Nya-mangaji Mirningiya Jujiba 37
JAO
37
Jujiba kulu likili-baba
2Jinangu wuka alunga liyi-raangaji liyikiliyi-arduwu ki-Jikaba. Kalu-arri jabungka nalarrku likili-ardu, nya-mangaji yalkuyi Jujiba alu likili-baba, rrankurri-arduwujara wu-Bila kulu rrankirri-arduwujara wu-Jilba, kalu-arri jabungka, kalu-arri namba yukumantharra jibi marda yukularri yiku ki-malbuwu nyuwalunganyu-biyiyu. Namba kalu-wardima awara linji-mangaji linjikulinji-babalu ki-Jujiba kulu kili-nu nyiki-biyi alunga ki-Jujiba ki-burinju.
3Jinangu malbu Jikaba, kalngiya ka-arri na-wurdu yiku ki-Jujiba, kilu-manmarralanga nya-mangaji ambuliyalu alunga liyikiliyi-arduwu kangka malbu ka-arri ngaliwa nya-mangaji ka-yanjarri. Kilu-yabima jumbala yiku ki-Jujiba, marringaya rdirardiramantha jumbala, nya-mangaji barranamba alunga liyi-wirdiyu, marringaya jumbala kilu-yabima ngayamantharra yiku.
4Ngala likili-baba ki-Jujiba, aluwiji, kala-kala nyalunga-biyi, ka-arri na-wurdu yiku ki-Jujiba ki-arrkulawu, kilu-manmarralanga yiwa ambuliyalu alunga, kulu kalu-mulamulanganthaninya yiku ki-Jujiba, kalngiya kalu-mulamulanganthaninya nalu-wurdu nyuwalunga-anyirawu ki-buringku, kangka yamulu kumba-riyarraba nyiki-biyi yiku ki-buwingku. Kalu-lhawarndi yiku, kurdardi kalu-wukanyinma yabi yiku, kurdardi, kalu-mulamulanga wakulamba.
5Kulu jina Jujiba, wundururra kilu-mawuranga awara. Ngaliwa kalili-nu likili-baba wumba kilu-mawuranga awara ngalalu kalu-mulamulanganthaninya mili yurrulu yiku wakulamba.
6Ka-arri alunga, “Marrirru, kanhirra-nykarrila. Kanhirra-nykarrila kulu kirrirni-nala wumba karna-mawuranga awara wundururra.
7“Wujurl karna-kala, wujurl jakarda ma-ngarra. Kambala-arri baji jabungka, kambala-rdirrirra nya-mangaji wujurl, kurarra ka-arri. Kulu niwarrku kurarra, arrkula nya-ngatha, ka-alarri ankaya, ka-alarri baji, ngala niwarrku kurarra nyirrunga, ka-wingka lukuluku nyuwu-ngatha. Nya-ngatha ka-arri wumbiji alarrinjarra ngala nyirrunga ka-arri mududu nyuwu-ngatha. Nganambaji karna-mawuranga awara.”
8Kulu kalu-yalbanga, “Ngani yinda, ngani? Nungka yinda ka-nmala nya-nganunga wirdi, nganu nmanthawu mududu yinku, li-buyi yinku?” Mili yurrulu kalu-mulamulanganthaninya yiku wirangu nya-mangaji wuka kalili-nu wumba kilu-mawuranga awara, yiwa anmanthawu wirdi alunga.
9Mili yurrulu kilu-mawuranga wundururra ki-Jujiba, kulu kalili-nu mili likili-baba wungkuwungkulamba. “Marrirru! Karna-mawuranga awara mili yurrulu. Karna-kala awara, rra-kamba, ngakarla, kulu marralhawa ll-bala karna-kala, kulu karna-kala nya-mangaji nmanthawu mududu barra ngathangkalu,” nganinya kalili-nu, baki nganinya kili-nu nyiki-biyi marda.
