मूक चेलाकू 11
11
पतरस एरुसलेम सहररेय कुदायान
1ईसूरिकुःआ मूक चेलाकू अरू एहूदिया छतररिकुःआ जमा बिसवासी होड़कू अयूमकेरा बेगर एहूदाकू हों भगवानराः सरवन अयूमकेडखनकू मनेवाडा। 2दो पतरस एरुसलेमे सेनेडा दो एहूदा बिसवासी होड़कू हाँय सुदाकू अड़ा-चउकीःआ। 3हँकू कतातेड, “आम बेगर एहूदाकूराः ओड़ाःरे सेनेनखनमे जोमतेरा।”
4दो पतरस होयानेना हनन इया हँकू एचेरेय कता उदुःतेरा, 5“ईंग जोपा सहररेयिंग अरजी मेला ईंग मीटोंग दरसनिंग ञेलतेरा। हना दरसनरे मीटोंग ओयोन सोनहे इया तोनोंगाः जिनिस चइरो कोनारे साब तड़ावतो सेरमो अते तोलोंग लुजुरुःआ अरू ईंग मड़ंगरे उतरावयान। 6ईंग हनारेयिंग ञेलतेडकुःआ दो चउंदीसरिकुःआ जानरकू, पहाड़रिकुःआ जानरकू, सोलंगाःतकू हँकुःआ जीव जंतरकू अरू तितीगकू हंडाकू दोहोना। 7हनते ईंग मीटोंग अरोयिंग अयूमतेरा, ने पतरस, रिमुःमे अरू ञेड जोममे, माःआन।
8दो ईंग कतातेरा, ने परबू, ईंग ओरोयिंग ञेड जोमतेडकुःआ। नाःआ इया सुद कोवाकुःआ हँकुःआ तोनोंगीग जानर नुँहू वरी मेरिंग जोमगाडकुःआ, माःआन।
9नाःआ इया बार तुरहा सेरमो अते अरो अरूयिंग अयूमतेरा, भगवान सुदकेरा हना जिनिसकून सुद कोवानेःआ माःआन अहम कतावा। 10हनन इया पेय तुरहा होयानेना अरू हना तयोमरे जमाकून सेरमो अगी ओर देगयान।
11दो हननमेला कइसरिया सहर अतेकू वारतेडकुःआ हँकुःआ पेनेय होड़कू, ईंग दोहोना हना ओड़ाःरेकू वेग चड़ाँनेना। 12दो भगवानराः सुद बिरुवा ईंग एचेरेय कताया, बेगर जाः घड़ीन हँकू सुदाम सेन, माःआन। नँकुःआ छोनो बिसवासी होड़कू ईंग सुदा सेनेडखन कुरनेलियूसराः ओड़ाःरेले सोदोरनेन। 13हाँय अलेय उदुःवाःआ, ईंग ओड़ाःरे मी होड़ सेरमो देसरीग बराहील चड़ाँतिंग ञेलतिरिया। अरू हाँय ईंग एचेरेय कताया, जोपा सहर अगी होड़कू वारकेडखन पतरस माःआनकू कतावायता हाँयग सिमोनमे एचे राः अगू, माःआन। 14हाँय अपे मीटोंग सरवने कता उदुःवापेता अरू आम अरू आम ओड़ाःरिकुःआ जमा होड़कू सडाव जुवाःता।
15हनते ईंग परसारगे लगायिंग बुँहड़ीतेरा अरू मड़ंगरे अबू एचेरे भगवानराः सुद बिरुवा उतरावनेना हनन इया हँकू एचेरे हों उतराव वेजेडा। 16परबू मड़ंगरेय कतातेरा हना कतायिंग उहियार अगूतेरा, एहुना, होड़कू दाःते बतिसमाय ओवातेडकुःआ, मनदो भगवान अपे आँयग सुद बिरुवाते बतिसमाय एमेवापेता, माःआन। 17परबू ईसू मसी एचेरेबू बिसवासतेड मेलाबू पवावनेना हनानाः दहिन हँकू होंकू पवावनेना। दो भगवानराः बुता करा इयायिंग रोंकाव अवेय?”
