Matio 8
8
Jizọs Ḅe Gbọrị Owuḅọ Gwọmẹ
(Mak 1.40-45; Luk 5.12-16)
1Jizọs Ḅe chịngị mị ọgọnọ koroḅo sịkị, ḅaka tomonikpo Ò ḍukomẹ. 2Anịsịkị ḅụkan obi kọn àrị gbọrị owuḅọ Ọ̀ damaḅomẹ, Ọ̀ tọrọkọ ḅụ ọ̀ kpẹrẹkị koro, se nwọ ḅẹmẹ, “Nyanaḅọ, Ị́ nemikase ḅereniḅịa ọkụma, Ị́ ineda ị̀ mịẹfịafịamaḅịa.”
3Jizọs Ḅe Ọ̀ ḅara ịsụn pakụma ọ̀ lamamẹ, se nwọ pẹkẹrẹ mẹ, “À ḅimẹ, fịafịa!” Anịkirikiri nweniḅọ ḅe ọ̀ kọn obi mị ḅụ ọ̀ ḅụ iḅimẹ. 4Anị Jizọs Ḅe nwọse ọ̀ ḅẹye-ẹ, “Poki! Ḍuko gbọrịḅọ sọnị pịrịma, ọkụma so dada agbamịẹḅọ ḅe damamun, se ori ị́ sime ọkụ ḍiki anịsịkị Moziz ḅe tọn koromasa agba mị nwọ mịẹ, se ḍiepakụma tomoniḅọ goyegoye nwọ pịrị na ị́ ḅụ iḅisam.”
Jizọs Ḅe Gbọrị Rom Owunitịḅịnịḅọ Fịrịnwẹngịḅọ Gwọmẹ
(Luk 7.1-10)
5Jizọs Ḅe Kapanịọm ḅie sọ sịkị, gbọrị Rom owunitịḅịnịḅọ Ori na ịrịamẹ, se Ọ̀ tẹkẹmẹ na Ọ̀ ḅarachụa ọ̀ pịrị-ẹ: 6“Ị̀ Nyanaḅọ, ị̀ya fịrịnwẹngịḅọ warị ḅie obi se mọnọye ọgọnọ ḅọlọlọ waraḅẹ, ori ineda ḅụ jikekẹ, se opuma tọrụsiọrịaḅẹ.”
7Jizọs Ḅe nwọ ḅẹmẹ, “À mun mịẹse ọ̀ ḅụ iḅiḅịa.”
8Anị owunitịḅịnịḅọ ḅe pẹkẹrẹye-ẹ, “Yei anịkẹ, ị̀ Nyanaḅọ, ị́rị́ ị̀ya warị ḅo mị Ị́ gbẹịnkẹ. Ị́rị́ pa kụrọ pịrị, ị̀ya fịrịnwẹngịḅọ ḅe ọ̀ ḅụ iḅiḅịa. 9Ị̀rị̀ sọnị, kụrọ nyana ḅẹrẹtọn apụma chuku ḅie simeḅọ-ẹ, à pịkị ị̀ chuku ḅie sime owuni nyana waraḅẹ. À tọn ḅe ḅọ ḅe pịrị na ‘Mun!’ ò mun mẹ, à pịkị tọn ísíḅọ ḅe pịrị na, ‘Ḅo!’ ò ḅomẹ; à pịkị tọn ị̀ya omoniḅọ ḅe pịrị na ‘Mịn mịẹ!’ nwọ ḅẹ ọkụma, ori anị mịẹmẹ.”
10Jizọs Ḅe mịn mị naa sịkị, anị Ọ̀ ḅụgbiripumamẹ, se Ọ̀ nwọse Ò ḍuko mun-arị apụma ḅẹmẹ, “À ḍuko ọ́ pịrịaḅẹ na, ma à nwọ sime opu ḅereni nyanaḅọ nwọ ọrịkẹ Izrẹl mị ḅie. 11À ḍuko kụrọma ọ́ pịrịaḅẹ na, tọn apụ ịrụa mị pakapaka nyọ na, ịrụa mị sọsọ nyọ na ḅụ wẹrị ḅo soḅie Amanyanakiri mị ḅie Ebraham ḅe na, Aịzịk ḅe na, pịkị Jekọb ḅe na sime yefịḅịa, 12ọkụma Amanyanakiri mị ḅie sime na gbẹịn apụma ini nwọ suma pakụma kanakana mị ḅie chuḅịa, ini anị nyọ ḅụ sime owu se pịkị inia akama farịḅịa.” 13Anị Jizọs Ḅe nwọse owunitịḅịnịḅọ ḅe ḅẹye-ẹ, “So warị mun, ị́ ḅereni ḅara mị anị pịkị nwọ paka ị́ pịrị.”
Se anị kirikiri owunitịḅịnịḅọ ḅe fịrịnwẹngịḅọ ḅe ḅụ iḅimẹ.
Jizọs Ḅe Tọn Apụ Gwọmẹ
(Mak 1.29-34; Luk 4.38-41)
14Jizọs Ḅe Pita ḅe warị nwọ mun mẹ, se anị nyọ Ò Pita ḅe fuarọ ma nwọ ọrịmẹ mọnọye ọgọnọ, ḅụfụka ḅụ á ḅọlọlọ waraḅẹ. 15Ọ̀ ḅara se á ḅara lamamẹ se ḅụfụka mị á koroma somẹ, se á sịsẹ sakị fịrịnwẹngị Ọ̀ pịrịmẹ.
