naa: «‑Gëbësɛnyɔ ‑mɔ nɩ, 'saa ɔ bhïla bhä da'a a bha 'nɩ?» ‑Mumuë lɛ naa: «Ɛ 'kä ‑bhɩɛ käbölagwɩ ‑mimii a 'dɩ ɔ ‑yinyɩ 'nyɛɛ.» Nyɩasɛ wa'aa sa'a nʋ, ‑maa Pɔɔlʋ ‑kä bhïlaa, ɔ bhïla Zezwii a dɛ, 'n ɔ bhïlaa gluwlʋwlɛ a dɛ, nza wa nʋä ‑sɩbhä. 19‑Mä ‑glɔ 'la 'mö a ‑gäga ‑bhlʋ 'wlu, ‑zijlitunɩdɛ ‑wʋ ‑mä, ‑mä wa laa Alewopaazɩ. 'Bɔgʋyiwa 'kädɩ 'la, 'n wa yiɛ Pɔɔlʋ 'wʋ 'libhï, wa ‑nyɔɔ 'sɔ 'n wa yiɛ ‑mä mö. Wa ghlɛɛ ‑mä, wa lɛ naa: «'Dɩlili ‑mi nɩ ‑n ‑sɛɛ, ‑a bhiamö ‑sɛsɛnɩnyiɛ ‑ka dlɩ ‑gömö. 20'Saa 'wuë ‑n bhïlaa, yɩ ‑mimii a'bhë ‑nɩnyɩɛ 'wlumö plɛ 'lɩlɩlɩ, ‑maa ‑sɩbhä yɩ ‑wʋ 'mö, ‑a 'yɩbhä ‑a 'kä yɩ zɛmö yɩbhlɩnɩ zaa, nyɩanyɩ 'dɩ.» 21‑Mä Atɛɛnɩ glɔ 'mö a nɩkpaa, wa ‑nyɛ ‑mä a lɛgäwaa 'sɔ, wa 'wuë, wa 'kä 'kwädlɩ 'dɩlili 'yukwli ‑pʋnɩ, wa 'kä 'dɩlili ‑sɛ, mɩɩ glɩnɩɛ 'wa libhoo.

22‑Maa wa 'yɩbhää ‑sɩbhä Pɔɔlʋ nimïï, 'n ɔ yiɛ 'wʋ ‑sɔ, ‑mä ‑zijlea jijo'wʋ, ɔ 'nɩgbö ‑mä, ɔ lɛ naa: «Atɛɛnɩ a nɩkpanyɩ, n bhälanyɩ. ‑Maa na'bhë n yɛ 'ylɩmö nɩɩ, ‑lagwɩbʋbɔwa a glɩnɩɛ ‑tiasɛ. 23N biɛ mä'ä a ‑glɔ 'möö, ‑bïdii a bʋbɔnɩɛ 'a ‑lagwɩɩ 'möö, n 'yi 'ylɩmö. Bʋbɔnɩdɛ ‑mämaa ‑bhlʋ a'bhë, wa 'cɛlɩ sɛ'ɛ ‑lɛ nɩɩ: Lagɔ ‑wʋʋä ‑yio, mʋʋ ‑kälɩɛ dɛ'ɛ. Lagɔtapɛ a'aa ‑yi a bʋbɔɔ da'aa, ɔ 'dɩ n yeanyɩɛ dɛ'ɛ 'nyɛɛ. 24Lagɔ ‑ɔ ‑bhɛ mä'ä 'pɩwʋ a ‑lii 'wuë, mɔɔ glɩnɩɛ zlɩɩ ‑nyɛ dʋdʋʋ 'sɔ a ‑lowlii. Ɔ'ɔ gʋʋ nɩkpasɩbhäbïdi 'mö. 25Ɔ'ɔɔ ‑aa kä'mö a ‑lu sɛ tɛlɩ. Ɛ'ɛ ‑bhö nyɩasɛ, ‑maa mɔɔ glɩnɩɛ nyɛmʋ a ‑sunyɔ, mɔɔ nyɛɛ nɩkpɛ ‑bhölɩbhölɛ, ‑lii 'wuë, mɔɔ nyɔnyɩɛ. 26Nɩkpɛ ‑bhʋlʋ ‑kpöö, 'mö ɔ 'wälanɩɛ mä'ä 'pɩwʋ a nɩkpaa a kii 'wuë 'mö 'n ɔ yuëë mä'ä dʋdʋkpäta ‑gömö sɛ slu. 'Tɛnyɩ wa 'kää mä'ä dʋdʋ 'wʋ ‑sɛ, ɔ kɛ a ‑pa ‑dɩ 'wë. Bhlɩɩ wa 'kää ‑gömö glɩɩ, ɔ kɛ a yɛka 'wë. 27Ɔ 'zʋä sa'aa, nɩkpaa 'kä sɛ tɛlɩ wa 'kɔ yɩbhlɩnɩ a za‑a. Ɔ yɩbhlɩnɩyɩbhlɩnɛ a'bhë yi 'mö 'tɛɛ ‑kë, 'n wa ‑kä sɛ tɛlɩ wa 'kɔ yɩbhlɩnɩɩ, wa yo ‑kamä yɩbhlɩnɩ. 'Lɩlɩlɩ a dɔ'wʋ, Lagɔ, ɔ ‑nɩnyɩɛ dɛ ‑tlʋnɩ. 28Nyɩasɛ n'n‑ä ‑sɩbhä gbä, ‑maa mɔɔ ‑suä ‑a'a nyɛpɛnyɛmʋʋ, mɔɔ gbää, a‑a 'bhööä ‑gba 'mö, mɔɔ nyɩanyɩɛ ‑bhölɩbhölɛ 'wuë. 'A 'lwɩbhlɩwaa a gla'mö a ‑mumuë ‑sɩbhä wa gbämöä wa'bhï, wa lɛ naa:

