Yunus 2
2
Pangkurrusumanga'na Nabi Yunus lan ba'tang bale
2:1-10
1Massambajangmi Nabi Yunus lan ba'tang bale lako PUANG Allataala to nasompa, 2nakua,
“Oo PUANG,
masussana' kumetamba mati' kale-Ta'
na Tapebalina'.
La matemo' kumeta'da tulung,
na Tasa'dingngmo gamarangku'.
3Mangkamo' Tapembuangan do' tasik
to liwa' mandalan.
Nalulunna' naperrambian toona'
bombang liwa' tonggo.
4Mangkadana' lan penawangku' kukua:
Oo PUANG Taca'beanmo' jio mai olo-Ta'.
Mbai tanglakukitamo
to bola mala'bih-Ta'.
5Tallanna' kutangnnissenmi menawa.
Naguririkkina' tasik gaja luah,
nakapu' tooi karra-karra to ulungku'.
6-7Tallanna' ratu do' garonto' buntu lan tasik.
Na ia to kuperasai susina' to la lan tarruhmo pangtarungkuan#2:6 Ia to naperasai Nabi Yunus susi to lanmi lino tomate..
Ia tonna malamma penawangku'
kumangngingaran kumetamba mati' kale-Ta',
‘Oo Puangku', PUANG Allataala!’
Lan mai bola mala'bih-Ta'
Tapesa'dingngi to passambajangku'.
Na susimo' to Tapaendek jiong mai lino tomate,
ammipatuo pole'na'.
8Den tonapakamoja' Puang Allataala,
memboko'mo na massompa lako dewata te'da bua'na.
9Apa ia to aku' la mangkurru sumanga'na' lako kale-Ta'
angkupassompan karoba,
kupugauk too sininna tinja'ku',
nasaba' PUANG Allataala manda to wa'ding mpasalama' tau.”
10Ia tonna mangkamo joo, nasuami PUANG Allataala joo bale lluai to Nabi Yunus de' gantanan.
S'ha seleccionat:
Yunus 2: mvpAD
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió
© Wycliffe Bible Translators, Inc. All rights reserved.