KƆLOOSIDIMA 4
4
1Ya ban su daaba la muna, ya dɔli yɛlimaŋni n‑tiri ba, ni an dɔli soori. Ka mi, ni, ya gba mari ya Dugma ka u bɛ arizana ni.
2See ka ya kur pɛ'ari n‑susiri Naawunni ni nimbirimoaa; yan di gbisi ka kyɛ puusigu. Ka laa m‑puusiri Naawunni barika sahakam. 3Ka ya puusigu wa ni, see ka ya susiri Naawunni n‑tiri ti gba: ni, u ti maali soori n‑ti ti ni ti ti tɔ'asi u yɛligu maa n‑tiri niriba, n‑toaai n‑kasigri u yɛlisɔ'ara an bɛ Kirisita ni maa. Di nyɛ la lala yɛligu maa zugu ka ba lɔ ma kyɔrimi ka n na kpalim m‑bɛ lala. 4Ni, Naawunni nin kyɛ ka n nin yiisiri yɛlisɔ'ara wa zaa paalu, hoo din kpa la talasi seem la. 5Ya mun kur mari ya mansi ka dɔli yɛm soori n‑tiri ban pa ti niriba la. Yan di kyɛ ka sahasunseaa ti gaari yɔri. 6Ya mari azamsuma an nya'asa, hoo zɛseesi an mari yaarim ŋɔn nya'asa seem la: ka mi yan sɔsiri seem ni niriba, n‑labsiri suŋŋa n‑tiri sɔkam.
7Tɔ. Tikyikusi nin yɛli ya n lahabaya zaa. U nyɛ la ti mabisuŋŋu n‑suŋŋni ti, ka ti la'amni taaba n‑tumni n‑tiri ti Dugma. 8Lala zugu ka n tumni u ya saani na, ni u ti yɛli ya ti lahabaya wa, ka lala ka u nin kpamsiri ya sufu. 9Ka n kyɛ ka Ɔneesima gba ti dɔli u n‑kyɛ ya saani na: ŋɔn gba nyɛ la ti mabisuŋŋu, tin mun niŋi u yɛdda n‑wuri u pam gba. Halli u nyɛ la ya timbiiya, ka u nin yɛli ya ti kpa wa yɛttɔ'a zaa.
10Arisitaakusi gba ka ba paasi n zugu n‑kpari sarika duu ni: ŋɔn gba puusiri ya ni. Maaki gba puusira - ŋɔn nyɛ Baanabasi tunzɔ la. Ŋɔn Maaki yɛla ka ya pun wum, ni, u yi ti paai ya saani na, see ka ya deaai u suŋŋa. 11Yisa sɔ, ban boonni sɔ ‘Gyasitisi’ la - ŋɔn gba puusiri ya. Ban n nyɛ Yɛhudiyadima ka ba suŋŋni ma Naawunni naam tuma maa ziiya; ba butiri sɔ zaa laa n‑ka ni m‑paasi ba zugu; ban mun kpamsiri ma ni sufudoaa. 12Ya timbisɔ gba bɛ ni, Ɛpafraasi, ka ŋɔn gba puusiri ya ni. U nyɛ la Kirisita Yisa nyaandɔlisuŋŋu. U moori sahakam n‑susiri Naawunni n‑tiri ya, ni, ya nin zɛ yummu Naawunni soori maa ni n‑dɔli Naawunni yuubu zaa sahakam. 13N nin toaai n‑yɛli ya u tuma pam yɛla, ni, u tumni tunkara n‑tiri yarima, ni Leoodisii dima, ni Heerapɔlisi dima gba. 14Dɔ'ata Luuki gba puusira - ti wuri ŋɔna pam gba - ŋɔn ni Diimasi m puusira. 15Ya puusima ti mabiisi ban bɛ Leoodisiiya la, ka yan di tam Nimfa ni ninvugseeba ban la'amni u yiri maa ni n‑gyeemna. 16Ya yi karim gbaŋŋu wa n‑naai, ya kpaŋŋi ya mansi n‑kyɛ ka Leoodisii dima ti deaai n‑karim, ka yan mun deaai ba dinni n‑karim. 17Ya yɛlim Akyipusi, ni, u na teesim tunseaa ban daa zaŋŋi n‑zaali u Naawunni zugu la, ni, u tumma n‑naai.
18Tɔ, ya nyam sɔppu wa - man sɔbri m‑puusiri ya n toori nuu ni sɔppu: Pɔla .
Ya teaama man ŋɔn lɔ la kyɔrimi seem.
Naawunni piinisuma zaa bɛ ya saani.
S'ha seleccionat:
KƆLOOSIDIMA 4: maw
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2002, Wycliffe Bible Translators, Inc. All rights reserved.