Ka̱la̱tiyam 3
3
Ni swidu kana keku bi̱yili̱mang
1N ti̱n ni̱bu bunti̱ki̱m a Ka̱latiyam, wule yo ti̱madu yinangu ta kubu diyange? Ta kurbu yinangu mang fwa chimi̱ni tas mi n Yesu Masiya a bwa di̱ne chi̱n a ki̱tiyang bwanga? 2Mi̱n baddu mang ma chimi̱n di̱bi̱di̱di diin, ti̱yiu Fi̱ki̱m Kwamamu di̱ne ti̱bunti̱ yili̱na, ka di̱ne ta nwe ya̱m bi̱yili̱mu ta ke ki̱ni ma? 3N ti̱n di̱bba? Ti̱mweti̱ chiti ram ki̱ni fi̱ki̱m yinangu a dakanang, ki̱la ki̱ka̱ngu da bwiye a ti kakku, ti̱ma nangang bwiyang.
4Da̱ng nabwe riye ta nwe we nangang ya̱m bi̱li̱mi̱me? Yoye ka kau ti̱kusiya? 5Yoye n Kwama a ni chi̱n Fi̱ki̱m ki̱mu, a ma nangi̱n chi ka̱ta̱kitu we tibe chi̱n di̱ne ti̱bunti̱ yili̱na? Ka di̱ne ta ke bi̱yili̱mu we chi ta nwenga?
6A wa̱re wiine, n Yibrayim a ke bi̱yili̱mu we di̱Kwama, n Kwama a yiu ki̱n a mar ki̱n naba yile 7Di̱ne yiko a dakan ta swaanu tiko, bwesi̱m Yibrayim i siini̱mu n nang bi̱bu a bunti̱ki̱n we keku bi̱yili̱mangu a di̱Kwamamu. 8Ya̱m Kwamam bi̱mwali̱li̱mu a fwako, wuka kuu bi̱bu n ke ni̱bu Yafudame ka medu ka ya yile we kakku Kwamangu di̱ne keku bi̱yili̱m chiyangu. N Kwama a fwa Yibrayim mi̱n ya̱m bi̱li̱m bi̱bu feredi yoko yiko, “Kutiyi kwang ka ya delaku a di̱mune.”#3:8 Mwe 12:3.
9Yibrayim a ke bi̱yili̱m a di̱Kwama a yati̱ delaki̱ku. We yiko, ni wu a ke bi̱yili̱m a di̱Kwama, ka yati̱ delaku yinang Yibrayim. 10Nangki̱n, ni̱bu bi̱bu ki̱kuradu ko Kwama ka yiu chidu di̱ne n chi ki̱bunti̱ miyaku yili̱n Musayimu, n chi ka kaiyadu ki̱ni yiko. Di̱ne ya̱m Kwamamu a fwa ko, “Kanang wuwule niye wu a bunti̱bu chi yilangu a fwange, ka bwila ki̱mi̱nu.”
11Ya̱m bi̱bu yi kwa̱rikwa̱ri, a ne ni ka kau naba yile we kakku Kwamangu di̱ne ki̱bunti̱ yili̱ne, di̱ne ya̱m Kwamamu a mwal ko, “N Kwama ki̱yiu ni̱bu yilemu di̱ne keku bi̱yili̱mang chiyangu.” 12Wu wa̱re keku bi̱yili̱mange a lakan n ti wu a yili̱n Musante. Yinangu ya̱m Kwamam bi̱mwali̱li̱mu a fwangu ko, “Nii ka tum chitu kwang we chi yilangu a fwaate, nang chi ka yuti̱ ki̱ne.”
13Aya n Yesu a tu ni we bwila wu a bunti̱ki̱ yili̱nange. Yo ni̱bu a kuka ki̱n a ki̱tiyang bwange, n ki̱n a da̱u bwila a no ya nidu di̱ne ki̱letiye a dur ki̱n. Di̱ne a mwal ko, “Kanang wuwule niye wu ni̱bu a kukan a ki̱tiyange, a yung a bwila ni wuko mi̱n.”#3:13 Mwa 21:23. 14Yo n Yesu a tu niye, delaki̱ku a ma Yibrayim mi̱nangu a ma bi̱bu n ke kuu ni̱bu Yafudamu mi̱n ti̱n, ke a yo chi mi̱n delaku a di̱n Yesu Masiyan. We yiko ti̱nti̱n, ni ya Fi̱ki̱m Kwamam di̱ne keku bi̱yili̱mang.
