लूका 1
1
भेत
1जनाब थियुफिलुस, ज़ुंण गल्ला हाम्हां जैंदरी हुई-बिति दी आसा, तिन्नां गल्ला झाल़णैं अर लिखणा लै आसा हाम्हां मांझ़ै खास्सै मणछै मैन्थ किई दी। 2ईंयां गल्ला पजैल़ी हाम्हां सेटा तिन्नैं ज़ुंणी ईंयां गल्ला पैहलै ई आपणीं आछी भाल़ी अर ईशूए खुशीए समादा ज़ैगै-ज़ैगै खोज़णैं आल़ै थिऐ। 3तैही सोठअ मंऐं इहअ ठीक कि हुंह लिखूं ताल्है ज़ाच़ी-भाल़ी करै शुरू ओर्ही बाढै इना गल्लो पूरअ हाल। 4ताकि ताखा ऐहा गल्लो थोघ लागे कि ज़ुंण गल्ला ताखा खोज़ी दी आसा, तिंयां आसा शुची अर अटल़।
जोहन्ने ज़ल्म हणें बारै
5ज़धू यहूदा मुल्खै हेरोदेस राज़ैओ राज़ थिअ, तधू थिअ अबियाह प्रोहते दला#1:5 अबियाह प्रोहते दला दाबेद राज़ेए ज़मानैं ओर्ही तै प्रोहते 24 दल। तिंयां करा तै भबने हर काम ज़िहअ कि भैंट, बल़ीदान, प्राथणां, पूज़ा अर भबने हेर-सभाल़। हर दले एछा ती छ़हा भिन्नैं बाद बारी अर साला दी दूई बारी। दी एक जकर्या नाओं प्रोहत अर तेऊए लाल़ी इलीशिबा#1:5 इलीशिबा सह बी थिई इज़राईले प्रोहत हारणे खिंबा का ती हारण प्रोहते खिंबा का। 6तिंयां दुहै ज़ण्हैं तै परमेशरा सेटा धर्मीं अर प्रभूए सारै हुकम अर बधाने बिधी मनणा लै आसा तै तिंयां नर्दोश। 7पर तिन्नें निं आजू आद-लुआद किछ़ै आथी ती! किल्हैकि इलीशिबा ती बांढी अर ऐबै गऐ तै तिंयां दुहै ज़ण्हैं खास्सै प्रोढै बी हई।
8तेखअ हुअ इहअ कि जकर्ये टोली ती बिधाते भबनै प्रोहतच़ारी करने बारी अर जकर्या त परमेशरे भबनै च़ाकरी करदअ लागअ द। 9आपणैं रबाज़े साबै परच़ी पाई छ़ांटअ जकर्या तेऊए टोली आल़ै कि सह प्रभूए भबना भितरी डेऊई धूप ज़ाल़े।#लुआ. 30:7 10ज़ांऊं सह भितरी धूप ज़ाल़दअ लागअ, तेभै तै बागा बाखा भबने ताटी खास्सै मणछ प्राथणां करदै लागै दै।
11तेऊ का शुझुअ नभैऊशै कि एक परमेशरो स्वर्ग दूत हुअ धूप बेदीए दैहणीं बाखा प्रगट। 12तेऊ स्वर्ग दूता भाल़ी झशकुअ जकर्या! अर डरअ बी खास्सअ। 13पर स्वर्ग दूतै बोलअ जकर्या लै, “जकर्या, तूह निं डरै आथी, प्रभू हेरी तेरी प्राथणां शूणीं अर तेरी बेटल़ी इलीशिबा का हणअ तेरअ एक शोहरू, तूह डाहै तेऊ शोहरूओ नाअं जोहन्ना।” 14ताह हणीं तेऊ करै नंद अर खुशी, होरी बी भेटणीं खास्सै मणछा तेऊए ज़ल्म हणैं करै खुशी। 15किल्हैकि सह हणअ प्रभू सम्हनै महान। तेऊ निं कधि दाखो रस अर शराब झुटणअ, सह हणअ आपणीं माए ओदरा ई का पबित्र आत्मां करै भर्हुअ द।#इफि. 5:18; पांच़ 13:4-5 16तेऊ फरेऊंणै इज़राईला का खास्सै मणछ परमेशर बिधाता बाखा लै। 17सह डेऊणअ प्रभू आजू-आजू शगती अर पबित्र आत्मां दी एलियाह गूरा ज़िहअ ताकि सह सैणैंओ मन्न तिन्नें लान्हैं बाखा लै फरेओए अर परमेशरे हुकम नांईं मनणै आल़ै मणछा धर्में समझ़ एछे अर प्रभू लै एक धर्मीं परज़ा बणाईं सके।#मला. 4:5-6
18जकर्या पुछ़अ स्वर्ग दूता का, “हुंह किहअ करै करूं ऐहा गल्लो भरोस्सअ? आप्पू; हुंह प्रोढअ आसा अर मेरी लाल़ी बी गई प्रोढी हई?”
