Matayo 15
15
Emitsye yʼAbafarĩsayo
(Mk 7.1-13)
1Neryo abandi bʼoko Bafarĩsayo nʼabakangĩrĩrya bʼEmigambo mobahĩka uku Yesu bakalũa eYerũsalema, bati, 2Busana nakĩ abiga bawe bakaketa emitsye yʼabakulu kwehĩ? Kusangwa sibenaba oko byala omugulu bakalya akalyo. 3Yesu mwasũbĩryabo ati, Nenyũ, busana nakĩ mukaketa ekihano kya Nyamuhanga busana nʼemitsye yenyũ kwehĩ? 4Kusangwa Nyamuhanga mwabũga ati, Ũsĩkaye tata wawe na koyo wawe, kandi, Oyukahula tata wuwe kutse koyo wuwe yo nabi, ĩtawe. 5Nĩkwa ĩnywe mũkabũga muti, Oyo wasyabũga na tata kutse nyĩnya ati, Ekĩndũkĩ kyage kyangakũwatĩkĩrye kyabirihabwa Nyamuhanga. 6Muti, siasĩkaye tata wuwe kutse koyo wuwe. Neryo litya, mukapona ekĩnywa kya Nyamuhanga busana nʼerikwama emitsye yenyũ. 7Ĩnywe batebya! Omũmĩnyererĩ Ĩsaya mwaminyerera ndeke busana nenyũ, ati,
8Abandu aba bakanyĩsĩkaya omo mĩnywa yabo,
Nĩkwa emitima yabo iri hali kwĩngye.
9Nĩkwa bakanyĩramaya buyira.
Kusangwa bakakangĩrĩraya amahano wʼabandu nga ni mahamulo wa Nyamuhanga.
Emitsye eyikayira omundu mo mũtsandĩrya
(Mk 7.14-23)
10Neryo Yesu mwabirikira endeko ukwʼiye mwabwirabo ati, Mwowe, muminye. 11Si kye kindu ekikaya omo buno bwʼomundu kyo kikamũtsandaya, nĩkwa kye kindu ekĩkalũa omo buno, kyo kĩkatsandaya omundu.
12Neryo abiga mobahĩka uku Yesu mobamubwira bati, Ũnasĩ kwʼAbafarĩsayo mobagalirwa omugulu bowa ebĩnywa ebĩ kwehĩ? 13Yesu mwasũbĩryabo ati, Obuli mbuto eyo Tata wage wʼelubula atahera yasyakulangwa. 14Mulekebo, ni basondolĩ ndĩmatĩme bʼabandu ndĩmatĩme. Omundu ndĩmatĩme amasondola ogundi mundu ndĩmatĩme, ababiri bosĩbasyatogera omo buhya. 15Neryo Petero mwabũga na Yesu ati, Ũtũkũmbũlĩre omũsyo oyo. 16Neryo Yesu mwabũga ati, Nenyũ mukine butaminya kwehĩ? 17Sĩmwasĩ ekikaya omo buno ko kikalaba omo nda, neryo ikyatwangana kwehĩ? 18Nĩkwa emyatsi eyĩkalũa omo buno ĩkalũa omo mutima yo yĩkatsandaya omundu. 19Kusangwa omo mutima wʼomundu mukahuluka amalengekanĩa mabi, erĩĩta, erĩsĩngĩra, amaragane, erĩĩba, eribihira bandi, nʼebĩtsũmĩ. 20Eyĩ ye myatsi eyĩkatsandaya omundu. Nĩkwa erirya omo byala bĩtanabĩre sĩbyetsandaya mundu.
