Matayo 25
25
Omũsyo wʼabana-bato ĩkũmĩ
1Oko mugulu oyo Obwami bwʼelubula bwasyalingana nʼabana-bato ĩkũmĩ, abaheka esyotala syabo, nʼerĩyahĩndana nʼĩba wʼomũherũkĩ. 2Abatanu ba kubo babya bakĩrũ, nʼabatanu babya bʼamenge. 3Omugulu abakĩrũ baheka esyotala syabo, mobataheka amagũta haguma nabo. 4Nĩkwa abʼamenge mobaheka amagũta omo matambya haguma nʼesyotala syabo. 5Neryo ĩba wʼomũherũkĩ mwamala yo ndambĩ, neryo abana-bato abo mobayitsingirako, mobayato.
6Nĩkwa omo katĩ-kanene omulenge mwabirikira ati, Ĩba wʼomũherũkĩ yoyũ! Mwase, mũhĩndane naye! 7Neryo abanabato ĩkũmĩ abo mobahangana, mobatwa amakala oko syotala syabo.
8Neryo abakĩrũ mobabwira abʼamenge bati, Mutuhe oko magũta wenyũ, kusangwa esyotala syetu sikahumbera. 9Nĩkwa abʼamenge mobasũbĩrya bati, Iyihi, sienditutsungana ĩtwe, nenyũ. Mugende oko bakatũndaya muyigulirego. 10Neryo abakĩrũ mobayagulago, neryo ĩba wʼomũherũkĩ mwahĩka. Abana-bato batanu ababya bakateya mobingira haguma naye okwʼirya lyʼerĩherũkya. Nʼolũyĩ molwakingwa.
11Enyũma wʼaho abandi bana-bato abo mobahĩka bati, Mukama, Mukama, utukingulire. 12Neryo ĩba wʼomũherũkĩ mwasũbĩrya ati, Kwenene ngabũga nenyũ, Sĩnyĩbasĩ. 13Neryo Yesu mwabũga ati, Neryo mũtegaye, kusangwa sĩmwasĩ ekiro kutse endambĩ.
Omũsyo wʼabagombe basatu
(Lk 19.11-27)
14Kusangwa liri ngʼomundu oyo wagenda oko lugendo lwʼekindi kihugo, neryo mwabirikira abagombe buwe, mwasĩgĩra bʼebindu biwe. 15Neryo mwaha obuli mugombe ngʼamenge wuwe kwʼali. Mwaha omuguma esyotalanta ĩtanu nʼoko gundi esyotalanta ĩbĩrĩ, nʼoko gundi talanta nguma, neryo mwaya oko lugendo. 16Neryo-neryo oyo wĩmaya esyotalanta ĩtanu, mwayatũndyasyo, mwabana mwʼendũndĩ yʼesindi talanta ĩtanu. 17Nʼoyo wabya nʼesyotalanta ĩbĩrĩ mwatũndyasyo, mwabana esindi ĩbĩrĩ. 18Nĩkwa oyo wĩmaya etalanta nguma mwayatakulirayo omo kitaka, mwabĩsa esyofranka syʼOmukama wuwe.
19Enyũma wʼomugulu muli, omukama wʼabagombe abo mwasa, mwabũlyabo emiganzo. 20Neryo omugombe oyo wĩmaya esyotalanta ĩtanu mwahĩkaho, mwaleta esindi talanta ĩtanu, ati, Mukama, mowamba esyotalanta ĩtanu. Langira! Nabĩrĩtũndya mwʼesindi talanta ĩtanu. 21Neryo omukama wuwe mwamubwira ati, Wamakola ndeke, uwe mugombe mubuya oyuteregula! Sulitalegula omo bindu bike, nasyakũhĩra erĩteya ebindu bingi. Wingire omo butseme bwʼomukama wawe! 22Nʼomugombe oyo wĩmaya esyotalanta ĩbĩrĩ mwasa ati, Mukama, mowamba esyotalanta ĩbĩrĩ langira, nabĩrĩtũndya mwʼesindi talanta ĩbĩrĩ. 23Neryo omukama wuwe mwamubwira ati, Wamakola ndeke uwe mugombe mubuya oyuteregula! Sulitalegula omo bindu bike, nasyakũhĩra erĩteya bindu bingi. Wingire omo butseme bwʼomukama wawe! 24Nʼomugombe oyo wĩmaya etalanta nguma mwahĩka ati, Mukama, nabya nyasĩ kʼuli mundu Ũkalĩre, ukagesa aho utabiba, nʼerikuma-kuma aho ũtahĩra mbuto. 25Neryo monubaha, monayabĩsa etalanta yawe yʼomo kitaka. Langira! Yeyĩ! 26Nĩkwa omukama wuwe mwamũsũbĩrya ati, Uwe mugombe mubi nʼomugata, wabya wasĩ ko ngagesa aho ndabiba, nʼerikuma-kuma aho ndahĩra embuto kwehĩ? 27Kumbe wahĩra ebindu byage omo bankĩ, neryo nangabere nahĩka inabana ebindu byage haguma nʼendũndĩ. 28Neryo mumusagule etalanta eyo, muheyo oyuwite esyotalanta ĩkũmĩ. 29Kusangwa oyuwite asyahabwa ebindi, iniabya nʼebingi; nĩkwa oyutawite, asyasagulwa ebyo awite. 30Kandi muguse omugombe oyutekuba lwahi omo mwĩrĩmya wʼeyĩhya; eyo abandu basyalira nʼerikeregeta ameno.
