Esita 4
4
Modekai asaba obuhoonyi bwa Esita
1Mani Modekai niyawulira ebyo byoosi ebyali nibiholerwe, yataandula engubo chae choosi olw'esibeera. Yeemao yefwaala engubo ch'ebigunia, haandi niyeebaha omutwe kwae kwoosi ekohe, mani n'achaaka ohukeendaana mu siko omwo, niyoobba wuuwi lukali, 2ohwoola lu yoola hu mulyaango kwe'siruwa sy'edooho ly'obwaami. Yahaya ohuliingiramo olwohuba abulao omuundu yeesi owalichiingi niyefwaalire ebigunia owali naafukiirirwa ohwiingiraangamo daawe. 3Mu buli situundu sy'obwaami obwo bwoosi, buli abuundu yi silagiro sy'omutuki wuno yi syali nisimalire ohuwuliirihana yoosi, yaliyo ohulira huungi muno mu Abayudaaya boosi. Basiibaanga, nibalira, niboobba wuuwi, haandi abahiramo obuungi nibefwalaanga ebigunia haandi nibakonaanga mu kohe.
4Mani abahalaabani bahasi ba Esita alala neende abasaacha balade abo nibachia mani bamuboolera ebyo bi Modekai yali n'aholere, mani Esita n'achuunisibwe muno mu mwooyo. Yayirira Modekai engubo ch'ohwefwaala ataali ebigunia, nae n'ahaya ohuchifukiirira daawe. 5Esita mani n'alaanga Hataki, mulala hu basaacha balade abalichiingi mu dooho omwo owali niyadoolwa neende omutuki oyo ohuba omuhalaabani wa Esita, mani n'amutuma ohuchia eyiri Modekai amuteebe esyali nisikwiireo, neende esifune syeene. 6Hataki mani n'achia eyiri Modekai owali naali mu sipaapi sy'esiko esyo hu siruwa sy'edooho elyo. 7Modekai mani n'amuboolera buli siindu syoosi esyali nisimwoolereho, neende obuungi bw'eseende chi Hamani yali n'asuubiise ohuta mu sibiihiro sy'eseende esy'obwaami, nikali mbwe Abayudaaya boosi bachia ohusihiriswa. 8Modekai mani n'aberesa Hataki ebyali mu esilagiro syali nisitusirwe mu Susa mwoosi, ni silagira ohusihiriswa hw'Abayudaaya boosi. Modekai yamutuma ayiyirire Esita, amweekese bulai obulamu koti bwali nibuli, haandi asabe Esita achie abalirire eyiri omutuki, amwekweede anyale ohukwiira abaluyia ba Esita bano esisa. 9Hataki y mani n'achia n'aboolera Esita bi Modekai yali n'aboolere. 10Esita yesi yaberesa Hataki omulaanga ohuyirira Modekai, n'aboola ati: 11“Niyibaao omuundu yeesi, omusaacha oba omuhasi, ochia mani yeengira mu lwaanyi lwomuukati omutuki n'atamulaangire, omuundu oyo wohwiitwa bwiitwa. Elyo nilyo elako li buli muundu yeesi yali n'amanyire, ohutulira elalira hu bakeraki b'omutuki ohwoolera elalira hu baandu boosi abamenya mu bituundu byoosi ebyomu bwaami obwo. Yaliyo engira ndala yoong'ene yi muundu anyala ohuwoneramo, omutuki n'amusingisira endabuhi yae y'obwaami ey'esaabbu, ao mani omuundu oyo haba saachia hwiitwa daawe. Nae malire endaalo amahumi kadatu nibataanaanga ohuchia eyiri omutuki.”
12Modekai niyawulira Esita bi aboolere, 13yesi yamutumira ohulabula huno huti: “Ewe otabaasaho oti mu Bayudaaya boosi, ewe niiwe onawonao daawe, olwohuba oli mu dooho ly'omutuki. 14Olwohuba n'owuleera mu siha sifwaana siti, Abayudaaya bachia ohunyoola obuhoonyi obwohuwonesebwa nibutula abuundu waandi, nae ewe neende ab'edaala lya lataao boosi muba muchia ohusihirira. Nae wiina omanyire awuundi waholwa ohuba omuhasi w'omutuki hulw'esiha sifwaana koti sino.”
15Esita mani n'akobola mu Modekai n'aboola ati: 16“Chia ohubuusa alala Abayudaaya boosi abali mu Susa; musiibe nimuundekongooyera eyiri Nasaae. Mutalyaaho esiindu syoosi, kata sa ohung'waaho esiindu syoosi, ohumala embaka y'endaalo chidatu neende ebiro bidatu. Ese neende abahalaabani bahasi bane, fwesi huchia ohuhola hutyo sa. Luunyuma, ese njia ohuchia eyiri omutuki, kata neende abyahaba nisitafukiirirwa neende amalako. Mani nikali mbwe ndi ow'ohufwa, njia ohufwa.”
17Modekai mani n'achia ohuhola koti lu Esita yamulagira.
©Bible Society of Kenya, 2019
©Bible Society of Uganda, 2019