Mumpar 1
1
Gɛ Korowii aa ta komɛlbwa
1Komɛlbwa mumpar la, Korowii ta nyundua ne harɛ.#Jɔn 1:1 2A ɡɛ saŋ la dɛ harɛ ta mar dɔe, dɛ komɛlbwa toole o ta. Dɛ nee tɔ komɛlbwa ta asɛ bɔr bir kpirkpir ken, asɛ Korowii Doma do nee la sie dɛ la dɛɛ ba.
3Belaa Korowii ŋɔ, <<Bɔ́r chaah.>>#2Kɔ 4:6 Asɛ bɔr chaah. 4O na bochaah la kɛŋɔ o wer. Asɛ o pere bochaah la le biro la bini, 5dɛ pa bochaah la sɔn <bɔrchaahna> asɛ dɛ pa biro la ɡe sɔn <bɔrjoe>. Asɛ bɔr jo dɛ chaah. Onee tɔpere waa tɔ sie.
6Korowii berɔ ŋɔ, <<Née la pere anɛ ásɛ ane kaa nyundua ásɛ ane ka harɛ.>> 7Gɛɛ Korowii ta bɔr nyundua dɛ pere nee la, ane kaa nyundua ane ɡe ka harɛ. Asɛ a ɛ ɡɛ. 8Asɛ o pa bɔr waa chɔ a baah ta la sɔn <nyundua>. Asɛ bɔr jo dɛ chaah. Onee tɔpere waa teŋa nɛɛ.
9Belaa Korowii ŋɔ, <<Née la aa ka harɛ la ka chɔ bobeŋkpoŋ ásɛ a ka harɛpɛɛ chɔ.>> Asɛ a ɛ ɡɛ. 10Asɛ o pa harɛpɛɛ la sɔn <harɛ>, dɛ pa nee la aa chɔ bobeŋkpoŋ la ɡe sɔn <mpo>, dɛ na kɛŋɔ a wer.
11Dɛ ŋɔ, <<Hárɛ pɛɛ la le kpɔɡa ne daa bwa soo siwi. Anɔ la aa dɛ ɛ bie ne daa aa dɛ nɔnɛ dɛ dɔ bie a bini bwa.>> Asɛ a ɛ ɡɛ. 12Harɛpɛɛ la le kpɔɡa ne daa bwa soo siwi. Anɔ la aa dɛ ɛ bie ne daa aa dɛ nɔnɛ dɛ dɔ bie a bini bwa. Asɛ Korowii na kɛŋɔ a wer. 13Asɛ bɔr jo dɛ chaah, onee tɔpere waa teŋa tooro.
14Asɛ Korowii ŋɔ, <<Kwáa chaah nyundua dɛ́ korɛ webaŋa le jwaana ta, dɛ́ baɡle tɔpera ne bene ne saŋ bɛla 15dɛ́ɛ chaah nyundua ne harɛ bwa.>> Asɛ a ɛ ɡɛ. 16Korowii ta konjena anɛ aa chaah. Anee wee ne korobie. Wee la kan dɛɛ chaah kohona bɔr chaahna saŋ, asɛ korobie waa do jeɡa la ɡe ɛɛ chaah jwaana. O ta weweela ɡe. 17O kpɔ ɡɛ kwaa nɔ bwa do nyundua asɛ aa chaah harɛ, 18bɛl dɛ ɛ toma jwaana bɛl ɡee ɛ toma bɔr chaahna saŋ, dɛ pere biro le bochaah ta. Asɛ Korowii na kɛŋɔ a wer. 19Asɛ bɔr jo dɛ chaah, onee tɔpere waa teŋa naarɛ.
20O berɔ ŋɔ, <<Pɛ́ŋa ne nee bini koŋkwaa su nee la ta pirim ásɛ jumbii ne koŋɡaahla do nyundua dɛɛ ɡah.>> 21Korowii ta mpo bini oljena ne koŋkwaa bwa aa lɔ nee bini pirim, ne jumbii ne koŋɡaahla ɡɛ a bwa soo siwi aa doa. Asɛ o na kɛŋɔ a wer. 22Asɛ Korowii swee andɛɛɡa tɛa dɛ ŋɔ, <<Hé loɡle dɛ́ warɛ dɛ su neerare ne mpo, ásɛ jumbii la ɡe loɡle dɛ́ su harɛ.>> 23Asɛ bɔr jo dɛ chaah, onee tɔpere waa teŋa nue.
24Asɛ Korowii ŋɔ, <<Hweera kwaa bwa soo siwi ba harɛ ta, kpɔɡ bini olchɔɡa, ne kondɛɛra ne anɔ la aa dɛ tuuɡi tea ta ne anɔ la aa dɛ huuh, a bwa ne a soo siwi.>> Asɛ a ɛ ɡɛ. 25Korowii ta a bini bɛlbwa soo siwi. Waa na kwaa waa taa la, o nao kɛŋɔ a wer.
26Belaa Korowii ŋɔ, <<Yá ta nɛwɛnyina bá do kɛ yan, dɛ́ɛ di kpeɡri pɛŋa ne jumbii ne kondɛɛra ne kpɔɡ bini ola, anjena ne anjeɡre, dɛ hweera kwaa aa dɛ huuh dɛɛ tuuɡi tea ta bwa nɛ.>>
27Anomanta, o ta nɛwɛnyina,
ɡɛ tenten waa doa laanee o ta ba.
Baa ne haahnee o ta.#Mum 2:21-24
28Korowii swee andɛɛɡa tɛɛ ba dɛ ŋɔ, <<Hé loɡle dɛ́ su harɛ ta pirim, ásɛ dɛɛ di kpeɡri pɛŋa aa lɔ mpo ta, ne jumbii ne koŋɡaahla aa lɔ nyundua, dɛ hweera kwaa aa dɛ huuh dɛɛ tuuɡi tea ta bwa nɛ.>>
29Dɛ ŋɔ, <<N tɛ heyaa kwaa aa dɛ ɛ bie ne daa aa nɔnɛ, dɛ dɔ bie a bini bwa soo siwi harɛ nɔ bwa ta, ásɛ a ɛ kondikwaa tɛ heya, 30dɛ kpɔ kpɔɡa ne papooni dɛ tɛ ola ne jumbii, ne kwaa aa dɛ tuuɡi tea ta ne anɔ la aa dɛ huuh, dɛ hweera kon te bɛlbwa ásɛ a ɛ a kondikwa.>> Asɛ a ɛ ɡɛ.
31Anɔ bwa habɔɔ la, Korowii nyiŋi kwaa waa taa la bwa dɛ na kɛŋɔ a bwa wer kɛrɛdɛ. Asɛ bɔr jo dɛ chaah, onee tɔpere waa teŋa numɛl.
S'ha seleccionat:
Mumpar 1: mzw
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.