बुतोंग 26

अग्रिपा राजाना मुने पोलुसना भाषण

1अग्रिपा पोलुसतुन इतुर, “निमा आपुना बारेते वळकिला परान्तोन।” असके पोलुस कयमुने किस यहुदिलोकुरक आपुना पोरो लावे किता सबोय दोसता बारेते ओर उत्तर हियाला लागतुर, 2“हे अग्रिपा राजा, यहुदिलोर नावागा लावे किता दोसता विरोद नेन्ड निया मुने ओरा उत्तर हियाना सन्दि पुटतु इन्जोर धन्य समजेमान्तोना, 3निमा यहुदिलोरा सबोय रिति रिवाज अनि वादतुन पुन्तोन। इन्जोर नावा उत्तर शान्तिते केन्जा इन्जोर नना विनन्ति किन्तोना।”

4पोलुस असा इतुर, “आपुना जातिता नडुम अनि येरुसलेमतिगा मुनेटाले नावा चाल-चलन बदाम मता इन्जोर सबोय यहुदिलोरक पुन्तोरक। 5नना परीसि आस आपुना दरमता सबोयताल कटोर नियमता अनुसार ताकतान इन्जोर ओरक पहलेटाल पुन्तोरक। यहुदि अदिकारिलोकुरकुन इच्चा मन्दार ते अदेना गवाहि हिया परान्तोरक#बुतोंग २३:६; फिलि ३:५। 6इदेक नना न्याय आयान साटि नितिनतोना कारण मावोर बाबो-दादिलोरकुन परमेस्वर हिता वाचातिगा नना आशा कितोना इन्जोर मन्ता। 7मावोर बारा गोत्र आपुना सबोय मन्दे नरका-पलिंग परमेस्वरना सेवा किसोर ओद वाचातुन येत परान्तोना इन्जोर आशा किन्तोरक। हे राजा, इदे आशाता कारण यहुदिलोर नावागा दोष लावे किन्तोरक। 8परमेस्वर हातोरकुन असा जितो किन्तोर इद पोल्लो विस्वासता योग्य हिले इदाम निमाट बाक्या समजेमान्तोरक? 9नासरितोर येसुना पोरोयता विरोदते नाकुन पकाय बाताले कियाला पहाजे इन्जोर नना वने मुने समजेमास मतोना#बुतोंग ८:३; २२:४,५। 10अनि येरुसलेमतिगा नना अदामे कितान, अनि मुक्याल याजक लोकुरकनिकेडाल अदिकार पुटहिच पकाय येसुना पवित्र लोकुरकुन जेहलतिगा वाटतान; अनि ओरकुन हव्किन्दुर असके नना वने अदेन सहमति हिन्दान। 11नना पकायि बेरा सबोय यहुदि समाज मन्डलितिगा हन्जुन ओरकुन तकलिप हिस हिस येसुना निन्दा कितान अनि ओरागा पकाय होंग आस बाहरो सहेरतिगा वने हन्जुन ओरकुन तकलिप हिन्दान।”

आपुना मन बदलेमायाना वर्णन

(बुतोंग ९:१-१९; २२:६-१६)

12पोलुस असा इतुर, “इद बुतो कियानपा नना मुक्याल याजक लोकुरकनिकेडाल मसिलोकुरकुन तकलिप हियान साटि अदिकार अनि अदेना साटि परवांगिता पत्र पयस दमासकस सहेरतिगा हन्दिला आस मन्दान, 13ते हे राजा, हरितिगा दुपाडा बेरा नना आबारतिगा पोळदता मान्जानाताल वने हजोर उन्दि ज्योति, आपुना अनि आपुनासंग ताकवालोरा नालुंगास बासा मान्जानपा हुळतान। 14माक सबोयलोर जागातिगा अरतोम असके ‘हे शावुल, हे शावुल, निमा नाकुन बाक्या सतेह किन्तोन? काटानुंग काल्कने हियाना निया साटि कठिन मन्ता’ इन्जोर इब्रानि बोलिते नाकुन इन्दाना पोल्लो केन्जतान। 15नना इतान, ‘हे प्रबु, निमा बोर आन्दि?’ प्रबु इतुर, ‘निमा पकाय तकलिप हिन्तोन ओर येसु ननाय आन्दान। 16मति निमा तेदचुन आपुना काल्क पोरो निता, बाक्याकि निमा हुळतोन अनि असा असा हुळकि ओद सबोय पोल्लोतुन सेवक अनि गवाहि आस ठहरे कियाका इन्जोर नना निकुन दर्शन हितान। 17अनि नना निकुन निया यहुदिलोकुरकताल अनि दुसरो जातितोर लोकुरकनिकेडाल पिसिहतोना, 18अनि ओरांग कोन्डांग तरियान साटि अदेनते ओरकुन अन्धारताल वेळिचितिगा अनि सयताना लावताल परमेस्वरनिके वासुन ओरा पापता मापि पुटहानुर, अनि नावागा विस्वास इरानाता मारे पवित्र बनेमातोरक ओर लोकुरकनिगा जागा पुटहान साटि नना इदेक निकुन यहुदि अनि यहुदि आयोर लोकुरा हेरे लोहान्तोना।’ ”

