Izaiya 7
7
Izaiya ohoza muwendjeliha mwene Akazi
1Akazi mwana Jotawu, muzuliye wa Uziya agali mwene wa Juda sidadi ya Jeruzalemu, kohokalawo amwidani kazile ira kawane na liye. Mmohi ali Rezimi mwene wa Siriya. Mmohiwa ali Peka mwana Remaliya mwene wa Izarayeli. Aliwa kohoza Jeruzalemu ira kawane kondo ira kagondjihe Jeruzalemu wali mwene Akazi, mbwenye tchawandile. 2Akazi na abalaye a muibalini mwa Davi kagavwile ira akuda Siriya kohokana vwanana na akuda Efarayimi,#7:2 akuda Efarayimi: Ku wonga atu a umwene wa Izarayeli. Tchoira nlogo nlukulu muwari mwa umwene wa Izarayeli ali nlogo na Efarayimi. mwene na atwaye kohorendjeya roma ngurumelaga nnga mitengo da muguguruni datekenyeyaga na nipevo.
3Nomala eno, Yehova ohowonga na Izaiya ira: <<Umutukule mwanawo Seyari-Jasube,#7:3 Fwanyeya ira Izaiya ohokana mwanaye eriwa Seyari-Jasube. Nzina neno nnatapulela ira a vang'ono anowela. Ku wonga masiki aIzarayeli atene katamangihiwe mwilamboni mwewa, kohokalawo a vang'ono anafuna welela mwilamboni mule ira kakalegemo akoka. mudowe mwagumane na mwene Akazi magomelo wa movira mwa mahindje okumela ntiya na mahindje nnafwanyeya muzulu wandamelana ndila yodowa munda wa namafulra nguwo. 4Wamuwandele Akazi ira akale owendjelene eto akale pee eto ahaove eto ahakukumuwe mmirimani mwaye na mwasa wa uwali wa Rezimi na akuda Siriya afwaye na Peka mwana Remaliya. Aliwa anakala nnga kuni dotuwela utchi bahi. 5Akuda Siriya na akuda Efarayimi vamohi na Peka mwana Remaliya kohopangana ira kamwirele mwene Akazi jotakala keraga: 6<Ndoweni nawane na akuda Juda, naatutcheni, naagondjiheni. Naagondjiha, ilambo yewa inakala yehu eto nnomuhambiha mwana Tabeyali ira akale mwene wa wewule.> >> 7Mbwenye Nabwiya Yehova unawonga ira: <<Jejo jinafuna atu irana kajinawandeya, eto kajiza jiireya. 8Mwasiwa ilambo ya Siriya muruwa tchi sidadi ya Damaxiku. Eto Damaxiku muruwa gu mwene Rezimi. Eto vahanavire yaka 65, nlogo na Efarayimi nnogudjuliwa pesa pesa ira kahakaleve nlogo na atu. 9Eto ilambo ya Efarayimi muruwa tchi sidadi ya Samariya. Eto Samariya muruwa gu Peka mwana Remaliya.#7:8-9 kajinawandeya… mwasiwa Damaxiku muruwa gu mwene Rezimi… Samariya muruwa gu Peka mwana Remaliya: Ku wonga akuda Siriya na akuda Damaxiku tchawanda agondjiha akuda Juda mwasiwa aliwa kosogolrelriwa na atu hiya sogolrelriwa na Mulugu otonga jatene. (Izaiya 2:22) Mwahalimbe mwa nroromelo, kamuza mukala olimba akoka.>>
Za wa Emanuwele
10Yehova eto ohowonga na Akazi akoka eraga: 11<<Udivepe miyo Yehova Mulugu wawo ira diirena ionihedo inafuna we. Ionihedo iwa ikale yorutcha nnga diha udihile ilambo ya atu kakwile nari yolapa nnga ulapile zulu.>> 12Mbwenye Akazi ohowakula eraga: <<Kadiza dinvepa eto kadiza dimuwesa Yehova.>> 13Evale Izaiya ohowongaga eraga: <<Muvwe nyo atu a muibalini mwa Davi. Kodi awaheyiha atu kunaukwakwaneni?#7:13 awaheyiha atu kunaukwakwaneni? Joira ja Akazi jali joawaheyiha atu eto jali jomuwaheyiha Mulugu. (2 Amwene 16:2-4) Eto nyo munafuna mumwaheyihe eto na Mulugu wagene? 