Yilangu n ti bwa̱ki̱ku
15Kebu mi̱m, mang swe chimi̱nu ki̱ni chi we da chire kwade. Ka ni̱bu a ma bwa̱ki̱ a kekan a di̱ka fa̱liyu we chi yaka made, wuka ni a ne kwiradu, a ne ni ka sute chiye we. 16N Kwama a bwa̱u n ti Yibrayim n ti wuka nii we ki̱kuwang kangu, #3:16 bukebu ki̱kuti̱li̱me: Yelenemu a mwal ko duum ki̱m, ka nang chikiye n Yesu. a dakabu ni da̱du ko ki̱fwadu n ti ni̱bu, n ki̱n ki̱fwadu n ti Nii wiin, Nii wuko n nang Yesu Masiya.
17Chi mi̱n fwaditu nang ti̱tu: Bwa̱ki̱ku n Kwama a bwa̱u n ti Yibrayimangu a ne kwiradu we swa̱ti̱tu 430 yo Kwama a ni Musa yili̱nte. Ti̱tu ka yungdu n Kwama ki̱kwira bwa̱ki̱mangu. 18Nangki̱n ka delaku Kwamangu ki̱bunti̱nu a yilange, a no neka bunti̱ni a bwa̱ke. N Kwama a ni Yibrayim delaki̱ku di̱ne bwa̱ki̱ku n Kwama a mangu.
19Ka yiko, wureni a yo n Kwama a ni yilange? N Kwama a ma yiko ko ke ki̱yung ni̱bu ki̱letiyu ditiyu ki̱da̱ng. Ti̱chitu wu a fwe ko ke a lami̱nti̱ ki̱dangu bukebu ki̱kuti̱ri̱be wu ni̱bu a bwa̱u ya̱m a dur ki̱ne ka bedangu. N Kwama a tume ni̱bu ti̱tumbi̱ri ki̱mu ki̱ni yilangu ko a ya ni Musa n ki̱n wu a le tibe Kwama n ti ni̱be. 20Ka ni̱bi burau a kekan a ya̱me, a dakan kano fware we. Aya n Kwama wu n ki̱kune, a mabu nanganu ki̱ni fware yo a bwa̱u n ti Yibrayime.
Yilangu a niibu yile n ti ti̱kuritu
21Yoye ti̱tu ki̱yungdu yilangu ki̱katadu n ti bwa̱ki̱ Kwamanga? Ko bayim! Ka no kaang yilang ka ni chi̱ni ti̱kuriye, a no n Kwama ka yiu chi̱ni di̱ne bunti̱ki̱ yilang kangu. 22Aya ya̱m Kwamamu a fwa ko, “Ti̱ti̱nitu kwang ni kau ka̱bi we ki̱letiyu, di̱ne ke bwa̱ki̱ Kwamangu a kau di̱ne ka nang wuwule niye, wu ki̱ni keku bi̱yili̱mang a di̱n Yesu Masiyange.”
23Yo no ya̱m keku bi̱yili̱mu a tibu bede, a no yilangu a tal ni yinang ni̱bu a le di̱bi̱nti̱li̱m. A no a ne da niin chire we ka n ke wa̱re keku bi̱yili̱mang a di̱n Yesunu a be chire.
Bwesi̱m Kwamam bi̱bu a keku bi̱yili̱mang
24We wuka ki̱swi, yilangu a maka ni a lami̱nti̱ yo n Yesu a be ti̱ti̱nite. A to niye a lami̱nti̱ ki̱dangu niyang ya yile di̱ne keku bi̱yili̱mang a di̱n Yesun Masiya, ni kau ni̱bu yilem we kakku Kwamangu. 25Aya we ki̱ka̱ngu keku bi̱yili̱mangu a ya fiswengu, niyang babu yilangu a no ki̱ma makakangu.
26Ki̱ka̱ngu di̱ne keku bi̱yili̱mangu n chi̱ni kwang kana bwesi̱m Kwamam. 27Aya yoko ni a ma batisma, a kau tiyangu ni a le Masiyangu, kanang chikiye, yinangu ni a yau luke wufwiyeng. 28Di̱ne yiko, ki̱ka̱ngu a ne ti̱kan chi we ko, naba ni̱bu Yafudame ka naba Yelena, bwe ka ka̱be, kwarta ka naye, n ti̱ni ki̱ni kwang ti̱kabbi wiin a di̱Yesu Masiya. 29Ka a kabi ying n ti̱n m bi̱u Masiya, a yung n ti̱n ki̱kuwang Yibrayim, ta chau kula wu n kwama bwa̱be.
S'ha seleccionat:
Ka̱la̱tiyam 3: Tula
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2015, The Nigeria Bible Translation Trust and Wycliffe Bible Translators, Inc. All rights reserved.