19स्वर्ग दूतै बोलअ तेऊ लै इहअ, “हुंह आसा जिबराईल स्वर्ग दूत, अर हुंह रहा सदा परमेशरा सम्हनै खल़्हुई। हुंह आसा परमेशरै ताह सेटा लै गल्ला करदअ अर ऐहा खुशीए समादा खोज़दअ छ़ाडअ द।#दान. 8:16; 9:21 20पर ऐबै शुण, ज़ेभै तैणीं ईंयां गल्ला पूरी निं हई मुक्के, तेभै तैणीं रहणअ तूह काल्लअ अर तूह निं किछ़ै बोली सकदअ। इहअ हणअ तै किल्हैकि तंऐं निं मेरी इना गल्लो विश्वास किअ ज़ुंण ठीक बगती पूरी हणीं।” 21लोग तै बागै जकर्या न्हैल़ै-भाल़ै लागै दै अर तिंयां हुऐ रहैन कि जकर्या भबना भितरी एतरी बल़ैग किल्है पाई? 22ज़ांऊं जकर्या बागै निखल़अ, सह निं किछ़ै बोली सकअ, जकर्या लागअ तिन्नां लै शारै करदअ अर सह रहअ काल्लअ ई। तै गऐ तिंयां समझ़ी कि बिधाते भबना भितरी शुझुअ हणअ एऊ का किज़ै।
23ज़ांऊं तेऊए च़ाकरीए धैल़ै पूरै हुऐ, सह डेऊअ आपणैं घअरा लै। 24इना धैल़ै बाद हुई तेऊए लाल़ी इलीशिबा सुंदी। पर सह निं पांज़ा भिन्नैं तैणीं आपणैं घअरा का ओर्ही-पोर्ही दूर डेऊई। 25सह लागी आपणैं मन्नैं बोल्दी कि इना धैल़ै किई अह क्रिप्पा प्रभू मुंह संघै मणछा मांझ़ै इज़त डाहणें तैणीं।#मूल. 30:23
ईशूए ज़ल्म हणें बारै
26इलीशिबा सुंदी हणें छ़हा भिन्नैं बाद छ़ाडअ परमेशरै जिबराईल नाओं स्वर्ग दूत गलील मुल्खै नासरत नाओंऐं नगरी एकी कुंआरी सेटा। 27तैहा कुंआरी नाअं त मरिअम अर तेसे बरनीं ती दाबेदे राज़े खिंबे एकी युसुफा नाओंऐं मर्धा संघै हुई दी। 28स्वर्ग दूत आअ तैहा सेटा भितरी संघा बोलअ तैहा लै, “तेरी हणीं बधाई, परमेशरै दैनअ ताल्है जश अर प्रभू आसा ताह संघै।”
29एऊ बैणा शूणीं पल़अ मरिअमे मन्नैं झाख अर सह लागी इहअ सोठदी कि इना गल्लो किज़ै मतलब आसा। 30तेखअ बोलअ स्वर्ग दूतै तैहा लै, “हे मरिअम, तूह निं फिकर करी ताल्है किई परमेशरै झींण। 31भाल़, तूह हणीं सुंदी अर तेरअ हणअ एक शोहरू अर तूह डाहै तेऊ नाअं ‘ईशू।’#ईशा. 7:14 32सह हणअ महान अर परम प्रधान परमेशरो पूत। परमेशर बिधाता तेरै दाद-बाब राज़ै दाबेदे राज़गाद्दी तेऊ लै।#भज. 132:11; ईशा. 9:6-7 33तेऊ करनअ याकबे घरानै दी सदा राज़, अर सह हणअ सदा लै राज़अ।”#2 शमू. 7:12,16; इब्रा. 1:8; दान. 2:44
34मरिअमै बोलअ स्वर्ग दूता लै, “इहअ किहै करै सका हई? हुंह, कुंआरी आसा?”
