रोमि 15
15
दुसरो लोकुरकुन वने गिरदा कियान साटि जिवित मन्ट
1माक विस्वासते मजबुत मन्तोम ते माक केवल आपुना गिरदासाटि कोसिस केमाट मति विस्वासते कमजोर मन्तोर ओर लोकुरा कमजोरितुन वने सहन किम्ट। 2अनि आपुनोर विस्वासि बायि-दादालोरकुन, विस्वासते मजबुत बनेहकियान साटि दुसरो लोकुरक साटि बोद भलायिता मन्ता ओदे किस ओरकुन गिरदा किम्ट। 3बाक्याकि “निया बारेते बोव खराब पोल्लोंग लोकुरक इन्तोरक ओव पोल्लोंग नावा पोरो वातांग#भज ६९:९” इदाम पवित्र पुस्तकतिगा परमेस्वरना बारेते कोटता लेहका मसिहाल वने आपुना गिरदा साटि जिवन जिवेमायोर मति ओर परमेस्वरतुन गिरदा कियान साटि जिवेमातुर। 4अनि परमेस्वरना पवित्र पुस्तकतिगा बचोक पोल्लोंग मुनेटाल कोटता मन्तांग अव सबोय माकुन करहान साटिय मन्तांग। बाक्याकि मावा साटि बाराय कियाना वाचा परमेस्वर कितोर अदेन ओर पुरा कियानुर इदाम आशा इरस माकुन पोसोरिंग सहेन किस मन्दान साटि अव पोल्लोंग माकुन हिमत हिन्ता।
5मावोर परमेस्वर माकुन धीरज अनि शान्ति हिस निमाट वरोर दुसरोनासंग शान्तिते मन्दान साटि ओर मिकुन मदत केविर इन्जोर परमेस्वरनिके नना प्रार्थना किन्तोना बाक्याकि येसु मसिना चेला लोकुरकुन इदामे कियाला पहाजे। 6असके निमाट सबोय लोकुरक उन्दि आस उन्दिय लेंगदे प्रबु येसु मसिनोर बाबो परमेस्वरना स्तुति किया परकिट।
7हे नावोर हेलाळ दादालोर, परमेस्वरतुन हजोर आदर पुटान साटि मसिहाल मिकुन स्विकार कितुर। अदामे निमाट वने वरोन दुसरोन स्विकार किम्ट। 8बाक्याकि परमेस्वर यहुदि लोकुरा आजि-दादालोरकुन वाचा हिस मतोर ओद पोल्लोतुन ओर पुरा कितोर इन्जोर परमेस्वरना ओद खरोय पोल्लोतुन पका कियान साटि मसिहाल यहुदि लोकुरा साटि वरोर सेवकता रुपते वातुर। 9अनि ओर यहुदि आयोर लोकुरक साटि वने वातुर ओरकुन परमेस्वर दया कितोर इन्जोर ओरक वने परमेस्वरना स्तुति कियाला पहाजे। बाक्याकि
“नना जाति जातितिगा निया स्तुति कियाका
अनि निया पोरोयता स्तुति कियाका#२ शाम २२:५०; भज १८:४९”
इदाम परमेस्वरना पोल्लोतिगा कोटता मन्ता 10इन्जोर
“हे सबोय यहुदि आयोर लोकुरक निमाट परमेस्वरना आचतोर लोकुरासंग मिलेमास गिरदा किम्ट#व्यव ३२:४३”
इन्जोर परमेस्वरना पोल्लोतिगा असा इतोर। 11अनि
“हे सबोय यहुदि आयोर लोकुरक निमाट प्रबुना स्तुति किम्ट
अनि सबोय जातितोर लोकुरक ओना स्तुति कियाला पहाजे#भज ११७:१”
इन्जोर असा परमेस्वरना पोल्लोतिगा इतोर। 12अनि
“यिशेना पिळिताल वरोर राजाल जनम आयनुर।
अनि ओर यहुदि आयोर लोकुरा पोरो राज कियान साटि वायनुर।
अनि ओनिगा सबोय यहुदि आयोर लोकुरक आशा कियानुरक#यश ११:१०”
इन्जोर असा परमेस्वरना पोल्लोतिगा यशायाह वने इन्तोर।
13अनि आशा हिन्तोर ओर परमेस्वर ओनिगा निमाट विस्वास इरान्तोरिट इन्जोर ओर मिकुन गिरदा अनि शान्तिते निहचिविर। इदाम पवित्र आत्माता लावते बोद आशा निमाट इरान्तोरिट ओद आशा बरसोरिंग हनि इन्जोर नना प्रार्थना किन्तोना।
पोलुस यहुदि आयोर लोकुरकनिगा आपुना सेवाता बारेते वेहिन्तोर
14हे नावोर बायि-दादालोरक, निमाट सोबाय स्वभावते मन्तोरिट। अनि मिकुन बाताल कियाना उचित मन्ता अदेन पुरा पुन्तोरिट इन्जोर निमाट वरोर दुसरोन करिहला परान्तोरिट इदाम नना पुरा रितिते पुन्तोना। 15मति ते वने परमेस्वर नाकुन दया किस यहुदि आयोरक लोकुरिगा येसु मसिना सेवा कियान साटि आचतुर। इन्जोर वरोर याजक परमेस्वरना मुने बदाम बलिदान हिन्तोर अदामे यहुदि आयोर लोकुरिगा नना येसु मसिना सोबाता पोल्लो प्रचार कियाना सेवा किन्तोना 16बाक्याकि निमाट परमेस्वर साटि उन्दि बलिदानता अर्पण लेहका निमाट पवित्र आत्माते पवित्र बनेमास परमेस्वरना येताना योग्य बनेमायिला पहाजे इन्जोर आलिहच हियान साटि नना इद पत्रतिगा मिकुन हुचुक पोल्लोंग साप-साप कोटस हिन्तोना।
