Kalinlinima 18
18
1Ka Yawɛ daa yɛli Aduna, “Sara maligu shee alahichi yɛn ʒila a min’ a bidibisi ni a yaannim’ zuliya bɛn be a sani zuɣu; ka maligumaanitali alahichi ʒi a min’ a bidibisi maa kɔŋko zuɣu. 2Dinzuɣu zaŋm’ a mabihi bɛn nyɛ Lɛvi zuliya ka nyɛ a daŋ niriba la na ka bɛ ti pah’ a zuɣu n-sɔŋd’ a min’ a bidibisi maa saha shɛli yi yi ti be alikauli suɣili maa gbini tumdi tuma. 3Di simdi ni bɛ tumdi tuma sɔŋdi ya, ka tumdi bɛ tuma ni nyɛ shɛli zaa Yawɛ chirigibu shee suɣili maa ni; amaa bɛ di miri sara maligu shee lahi la bee sara maligu bimbini maa, bɛ yi niŋ lala, yi mini ba ni kpi. 4Bɛ pahimi yi zuɣu ka yi tummi Yawɛ chirigibu shee suɣili maa puuni tuma mini bɛ tuun’ shɛŋa din be Yawɛ chirigibu shee suɣili maa ni zaa; ka ninvuɣ’ zino miri ka o zaŋ omaŋ’ bali yi ni. 5Yimaŋmaŋ’ tummi sara maligu shee mini sara maligu bimbini maa gbini tuma, ka di chɛ ka n suhu ku lan yiɣisi bahi Izraɛlnim’ zuɣu. 6Mani m-piig’ a dɔɣiriba Lɛvinima Izraɛlnim’ ni; bɛ nyɛla Yawɛ ni su shɛba; ka o zaŋ ba ti a ni bɛ tumdi Yawɛ chirigibu shee suɣili maa puuni tuma. 7Amaa a min’ a bidibisi n-yɛn su maligumaanitali tuma ni sara maligu bimbini zuɣu tuma zaa ni chinchin’ tibisili la puuni tuma n-tumda. N zaŋ yi maligumaanitali maa tin ya pini, ka ninvuɣ’ so ŋun bi kpin’ li yi zaŋ omaŋ’ bali yi ni, bɛn kum’ o.”
Maligumaaniba tarili
8Ka Yawɛ daa yɛli Aduna: “N zaŋ bɛ ni zaŋ sara maligu binshɛŋa ti ma, ka di nyɛ Izraɛlnim’ sara binshɛŋa din be kasi zaa ti a min’ a bidibisi ni di nyɛ yi maligumaaniba tarili sahakam. 9Yi tarili ni yɛn nyɛ shɛli sara maligu binshɛŋa din be kasi ka bɛ bi zaŋ li nyo buɣim m-bɔŋɔ: Bɛ sara maligu kam din be kasi ka bɛ zaŋ li ti ma, din nyɛ chi sara bee alahichi sara bee taali tumbu sara kam di nyɛla a min’ a bidibisi dini. 10Dimiya li, di nyɛla din be kasi. Dɔbba kɔŋko n-ni tooi di li. Di nyɛla din be kasi yi sani. 11Din lan nyɛ yi dini m-bɔŋɔ: Bɛ ni yihi shɛlikam pin’ shɛŋa zaa Izraɛlnim’ ni zaŋdi maani sara shɛli bɛ ni zaŋdi gahiri zuɣusaa la puuni, n zaŋ li ti a min’ a bidibisi ni a bipuɣinsi ni di nyɛ yi tarili, ka ŋunkam be a yiŋa, ka be nyam ni tooi di li.
12“Bɛ ni zaŋ kpa’ viɛl’ shɛli mini wain viɛla zaa ni chi ni bindiri daŋda shɛŋa zaa ti man’ Yawɛ, n zaŋ li tin ya. 13Bɛ tiŋgban’ ni tiwal’ shɛŋa din daŋ moobu zaa, ka bɛ zaŋ li na ti ti man’ Yawɛ, di nyɛla yi dini; ka ŋunkam be a yiŋa ka be nyam ni tooi di li. 14#Lɛv 27.28 Bɛ ni zaŋ binshɛlikam ti Naawuni Izraɛl tiŋgbɔŋ ni nyɛla yi dini.