10Kulu malbu Jikuba, ka-mirirri yiku. Ka-arri, “Kajakaja! Ngandarra barra kinyu-mawuranganhu awara? Minja yalkuyi marninda kulu nganu barra, kana-nmala mududu yinku? Nganu barra, yinkurra-wibi baki likili-baba li-ll-bala, wayi barra nganu anmanthawu mududu barra yinku ki-buriyu?” Ka-arri yiku nganinya.
11Ngala likili-baba ki-Jujiba, kalu-wardirri nalu-wurdu yiku, kalu-nganyma yiku, ngala nyiki-biyi, kilu-linginma Jujiba wumba kilu-mawuranga awara. Bawuji.
Kalu-jilima Jujiba, ka-wingka bajinju Yijiba
12Kalu-lhuwarri nguthundiya likili-baba ki-Jujiba, nguthundiya kalu-lhuwarri bajinju Jikim naluyirdi jibiyu baki yukularriyu, kalu-yukuma jibi wiji yiku nyuwalunga-biyiyu. Kala-ka bajinju wujurlu nyamba-wudurrumarithawu ngaliwa ka-arri wambu nya-mangaji Jujiba, wambu kawula-arri nyiki-biyi baji Yiburun.
13Ka-arri malbu yiku ki-Jujiba, “Kajakaja! Ngandarra ka-wingkala nguthundiya nganthalu nyinki-baba, kalu-rnani juju barra. Kalu-lhuwarri nguthundiya naluyirdi jibiyu baki yukularriyu, bajinju Jikim kalu-wingka. Bawuji kirni-jala aluwalu.” Kumba-ngarninyma yiku, “Karna-wingkala, biyi.”
14Ka-arri mili malbu, “Bawuji lhuwarriya nganthalu li-mangaji, wayi barra alunga, wayi barra jibi wiji. Kulu bawuji waniya karinguthunda, waniya ngathangkalu nalinanthalu awara. Bawuji barra, kajakaja.”
15Ankaya ka-lhuwarri...i nguthundiya. Ka-wingka yurrujurru nyala bajinju Jikim. Baji ka-arri yarrbantharra alunga liyikiliyi-babawu. Kila-kala ki-arrkulangku, kila-kala wingkalwingkayarra lukuluku. “Ngabinya! Ngalhiyu ja-yarrbanjimu?”
16Kumba-ngarninyma, “Jarna-yarrbanji alunga liyingathaliyi-babawu. Karingamala kalu-wingka marnajinju, kala-ka jibi wiji marnajinju nyamba-wudurrumanthawu wujurl. Kalinyi-nganhu kirna-barlirra? Nganthiwuthu bajalu?”
17Ka-arri yiku, “Kalu-lhuwarri marningu, kalirna-kala. Kalirna-nykarri nyamba-wukanyinjarra, ‘Bawuji ngambala-lhuwarriya nguthundiya nyala Duthan.’ Kalu-lhuwarri bajinju.” Kulu nguthundiya ka-lhuwarri Jujiba, kalilu-wanda barra, kalilu-wakarama baji Duthan.
18Ngaliwa ka-rilirri karingamala, kala-kala linjikulinji-babalu, kala-kala kulu kalinyamba-wukanyi barra ngandarra ramanthalu nya-mangaji nyalunga-anyira.
19“Marniwa barra ngambalalu nya-mangaji jamawuranga. 20Bawuji ngambala, winarrku barra ngambala-ramaya jinangu Jujiba. Ngambala-walimaya na-manka, ngambala-walimaya nambinju wajkaliya lawarru. Bawuji barra kulu kambali-nala wunyatha yiku, kila-tha ki-wardalinju, nganinya kambali-nala. Kurdardi kilu-mawurangarru awara mili yurrulu. Ngambalu-rraya mawuranganthawu barra nya-mangaji.”
21Ngala nya-mangaji Rubin, kalila-nykarri nyamba-wukanyinjarra, ka-rarri na-wurdu nyiki-anyirawu, kumba-nykalanykarri yiku marakamanthawu. “Marrirru! Waraba kambala-ramarru, wa-nmaya lhungku nyirrunga-anyira!”
