रोम 4
4
अब्राहम को बिस्वास
1जणा पाछै म्हें काँई बोलां क आपणा धरती का बडका अब्राहमनै इ धारमिक्ताऊँ काँई समज म आयो? 2क्युं क ज अब्राहमनै बिका कामा की बजेऊँ धरमी गिण्यो जातो, जणा आतो बि ताँई गुमान करबा की बात ही, पण परमेसर क सामै नइ। 3#गलाति 3:6पबितर सास्तर काँई खेवै ह? “अब्राहम परमेसर प बिस्वास कर्यो, जिकी बजेऊँ बो धरमी खुवायो।”
4काम करबाळानै मजुरी देबो कोई एसान कोनी ह, बो तो बिको हक ह। 5पण ज कोई मिनख करम कोनी करै पण खाली बि परमेसर म बिस्वास करै जखो पाप्यानै धरमी बणावै ह, जणा बिको बिस्वासई बिकी धारमिक्ता खुवावै ह। 6जिनै परमेसर बिना करमा क धरमी मानै बिनै दाऊद बी धने खेवै ह,
7“भागहाळो ह बो जिका अधरम माफ कर्या गया,
अर जखा का पापनै ढक्यो गयो!
8भागहाळो ह बो मिनख जिका पाप परबु कोनी गिणै!”
9जणा आ धारमिक्ता हाळी बात यहूदि मिनखा पई नइ पण गैर-यहूदि मिनखा प बी लागू होवै ह। क्युं क जंय्यां म्हें कह्या हा क, “अब्राहम को बिस्वास बि ताँई धारमिक्ता गिण्यो गयो।” 10बिको बिस्वास धारमिक्ता म कद गिण्यो गयो? के बिकी सुन्नत होबा क पाछै? नइ, सुन्नत होबा क पाछै नइ पण पेली! 11इकै पाछै धारमिक्ता की छाप क रूप म एक सेलाण की जंय्यां बो सुन्नत करवाई। ओ बिस्वास बो जद दरसायो हो जि टेम का बिकी सुन्नत कोनी होई ही। जणा बो बा सगळा को बाप ह जखा बिना सुन्नतहाळा हीं पण बिस्वास करीं हीं। जिऊँ गैर-यहूदि बी धरमी गिण्या जावै। 12जखो बिस्वास अब्राहम आपकी सुन्नत होबाऊँ पेली कर्यो, ज सुन्नतहाळा सुन्नत की सेलाण क सागै बंय्यां को बिस्वास बी करै जणा बो बाको बी बाप ह।
बिस्वास अर परमेसर को करार
13 #
गलाति 3:29
अब्राहम अर बिकी ओलादानै ओ करार क बे जगत का वारिस होसी, नेम-कायदाऊँ कोनी मिल्या पण बि धारमिक्ताऊँ मिल्या जखी बिस्वास की बजेऊँ आई ही। 14#गलाति 3:18ज नेम-कायदानै मानबाळा जगत का वारिस होता जणा बिस्वास को काँई मोल रेह्तो अर करार बी बेकार होज्यातो। 15क्युं क नेम-कायदा का नियमानै तोड़बाऊँ परमेसर की झाळ मिनखा प पड़ै ह अर जठै नेम-कायदा कोनी बठै बिनै तोड़बा की गुंजाईस कोनी।
16 #
गलाति 3:7
जणा इऊँ आ बात साबित होवै ह क परमेसर को करार बिस्वास को फळ होवै ह जखो बिकी दयाऊँ मिलै ह। आई बजे ह क बिको करार अब्राहम की सगळी पिड्या प लागू होवै ह, खाली नेम-कायदा का नियमानै मानबाळा पई नइ पण बा सगळा प बी जखा अब्राहम की जंय्यां को बिस्वास राखीं हीं। बो आपणा सगळा को बाप ह। 17जंय्यां क पबितर सास्तर म मंडर्यो ह, “म तनै बोळा कूणबा को बाप बणायो।” बि परमेसर क सामै जिपै बो बिस्वास कर्यो जखो मरेड़ानै ओज्यु जीवावै ह अर जखी बात आथई कोनी बानै परगट करै ह बो अब्राहम आपणो बाप ह।
18जठै आस करबा की गुंजाईस कोनी बठै आपका मन म आस लेर अब्राहम बिपै बिस्वास कर्यो, आई बजे ही क बो कह्या गेल बोळा कूणबा को बाप बण्यो जंय्यां पबितर सास्तर म मंडर्यो ह, “तेरै बोळी ओलाद होसी जखी गिणी कोनी जासी।” 19बो चोखी तर्या जाणतो हो क बिकी काया सो बरस की बूडी मरियलसी होगी अर सारा बांझ ह, इकै बावजुद बी बिस्वास म बिना हाल्या 20परमेसर का करार म बिस्वास जगायो राख्यो। आई नइ पण बिस्वासनै ओर बी मजबूत कर परमेसरनै मेमा दि। 21बिनै पक्को बिस्वास हो क जखो करार परमेसर बिऊँ कर्यो ह बिनै बो पूरो करबा की ताकत राखै ह। 22आई बजे ही क बिको ओ बिस्वास बिकी धारमिक्ता गिण्यो गयो। 23पबितर सास्तर को ओ बचन क, “बिस्वास बि ताँई धारमिक्ता गिण्यो गयो”, खाली बि ताँई नइ 24पण आपणा ताँई बी ह। परमेसर आपानै जखा बिपै बिस्वास राखां हां धरमी मानसी। बो आपणा परबु ईसुनै ओज्यु जीवायो। 25ईसुनै आपणा पाप ताँई मरबानै दिओ गयो अर आपानै धरमी बणाबा ताँई मरेड़ा मऊँ ओज्यु जीवायो गयो।
S'ha seleccionat:
रोम 4: एस डब्लु वी
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
(c) 2010-2017, New Life Computer Institute. All rights reserved