Eritswera lyʼendũlĩ
31Nĩkwa omugulu Omugala wʼomundu asyasa omo lukengerwa luwe, nʼabamalaĩka bosĩ haguma naye, asyĩkala oko kĩtũmbĩ kiwe kyʼobwami kyʼolukengerwa. 32Nʼebihanda byosĩ byasyahĩndanĩbwa embere siwe; kandi asyasololabo ngʼomũlĩsya kwʼakasolola esyombũlĩ omo mbene-hene. 33Asyahĩra esyombũlĩ oko byala biwe byʼamali, nʼesyombene-hene oko malembe. 34Neryo Omwami asyabwira abandu abali oko byala biwe byʼamali ati, Mwase, ĩnywe Tata wage abiritsumula, mwĩmaye obwami obwakokotĩbawa busana nenyũ okwʼihangika lyʼekihugo. 35Kusangwa nabya nʼenzala momwanyaganula; nabya nyĩkwĩre enyota momwamba awʼerĩpũlya; nabya mũgendĩ, momwanyĩkokya. 36Nabya ndũmbũ momwanyambalya; nabya nyilwere, momwanyibana; nabya omo mũlĩkĩ, momwambĩkako. 37Neryo abatunganene basyamũsũbĩrya bati, Mukama, twakulolako mugulu wahi, erikuha kalyo kwehĩ? Kutse ĩgũkwĩre enyota itwakuha awʼerĩpũlya kwehĩ? 38Kandi omugulu wahi twakulolako iguli mũgendĩ, motwakũkokya kwehĩ? Kutse iguli ndũmbũ motwakwambalya kwehĩ? 39Kandi mugulu wahi wabya ulwere, kutse omo mũlĩkĩ motwasyakubana kwehĩ? 40Nʼomwami oyo asyasũbĩryabo ati, Kwenene ngabũga nenyũ nyiti, Ngoko mwakolera omuguma gʼoko bagala betu bake-bake aba, momwakolakyo ũkwʼĩngye.
41Neryo asyabwira abʼoko byala biwe byʼamelembe ati, Mũlũe kwĩngye, ĩnywe batakirwa! Muye omo muliro wa kera na kera owakokotĩbawa busana na Satanĩ nʼabamalaĩka buwe. 42Nabya nyĩkwĩre enzala, momutanyaganula, kandi nabya nyĩkwĩre enyota, momutamba awʼerĩpũlya. 43Nabya mũgendĩ, momũtanyĩkokya, kandi nabya ndũmbũ, momũtanyambalya, nabya nyilwere, kandi nabya omo mũlĩkĩ, momutayanyibana. 44Neryo basyamũsũbĩrya bati, Mukama, omugulu wahi twakulolako ĩgũkwĩre enzala, kutse enyota, kutse iguli mũgendĩ, kutse ndũmbũ, kutse igulwere, kutse iguli omo mũlĩkĩ, motutakukolera, kwehĩ? 45Neryo Omwami asyasũbĩryabo ati, Kwenene ngabũga nenyũ nyiti, Ngoko mutakolera omuguma gʼoko bake-bake aba, momutakolakyo ũkwʼĩngye. 46Neryo aba basyagenda omwʼisuyirwa lyʼerikota, nĩkwa abatunganene basyaya omo ngebe yʼerikota.
S'ha seleccionat:
Matayo 25: KB80
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Bible in Kinandi © Bible Society of the Democratic Republic of Congo, and Bible Society of Uganda, 1980.