Ɛyf 5
5
Ananias ghene Safila Yia əbbuam se Feyin
1Wel əblee se lu nɛ ɛ́ toŋte ge Ananias, toŋte wiy ə wen ge Safila. Əb feene sɛy ɛylem ə wen, 2ghene wiy ə wen suŋnen, əb lete əbkaa əblee, è gwiy kɛn nɛ̀ kembɛke əbkaa è fo se ghɛ́ ntum nə Jesuse. 3Bita me bif se wen ge: Ananias, lu bek ghɛ wɛ wɛ̀ beemen Satane lii se wɛ ɛytem wɛ̀ lete əbkaa ɛylem əblee, è gwiy è se yia əbbuam se Keyioy Kelanene? 4Nè lu nɛ wɛ̀ bɛɛy ghàà feene ɛyleme ten nɛ lu yiɛ. Wɛ̀ feene, əbkaa tene ko se lu viɛ. Nɛɛy ghɛ ge wɛ̀ mom ɛynkii kenəə ghan? Wɛ̀ di báà yia əbbuam se wel, wɛ̀ yia nɛ lu se Feyine! 5Ananias yio dî ɛ leghɛ, è fɛy se ntiɛ è kuo. Ghel ghɛ ɛ́ nè yion kenəə kin me se fane naa se ŋaŋ. 6Ghondɛɛ nsume lii è gwiy, è limte ɛygvən ə wen nɛ̀ ndəyse è bɛɛy, è fəy so è ndu è gvəəme.
7Keleŋ əbliye loo chia ka chuy setal dì, wiy ə Ananias lii è gwiy, nɛ əb bɛɛy ghàà keele kenəə kɛ ke ganen se lum ə wen. 8Bita bif se wen ge: Suuy əbluuy se mɛ, lɛ ghan mɛy mɛy əbkaa wɛ ghɛne lum ə viɛ kè feenen ɛylem ə yɛn so-a? Əb bééme ge lu əbghene əbjim.
9Bita me suuy se wen ge: Lu bek ghɛ wɛ ghɛne lum ə viɛ siysen se momse Keyioy ə Bay? Yɛn-a, yio ka nchinse ə ghel ghɛ ɛ́ gvəəmen lum ə viɛ kumen ɛ əbchio ndaa. Ghene bɛɛy wɛ̀ ɛ leenen è ndu è gvəəme sɛ̂y. 10Bita suŋnen dì ɛ leghɛ Safila fɛy ɛ wen ɛyshiɛ è kuo. Ghondɛɛ nsum ghii lii è gwiy è yɛn nɛ əb kuomen, è bɛɛy è fəy so è ndu è gvəəme ɛ lum wen ə ɛybee. 11Kenone ghel ɛbeemene gese nɛ̀ ghel ɛlee ghɛ ɛ́ nè yion əbnəə vin se fane naa se ŋaŋ.
Ghɛ́ ntum nə Jesuse nɛɛy əbnəə əbchio əbyúméné
12Ghɛ́ ntum nə Jesus se nɛɛye əbnəə əbchio əbyúméné gese nɛ̀ əbnəə əbkanene ɛ ghele məm. Ghel ɛbeemene nè lóó ɛ́ konen ɛ kebaa ndaa kɛ ɛ́ nè toŋte ge kɛ́ Solomone ɛ ndaa-ɛykokse. 13Ghel ɛlee se kiye, fane se chintene kenone ghen, dî nɛ wel əbjim foo ɛyvəm se ghene naa se ŋaŋ. 14Ɛluumene ghene əbkiye fó ɛytem se Báàba se ɛydio è me chìntèn kenone ghel ɛbeemene. 15Ghele me se gwiye nɛ̀ ghel ɛyafkene nə ghene nyiŋse ɛ əmkun nɛ̀ se əmghame ɛ teghaŋe jii, ka Bita nɛ̂y loo chia é kenjimnjim ə wene guo ɛ ghene ɛyghun. 16Əbnone ghele se lóò sɛ̂y ɛ ntɛk sɛ se baksen se Jolesalem gwiye nɛ̀ ghel ɛyafkene nə ghene gese nɛ̀ ghel ghɛ ɛyfime jefsen ghene, nɛ ghɛ́ ntum nə Jesus chuke ghene naa ɛjim.
Ɛ́ nyable nɛ̀ ntumse Jesus
17Ketuu se ghɛ́ ntaŋlee ghene ghele ngoo nə wene naa ɛjim nɛ lu ghele kenone Saddusee me se ghɛke ghɛ ntum nə Jesuse naa se ŋaŋ. 18Ghene me suuy ɛ́ koo ghɛ ntum nə Jesus è kum se ndaa nchak. 19Nɛy se lu nɛ̀ ntəke nchiy-ndaa-Feyine gwiy è dise əbchio ndaa nchak è fəyse ghene è suuy ge: 20Ghɛn ndu ɛ ndaa-ɛykokse è yɛ fekte əbnəə əbjim kum ɛychii ɛyfɛɛ yine se ghele. 21Ghene yio dî, è bvəs è ndu se ndaa-ɛykokse è se dinte əbnəə se ghele.
