रोमियन 16
16
पवलुस के अभिबादन
1हम तोंहसे पंचन से किंख्रिया सहर के मसीही मन्डली माहीं सेबा करँइ बाली फीबा बहिनी के खातिर बिनती करित हएन, 2काहेकि ऊँ प्रभू के ऊपर बिसुआस करँइ बाली बहिनी आहीं, एसे उनहीं प्रभू के दासी समझिके तूँ पंचे सोइकार करा; अउर अगर उनहीं कउनव चीज के तोंहसे पंचन से जरूरत परय, त उनखर मदत करा; काहेकि ऊँ खुब मनइन के मदत किहिन हीं, इहाँ तक कि हमार घलाय मदत किहिन रहा हय।
3अउर मसीह यीसु के सेबा माहीं हमरे साथ काम करँइ बाली प्रिस्का अउर उनखे मंसेरुआ अक्विला काहीं घलाय हमार नबस्कार कहि दिहा। 4ऊँ पंचे हमहीं बचामँइ के खातिर आपन प्रान घलाय देंइ के खातिर तइआर रहे हँय, हम उनखर धन्यबाद करित हएन, अउर केबल हमहिन भर नहीं, बलकिन गैरयहूदी लोगन के सगली मसीही मन्डली घलाय उनखर धन्यबाद करती हँय। 5अउर उनखे घर माहीं जउन मसीही मन्डली लागत ही, ओमा एकट्ठा होंइ बाले सगले भाई-बहिनिन काहीं नबस्कार कहि दिहा, अउर हमरे पियार साथी इपयनितुस काहीं, जउन आसिया प्रदेस के पहिल मसीह बिसुआसी आहीं, उनहूँ काहीं घलाय हमार नबस्कार कहि दिहा। 6अउर मरियम बहिनी काहीं, जउन तोंहरे पंचन के खातिर खुब मेहनत करती हईं, उनहीं हमार नबस्कार कहि दिहा। 7अउर अन्द्रुनीकुस अउर यूनियास काहीं जउन हमरे यहूदी जाति के बिसुआसी भाई आहीं, अउर हमरे साथ जेल माहीं घलाय गे रहे हँय, अउर यीसु मसीह के खास चेलन माहीं ऊँ पंचे मसहूर रहे हँय, अउर हमसे पहिले मसीह के ऊपर बिसुआस किहिन रहा हय, उनहूँ काहीं हमार नबस्कार कहि दिहा। 8अउर भाई अम्पलियातुस काहीं, जउन प्रभू के ऊपर बिसुआस करत हें, एसे हम उनसे प्रेम करित हएन, उनहूँ से हमार नबस्कार कहि दिहा। 9अउर भाई उरबानुस काहीं, जउन हमरे साथ मसीह के सेबा किहिन हीं, उनहूँ काहीं हमार नबस्कार कहि दिहा, अउर हमरे पियार साथी इस्तखुस काहीं हमार नबस्कार कहि दिहा। 10अउर भाई अपिल्लेस काहीं जउन मसीह के सेबा माहीं खरे निकरे हँय, हमार नबस्कार कहि दिहा, अउर अरिस्तुबुलुस के घर माहीं रहँइ बाले बिसुआसी लोगन काहीं हमार नबस्कार कहि दिहा। 11अउर हमरे यहूदी जाति के भाई हेरोदियोन काहीं नबस्कार कहि दिहा, अउर भाई नरकियुस के घर माहीं जेतने जन प्रभू के ऊपर बिसुआस करत हें, उनहीं हमार नबस्कार कहि दिहा। 12अउर बहिनी त्रूफेना अउर त्रूफोस काहीं, जउन प्रभू के सेबा माहीं मेहनत करती हईं, हमार नबस्कार कहि दिहा, अउर पियार बहिनी पिरसिस काहीं घलाय जउन प्रभू के सेबा माहीं खुब मेहनत करती हईं, उनहूँ काहीं हमार नबस्कार कहि दिहा। 13अउर भाई रूफुस काहीं, जिनहीं प्रभू के सेबा के खातिर चुना ग हय, अउर उनखे महतारी काहीं जउन हमरे खातिर महतारी कि नाईं हईं, उनहीं दोनव जनेन काहीं हमार नबस्कार कहि दिहा। 14अउर असुन्क्रितुस अउर फिलगोन अउर हिरमेस, अउर पत्रुबास, अउर हिर्मास अउर उनखे साथ माहीं रहँइ बाले सगले भाइन काहीं नबस्कार कहि दिहा। 15अउर भाई फिलुलुगुस, अउर बहिनी यूलिया अउर नेर्युस अउर उनखे बहिनी काहीं, अउर भाई उलुम्पास अउर उनखे साथ माहीं रहँइ बाले सगले बिसुआसी भाइन काहीं हमार नबस्कार कहि दिहा। 16अउर तूँ पंचे आपस माहीं बड़े प्रेम के साथ नबस्कार किहा, तोंहईं पंचन काहीं मसीह के सगली मन्डलिन के तरफ से नबस्कार।
