YEMISI 4

Gbɛ̃nnakpana kↄ̃n andunao

1Bↄ́ bé è swèe kↄ̃n lɛokpakↄ̃ao da a tɛ́ɛ? Aↄ̃è bↄ a pↄyezi kɛ̀ aↄ̃ↄe kↄ̃dɛɛ kɛɛ a mɛ̀guunↄ kiianloo? 2Eègↄ̃ ye pↄ́zi, mↄde eè ero, ben eè gbɛ̃ dɛ. Eè pↄ́ ni dɛ, ben eè pↄ́ kɛ̀ ée pɛɛa lero. Ben eè lɛokpakↄ̃a kɛ, eè swèe kɛ. Á vĩro, kɛ̀ eè wɛ́ɛ kɛ Ludaaro yãnzimɛ. 3Tó à wɛ́ɛ kɛ̀, eè ero, kɛ̀ eè wɛ́ɛ kɛ nↄ̀sɛ maaaoro yãnzimɛ, zaakɛ eègↄ̃ yezi à a bↄkↄ̃tɛ kɛ a pↄ́nidɛnanↄ guumɛ. 4Náanɛsaideenↄ, á dↄ̃ kɛ̀ gbɛ̃nnakpana kↄ̃n andunao nɛ́ íbɛtɛkpana kↄ̃n Ludaonloo? Gbɛ̃ kɛ̀ yezi à kɛ anduna gbɛ̃ ũu gↄ̃̀ Luda ibɛɛ ũmɛ. 5Kɛ̀ wà kɛ̃̀ Luda yãn wà bè, Ninii kɛ̀ Ludaa dà wa guu nↄ̀sɛgↄ̃aanↄ vĩ, ée daa yã pãamɛↄ́? 6Mↄde gbɛ̃kɛɛ kɛ̀ Ludaa vĩwao dɛ beeela, zaakɛ wà kɛ̃̀ Luda yãn wà bè:

Luda è íbɛtɛ kpá kↄ̃n ĩadãrinↄ,

mↄde à gbɛ̃kɛɛ vĩ kↄ̃n zĩndabusarinↄ.

7Beee yãnzi à mì siɛ Ludanɛ. À gí Ibilisinɛ, eé bàa síare. 8À sↄ̃ Ludazi, eé sↄ̃azi. Durunkɛrinↄ, à ↄ bↄ durunn. Nↄ̀sɛplaadeenↄ, à a swɛ̃̀ pípi. 9À ↄ́ↄ dↄ kↄ̃n pↄsiaao kↄ̃n wɛ̃ndaao. À a yáadↄna liɛ ↄ́ↄdↄna ũ, à a pↄnnaa liɛ nↄ̀sɛyakana ũ. 10À a zĩnda busa Dii aɛzĩ, eé a sɛ́ lezĩ.

11Ma gbɛ̃nↄ, àton kↄ̃ tↄ́ zaaa síro. Gbɛ̃ kɛ̀ à a Yesude daa tↄ́ zaaa sì ke à à zaa bò, à Luda doka sèeda zaaa kɛ̀ à à zaa bò. Tó n Luda doka zaa bò sↄ̃, à màrin n ũro, à zaaborin n ũ. 12Ludan dokadiɛri ũ kↄ̃n yãkpaɛkɛrio. Àmbe à gbɛ̃ mìsina kↄ̃n à kaatɛnao gbãa vĩ. Mpi sↄ̃, dén n ũ, kɛ nɛɛ̀ n gbɛ̃daaa zaa boo?

Luda bà bↄna

13À yã ma sa, amↄa kɛ̀ eè be, gbã̀a ke zia é gá mɛɛwi, é vɛ̃ɛ gwe wɛ̃̀ do, é laa tá à àre e. 14Á yã kɛ̀ eé a le ziaa dↄ̃ↄ́? Á dↄ̃ lán a wɛ̃̀ndi dɛ nàↄ́? Á dɛ lán sukaa bàmɛ. Tó à kpà féte, ben è gɛ̃ zɛ́la gↄ̃ↄ. 15Yã kɛ̀ dɛ à oon yɛ̀: Tó Dii wè, ben wá aafia, wé kɛ lán kɛ̀ bà ke lán kɛ̀ bà. 16Tia sↄ̃ ée ĩa dãa, a Luda bà bↄ̀. Ĩadãna beee taka borii maaro. 17Gbɛ̃ kɛ̀ maakɛna dↄ̃ ben èe kɛroo durun kɛ̀.

S'ha seleccionat:

YEMISI 4: BBB

Subratllat

Copia

Compara

Comparteix

Vols que els teus subratllats es desin a tots els teus dispositius? Registra't o inicia sessió