आपुना सेवाता बारेता वर्णन

19पोलुस असा इतुर, “इन्जोर हे अग्रिपा राजा, नना ओद स्वरगिय दर्शनता विरोद केवोन आस, 20पहले दमासकसतिगा, पजा येरुसलेमतिगा, अनि इदेक सबोय यहुदिया प्रदेशतिगा मन्वालोरकुन अनि यहुदि आयोर लोकुरकुन वने पस्तेमाम्ट अनि पस्तेमायाना योग्य बुतो किस परमेस्वरनिके मलस हन्ट इन्जोर वेहचोर मतोना#बुतोंग ९:२०,२८,२९। 21इद पोल्लोता कारण यहुदिलोर नाकुन मन्दिरतिगा पयस हव्काना कोसिस किन्दुरक। 22मति परमेस्वरना मदतते नना नेन्डवनाह जिवित मन्तोना, अनि हुडलोरक या हजोरक इदाम सबोय लोकुरा मुने गवाहि हिसोर इगा मन्तोना। 23मसिन दुःख ताह लागार, अनि ओरे सबोयना मुने हातोरिगाडाल जिवेमास, मावोर लोकुरकनिगा अनि दुसरो जातितोर लोकुरकनिगा वेळिचि लेहका मन्ता परमेस्वरना पोल्लो वेहानुर इन्जोर परमेस्वरना पोल्लो वेहवालोरक अनि मूसाल वने वायवाल मन्ता दियांगता बारेते परमेस्वरना पोल्लो वेहतुरक अदेन तासि नना असा दुसरो बाताले इनोन#१ कुरि १५:२०; यश ४२:६; ४९:६।”

24पोलुस इद रितिते उत्तर हिसोर मतोर असके राजपाल फेस्तुस, “हे पोलुस निमा बयहाल मन्तोन। पकाय करियना निकुन बयहाल किता” इन्जोर जोरदे इतुर। 25मति पोलुस इतुर: “हे माननिय फेस्तुस, नना बयहाल हिलेन मति बुद्धिते खरोय पोल्लोंग वळकान्तोना। 26इव पोल्लोनुंग राजाल वने पुन्तोर। नना खुलो मन्दे ओना मुने वळकिला आतोना। इव पोल्लोंगनिगाडाल बोदे पोल्लो ओनाताल मकता हिले इन्जोर नाकुन विस्वास मन्ता बाक्याकि इद घटना#२६:२६ येसु मसिना सेवा, हायाना, असा जिवेमायाना। दरतिता बोदे कोन्टातिगा आता मकता पोल्लो आयो। 27हे अग्रिपा राजा, बाताल निमा परमेस्वरना पोल्लो वेहवालोरा विस्वास किन्तोन? इंगो, निमा विस्वास किन्तोन इन्जोर नना पुन्तोना।” 28असके अग्रिपा पोलुसतुन इतुर: “निमा हुचुन्सा समजेह कियानाते नाकुन सान्डे मसि बनेहकियाना इच्चा किन्तोन बहे?” 29पोलुस इतुर: “केवल निमाय आयो मति नेन्ड नावा पोल्लो केन्जता सबोय लोकुरक हुचुन्सा बेराते या पकाय बेराते मसि विस्वासि आयिरक इन्जोर नावा इच्चा मन्ता। नना बाताले गलत केवाय जेहलतिगा पकाय तकलिप सहेन किन्तोना मति निमाट नावा लेहका बाताले गलत केवाय पकाय तकलिप सहेन केमाकिर इन्जोर परमेस्वरतुन नना प्रार्थना किन्तोना।”

30असके राजाल अनि राज्यपाल अनि बिरनिके अनि ओरासंग उदवालोरक निचुन अलग हन्जुन: 31“हायाना दन्ड या जेहलतिगा वाटाना योग्य बाराय येर मानेय केवोर” इन्जोर आपसते वळकिला लागतुरक। 32अग्रिपा फेस्तुसतुन इतुर: “येर मानेय हजोर राजान हेरे न्याय तलकोर आस मनेर ते बन्दि आयोर आस लोहच मनेर।”

S'ha seleccionat:

बुतोंग 26: fmu

Subratllat

Copia

Compara

Comparteix