Matayo 20
20
Abahĩngĩ omwʼirima lyʼebĩnyũ
1Kusangwa obwami bwʼelubula bulingene nʼomwenye kitaka oyo watsinduka erĩsondya abahĩngĩ busana nʼeririma liwe lyʼebĩnyũ. 2Naye mwalĩga eririha abahĩngĩ abo ekĩtsĩpa kiguma oko kiro kiguma, neryo mwatumabo omwʼirima liwe lyʼebĩnyũ. 3Neryo omukulima oyo mwahuluka oko saa ĩsatu mwalangira abandi ibanimene buyira omo katale. 4Neryo mwabwirabo ati, Nenyũ muye omwʼirima lyʼebĩnyũ, nʼesitolere nasyabahasyo. Neryo mobayayo. 5Kandi mwayayo oko saa yʼendatu, nʼoko saa yʼomwenda, neryo mwakola atya. 6Nʼoko saa yʼerĩkũmĩ nʼenguma mwaswahuluka, mweya abandi ibanimene. Neryo mwabwirabo ati, Busana nakĩ mwimene hano ho buyira omusibo gosĩ kwehĩ? 7Nabo mobamubwira bati, Sitwetabana mundu wʼerituha mũbĩrĩ. Neryo mwabwirabo ati, Nenyũ muye omwʼirima lyʼebĩnyũ.
8Neryo erĩgolo-golo lyabere ryahĩka, Omwenye eririma lyʼebĩnyũ mwabwira omwĩmanĩrĩ wuwe ati, Ubirikire abahĩngĩ Ulihebo obũhĩngĩ bwabo erĩtsũka oko bʼenyũma ũhĩke oko batsũka. 9Neryo abandu abatsũka omũbĩrĩ esaa erĩkũmĩ nʼenguma mobalihwa ekĩtsĩpa kiguma. 10Neryo abandu abatsũka erihabwa omũbĩrĩ mobahĩka mobaganĩrya bati bakandĩĩmya bingi kwʼaho; nĩkwa obuli mundu mwalihwa kĩtsĩpa kiguma. 11Neryo babere bahambakyo, mobayikuna oko mwenye esyombibi, 12bati, Abandu bʼenyũma aba bamakola esaa nguma nyisa, nawe wabiririhabo ngatwe, tũlũe tũsĩbĩre tukanuba omo mũbĩrĩ, nʼeryuba likatutera. 13Nĩkwa Omwenye eririma mwasũbĩrya omuguma wa kubo ati, Mwĩra wage, sinditakuyira nabi, motutalagana nawe busana nʼekĩtsĩpa kiguma kwehĩ? 14Wĩmaye esyawe, ugende. Nĩkwa nyanzĩre eriha omundu wʼenyũma oyũ ngawe. 15Sindi nʼehamũlĩ erikola omo byage ngoko nyanzĩre kwehĩ? Kandi ukatsura kusangwa indi mubuya kwehĩ?
16Litya owʼenyũma asyabya wʼerĩmbere, kandi owʼerĩmbere asyabya wʼenyũma.
Yesu akahula oluholo luwe kandi
(Mk 10.32-34; Lk 18.31-34)
17Neryo omugulu Yesu asonda erihetukira eYerũsalema, mwatwala abiga ĩkũmĩ nʼababiri ĩbobene aho lutambi, neryo omo nzira mwabwirabo ati, 18Lebaya, tukahetukira eYerũsalema, nʼomugala wʼomundu asyahoterwa oko bahererĩ bakulu nʼabakangĩrĩrya bʼEmigambo, nabo basyamutswera ambu ahole. 19Kandi basyamuhotera oko Bihanda erĩmũsekererya nʼerĩmũswĩrya emikoba, nʼerimubamba oko musalaba, nʼenyũma wʼebiro bisatu asyalũbũkĩbwa.
Koyo wa Yoane na Yakobo akabũlaya kindu
(Mk 10.35-45)
20Neryo nyĩnya wʼabagala ba Zebedayo mwahĩka uku Yesu haguma nʼabagala buwe, neryo mwamũnamira, mwamũbũlya omwatsi. 21Neryo Yesu mwamũbũlya ati, Ukasondakĩ kwehĩ? Naye mwamubwira ati, Uhane, uti abagala bage babiri aba, bĩkale muguma oko byala byawe byʼamali, nʼomuguma oko malembe omo Bwami bwawe. 22Nĩkwa Yesu mwamũsũbĩrya ati, Sĩmwasĩ ebyo mũkabũlaya. Ĩnywe mwangatoka erĩpũlya oko lũtehĩ olo ngandĩpũlyako kwehĩ? Nabo mobamũsũbĩrya bati, Twanganatoka. 23Neryo Yesu mwabwirabo ati, Mwasyapũlya oko lũtehĩ lwage, nĩkwa erĩĩkala oko byala byage byʼamali, nʼoko malembe, si ryage eribahalyo, nĩkwa ni ryʼabo Tata wage abĩrĩkokoteryalyo.
24Nĩkwa omugulu abandi biga ĩkũmĩ mobowa ekĩ, mobahitana uku balĩkyabo abo babiri. 25Nĩkwa Yesu mwabirikira abosĩ bo haguma, mwabwirabo ati, Mũnasĩ kwʼabatabalĩ bʼabandu bakatabalirabo, nʼabakulu babo bakahamulabo. 26Nĩkwa ko bite bitya omo katĩkatĩ kenyũ. Nĩkwa oyo wanzĩre eribya mukulu omo katĩkatĩ kenyũ, asyabya mugombe wenyũ, 27kandi oyo wanzĩre eribya wʼerĩmbere omo katĩkatĩ kenyũ asyabya mugombe wenyũ. 28Kusangwa Omugala wʼomundu mwatasa erikolerwa, nĩkwa asa erikola, nʼeriha engebe yiwe mo bũgũlĩ busana nʼabandu bangi.
Yesu akalamaya esyondĩmatĩme ĩbĩrĩ
(Mk 10.46-52; Lk 18.35-43)
29Neryo omugulu babya bakalũa eYerĩko, endeko nene moyakwama Yesu. 30Neryo lebaya, esyondĩmatĩme ĩbĩrĩ babya bĩkere oko mũsĩke wʼenzira mobowa ambu Yesu akalabaho, mobabirikira kutsibu bati, Mukama, utuganyire, uwe Mugala wa Dawĩdĩ. 31Neryo endeko mobakungabo nʼeribwirabo bati, babye bũkũtũ. Nĩkwa mobabirikira kutsibu bati, Mukama, utuganyire, uwe Mugala wa Dawĩdĩ! 32Neryo Yesu mwahangana mwabirikirabo, ati, Mukasonda inabakolerakĩ kwehĩ? 33Nabo mobamubwira bati, Mukama, twanzĩre ĩwalĩbũla ameso wetu. 34Neryo Yesu mwakwĩrabo bũlĩge, neryo mwatũla oko meso wabo; neryoneryo mobabana erilangira, mobamukwama.
S'ha seleccionat:
Matayo 20: KB80
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Bible in Kinandi © Bible Society of the Democratic Republic of Congo, and Bible Society of Uganda, 1980.