Ɛyf 7
7
Kesuŋnen ə Stefen se ghɛ́ ndaa nsake
1Ketuu se ghɛ́ ntaŋlee me bif se Stefen ge: Əbnəə vin wɛ ɛ́ suuyen ɛ wɛ̀ əbghun lɛ lu se əbluuy-a? 2Əb fise ge: Ɛbaa ə ghome gese nɛ̀ ghone-nyii, ghɛn yióté. Feyin wɛ əb ngaŋten è chia nè lô din ngeŋ ə wen se Ba ə wɛsen Ablaham nɛ əb bo bɛɛy ɛ Mesobotamia, nɛ əb geese ndu se yɛ chii ɛ Halan. 3Əb nè suuy se wen ge: Loo se ghɛn ɛylak è vəse ghel ə ghɛn è ndu se ghaa mɛ nɛ̂y din se wɛ̀. 4Ablaham me lòò se ɛylake Chaldea è ndu è se chii ɛ Halan. Ba ə wen naa kuo, Feyine nɛɛy əb loo se fô è gwiy ɛylak fɛn ghaa ghɛne chiin. 5Əb nè chii fɛn dì, Feyine cheme jia fo naa feliikese ntiɛ se wen ghɛy, dî è kak ge Yi náà fo ɛylak yin se wen ghene ɛyshaa ndaa nə wene. Feyine fo ɛykak yin nɛ Ablaham chèmè ki wiy wán ghɛy. 6Feyine me gese suuy se wen ge: Ɛyshaa ndaa nə wɛ̀ náà ndu è yɛ lu əbngwiy ɛ ketum kechine, fɛle kekos nɛ ɛ́ nəkse ghene fo se ngukse ɛyviɛ ɛykɛɛk. 7Feyine gese suuy ge: Mɛ náà mak ngɛk se ketum nɛ̂ fo, é ɛykfəə ə yiɛ fəy se fô è gwiy è yɛ kokse mɛ fɛn. 8Feyine me suuy se Ablaham ge əb nɛ̂y yɛ nɛyte ghon ə wen ka əbchəyte kelek kefɛɛ. Ablaham naa bii Ayzek, əbchii lun ɛyfaame əb nɛyte wen, Ayzek naa bii Jakob è nɛyte, Jakob naa bii ghon ə wen ghɛ njio-sebaa ɛyvəm ghɛ luun ɛbaa ə ghɛsen è nɛyte.
9Ɛbaa ghɛsen ghii naa me ghɛk Josɛf wɛ wán no ə ghen, è feene ɛ Ejibt ge kekos, dî Feyine se toknen nɛ̀ wen, 10è giamten wen se wene ngɛkse naa sejim. Feyine nè fo əbfee se wen è nɛɛy Əbfon Fɛlao wɛ̂ Ejibt se koŋe wen naa se ŋaŋ è lɛm wen ge əb yɛ kiynen ɛylake Ejibt gese nɛ̀ ɛykfəə Əbfone. 11Jeŋ naa koo ɛ Ejibt gese nɛ̀ se Kanaan, ghele se yɛne ngɛk naa se ŋaŋ. Ɛbaa ghɛsene jia se ki əbfua-əbyíɛ́ne. 12Nɛy se lu ka Jakob nè yion ge əbfua-əbyíɛ́ne lu ɛ Ejibt, è me tum ghon ə wen ghɛ luun ɛbaa ə ghɛsen se əbliy wɛ̂ mbiye. 13Ghene nɛy gese ndu ge kaŋ ɛbaa, Josɛf fekte ngeŋ ə wen se ghone-ba wene. Fɛlao me keele sɛy ɛykfəə Josɛf. 14Josɛf me tinse ntum se ba ə wene Jakob ge ghene ɛykfəə wen ɛyjime gwiy. Ghene ghel ɛjim nè lu njio-setan əmsaamba. 15Josɛf ghene ghe ɛbaa ə ghɛsene loo è ndu se Ejibt bene fɛ ghene nè kalen ə kuo, 16ɛ́ liɛ tegvən ə ghene è kase ndu so se Shekem, è gvəəme se ɛysɛy yɛ Ablaham nè yunen se ghon ə Hamo-o.
17Əbliye naa loo kwɛn wɛ Feyine lunse ɛykak yɛ əb nè kaken Ablaham so, ghel ə ghɛsene me se dio naa se ŋaŋ ɛ Ejibt. 18Ɛ́ me tom əbfon əblee nɛ əb ke wiy kenəə kum Josɛf, əb se sake Ejibt. 19Əbfon nɛ̂ vi me se lɛɛse ghel ə ghɛsen, nəkse ɛbaa ə ghɛsen, kane ge ghene yɛ maay ghon ə ghen ɛ bɛy ka ɛ́ kuoke.