पवलुस के आखिरी सलाह
17हे हमार भाई-बहिनिव, हम तोंहसे बिनती करित हएन, कि तूँ पंचे मसीह के जउन सिच्छा पाया हय, ओखे बिरोध माहीं सिच्छा दइके, जउन मनई फूट डारत हें, अउर बिसुआसी भाई-बहिनिन काहीं बिसुआस से भटकाय देत हें, उनहीं पहिचान ल्या करा, अउर उनसे दूरी रहा करा। 18काहेकि इआमेर के मनई हमरे पंचन के प्रभू यीसु मसीह के सेबा नहीं करँय, बलकिन अपने कमाई के खातिर सेबा करत हें; अउर मीठ-मीठ बातँय कइके भोले-भाले मनइन काहीं बिसुआस से भटकाय देत हें। 19पय सगले बिसुआसी भाई-बहिनिन काहीं मालुम हय, कि तूँ पंचे प्रभू के हुकुमन काहीं मनते हया, एसे हम तोंहरे पंचन के बारे माहीं खुब आनन्दित हएन, पय हमार इच्छा इआ हय, कि परमातिमा के नजर माहीं, जउने कामन काहीं तूँ पंचे निकहा समझते हया, उनहीं करँइ माहीं लगे रहा, अउर बुरे कामन से तूँ पंचे दूरी रहा। 20अउर सान्ती देंइ बाले परमातिमा सइतान काहीं तोंहरे गोड़ेन से हरबिन कुचरबाय देइहँय। अउर हम प्राथना करित हएन, कि हमरे पंचन के प्रभू यीसु मसीह के किरपा, तोंहरे पंचन के ऊपर होत रहय।
21अउर तीमुथियुस जउन हमरे साथ सेबा करत हें, अउर हमरे यहूदी जाति के साथी लोग लूकियुस अउर यासोन अउर सोसिपत्रुस के तरफ से तोंहईं पंचन काहीं नबस्कार पहुँचय। 22अउर हम तिरतियुस जउन पवलुस के साथ इआ चिट्ठी काहीं लिख रहेन हय, हमहूँ प्रभू के नाम से तोंहईं पंचन काहीं नबस्कार कहित हएन। 23भाई गयुस के तरफ से जउन हमार अउर मसीही मन्डली के सगले बिसुआसी भाई-बहिनिन के स्वागत-सत्कार करत हें, तोंहईं पंचन काहीं नबस्कार पहुँचय। अउर भाई इरास्तुस जउन सहर के भन्डारी हें, अउर भाई क्वारतुस के तोंहईं पंचन काहीं नबस्कार। 24अउर हम प्राथना करित हएन, कि हमरे पंचन के प्रभू यीसु मसीह के किरपा तोंहरे पंचन के ऊपर होत रहय। आमीन।
25अउर परमातिमा के बड़ाई होय, हम यीसु मसीह के बारे माहीं जउने खुसी के खबर काहीं तोंहईं पंचन काहीं बतायन हय, ओहिन के मुताबिक तोंहईं पंचन काहीं उँइन बिसुआस माहीं मजबूत कइ सकत हें, अउर परमातिमा के इआ रहस्यपूर्न सत्य जुगन-जुगन से छिपा रहा हय। 26पय अब ओही हमेसा रहँइ बाले परमातिमा के हुकुम से उनखे सँदेस बतामँइ बालेन के लिखी किताबन के द्वारा, सगले जातिअन के मनइन काहीं बताबा ग हय, कि जउने उनखे ऊपर बिसुआस कइके, ऊँ पंचे उनखर हुकुम मानँइ बाले होइ जाँय। 27उँइन एकलउते बुद्धिमान परमातिमा के बड़ाई, यीसु मसीह के कीन कामन के द्वारा, जुग-जुग होत रहय। आमीन!
S'ha seleccionat:
रोमियन 16: bag
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió
© Wycliffe Bible Translators, Inc. All rights reserved.