14Nona Nabwiya mwinnya unafuna auvaheni ionihedo. Kaing'anani, namwali ula ahagumanile na mulombwana unoza akayena vambani, ambale mwana wa mwanapongwe, anvahe nzina na Emanuwele.#7:14 namwali ula ahagumanile na mulombwana unoza akayena vambani: Inakala nnga Izaiya awongaga na Akazi, okala namwali amutonya liye. Emanuwele: Ku wonga ira Mulugu uli na hiyo. Mazwala anorutcha tapulela. Inakala nnga Izaiya awonga zela yengo yafuna ireya tempu yaliwo liye, yowonga yenno eto yamutonyiheda Yesu. (Matewuji 1:23) 15Mwanole afiya idadi yoiziwa konda yabure eto sakulra yapama, unadjege nuwi na mukaka osakanyediwa.#7:15 mukaka osakanyediwa tchi yengo yodjiwa na kwilyeri nnga nipala. 16Mbwenye mwanole ahanafiye idadi yoiziwa konda yabure eto sakulra yapama, vilambo da amwene ambinli anno anaututchani ayo nnosanduwa dikale madebe.
Tongiwa owopiha unafuna za
17<<Yehova unoza auvaheni malambo a goyi romela nyo, atwinyu vamohi na atu a muibalini mwa babinyu. Goyi yenno kinarome kalawo kuma siku nenne namwalanne Efarayimi na Juda.#7:17 kuma siku nenne namwalanne Efarayimi na Juda: Ku wonga tempu yamwalanne aIzarayeli na akuda Juda, atu atene kakumile muwari mwa nlogo nimohive na Izarayeli. Nione 1 Amwene 12:1-24. Goyi diwa nnakumela wa mwene wa akuda Asiriya.>> 18Siku neno Yehova unoza aimbe pintu aitanaga pondolre dili vevo vipanduwele mihindje da Ijipitu eto aitanaga nuwi dili ilambo ya Asiriya.#7:18 pondolre dili vevo vipanduwele mihindje da Ijipitu… nuwi dili ilambo ya Asiriya: Ku wonga amwidani kafuna za wana na akuda Juda kafuna kakume ilambo ya Ijipitu na ilambo ya Asiriya eto kafuna kakale owopiha. 19Edo nnoza difiye, dibotelrege mmambalo mwa vodiha, mmilihani mwa mabwe, mmingani mwatene na modjiha jifuwo mwatene.#7:19 dibotelrege mmambalo mwa vodiha: Ku wonga amwidani kaza, kannaoneya nimburo notawela mwasiwa amwidani ale anakala mwatene mwene.
20Siku neno Nabwiya unoza aainge na lembe naalugarile liye kombela wa muhindje Eufarati, wenno unafwanyeya agali mwene wa Asiriya. Liye na lembe naye unoza auingeni nsisi na mmuruni na maningo matene vamohi na ndevu. 21Siku neno mutu unokoya ng'ombe imohi ing'onong'ono ya muhiyana na mabila menli. 22Mwa jifuwo jejo mutu unoza akayena mukaka pwi eto unadjege mukaka osakanyiwa. Mwasiwa mutu uli watene unafuna hala emule unadjege nuwi na mukaka osakanyiwa. 23Siku neno munda wa uva wapama okana miratchi da uva 1.000, wenno aguliwa na kobiri da parata 1.000, unoza asanduwe akale makaruwe na minga bahi. 24Mutu avolowaga munda wenno, unavolowege na urwa naye na mafumwiwa mwasiwa ilambo yatene inomala zala makaruwe na minga.#7:24 avolowaga munda wenno, unavolowege na urwa naye na mafumwiwa: Ku wonga munda wenno umala sanduwa kala kokola muli anavinyama. 25Eto mmwangoni mwatene mwalimiwetcha wanle, atu kinavolowegemo na mwasa oova makaruwe na minga. Minda dedo nnoza disanduwe dikale nimburo nodjiha ng'ombe na mabila bahi.
S'ha seleccionat:
Izaiya 7: iLolo
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2018 Visão Integral