22Kulu ka-arri mili alunga, “Barni-ramantha marda barni-wurrubantha yilirri nyikungu. Winarrku rru-yibarraya wajkaliya lawarra baji munjimunji ngala barni-ramantha.” Minja ka-wukanyi nganinya alunga ngala minja kumba-wukanyi na-wurdu, “Baku karna-lhungkumala nyangathi-anyira, karna-rdumala kariwajka nakari lawarra. Baku ka-wanila wunyathalu yilalu, karni-jala yamulu yilalu.”
23Kulu Jujiba, ka-wingka, ka-wingka nayirdi ki-jumbalawu ki-marringayawu wumba kilu-ngunda nyiki-biyilu, ka-wingka bajinju aluwalu. Kulu yinarrambalulu kalu-wardima, kali-nma jumbala nyikungu, nya-mangaji marringaya kali-nma.
24Kulu kalu-rduma nyalunga-anyira, kala-ka bajinju, kalu-walima wajkaliya lawarra, na-lawarr kalu-mulantha li-wulu ambuliyalu, ki-wabudawu kalu-mulantha...i wajkaliya, na-ruku barra na-mangaji na-lawarr, kalu-walima Jajiba wajkaliya lawarru linjikulinji-babalu, kala-nda baji, bawuji kalu-wani alanjilu.
25Ngaliwa nya-mangaji nyiki-baba wirdi ki-Jujiba, Rubin, ka-mamarri ki-ngabiyala ngalalu li-mbangu li-wulu, likili-nganji ki-Yijmayil, li-mangaji nalarrku li-jibiya Midiyan, li-karingamalangu, li-mangaji barra kalu-rilirri karakarra nakari mayangka awara Kiliyad, kalu-rilirri. Kalu-wingkalwingkayaninya akarriya bajinju Kiliyad bayimanthalu yumbulyumbumantha awara baji, kalu-bayimanthaninya awara, kala-kalakanthaninya...i ki-wawinja ngamaliya...i, aya barra bajinju Yijiba, bawuji. Kalu-jilimanthaninya awara baji. Li-mangaji kalu-rilirri karakarra ngalalu likili-baba ki-Jujiba kalu-arri baji nyamba-wudurrumantharra, ngaliwa ka-mamarri wirdi Rubin, ka-mamarri ngabiyanthawu.
26Kulu arrkula nyiki-baba, Juda na-wini, ka-arri alunga nuwalarrkulu, “Namba kambala-ramanjima nya-mangaji Jujiba, kambalamba-wajkirranjima nyuwu-mangajiwuthu ngulakari, kambalamba-wajkirranjima, minja kambala-waninjima ngamaliya winarrku bardabarda.
27“Kulu ngambala, barni-ramantha nya-mangaji ngala ngambala-jilimaya aluwalu linji-mangajiwuthu linji-nganjinyu ki-Yijmayil, ngambala-jilimaya aluwalu mu-maniyu ngambalanga. Kalu-bayimala ngambalalu kulu kala-kala...i aya jujungku. Kala-kala...i aya bajinju Yijiba, jilimanthawu yilalu nyungku-mbangu barra, jilimanthawu barra baji juju angula. Nganambaji barra kambala-nmala, kurdardi kambala-ramarru nya-mangaji nyangambalanga-anyira, wurrbi nyangambalanga-anyira, ngambala-jilimaya nya-mangaji aluwalu linjikulinji-nganjinyu ki-Yijmayil mu-maniyu!” Kalinyamba-wukanyi li-mangaji likili-baba kulu kalu-ngayama wiji, alu jilimanthawu nyalunga-anyira nganinya.