‑Abhʋa, Lagɔ a yuë ‑a glɩnɩmöä.

29Zaa, a‑a ‑kä Lagɔ a 'yuë glɩnɩ, ‑aaa ‑kä ‑a 'kä dlɩ 'pä nɩɩ, ‑a yi dleyi 'wʋ 'libhï, ɛ ‑kä'ɛ ‑sikaa, ‑a yea 'wʋ 'libhï, ɛ ‑kä'ɛ kpiyi, ‑a ye 'wʋ 'libhï, ‑a yi dlɩ 'pä ‑a yi ‑lu tɛlɩ, wʋ yi Lagɔ glɩnɩ. 30Miɛ abhlɩ da'a. ‑Maa ‑tiamö a dɔ'wʋ, 'tɛnyɩ ‑mɛ'la 'wuë, dɛɛ nɩkpa 'nɩ a‑a 'saa wa nʋä ‑yi, Lagɔ 'nɩɛ a gbʋ ‑dɩ. ‑Sɩkaa a dɔ'wʋ, sɛ'ɛ ɔ nyɛɛ 'bhlɩbhëa 'dɩ nɩɩ: Wa nɩ ligba wa 'kä 'wa ‑lizokuu kɛ'mö ‑sɛ wa 'kɔ yɩbhlɩnɩ. 31Lagɔ a'bhë ɔ yɛ 'ɔ ‑zijle 'kädaa a zlɩɩ ‑dɩ. ‑Lɛ a zlɩ 'la 'mö nɩkpɛ ‑bhlʋ ɔ ‑sɛɛ ‑lɛ, 'mö ɔ 'kää 'mö ghlɛnɩ ɔ 'kä gbëaa 'bhlɩbhëa 'wuë ‑zijli tu. ‑Lɛ a nɩkpɛ 'la, nɩkpa 'lɩbhɔ 'n ɔ yiɛ 'ku, 'n Lagɔ yoo gäla 'n ɔ yoo glu ‑sɛ. Sa'a ɔ tulanɩɛ 'ylimö nɩɩ, 'mö ɔ ‑sɛɛ ‑lɛ.»

32Pɔɔlʋ bhïlaa gluwlʋwlɛ a dɛ cuu, ‑wa ‑pʋnɔɔ a‑a 'yukwlii, wa gla'mö a ‑mumuë 'n wa yoo gla pälɩ, ‑mumuë lɛ naa: «Yɩ ‑gäa'a sa'a kɛ. ‑A ‑kamöa'a zlɩ ‑mɛmɛɛ 'mö 'yukwli ‑pʋnɩ.» 33Da'a yɩ 'bhlenɩɛ 'n Pɔɔlʋ yuëë yɔwʋ 'bhöö. 34‑Maa ‑sɩbhä yɩ ‑wʋ 'mö, nɩkpa ‑mumuë yinɩ Pɔɔlʋ ‑gömö 'n wa yiɛ Zezwii a ‑nʋä 'zʋ. Wa gla'mö a nɩkpɛ ‑bhlʋ 'mö wa laa Deniisɩ, ‑mä Atɛɛnɩ glɔ 'mö a ‑zijlitunyɔ 'kɔdɔ ɔ glɩnɩmöä. 'Nglɔ ‑bhlʋ wa laa Damalisɩ, ɔ kökämö, 'n nɩkpa ‑mumuë 'yɛ, wa 'wuë ‑sɩbhä wa 'zʋä Zezwii a ‑nʋä.

S'ha seleccionat:

Nʋnʋlii 17: bet

Subratllat

Copia

Compara

Comparteix