15“Bɛ yi dɔɣi bi’ tuuli kam zaa, di yi nyɛla ninsal’ bee biŋkɔbigu, ka bɛ zaŋ ba ti man’ Yawɛ, bɛ nyɛla yi dini. Amaa di simdi ni yi deei binshɛli bɛ ni zaŋ zali daadam bi’ tuuli zaashee; ka lan deei binshɛli bɛ ni zaŋ zali biŋkɔb’ so ŋun bi be nyam bi’ tuuli zaashee. 16Bɛ yi ti paai goli yini, nyin’ zalim’ ba ka bɛ yo anzinfa laɣibaligu diba anu, ka bɛ daa zali ba kaman Naawuni jɛmbu duu liɣiri zahimbu ni daa nyɛ shɛm. 17Amaa niɣi mini piɛri ni buhi bɛna, di deeya binshɛli zali bɛ ni tuui dɔɣi bi’ shɛb’ zaashee n-tiligi ba, bɛ nyɛla bɛn be kasi. Niŋmiya bɛ ʒim mihi sara maligu bimbini, ka zaŋ bɛ kpam nyo buɣim mali sara; di ʒiɛɣu niŋdi Yawɛ nyaɣisim. 18Amaa bɛ nimdi nyɛla yi dini kaman bɛ ni zaŋ biŋkɔbigu nyɔɣu polo mali bɛ ni zaŋdi sara shɛli gahiri zuɣusaa mini nudirigu gbalipaɣa ni nyɛ yi dini shɛm la.
19“Izraɛlnim’ ni zaŋ pin’ shɛŋa din be kasi ti ma zaa, n zaŋ li ti a min’ a bidibisi ni a bipuɣinsi zaa ni di nyɛ yi dini sahakam. Di nyɛla yalim alikauli shɛli din yi man’ Yawɛ sanna ka n lo a min’ a zuliya maa sahakam.”
20Di nyaaŋa ka Yawɛ daa yɛli Aduna, “A bi yɛn mali tiŋgbani bɛ tiŋgbɔŋ maa ni bee m-mali tarili bɛ sani. Mani n-nyɛ a tarili ni a ni su shɛli Izraɛlnim’ sani.”
Lɛvinim’ tarili
21 #
Lɛv 27.30-33; Zal 14.22-29 “N zaŋ Izraɛlnim’ zaka din nyɛ bini pia kam puuni zaɣ’ yini la ti Lɛvinima ni di nyɛ bɛ ni tumdi tuun’ shɛŋa Yawɛ chirigibu shee suɣili ni la yɔri. 22Ka pumpɔŋɔ zaŋ chana, Izraɛlnim’ miri ka bɛ kana ti miri Yawɛ chirigibu shee suɣili maa, bɛ yi niŋ lala bɛ ni tum alahichi ka kpi. 23Amaa Lɛvinima n-yɛn tumdi Yawɛ chirigibu shee suɣili maa ni tuma ka bɛmaŋmaŋ’ daalahichi ʒi bɛ zuɣu. Lala n-yɛn nyɛ li yi ʒiɛmani kam ni. Lɛvinim’ mi ku pahi Izraɛlnim’ zuɣu su tiŋgbani palo. 24Dama Izraɛlnim’ zaka din nyɛ bini pia kam puuni zaɣ’ yini shɛli bɛ ni zaŋdi tiri man’ Yawɛ la, n zaŋ li ti Lɛvinim’ ni di nyɛ bɛ tarili. Dinzuɣu ka m pun yɛli ni bɛ ku mali tiŋgbani Izraɛlnim’ sani.”
Lɛvinim’ zaka yihibu
25Ka Yawɛ daa yɛli Musa, 26“Yɛlim’ Lɛvinima, ‘Yi yi ti deei zaka bini pia kam puuni zaɣ’ yini Izraɛlnim’ sani, din nyɛ n ni deei shɛli bɛ sani tin ya ka di nyɛ yi tarili la, yin’ yihimiya di bini pia kam puuni zaɣ’ yini ti man’ Yawɛ, ka di nyɛ zaka binyɛra puuni mi zaka. 27Dina n-yɛn nyɛ yi gba zaka, ka di be kaman kabɔɣili ni chi bee wain tɔɣiri bɔɣili ni wain zaka la. 28Di simdi ni yi gba yihi yi ni deei zaka binshɛŋa zaa Izraɛlnim’ sani maa mi zaka ti Yawɛ, ka zaŋ din nyɛ Yawɛ dini maa ti maligumaana Aduna. 29Bɛ ni zaŋ pin’ shɛŋa zaa tin ya, yihimiya Yawɛ dini ni nyɛ shɛli zaa di puuni. Din nyɛ din viɛli gari di zaa ka yi yɛn zaŋ ti o.’ 30Yɛlim’ ba yaha, ‘Yi yi ti yihi zaɣ’ viɛla maa zaka di ni, yinim’ Lɛvinim’ yin’ zaŋmiya din kpalim kaman kabɔɣili ni chi bee wain tɔɣiri bɔɣili ni wain zaka la. 31Ka yi mini yi yiŋnim’ zaa ni tooi di li luɣ’ shɛlikam zaa; dama yi ni tumdi tuun’ shɛŋa Yawɛ chirigibu shee suɣili ni la yɔri m-bala. 32Yi yi yihi di ni zaɣ’ viɛla zaka ka di li, yi bi tum taali. Amaa miriya ka yi ta Izraɛlnim’ pin’ shɛŋa din be kasi daɣiri; yi yi niŋ lala, yi ni kpi.’ ”
Red Letter Dagbani Bible © Bible Society of Ghana, 2011