Romam 14
14
Ma kemo mi̱nu chi a lebitu we
1Ti̱yiu nii wu keku bi̱yili̱mang kangu a tibu kwire, ti̱nidu ki̱le we didin ka ti̱kuran chi̱ntu a lakane. 2Wuka ni keku bi̱yili̱mang kangu a yung ka chadu kasi ti̱ti̱le, aya we wuka nii wu keku bi̱yili̱mang kangu a tibu kwire, ki̱chau ka fule. 3N ki̱n wu ki̱chau ka ti̱ti̱le, a swa̱badu wu a mabi yiko we. N ki̱n wu a chabu ka ti̱ti̱le ti̱nti̱n, chiye a kaiyu nii ki̱chade we di̱ne n Kwama a kobu ki̱n. 4M muna wure wu mun mwata wuka ni mi̱ne? Kana Tewuduwe ko, nang wu a lwe ka fwa tiiki̱ kangu n ti yare ko. A mwintuwe ka tidu di̱ne Kwama ko ka yo ki̱nu ka tidu.
5Wuka nii ki̱da̱ng wuka ki̱di a la ki̱mi̱n chi we yikayu diti. We wuka nii, ditiyu ki̱ni kwang a fiwine. Kanang wuwule ki̱bunti̱na chi ni̱r ki̱n a tau kwari̱le. 6N ki̱n wu a da̱u wuka di a la ki̱mi̱n chiye, a ni Kwama dwiyentu we chi n ki̱n a ma. N ki̱n wu ki̱wu name, ki̱ni Kwama dwiyentu di̱ne a wana Tewuduwe. N ki̱n wu a wube, a ni ti̱n Tewuduwe dwiyentu di̱ne a wana Kwama. 7Di̱ne a ne ni we tibe chire wu ki̱ma fiswe di̱ne dur ki̱ne yinu a neti̱ nii wu ki̱bwadu di̱ne dur ki̱ne. 8Ka ni ma fiswe ni swedu di̱ne Tewuduwe, ka ni bwange ni bwadu di̱ne Tewuduwe. Di̱ne ka ni ma fiswe ka bwa n chini m bi̱u Tewuduwe. 9Nang chi a yo n Yesu Masiya a bwa, a kuntuwe ko ke ki̱kau Tewuduwe bi̱kuri̱me, n ti bi̱bwari̱m.
10A mayire mun mwata kemo mi̱ne? A mayire mun swa̱ba kemo? Di̱ne n chi̱ni ki̱ni kwang ni tidu we ki̱di̱ng kabaku Kwamangu. 11A mwal ko,
“N Tewuduwe a yi ko bi̱yili̱m,
ka nang wuwule niye ka sungdu
we kakku mangu ki̱ni ti̱dumi̱n
ka dela Kwama ki̱ni yii ko.
12“Di̱ne yiko, ka nang wuwule niye ka fwa chi n ki̱n a maatu we kakku Kwamangu.”
Yo wuka mi̱nu yare we
13Di̱ne yiko, ni du kabaku ni̱bu mi̱nu we. Aya mu ni̱ru tiyangu ne mwang lwanda ka mwang yo chi yare we wa̱re kemo.
14N yim yinu n ni bi̱yili̱mu we di̱Tewuduwe Yesuwe, a ne ti̱kan chabtu ti̱tu ka kai nii. Aya ka nii a da̱u ti̱kanchi ko a lebe, a mwituwe yiko we di̱ki̱ne a lebu. 15Ka ke mo ka yaru we kuteng mwangu di̱ne chabti̱tu mun chadite, a yung mi̱laki̱ mwangu a newe. A dakabu chi mun chaditu, ka kau kemo wu n Yesu Masiya a ni yikiye mi̱n bwa.
16Kedu chi mun da̱ngdu a letu ni̱ba da̱duwe bwila. 17Yaa Kwama n ke chakku ti nori̱n, aya yile ti fiswe li̱ma ti furi mwemwen we fi̱ki̱m Kwamamu. 18Di̱ne ka nang wuwule niye wu ki̱sii Yesu Masiya a wa̱re we, n Kwama ki̱nwe ta̱ma̱ng kangu, ni̱bu ki̱yiu ki̱nu kani yurau.
19Di̱ne yiko, ni swaan funti̱ku bwiyang chirengi kwang, ni ma chi ka ru yichireye n ti keku bi̱yili̱mang ki̱ku a dakanang. 20Ti̱kaiyu nangang Kwamangu we ki̱ni ya̱m chabtu ti̱tu a lebitu. Chabti̱ti kwang a ne ki̱le we. Aya a kau ki̱le ka nii ki̱chau ti̱kan chi ti̱tu ka yo wuka nii mi̱n yare. 21A la chi, wudu nam we, nodu yim we kasi no ti̱ti̱le ti̱tu ka yo ka ke mo mi̱n yaritu.
22Di̱ne yiko, chi mwang ke bi̱yili̱m a dur ki̱ne, tiwe yiko a tibe mo n ti Kwama mo. Naba delake wu a ke we ni̱r ki̱nu ki̱ni chi n ki̱n a ke ko chabte. 23Aya n ki̱n wu ni̱r ki̱nu a ko chi n ki̱n ki̱chade, a kau ki̱mi̱n yare. Di̱ne n ki̱n a chabu ki̱ni keku bi̱yili̱mang. Ka m ma chi mwang kebu bi̱yili̱m mwi a lete, a kau ki̱le.
S'ha seleccionat:
Romam 14: Tula
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2015, The Nigeria Bible Translation Trust and Wycliffe Bible Translators, Inc. All rights reserved.