16Saso ḅiri ḅo lasịkị, ini si-a-tẹmẹ ḅie sime tọn apụ nwọ ọkịḅo Jizọs Ḅe pịrịmẹ. Jizọs Ḅe kọn gbọrị ọkwẹịn si-a-tẹmẹma desinmẹ, se obiapụ mamgba ḅụ iḅimẹ. 17Ọ̀ mịn mị nwọ mịẹmẹ mịẹse ịkịankoro Aịzaya ḅe ḍukoye mị ḅo kọkọmaye sọḅịa ḅara na, “Ori ḅara na mịna obima nwọ pụramẹ, pịkị mịna ịnyọḅụoforikama nwọ dekisinmẹ.”
Jizọs Ḅe Ọḅụḍukoḅịa Apụ Ma
(Luk 9.57-62)
18Jizọs Ḅe Ò kelema tomonikpo mị ọrị sịkị, Ọ̀ tọn Oria ọḅụḍukoapụma pịrịmẹ na ini ḍapa mị saḅa ísí pẹkẹrẹ mun. 19Gbọrị Oloko ḍieḅọ Ọ̀ damaḅo se nwọ ḅẹmẹ, “Yeḍieḅọ,” “à ḅụkarakaramamẹ Ị́ ḍuko Ị́ munḅịa nyọ goyegoye nwọ mun.”
20Jizọs Ḅe nwọse ọ̀ pẹkẹrẹmẹ, “Pụnụma àrị pokolo nyanamẹ, fenima pịkị feni-warị nwọ nyanamẹ, ọkụma Tomoniḅọ Tọkụ Ḅe ḅọlọlọ se ịnyọsaraḅịa nyọ sọnị ọ̀ nyanakẹ.”
21Jịnḅọ, anị Oria ọḅụḍukoapụma ḅie gbọrịḅọ pịkịna nwọ ḅẹmẹ, “Ị̀ Nyanaḅọ, ḅereni ị̀ pịrị à tatarị somun ị̀ ḍa ḅe ḍipi.”
22Jizọs Ḅe nwọse ọ̀ pẹkẹrẹmẹ, “Ị̀ ḍuko se ye fịapụma inia fịapụma ḍipi.”
Jizọs Ḅe Irisi Deinmamẹ
(Mak 4.35-41; Luk 8.22-25)
23Jizọs Ḅe gbọrị arụ ḅụkụlọmẹ, se Oria ọḅụḍukoapụma Ọ̀ ḅụ sọmunmẹ. 24Ḅụnemika ḅara ḅụ kụrọ irisi fiemẹ ḍapa mị ḅie, arụ mị sọnị ḅalafama ḅara ḅụ ḅile-ẹ tọn aḅẹ. Ọkụma Jizọs Ḅe Ọ̀ mọnọaḅẹ. 25Ọḅụḍukoapụma Ọ̀ damamun se Ò wosịsẹmamẹ, se nwọse Ọ̀ ḅẹmẹ, “Wa ḍụa, Nyanaḅọ!” “Wa fa-ẹtọn aḅẹ!”
26Jizọs Ḅe nwọ pẹkẹrẹmẹ, “Nde ó gose nwọ sime ḅaramgba nwọse ḅalafaye?” “Ómine kala ḅereni nyana apụ!” Anịeso Ọ̀ sịsẹ se ịganị fọrụ mị na amburama na pịrị se tọrụ mị deinma simemẹ.
27Nweni mamgba ḅụgbiripumẹ se nwọ ḅẹmẹ, “Ḅe ḅọrọ ndende ọkụ sime tomoniḅọ?” “Se fọrụ mị na amburama na sọnị Ọ̀ ḅịpị pokimẹ!”
Jizọs Ḅe Si-a-tẹmẹ Ḅie Sime Mama Owuapụ Gwọmẹ
(Mak 5.1-20; Luk 8.26-39)
28Jizọs Ḅe Gadara ama pẹkẹrẹ mị nwọ ḅo sịkị, anị ḍapa mị ḅe saḅamanga ḅụ, ḍụẹịn ḍipi nyọ mị ḅie wẹrị pakaḅo mama owuapụ ori na ịrịamẹ. Mịnapụma inia ḅie si-a-tẹmẹ omi-ẹ. Ini ḅalafama so ọkụma gbọrịḅọ sọnị dadama anị ateli mị ḅie ḅọrọḅọrọkẹ. 29Kirikiri ini olokumẹ, “Wa ị́rị́ na che mịẹ gbolomaye nwọ nyana, ị́rị́ Tamụnọ Tọkụ? Sịkị mị ma laka simeogbo, ị́ ḅụfụka se wa pịrị-ẹḅosa?”
30Anị nyọ na kpeki anga ḅụ oporopo ogbo yefịaḅẹ. 31Si-a-tẹmẹma Jizọs Ḅe tẹkẹmẹ, “Ị́ mine depakụmaḅịa ḅẹḅẹ, wa se anị oporopo ogbo mị ḅie fịrịma.”
32Jizọs Ḅe nwọse àrị ḅẹmẹ, “Ó mun.” Anị àrị somun oporopoma ḅie sọye-ẹ. Oporopo mamgba mangị mun chịngị mị anga sime ḍapa mị ḅie koro se simbi fịmẹ.
33Oporopoma ḍikiḍikisime apụma mangị so ama mị ḅie mun seni anị nyọ pakaye mamgba na si-a-tẹmẹma ḅie simeapụma ḅụ pakayema na nwọ ḍuko pakụmamẹ. 34Anị ama mị ḅie simeapụ mamgba paka ḅomẹ, Jizọs Ḅe na ịrịaḅịa ye gose, se ini Ori ọrị sịkị, ini Ọ̀ tẹkẹmẹ na Ori inia ama pẹkẹrẹ mị nwọ koroma so.
S'ha seleccionat:
Matio 8: OBTP
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
The Bible Society of Nigeria