रोमि 14

निमाट दुसरो लोकुरा न्याय केमाट

1हे मावोर बायि-दादालोरक, मियागाडाल बोरे विस्वासते कमजोर मन्तोर ते वने ओन येताट मति बोनाय मनतिगा मावाताल बाताले अलग विचार मन्ता ते अदेना बारेते निमाट न्याय केमाट#कुलु २:१६। 2बाक्याकि हुचुलोर विस्वासि लोकुरक सबोय चिज तिन्दानातिगा विस्वास इरान्तोरक मति बोर विस्वासतिगा कमजोर मन्तोरक ओरक केवल भाजिपाला तिन्दानातिगा विस्वास इरान्तोर। 3अनि बोर सबोय चिज तिन्तोरक ओरक हविंग तिनोरक ओराताल आपुनतुन हजोर समजेमायमाकिर, अनि हविंग तिनोरक मति केवल भाजिपाला तिन्तोरक ओरक हविंग तिनवालिन दोष लावे केमाकिर। बाक्याकि परमेस्वर ओरकुन स्विकार कितोर। 4अनि परमेस्वर ओरा मालकाल मन्तोर अनि ओरक परमेस्वरना सेवक मन्तोरक इन्जोर दुसरोना सेवकिन दोष लावे केवालोर निमाट बोर आन्दिट? इदाम न्याय कियाना अदिकार मिकुन हिले। बाक्याकि ओरक दोषि मन्तोर या हिलेर, अनि बोद कियाला पहाजे ओरक किन्तोरक या केवोर इद न्याय कियाना अदिकार ओरा मालकान मन्ता। अनि प्रबु ओरकुन येताना योग्य ठहरे किन्तोर।

5हुचुलोर लोकुरक उन्दि दियातुन दुसरो दियाताल सोबाय मानेमान्तोरक मति असा हुचुलोर लोकुरक सबोय दियातुन उन्दि लेहकाय मानेमान्तोरक इन्जोर इदेना बारेता आपुना विस्वासते निमाट शंका केमाट अनि आप आपुना विस्वासते पका आस मन्ट। 6बोदे दियातुन दुसरो दियाताल सोबाय मानेमान्तोरक ओरक प्रबुन आदर हियान साटि मानेमान्तोरक। अदामे सबोय आयि तिन्तोर ओर वने प्रबुन आदर हियान साटि तिन्तोरक। बाक्याकि ओर बातांग आयि तिन्तोरक अदेन साटि परमेस्वरना धन्यवाद किन्तोरोम। अदामे बोरे हविंग तिनोरक ओर वने प्रबुन आदर कियान साटि तिनोरक अनि ओर वने परमेस्वरना धन्यवाद किन्तोरक। 7बाक्याकि मावानिगाडाल बोरे आपुन साटि जिवेमायोर अनि आपुन साटि हायोर। 8बाक्याकि माक जिवित मन्तोरोम ते प्रबुन आदर हियान साटि जिवित मन्तोरोम अनि हान्तोरोम ते वने प्रबुन आदर हियान साटि हान्तोरोम इन्जोर माक जिवेमायिकाट या हायकाट माक प्रबुनोरेय मन्तोरोम।

9मसि हातोरक अनि जिवित लोकुरा प्रबु आयिर इन्जोर ओर हातुर अनि असा वने जिवेमातोर। 10इदाम मन्ता ते निमा आपुना तमोन बाक्या दोष लावे किन्तोन या निमा आपुना तमोन बाक्या तुच्च समजेमान्तोन? बाक्याकि माक सबोय लोकुरकुन परमेस्वरना मुने न्याय साटि नित लागार#२ कुरि ५:१०। 11परमेस्वरना पोल्लोतिगा कोटता मन्ता:

“नना जिवित मन्तोना इन्जोर सबोय लोकुरक नावा मुने मिन्डांग टेकेकिस नना परमेस्वर आन्दान