18नाःआ कता हँकुःआ होड़कू अयूमतेरा दो हँकू कलेकालयान अरू भगवान जागवाडखनकू कताया, “नपाय इदा। भगवान बेगर एहूदाकू कसूर अते जीव कुदाकेडखन ओरो टुटीगनेना हना जीवकू पवाः लगाय दहिनवाडकुःआ।”
अंतकिया सहरराः कलसिया
19इसतपनूस गोएगनेन तयोमरे होड़कू एरुसलेम सहरराः कलसियारिकुःआ होड़कू मुरुककू संतावकुःआ। हनालगा हँकू अते मुरुक बगरा बिसवासी होड़कू हना ततेरतेकू ञीरबाःयान अरू फिनिका छतर, सइपरास डुगु अरू अंतकिया सहररेकू सोदोरयान। हँकू एहूदाकू एचेरे एकला नपाय सरवनकू कता उदुःतेरा। 20दो सइपरास डुगुरिकुःआ अरू कुरेन सहररिकुःआ अदोम बिसवासी होड़कू अंतकिया सहररे वेजेडखन बेगर एहूदाकू एचेरे परबू ईसूराः नपाय सरवनकू उदुःवाकुःआ। 21भगवान हँकू सुदाय दोहोना अरू बेगर एहूदाकू मुरुक होड़कू कसूर अते जीव कुदातेडखन परबू ईसू एचेरेकू बिसवासतेरा।
22नाःआ कता एरुसलेमराः कलसियारिकुःआ होड़कू अयूमतेरा दो, हँकू बरनाबास#मूक चेला 9:27 ञावीग मी होड़ बिसवासी होड़ अंतकिया सहररेकू वारगोतेडीग। 23हाँय हंडा सोदोरनेनखन भगवानराः मया हँकुःआ होड़कू एचेरे ञेलतेडखन मुरुके बहालयान। अरू हँकू जमा इंदरीते परबू ईसू एचेरे बिसवास हड़ाःगोड ञवनकू लगाय कता बहालगोतेडकू। 24हाँयग बरनाबास नपाय होड़े दोहोना। हाँय सुद बिरुवाते पेरेगतोय दोहोना अरू बिसवासरे बड़ियाड़ होड़े दोहोना अरू मुरुक होड़कू हाँयते परबू ईसू एचेरेकू बिसवासतेरा।
25हना तयोमरे हाँय साहूल ञाम लगा तरसूस सहर अगी तोराय। 26हाँय सुदाय जुमावनेन दो अंतकियारे साहूले अगूतेरा। हँकिन मी बरिस वरी हना कलसियारिकुःआ होड़कू सुदाकिन दोहोना, अरू मुरुक होड़कूकिन चेड ञवना। चेलाकू अंतकिया सहररे मड़ंग मसी होड़कू माःआनकू एचे कतानेना।
27हननमेला एरुसलेम अते अदोम भगवानराः बड़रा कता होड़कू अंतकिया सहररेकू वेजेडा। 28हँकू अते मी होड़राः ञाव दोहोना अगबूस। हाँय जमाकू तलारे चड़ाँनेनखन सुद बिरुवा एचे कता इयाय कता उदुःतेरा, “जमा चउंदीसरे कतकाल होयाःता।” (अरू हना कतकाल मरंग राजा कलाउदियूस राइजगेःआ हनमेला होयानेना।) 29दो हंडाकुःआ चेलाकू अँननकूराः पुंजी पसारकून एहूदिया छतररिकुःआ बिसवासी होड़कू संघरावाकू लगाकू एमेतेरा। 30हँकू हनन इयाकू एचेतेरा अरू एरुसलेमराः कलसियारिकुःआ अगुवा होड़कू एचेरे एमेय लगा बरनाबास अरू साहूल एचेरे पुंजी पसारकू एमेगोतेड।
S'ha seleccionat:
मूक चेलाकू 11: kfp
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© (Active) Wycliffe Bible Translators, Inc. All rights reserved.