Engaado 26
26
1Oluyaali haba siluhoyera omuundu musiru,
koti lu munyiti kutahoyera ohubao mu siminyu oba efula mu ndaalo cheekesa.
2Ebibwaabo bitahuhoyera haba sibinyala huhudiira,
biri koti obbiichubbiichu oba endikaaliki chibburuha-bburuha mani chaahaya ohukwa.
3Efaraasi chiri neende ohuhuywa, esuhiri ohunaalwa ehoba,
nilwo lu baandu basiru bahoyerwa ohutoochwa endawusi.
4Esiteebo sy'omusiru otasikobolaangamo mu ngeri y'obusiru,
hu wesi ohaye ohumufwaanana mu busiru.
5Ohutusaho omusiru omukobolaangamo koti lu ahoyera,
hu anyale ohumanya ati esiteebo syae haba si sibeere esy'amakesi koti lw'abaasa.
6Oyo otuma omusiru ohuba wamwaanda
aba koti owehengereho amakulu haandi yereetera ebidinyu.
7Omuundu musiru owehoonyera olukaado,
ali koti omulema yehoonyera ohukulu hulema hulereecha bulereecha.
8Ohwiisa oluyaali mu muundu musiru,
siri koti ohuboya ekina mu simulo.
9Omusiru owehoonyera engaado ch'amakesi,
ali koti omumeesi oli ohweetusa eewa mu syaaba syae.
10Oyo opaangisa walukeenda musiru ohumuholera emirimo oba omumeesi,
ali koti omulasi w'olusaale olasa buli muundu yeesi.
11 #
2 Pet 2:22. Omusiru aloondamo eby'obusiru buli siha,
ali koti embwa eyilya ebiindu bi yisalire haandi.
12Omusiru ahirimo obusiru mulai hooho,
ohuhira oyo owelaanga omweene ati mukesi niye.
13Omukata aboola ati, “Erwaanyi yiriyo edalang'i,
siinyala ohutula mu nyuumba ohuchia ohuhola emirimo.”
14Omukata yekaluuhania-kaluuhania hu sitaanda syae,
koti olwiiki lukaluuhanira hu pata chaalwo.
15Omukata adoong'ia ebyohulya mu sikaye;
mani yekanyiirisa naabita mu munwa kwae.
16Omutaka abaasa ati mukesi niye,
ohuhira abasaacha bataanu-na-babiri abanyala ohutereesa emboosi.
17Omuundu yeyingisa mu busoolo butamudiiraho,
ali koti omuundu adiira mu matwi k'embwa yatatuka.
18Koti omulalu osukuna amaanda kaaduha,
oba obusaale, neende ebilwaaniso bibi,
19oyo yesi obacha owaasye
mani yaboola ati, “Mbeere ngachula sa!”
20Olwohuba eehwi nichibulaao, omuliro kwosi nikusima;
haandi omumoonyi nabulao obusoolo bwosi nibwaakama.
21Koti amaanda kakera esyoosyo nisiniooha haandi eehwi chakera omuliro nikwaaduha,
nilwo lu muundu musoolani anioohesa obusoolo.
22Emboosi ch'omuundu mumoonyi chinyunyuula muno;
chiihirira aasi koti ebyohulya bihirira mu nda.
23Emboosi ndai chinyunyuula echeekisa mu mwooyo mubi,
chiri koti esikaye sibabahaho efeesa.
24Omwebachirisi akisa ohusyuula hwae mu mboosi ch'ohubachirisa,
haandi abiiha obubacha mu mwooyo kwae.
25Naalomaloma emboosi ch'esisa, haba sochifukiirira,
olwohuba omwooyo kwae kulimo eby'omusiro bitaanu-na-bibiri.
26Naakisa ohusyuula hwae mu bweebachirisi,
ebyonoono byaahola bicha ohubituumbula alafu.
27Oyo oyaba obuko, achia ohubukwaamo;
haandi oyo ochaaka ohusindikisa okukina, kuchia ohumukobolera.
28Omuundu mubacha asyuula abaandu babacha,
haandi ohweniinia-niinia huleeta ohusihirira hwoong'ene.
©Bible Society of Kenya, 2019
©Bible Society of Uganda, 2019