35स्वर्ग दूतै बोलअ तैहा लै, “ताल्है एछणअ पबित्र आत्मां अर परम प्रधान परमेशरे शगती रहणीं ताह संघै। ज़ुंण सह पबित्र शोहरू पैईदा हणैं आल़अ आसा, तेऊ लै बोल़णअ परमेशरो पूत।” 36शुण, तेरी मसेरी बैहण इलीशिबे बारै आसा सोभी का थोघ कि सह आसा बांढी; एभै आसा तेसो छ़ऊअ भिन्नअ लागअ द। 37परमेशरे भलै सका सोभै गल्ला हई।#मोत्त. 19:26; जेर. 32:27
38मरिअमै बोलअ तेऊ स्वर्ग दूता लै, “भाल़, हुंह आसा प्रभूए दासी, ज़िहअ तूह बोला तिहअ ई लोल़ी मुल्है हुअ।” सह स्वर्ग दूत डेऊअ तेखअ तिधा का।
मरिअमो इलीशिबा सेटा मिलदै डेऊणअ
39संघा डेऊई तिन्नां ई धैल़ै बाद मरिअम उझै सराज़ा दी यहूदा मुल्खै एकी नगरी लै ज़िधी जकर्या प्रोहत रहा त। 40ज़ांऊं सह जकर्ये घअरै पुजी, तैहा पुछ़ी इलीशिबा का राज्ज़ी-खुशी, 41ज़हा घल़ी इलीशिबा मरिअमे राज्ज़ी-खुशी शूणीं, तैहा ई घल़ी लागअ तेसे पेटै शोहरू च़ुकदअ अर इलीशिबा भर्हुई पबित्र आत्मां करै।
42इलीशिबा बोलअ ज़ोरै हाक पाई, “परमेशरै बणाईं तूह सोभी बेटल़ी दी बडी अदर करनै जोगी अर ज़हा शोहरू लै ताह ज़ल्म दैणअ, तेऊ लै बी दैनी परमेशरै बर्गत। 43मेरै ईंयां भाग किधा का खुल्है कि मेरै प्रभूए ईज आई मुंह सेटा लै? 44भाल़ मरिअम, ज़ांऊं तंऐं मुल्है राज्ज़ी-खुशी पुछ़ी अर सह बोल ज़ांऊं मेरै कानै पुजअ, तैहा ई घल़ी लागअ मेरै पेटै शोहरू खुशी-खुशी च़ुकदअ। 45परमेशरा दैणीं ताल्है बर्गत, किल्हैकि तंऐं किअ विश्वास कि ज़ुंण गल्ला प्रभू बाखा का ताल्है बोली ती, तिंयां हणीं पूरी।”
मरिअमो स्तोती भज़न
46तेखअ बोलअ मरिअमै,#1 शमू. 2:1; 1:11; लूक. 1:42; मला. 3:12
“मेरी आत्मां करा प्रभूए ज़ै-ज़ैकार
47अर हुंह हुई उद्धार दैणैं आल़ै परमेशरा करै खुश।
48किल्हैकि तेऊ भाल़ी हुंह ज़ुंण तेऊए दासी अर तैही भाल़ा,
एभा पोर्ही जुगे-जुगे लोगा बोल़णअ इहअ कि परमेशरै दैनी मुल्है बर्गत।
49किल्हैकि स्वर्गे सारी सैने मालक परमेशरै किऐ मुल्है बडै-बडै काम
अर तेऊओ नाअं आसा पबित्र
50अर तेऊए झींण हआ तिन्नां लै ज़ुंण तेऊए डरा हेठै रहा,
अर सह झींण रहा पोस्ती दर पोस्ती बणी।
51“तेऊ रहैऊअ आपणीं बाहो बल#2 शमू. 2:7; आयू. 5:11; भज. 113:7-8
अर ज़ुंण आप्पू बडअ समझ़ा तै तिंयां दरल़ाऊऐ तेऊ सातै-बातै।
52तेऊ किअ बडै-बडै राज़ैओ राज़ खतम,
अर दुखी-दल़िदर किऐ बडै।
53भुखै दैनै तेऊ बधिया गल्ला करै रज़ैऊई
अर सेठ काढै रित्तै हाथै दरल़ाऊई।
54“आपणैं च़ाकरी करनै आल़ै इज़राईलीए किई तेऊ हेर-सभाल़
कि तिंयां तेऊए झींण आद डाहे,
55ज़ुंण आबरामा अर तेऊए खिंबा दी सदा रहणीं।
“ज़िहअ तेऊ म्हारै दादा-बाबा का बोलअ त।”#मूल. 17:7
56मरिअम रही चिई भिन्नैं तैहा सेटा अर तेखअ आई सह घअरा लै फिरी।
जोहन्ना डुबकी दैणैं आल़ैओ ज़ल्म
57तेखअ आऐ इलीशिबे सूंणें धैल़ै अर तेसो हुअ एक शोहरू। 58ज़ांऊं तेसे साथी-संघी शूणअ कि परमेशरै किई तैहा लै झींण अर तेसो हुअ शोहरू, तिंयां बी हुऐ खास्सै खुशी।