28Nyalalhurrku barra ngalalu nalarrku likili-nganji ki-Yijmayil kalu-wingka...i bajinju ngalalu likili-baba ki-Jujiba, kalu-rankarrma kariwajka, kala-ka aluwalu linjikulinji-nganjinyu ki-Yijmayil, kalu-jilima nyalunga-anyira, kalu-jilima aluwalu, kalu-jilima mu-maniyu. Kulu linjikulinji-nganjinyu ki-Yijmayil, kalalu-bayima ma-janyka ma-wurrirri ma-20-bala, kalu-rduma Jujiba mungku-ja barra bawuji. Kulu bawuji barra kalu-lhuwarri ngamaliya...i, kalu-lhuwarri naluyirdi yiku ki-Jujiba, kalu-wingkalwingka...i aya bajinju Yijiba. Bawuji.
29Ka-wani barra Rubin ngulakari, ka-lukulukuma nyala bajinju lawarru, karnila-kala kurdardi yiku ki-Jujiba, karnila-kala mili nularna-lawarr. Ka-rarri na-wurdu kurdandu, kulu kilu-ma jumbala nyikungu, kilu-ma jumbala kangka ka-rarri na-wurdu wakulamba, nganinya narnu-yuwa narnalunga.
30Kulu ka-wani alanjilu aluwalu linjikulinji-anyiralu. “Marrirru, nganthiwa Jujiba nyangambalanga-anyira, nganthiwa? Ngandarra karna-nmala?” Ngala kalu-arri baji jakudi yiku, mili kalinyamba-wama.
31Ngala nya-mangaji barra jumbala yiku ki-Jujiba, nya-mangaji marringaya kilu-ngunda nyiki-biyilu, baji ka-arri aluwa. Kulu kalu-rama kidikidi, kalu-rama kulu kalu-yibarra nya-mangaji jumbala yilirrinja ki-kidikidiyu. “Kambala-arrila wunyathawu yiku, katha kambala-wakarama jinangu jumbala wumbiji yabala, katha kila-tha ki-wardalinju.”
32Kulu kalu-wani ngamaliya barra bawuji yilalu ki-malbungku ki-Jikaba naluyirdi jumbalawu yiku ki-Jujiba. Kalu-wingka bajinju yilalu, kulu kalu-mirnima nya-mangaji jumbala nyuwalunga-biyiyu, kulu kalu-warndima yiku, “Biyi! Ngandarra jinangu jumbala yilirriwiji kanu-nirri wumbiji? Jinangu nyikungu nyinki-arduwu?”
33Kulu kilu-lhaa ki-malbungku. “Yiya, jinangu jumbala jarna-lhaanji nyikungu nyungathi-arduwu ki-Jujiba. Kila-tha nungka ki-wardalinju baji wumbiji. Kilu-ma na-manka nyangathi-ardu marlijinda, kilu-ma na-manka ki-wardalinju, kila-tha. Warriya luku nyangathi-ardu.” Kalu-warndima kurdandu.
34Kulu ka-wardirri barra malbu na-wurdu nyiki-arduwu. Ka-rarri na-wurdu kurdandu. Kilu-ma jumbala nyikungu kangka ka-rarri na-wurdu wakulamba, kulu kumba-yulyulba nyarrku wardi jumbala rarrinjarra yiku, nganinya narnu-yuwa narnalunga. Kurdandu barra ka-rarri...i yurrngumantha nyiki-arduwu ki-buringku.
35Kalu-wingkalwingka yilalu ki-malbungku likili-ardu wiji. Kalu-wingkalwingka yilalu yabimanthawu na-wurdu yiku ki-Jujiba ngala minja kalinyamba-ayayanu. Kumba-ngarrarnma alunga, alu yabimanthawu na-wurdu. Ka-arri, “Baku karna-wingkala nambinju, karna-lhakanbala ki-awaralu nyungkalunga liyi-ngabangakuwu, karna-wingkala bajinju nyala rarrinjarra ngarna-wurdu yiku nyungathi-arduwu, warriya luku nyangathi-ardu buyi.” Kulu nganinya barra ka-rarrinjaninya...i na-wurdu yurrngumantha, ka-rarrinjaninya na-wurdu nyiki-arduwu ki-buringku. Bawuji.