20Nè lu ɛ əbliy nɛ̂ fɛn wɛ ɛ́ nè biin Moses, Feyine se koŋe wen naa se ŋaŋ, ɛ́ se ki wɛn ɛ ba ə wene bɛy se njoŋ setal. 21Ɛ́ nɛy maay wen se bɛy, wan Fɛlao əbkiy boŋ wen, è liy wen ɛ ntok ka wán ə wen. 22Moses me se kuye, yiɛke əbfee wɛ̂ Ejibt əbjim, è se lu wel Əbtaa ɛ wen ə kesuŋnen nɛ̀ se əbnəə wɛ̂ əb nè nɛɛyen,
23Nɛy se lu ka Moses chinen ngukse əmkɛɛk, əb liɛ ge yi shik ɛyghan se ghel ɛykfəə nə ghene ghɛ ghele Islael. 24Əb loo ndu, è yɛn nɛ wele Ejibt nəkse wele Islael. Əb chia è giamten wele Islael vi, è yuy wele Ejibt wɛ ten se seese kenəə kɛ əb nè nɛɛyen. 25Moses nè kwaate ge ghele wene keele ge tum Feyin yi ge yi fii ghene, dî ghene jia keele. 26Əbtəke yio əb loo ndu è yɛn ghele Islael ɛbaa nɛ ɛ́ noo. Əb se momse se giabsene ghene ge ghene yɛ lu əbchio əbmok, è suuy ge: Sun ə some, ghɛn lu ghone-nyii, noo gee ghɛ? 27Wel wɛ əb nè nəksen wán-no wen dom Moses domen è suuy ge: Lɛm ndɛ wɛ̀ ge wɛ̀ yɛ sake ghɛs, tenen nsak ə sɛs? 28Wɛ̀ kɛŋe se yuye mɛ ka wɛ̀ ne yuyten wele Ejibt ɛ ɛyyionen-a? 29Moses yio dî è me nyiŋ è ndu se ɛylake Median è se chii fo ka kengwiy, è naa bii ghon ɛluumen fo ɛbaa.
30Naa se lu ɛybame nguk əmmkɛɛk, Moses yɛn nchiy-ndaa-Feyin ɛ məme keleeme əbvəs kɛ ke nè baalen ɛ fekak ɛ əbkwak əbyume əbghune kfən Sinai. 31Əb yɛn dî ke jefse wen, əb kokte è ndu ge yi loote kiy, è me yio nɛ Bay suuye ge: 32Lu mɛ Feyin wɛ ɛbaa ghiɛ ghɛ Ablaham nɛ̀ Ayzek gese nɛ̀ Jakob nè koksen. Moses yio dî è me se fane, chiŋe, è jia gese kiy fo ghɛy. 33Bay me suuy se wen ge: Chokte guose ɛvəə nə wɛ̀, bek ge kelik kɛ wɛ tiyen ɛ ten lu kelik kelanene. 34Mɛ lu nɛ mɛ loote yɛn ka ɛ́ nəksen ghel ə ghom ɛ Ejibt, è yio ka ghene toŋen. Mɛ səəke è gwiy se boyse ghene. Gwiye fɛn, mɛ kase tum wɛ̀ se Ejibt.
35Ko lu Moses nɛ̂ vin wɛ Feyine nè tumen ghele Islael se tunsee, bife ge: Lɛm ndɛ wɛ̀ ge wɛ̀ yɛ sake ghɛs, tenen nsak ə sɛs? Feyine nè tum wen ge əb yɛ sake ghene gese boyse ghene, è chia əbghun nə nchiy-ndaa-Feyin yɛ əb nè yɛnen ɛ fekak fɛ əbvəse nè baalen ɛ ten. 36Moses nè nɛɛy əbnəə əbchio əbyúméné ɛ Ejibt è liɛ ghene è fəy sô se fô, è nɛɛy sɛy əbnəə əbchio əbyúméné ɛ Jio-ɛyghuy Ɛybaŋen. Əb nè lô nɛɛy sɛy əbnəə əbchio əbyúméné əbkwak əbyume əbliy wɛ ghene nè luun fô se nguk əmkɛɛk. 37Gese se lu Moses nɛ̂ vin wɛ əb nè suuyen se ghele ghɛ Islael ge: Feyine náà chok wele ntum nə wen ɛ ghɛne məm ka mɛ lɛ. 38Lu wen wɛ ghene ghele Islael nè luun se kenon ɛ əbkwak əbyume. Əb nè lu fô ghene ghe ɛbaa ə ghɛsen gese nɛ̀ nchiy-ndaa-Feyin yɛ ɛy nè suŋnen se wen ɛ kfən Sinai. Lu fo ghaa əb nè fiin giɛ sɛ se jia yî mɛy, è chiase se ghɛsen.