59तेखअ हुअ इहअ कि आठुऐ धैल़ै निंयं आपणअ शोहरू तिन्नैं खतैर करना लै, तिन्नैं लाअ त तेऊओ नाअं तेऊए बाब ज़िहअ जकर्या डाही।#मूल. 17:12; लेब. 12:3 60पर तेऊए ईजै बोलअ इहअ, “एऊ शोहरूओ नाअं डाहंणअ जोहन्ना।”
61तिन्नैं होरी बोलअ तैहा लै इहअ तेरै खिंबा दी निं इहअ नाअं कोहिओ आथी? 62तेखअ पुछ़अ तिन्नैं तेऊ शोहरूए बाबा का शारै करै, “किहअ करनअ? कि तूह एऊओ नाअं कै च़ाहा डाहंणअ?” 63तेखअ मांगी तेऊ तिन्नां का लिखणे तगती अर तेथ लिखअ, “एऊओ नाअं आसा जोहन्ना।” तिंयां सोभ हुऐ रहैन। 64तेऊओ खाख अर ज़िभ खुल्ही तेभी; सह लागअ गल्ला करदअ अर परमेशरो शूकर करदअ।
65तेऊ ओरी-पोरी रहणैं आल़ै डरै सोभ अर तिंयां गल्ला पुजी तेस्सी बाती तेस्सी कई ज़ैगा यहूदा मुल्खै सारै सराज़ै। 66ईंयां गल्ला ज़ुंणी बी शूणीं तिंयां लागै आपणैं मन्नैं सोठी बोल्दै कि अह शोहरू किहअ हणअ? किल्हैकि प्रभूए शगती आसा तेऊ संघै।
जकर्यो स्तोती भज़न
67तेऊ शोहरूओ बाब जकर्या भर्हुअ पबित्र आत्मां करै अर सह लागअ आजू हणैं आल़ी गल्ला प्रगट करदअ,#भज. 111:9
68“प्रभू, इज़राईले परमेशरे ज़ै-ज़ैकार#भज. 132:17; जेर. 30:9
तेऊ दैनअ आपणीं परज़ा लै धैन अर तेऊ दैनअ तिन्नां लै छ़ुटकारअ।
69आपणैं दास राज़ै दाबेदे खिंबा दी दैनअ आजू एक इहअ शगती आल़अ,
ज़हा हाम्हां लै उद्धार दैणअ।
70ज़िहअ परमेशरै खास्सी साला पैहलै आपणैं पबित्र गूरा का खोज़अ
ज़ुंण एऊ संसारे शुरू ई का थिऐ बोल्दै लागै दै।
71म्हारै तिन्नां दुशमणे हाथा का दैनअ हाम्हां लै उद्धार
ज़ुंण हाम्हां संघै ज़ीद डाहा तै।
72परमेशरै डाही म्हारै दादा-बाबा लै झींण करी
आपणीं पबित्र करार आद।
73“ता सह करार ज़ुंण तेऊ म्हारै दाद-बाब आबरामा संघै किई ती,#मूल. 17:7; भज. 105:8-9
74कि तेऊ दैणअ हाम्हां लै इहअ कि
हाम्हैं आपणैं दुशमणे हाथा का बच़ी
75तेऊ सम्हनै पबित्र धर्मीं अर निहंचै
सारी ज़िन्दगी तेऊए च़ाकरी करदै रहे।
76“हे शोहरूआ,#मला. 3:1; ईशा. 40:3
तूह हणअ परम प्रधान परमेशरो गूर,
किल्हैकि तूह हांढणअ आजू-आजू ताकि प्रभू एछणें धैल़ी लै लोगा तैर करी सके,
77ताकि तूह तेऊए लोगा लै उद्धारो ज्ञैन दैई सके,
ज़ुंण तिन्नें पाप माफ हई भेटणअ।
78किल्हैकि परमेशर आसा हाम्हां लै झणैल़ू
तेऊ करनै हाम्हैं माफ इहअ करै अह उद्धार करनै आल़अ
ज़ुंण दोत्ती सुरज़ा ज़िहअ आसा, अह एछणअ स्वर्गा का म्हारी मज़त करदअ ताकि
79न्हैरै अर मौते छ़ैल्ली दी बेशणै आल़ै लै प्रैश्शअ होए।
“तेऊ खोज़णीं हाम्हां का सुंबल़ी बात ताकि हाम्हैं शांती दी ज़िऊई सके।”#ईशा. 58:8; 60:1-2; 9:2
80इहअ करै लागअ सह शोहरू जोहन्ना बढदअ अर आत्मां दी जोधअ हंदअ अर इज़राईल देशे लोगा मांझ़ै प्रच़ार करनै का आजी तैणीं रहअ सह शुन्नैं रेगीस्तानै।
S'ha seleccionat:
लूका 1: OSJ
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
This work is licensed under Creative Commons Attribution-ShareAlike 4.0 License.