17इन्जोर येसु मसिनासंग सोबाय संबन्द इरस परमेस्वरना सेवा किन्तोना इन्जोर नना पकाय अभिमानि किन्तोना। 18यहुदि आयोर लोकुरक वने परमेस्वरतुन मानेमायिर इन्जोर नना ओरकुन करिहता ओद पोल्लो केन्जुन अनि पवित्र आत्माता मदतते नना किता ओव हजोर चमत्कारता बुतोतुन हुळस ओरक मसिनिगा विस्वास कितोर। इदाम नावा द्वारा मसिहाल बारायि कितोर अदेन तासिस असा दुसरो बोवे पोल्लोनुंग वेहाना हिमत केवोन। 19इदाम किस नना येरुसलेम सहेरताल इल्लुरिकुस प्रदेशवनाह सबोय जागातिगा नना येसु मसिना बारेते सोबाता पोल्लोता पुरा पुरा प्रचार कितान।
20अनि वरोर मानेय उन्दि लोन बनेहकियान साटि किता पायवाता पोरो दुसरो मानेय लोन बनेकियाना लेहका बगा बोरे मुनेटाले येसु मसिना सोबाता पोल्लो वेहतोर ओदे जागातिगा असा येसु मसिना सोबाता पोल्लो वेहाना नावा इच्चा हिले। मति बगा बगा मसिना बारेते वेहोर इदाम जागातिगा हन्जुन येसु मसिना सोबाता पोल्लो वेहाना नावा पकाय इच्चा मन्ता। 21मति
“ओना बारेते बसकेय पुनोर ओर लोकुरक ओने हुळानुरक
अनि ओना बारेते केन्जोर ओर लोकुरक ओना पोल्लो समजेमायनुरक#यश ५२:१५”
इन्जोर परमेस्वरना पवित्र पुस्तकतिगा कोटता मन्ता।
22येसु मसिना सोबाता पोल्लो बोद जागातिगा इदेकवनाह अवो ओदे जागातिगा येसु मसिना सोबाता पोल्लो वेहाना बुतोते मन्तोना इन्जोर नना मिया हेरे वायिला परोन#रोमि १:१३ आतान।
रोम देशतिगा हन्दाना पोलुसना योजना
23मति इदेक इव प्रदेशता सबोय जागातिगा नना येसु मसिना सोबाता पोल्लो प्रचार कियाना बुतो पुरा कितोना। अनि पकाय वरसाताल मियाके वास मिकुन मिलेमायाना नावा पकाय इच्चा मन्ता।
24इन्जोर नना इसपानिया देशतिगा दाका असके मिया हेरे वास मिकुन मिलेमायका अनि हुचुक दियांग मियासंग मतपा इदाम नावा मन्दा इच्चा पुरा आयार। इदेना पजा नाकुन मुने हन्दान साटि निमाट नाकुन मदत कियाकिट इन्जोर नावा आशा मन्ता। 25मति इदेक ते येरुसलेम सहेरतोर विस्वासु लोकुरकुन मदत कियान साटि नना अगा हन्दिला आतोना। 26बाक्याकि मकिदुनिया अनि अखिया देशतोर विस्वासु लोकुरक येरुसलेम सहेरतोर गरिब विस्वासु लोकुरक साटि हुचुक दान जमा कितोर#१ कुरि १६:१-४। 27अनि ओरक गिरदाते इद कितुर मति इद कियान साटि मकिदुनिया अनि अखिया देशतोर विस्वासु लोकुरक येरुसलेम सहेरतोर विस्वासि लोकुरा करजदार मन्तोर। बाक्याकि यहुदि आयोर लोकुरकुन येरुसलेमतोर मसि विस्वासि लोकुरकताल आत्मिक पोल्लोता आशिष मन्जे येसु मसिना सोबाता पोल्लो पुटता इन्जोर ओरक यहुदिलोकुरकुन शारिरिक रितिते मन्जे दान हिस ओरकुन मदत कियाला पहाजे#१ कुरि ९:११। 28इन्जोर नना इद बुतो पुरा किस मन्जे इद दान ओरा कयदे सोपेकिस मिकुन मिलेमास इसपानिया देशतिगा दाका। 29अनि नना मिया हेरे वायका असके मसिना आशिष माक सबोय लोकुरकुन पकाय पुटार इन्जोर नना पुन्तोना।
30हे नावोर बायि-दादालोरक, मावोर प्रबु येसु मसिनिगा माक विस्वास इरस पवित्र आत्माता मदतते माक वरोर दुसरोन मया किन्तोरोम इन्जोर नना मिकुन विनन्ति किन्तोना: 31यहुदिया प्रदेशतोर परमेस्वरनिगा विस्वास इरोरक ओर लोकुरा कयदाल परमेस्वर नाकुन पिसहिर: अनि येरुसलेमतोर विस्वासु लोकुरक साटि नना ओयिला आतोना ओद दान विस्वासु लोकुरक गिरदातासंग स्विकार केविर इन्जोर नावासंग मिलेमास नावा साटि परमेस्वरनिके खरोय मन्दे प्रार्थना किसोर मन्ट, 32असके परमेस्वरना इच्चाता अनुसार नना मिया हेरे गिरदातासंग वायका अनि इदेना द्वारा माक वरोन दुसरोन हिमत हिया परकाट।
33शान्ति हेवाल परमेस्वर मिया सबोयसंग मनिर इन्जोर नना प्रार्थना किन्तोना। आमिन।
S'ha seleccionat:
रोमि 15: fmu
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© (Active) Wycliffe Bible Translators, Inc. All rights reserved.