39Ɛbaa ghɛsene nè báà yiote se Moses; ghene nè tunse wen, è sɛy se ki ɛykwaate ge ghene kase fiile se Ejibt. 40Ghene me suuy se Aalon ge: Fɛle əmnyin mɛ əm yɛ dine jii se ghɛs. Ghɛse báà se ke kenəə kɛ ke ganen se Moses vi wɛ əb nè liɛn ghɛsen è fəy so se ɛylake Ejibt. 41Ɛ́ me fɛl kebambo nɛ ke fuosen wán ə na, è se gwiye nɛ̀ nyamse sɛɛ, foo ɛykokse so, chɛklee ɛyfɛle keghoo nə ghene. 42Feyine me ben jim se ghene, ghene se kokse nɛ lu chuy, nɛ̀ njoŋ, gese nɛ̀ əmnjesme ɛyyio, ghɛɛ-ghɛɛ ka ɛ́ nè nyaken ɛ ŋwaale nə ghɛ́ ntum nə Feyine ge:
“Ghele ghɛ Islaele, ghɛn nè jɛle əbkwak əbyume se ngukse əmmkɛɛk,
sɛɛ nyamse kokse nɛ lu mɛ so-a? 43Ɛngaŋ, ghɛn nè kokse nɛ lu əmnyin mɛ fɛ́len ghɛn,
bɛɛye əbtaa ɛykokse nɛ lu wɛ feyin fɛ ɛ́ toŋten ge Molok,
gese bɛɛye fenjes fɛ ɛ́ fɛlen ge feyin fɛ Lefan.
Lu bek kii nɛ̂ kine kɛ mɛ nɛ̂y jum ghɛn é ghɛn chia Babilon chian.”
44Ɛbaa ə ghɛsen nè lu əbkwak əbyume ki əbtaa ɛykokse wɛ ə́b nè dinen ge Feyine lu ghene ghene. Nè baklé Moses əbtaa ten kɛn ghɛɛ-ghɛɛ ka Feyine nè dinen se wen ge əb baklé əb yɛ́ lu. 45Ghon ə ghene nɛy yese è fii əbtaa ten se ghene è bɛɛy ɛ əbliy wɛ ghene ghe Joshua nè ghanen fiin ntiɛ se əbtume wɛ Feyine nè jumen nduu so nɛ ghene me gwiye. Əbtaa tene me gok fo se chin se əbliy nə əbfon wɛ David. 46David nè lu wel əbjuŋ ɛyshiɛ nə Feyine, è me lon ge Feyine fó əbtaawe é yi bom ndaa yɛ yɛ́ kokse Feyin ə Jakob ɛ ten. 47Dî nɛ sɛy nè kal è bom Solomon ndaa ten se wen. 48Feyine dì báà se chii ɛ ndaa sɛ bomen ghel, ke lu ɛyghɛl ka wele ntum nə wen nè suŋnen ge Feyine nè suuy ge:
49“Ɛyyio lu kaba ə wom
nɛ ntiɛ lu kebuŋten ɛvəə nə mɛ.
Lu ɛynkii ndaa ɛykɛ yɛ lòó ghɛn baklé san?
Kelike lɛ lu kɛ mɛ yɛ chii ɛ ten-a?
50Lɛ nè báà bom mɛ əbfua vin əbjim-a?”
51Stefen fiɛl dì, è suuy ge: Ghɛne taa ketuu se ŋaŋ. Tetem ə tene nɛ̀ əbtuule wɛne lu ka wɛ ghel ghɛ ɛ́ keen wiy Feyin. Ghɛne tunse Keyioy Kelanene kɛn ka ɛbaa ə ghɛne nè tunsen. 52Wele ntum nə Feyin lɛ lu wɛ ɛbaa ghɛne nè báà nəkse-a? Ghene nè yuyte ghii dii ghɛ ɛ́ nè suŋnen kum ɛygwiy wel ɛyfɛl nə Feyin əbjuŋ. Se lu nɛ ghɛn nè dinmen wen ɛ́ koo è yuy. 53Ko lu ghɛn ghɛ ɛ́ nè fiisen nchilse Feyin sɛ nchiyse-ndaa nə wen nè gwiyen so, è jia se lɛme.
Ɛ́ təmle Stefen nɛ̀ ɛtiye
54Ghɛ́ saken yio əbnəə wɛ Stefen suuyen, ke tɛ́n ghene, ghene luyse ɛykek se wen. 55Keyioy Kelanene lun se Stefen ɛytem, əb kiy ɛyyio, è yɛn ɛyban ə Feyin gese nɛ̀ Jesus nɛ əb tiy ɛ ɛybee əbkoy əbtaa nə Feyine. 56Əb suuy ge: Yɛn-a, mɛ yɛn ɛyyio nɛ ɛy dise, è yɛn nɛ Wanwel tiy ɛ ɛybee əbkoy əbtaa nə Feyine. 57Ghene yio kii nɛ̂ kine, è gwɛl fezəə, è fimte əbtuule ə ghen nɛ̀ ɛghoo, è shiŋ è ndu ɛ wen əbghun, 58faŋ wen è guf è fəy so se ntɛk è təmle nɛ̀ ɛtiye, ghel ghɛ ɛ́ nè tiyen fo tokte kenəə ten chokte ndəyse ghen è lɛm se wándɛ nsum əblee nɛ ɛ́ toŋte ge Sool. 59Ɛ́ se təmle Stefen dì nɛ Stefen jeme ge: Báàba Jesus, fiisen keyioy ə kom. 60Əb təm ɛləy è toŋ ɛ giɛ ɛytaa ge: Bay, ghàà gham ghene se mbee yin yɛ ghene nɛɛyen. Əb suuy dì è me kuo.
S'ha seleccionat:
Ɛyf 7: oku
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
©CABTAL, 2012