इदाम सबोय लोकुरक कबुल किस आरादना कियानुरक इन्जोर प्रबु इन्तोर#यश ४५:२३।”

12इन्जोर मावानिगाडाल सबोय लोकुरकुन आप आपुना हिसाब परमेस्वरतुन हियालागार।

तिन्दाना उन्डानाता द्वारा वरोन दुसरोन न्याय केमाट

13इन्जोर माक वरोन दुसरोन असा दोष लावे केमाट। अनि इदाम किस माक दुसरो विस्वासि लोकुरा विस्वास नाश किस ओर पाप कियाना कारण बनेमायमाट इन्जोर निश्चय किम्ट। 14सबोय चिजक तिन्दान साटि सोबाय मन्ता इन्जोर प्रबु येसुनिगा विस्वास किता द्वारा नाकुन बराबर समजेमाता। मति बोरे बोदे चिज तिन्दान साटि अशुद्ध मन्ता इदाम समजेमान्तोर ते ओना साटि ओद चिज अशुद्धेय मन्ता। 15नियोर बायहि या दादालोरक निया जेवनता कारण दुःखि मन्दानुर ते ओनासंग निया संबन्द मयाता अनुसार आयो। निमा तिन्दाना द्वारा बोनाय विस्वासता नाश केमा बाक्याकि ओना साटि वने मसिहा आपुना जिवा हितोर। 16इन्जोर मिया साटि सोबाय मन्ता मति अदेना द्वारा दुसरो लोकुरक निकुन निन्दा किन्तोर अदाम बुतो केमाट। 17बाक्याकि परमेस्वरना राज्य तिन्दान उन्डानातिगा आयो मति सबोयनासंग पवित्र आत्माता द्वारा पुटता शान्तिते अनि गिरदाते परमेस्वरतुन गिरिदा आन्ता इदाम बुतो किसोर जिवन जिवे मायिर ते परमेस्वर मावा जिवनतिगा राज्य कियानुर। 18अनि बोर आयि इदाम जिवन जिवेमास मसिना सेवा किन्तोरक ओनाताल परमेस्वर गिरदा आन्तोर अनि सबोय लोकुरक ओन मान हिन्तोरक।

19इन्जोर माक दरोज वरोर दुसरोनासंग शान्तिते मन्दान साटि कोसिस कियाला पहाजे अनि वरोर दुसरोना विस्वासतिगा मजबुत बनेमायान साटि मदत कियाला पहाजे। 20अनि मिया तिन्दाना उन्डाना इच्चाता कारणते निमाट परमेस्वरना बुतोतुन नाश केमाट। सबोय तिन्दाना चिज तिन्दान साटि सोबाय मन्ता। मति मिया तिन्दानाता द्वारा दुसरो लोकुरा विस्वासता रुकावट आयाना कारण आयाना ते ओद चिज तिन्दाना उचित हिले। 21हविंग तिन्दाना, दाळंगो उन्डाना इदाम दुसरो विस्वासि लोकुरा विस्वासतुन नाश किन्ता बोदे बुतो निमाट केमाट।

22इव पोल्लोता बारेते बाताले निमाट विस्वास किन्तोरिट अदेन मिया मन्दिगा अनि परमेस्वरना हेरे खरोय मन्दिला हिम्ट। हुचुलोर लोकुरक आपुना मुने बोद सोबाय मन्ता ओदे किन्तोरक अनि अदेन कियान साटि ओरकुन खराब लागो इदाम लोकुरक धन्य मन्तोरक। 23मति बोरायि मन्दिगा इद चिज तिन्दाना खरोय मन्ता या हिले इदाम शंका इरस बाताले तिन्तोरक ते ओर परमेस्वरना मुने दोषि ठहरे मातोरक। बाक्याकि ओरक विस्वास केवायि तिन्तोरक अनि अविस्वासते बाताले किन्तोरक ओद पाप मन्ता।

S'ha seleccionat:

रोमि 14: fmu

Subratllat

Copia

Compara

Comparteix