Ketuu se ghɛ́ ntaŋlee ghene ghele ngoo nə wene loo kɛ ghene, è jaŋte chɛɛ sɛ Islaele ghene ghene ghal ɛydiom ɛ ndaa nsak, è tum ghele nchiy ɛlee se ndaa nchak ge ɛ́ ndu è gwiy nɛ̀ ghɛ ntum nə Jesuse ghii se ghene. 22Ghene ndu è jia yɛn ghene ɛ ndaa nchak è kase fiile è suuy ge: 23Ghɛs ndu è chin fo, è yɛn əbchio ndaa nɛ əb loote lu əbkumen, nɛ ghele nchiye tiy fo, ghɛse dise è jia yɛn wel ɛ məm. 24Ghele mbiy se ghɛ́ ntaŋlee ghene wele mbiy se ghel ghɛ ɛ́ chiyen ndaa-ɛykokse yio dî è se kante ge sɛ gan ghɛ-a? 25Wel əblee me gwiy è suuy se ghene ge: Ghel ghɛ ghɛn ne kumen se ndaa nchak tiy ɛ ndaa-ɛykokse dinte se ghele. 26Ketuu se ghel ghɛ ɛ́ chiyen ndaa-ɛykokse kii ghene ghel ɛyfɛl nə wene me ndu è liɛ ghɛ ntum ghii è gwiy so. Ghene nè báà kante ghene kanten bek ge ghene nè fanen ge lòó ghele təmle ghene nɛ̀ ɛtiye.
27Ghene gwiy nɛ̀ ghɛ ntum nə Jesus ghii di, è liɛ è ndu nɛ̀ ghene se ndaa nsak. Ketuu se ghɛ́ ntaŋlee sɛ́ ndaa-ɛykokse bif se ghene ge: 28Ghɛs lɛ nè báà chiise se ghɛn ge ke fɛ ghɛn bo yíɛ́ke ghel nɛ̀ kenəə kɛ kum Jesus-a? Se lu nɛ ghɛne nɛɛymen ghel ɛjim ɛ Jolesaleme yio ɛyyiɛke ə yɛn, ghɛn se kɛŋe se toye ghɛs kum ɛykuo ə wen.
29Bita ghene ghɛ́ ntume naa ɛjim fise ge: Ghɛs lu se yɛ yionen se Feyine, nɛ wiy se wel. 30Feyin fɛ ɛbaa ə ghɛsene nè koksen nè lose Jesus se ɛykuo, lu Jesus nɛ̂ vin wɛ ghɛn nè banten se kentam. 31Feyine nè lose wen dì è lɛm se wen ɛybee əbkoy əbtaa ge wel wɛ əb saken gese boysee, ka ə́b din jii se ghele Islael é ghene kubsen tetem ə ghen é əb lɛyse mbeese ghen. 32Ghɛse me se suuy əbnəə nɛ̂ vin ka ghel ghɛ ɛ́ nè yɛnen, nɛ suuy ghɛse ghe Keyioy Kelanene kɛ Feyine foon se ghel ghɛ ɛ́ yionen se wen.
33Ghɛ́ ndaa nsake yio kii nɛ̂ kine, ke yaf ghene se ŋaŋ, ghene me se kɛŋe se yuytê ntumse Jesus. 34Dî Gamaliel wɛ wele ndaa nsak əblee loole è teem è suuy ɛ́ liɛ ghel ghi è fəy so se bɛy se feleeŋese əbliy. Əb nè lu wele kenone Falisee, lu ndinte tesak nə Moses nɛ ghele gese vəme wen. 35Əb me suuy se ghɛ́ ndaa nsak ghii ge: Ghele Islaele, ghɛn kwaate kejuŋ kum kenəə kɛ ghɛne kɛŋen se nɛɛy se ghel ghine. 36Ghɛn kume ge nè lu ɛ keleŋ əbliy kelee wel əblee nɛ ɛ́ toŋte ge Teudas ŋaake è se suuy ge yi lu wel əbghaken əblee, ghele chinten wen ka ɛyviɛ ɛykɛɛk dì. Ɛ́ naa yuy wen, ghele ngoo nə wen ɛjim takle, kenəə ə wene buu. 37Se ɛybame ten Judas wɛ̂ Galilee ŋaake ɛ əbliye kentaŋ è liɛte ghel se wen əbghun se ɛydio. Ɛ́ naa yuy wen, ghele ngoo nə wen ɛjim takle. 38Mɛ me se tefte ghɛn ge ghɛn fəyse ɛghoo ə ghɛn se ghel ghine kenəə è vəse ghene, bek ge lòò yɛ lu ge əbnəə wɛ ghene nɛɛyen lu ɛykwaate wel, əb nɛ̂y liime è lɛy. 39Dî nɛ lòò è yɛ lu ge əb lòò se Feyine, fene lòó ghɛn jia ghak ghene, é ghɛn sɛ́y nɛ̂y yɛn nɛ ghɛn noo Feyin. 40Ghɛ ɛ́ saken yio ntef ə Gamaliel è beeme, è me jaŋ ghɛ ntum nə Jesus ghi è suuy ɛ́ tɛl ghene, è gese chiise se ghene ge: Ke fɛ ghɛn bó yî yiɛke ghel kum ɛyghel ə Jesus. Ghene suuy di è me jum ghene. 41Ghene fəy se ndaa nsak è se nduu saŋle bek ge Feyine lu nɛ fe liɛ ge ghene lu kekwɛnten se kiile kenchoksen bek Jesus. 42Ghene ndu dì è se dinte əbnəə se ghele ɛ ndaa-ɛykokse gese nɛ̀ se ndaase əbchii əbjim, fekte ge Jesus lu Vi wɛ Feyine nè Yiosen.
S'ha seleccionat:
Ɛyf 5: oku
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
©CABTAL, 2012