Erĩkĩrĩrya lyʼomũkalĩ wʼeTĩro
(Mk 7.24-30)
21Neryo Yesu mwalũaho mwaya omo bihugo byʼemĩyĩ yʼeTĩro nʼeSĩdonĩ. 22Neryo mũkalĩ, Omukanana oyo wabya ĩkere omo kihugo ekyo, mwasa uku Yesu, mwabirikira ati, Uwe Mukama, mugala wa Dawĩdĩ, unyiganyire. Mwali wage ali ko mbĩnga ĩkamwagalaya kutsibu. 23Nĩ kwa Yesu mwatamũsũbĩrya kĩnywa nʼekiguma. Abiga buwe mobahĩka nʼerimubwira bati, Umuhige agende, kusangwa akatũkwamaya olukanda. 24Nĩkwa Yesu mwasũbĩrya ati, Natumawa oko syombũlĩ esĩherĩre syʼenyũmba ya Ĩsraelĩ nyisa. 25Nĩkwa omũkalĩ oyo mwasa, mũnama embere sya Yesu, ati, Mukama, ũnyĩwatĩkaye! 26Yesu mwasũbĩrya ati, Sĩryowene erĩĩmya akalyo kʼabana nʼerigusako oko syombwa. 27Nĩkwa omũkalĩ oyo mwabũga ati, Kwenene, Mukama, nĩkwa esyombwa nasyo sikalya ebitahangukira ebikalagala oko mesa ya mwenyesyo. 28Neryo Yesu mwasũbĩrya ati, Uwe mũkalĩ, erĩkĩrĩrya lyawe nĩ rĩnene! Ebyo wanzĩre bikolawe busana nawe. Neryo mwali wuwe mwalamĩbwa oko ndambĩ eyo.
Yesu akalamaya bandu bangi
29Neryo Yesu mwalũa eyo, mwalaba oko mũsĩke wʼengetsi yʼeGalĩlaya. Neryo abere ahetukira oko kitwa, mwĩkalaho. 30Nʼesyondeko mosyamũhĩkako, ibakamuletera abakasĩndogera, nʼebirema nʼesyondĩmatĩme, nʼesyomũmũ, nʼabandi bangi abalwere, mobahĩrabo hakũhĩ nʼebisando bya Yesu, naye mwalamyabo. 31Kyaleka endeko iyasweka omugulu balangira esyomũmũ sĩkabũga, nʼebirema ibyabirilama, nʼabakasĩndogera ibalimugenda, nʼesyondĩmatĩme isirimulangira, neryo mobapipa Nyamuhanga wa Ĩsraelĩ.
Yesu akalĩsaya abandu elfu ĩnĩ (4,000)
(Mk 8.1-10)
32Neryo Yesu mwabirikira abiga buwe, ati, Namakwĩra endeko yʼobũlĩge, kusangwa bamasiba nage lino biro bisatu, isibawite ebyʼerirya. Kandi sĩnyanzĩre eritumabo bakagenda batalĩre, bakasyalemberera omo nzira. 33Neryo abiga mobamũbũlya bati, Tukandibana amandu angaha go hahi omo mbwarara erĩũgũtya endeko yingana nʼeyĩ kwehĩ? 34Neryo Yesu mwabũlyabo ati, Muwite uku mandu angahi kwehĩ? Nabo mobabũga bati, Alinda, nʼehihere hike. 35Neryo Yesu mwategeka ati endeko bĩkale ahisi. 36Nĩkwa Yesu mwĩmya amandu alinda ayo nʼamahere, mwaha ewasĩngya uku Nyamuhanga, neryo mwatsũtsangago mwahago oko biga buwe, nʼabiga nabo mobahago oko bandu ababya omo ndeko. 37Abosĩ mobalya, mobũgũta. Neryo abiga mobasongya-songya ebitiri birinda ebyoswĩre mwʼebitahangukira ebyasaka. 38Neryo abalume abalya babya elfu ĩnĩ (4,000), abakalĩ nʼabana bataganzĩrwe kubo.
39Neryo Yesu mwalagana nʼendeko ati bagende. Neryo mwingira omo bwato, mwaya omo kihugo kyʼeMagadanĩ.
S'ha seleccionat:
Matayo 15: KB80
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Bible in Kinandi © Bible Society of the Democratic Republic of Congo, and Bible Society of Uganda, 1980.