Pillilpiv 3
3
Mal dil tsaq nail daol nail phaq nail ganl
1Aqivq jaqbheq juq-ol, haoqnao nao saq khe daoq neq, niail hai ngaol; Yeiqsul nail lavqkhoel bhai lavqkhiq tsail yaoq. Ganl niil nul juq bhai teevq yanq ngal-aq teevq pov gevq bhoel-ai lavq nail neq, gaqdoil maq doil. Khul khi mail dai ngal-aq neq, nul juq jaol ivq nia dai, ganl tsoiq nail ngaol.
2Kheeq khe-ai dul nail tsaol-aq bhai yaol phaol yaoq. Aqyu juq neq, haqeiv nail phaq nl nail nee ovqtavq, bavkov uqjaq ya oev naol dai, ge nail ngaol. 3Mal dil bavkov uqjaq oev nail juq neq, ngadao juq ngaol. Khul khi mail dai ngal-aq neq, ngadao juq Miqyail nail Aqhaqlal nail lavqkhoel nee Miqyail bhai uqhuq thaoq nail tsaol-aq ngaol. Al ovqtavq, Yeiqsul Khali nail lavqkhoel neema eeq duq jiav khi, aqsivq haqjoil bhai maq juq nail tsaol-aq iqsanl ngel nail ngaol. 4Mal dil dai, ge haq neq, ngal aqsivq haqjoil bhai juq movq haq neq, juq kivq naol. Ngal aqsivq haqjoil bhai juq kivq naol dai, yu teevq gaq ga nav noeq haq neq, ngal aivq nee maq tsil juq kivq naol. 5Ngal neq, doevq lee khi eivq n bhee lal-al ngal-aq neq, bavkov uqjaq oev-a nail ngaol. Ngal neq, Ilsaqleiqlav nail jeq-e jaq-a nail lavqkhoel khe, Bheinqyaqminq nail jeq-e jaq-a ngaol. Heiqbhail nail tsaol-aq lavqkhoel nee doevq lee-a nail, Heiqbhail nail tsaol-aq mal dil ngaol. Aol daoq kovq daoq phao nee ge haq neq, Phaq liq sail ngaol. 6Ngaq-i mail lai jai dee dee-a nail ganl bhai ge haq neq, Khali yaq munl bhai khoeq bhiq jiovq bhiq daiq-a nail teevq gaq ngaol. Aol daoq kovq daoq bhai tavq nail tsaq nail daol nail phaq bhai ge haq neq, oeqbal maq aol nail tsaol-aq ngaol.
7Thail hai ngaol-aoq, ngaq nail haqbhoil jailjeq aol naol dai, ngaq-i mail khal saol-nvq-ai thaq nail al juq iqsanl bhai, Khali nail haqbhoil sunq ail nail phaq pevq lao thaq nail niil dai, niil aq-il saol-nvq-ai thaq nail ngaol. 8-9Mal dil dai, ge haq neq, ngal ngaq nail Heeqphaq Yeiqsul Khali bhai heeq kivq-a nail neq, iqsanl nee maq tsil meeq jaiq nail ngel-i mail, yaoq juq yaoq iqsanl bhai sunq ail nail juq ngaol dai, saol-nvq-ai thaq nail ngaol. Ngal aivq nail haqbhoil yaoq phaq yaoq-ao nee bhi sunq ail gil-a nail ngaol. Ngal Khali bhai ya khi aivq nail lavqkhoel bhai jaol kivq dai, al juq iqsanl bhai yav ha-ai thaq nail pavqkhuq pavq leivq ngaol dai, saol-nvq-ai thaq nail ngaol. Ngal neq, aoldaoq kovqdaoq bhai tavq nail tsaq nail daol nail phaq maq jiav. Khali bhai neema thaq tsaol nail bhai tavq nail tsaq nail daol nail phaq jiav nail ngaol. Tsaq nail daol nail niil phaq neq, Miqyail nee mail dov lee-a nail ngaol. Neema thaq tsaol nail ngel-i mail taivq-ail tsaq nail daol nail niil phaq bhai ya nia nail ngaol. 10Niil aq-il neq, Khali bhai iqsanl, aivq doevq kovq lal-a nail bhaqaoq bhai iqsanl, ngal heeq kivq movq ail nial. Al ovqtavq, Khali-i mail daq-a nail haq nail aoq nail juq bhai aivq nee mail teevq gaq khe-ai daq daq ail, aivq sil-a nail khe-ai dul lal dai iqsanl, doevq movq ail nial. 11Al heel ngel-i mail, ngal iqsanl sil khi doevq kovq lal nail phaq bhai ya kivq ail jaol-aq dai, noeq thunq dee dee nail ngaol.
Paolluv kovpavq ya dai lai jai nail ganl
12Ngal niail hai ge nail neq, niil aq-il ya gaq-ao naol dai, ge nail maq ngel-ail. Bheeq lal gaq-ao naol dai, ge nail iqsanl maq ngel. Yeiqsul Khali-i mail ngaq bhai aivq nail tsaol-aq bhi pevq lal-a nail khe-ai, kovpavq al bhai ngal ya dai, lai jai thail thaiq nail ngaol. 13Aqivq jaqbheq juq-ol, kovpavq al bhai ya gaq-ao naol dai ngal maq noeq-ail. Thail hai ngaol-aoq, ngal khaq mao iqsanl nl nail teevq phaq neq, haoqnaol phao khe nl jel-ail ceevq-a nail juq bhai nioil peivq ail ceevq khi, sivtavq phao nl heeq phaq-ail jiav nail phaq bhai the kheel lai dai, lai jai nail ngaol. 14Ngal kovpavq al bhai ngal the kheel lai dai, lai jai nail ngaol. Kovpavq al neq, Miqyail Yeiqsul Khali bhai juq khi nqtavq kovtavq bhai aqdoevq ya doevq dai, ngaq bhai khul lavq-a nail phaq pevq nail ngaol.
15Neema thaq tsaol nail phao yovkav eeq lal-a nail ngadao juq neq, neema al hai thaq bhel. Niil nail lavqkhoel bhai nul juq-i mail noeq nail teevq phaq ga nav maq dul lai haq neq, ganl al juq Miqyail nul juq bhai phao daiq lavq nail ngaol. 16Ngadao juq-i mail khal the kheel-ai thaq nail juq bhai nieivq thaiq-ai thaq khi, daol coev dai nl dal laivq bhel.
17Aqivq jaqbheq juq-ol, ngal aqdoevq doevq nail khe-ai, nul juq iqsanl doevq yaoq. Ngaq bhai saol oil khi aqdoevq doevq nail tsaol-aq juq bhai hel daiq yaoq. 18Khul khi mail dai ngal-aq neq, jel lal-u phao, ngal nul juq bhai mee nia pov ge bhiq-a nail khe-ai, niil aq-il iqsanl maivbhil dov dov-ail gaoq ge lavq bhel. Khali nail lavqyavq bhai neejiav jiav nail tsaol-aq mao dai jaol nail ngaol. 19Tsaol-aq al juq neq, haoqnao nao saq n-gaol luq ail seil ail nail ngaol. Aqyu juq nail ovqmav neq, aqyu juq nail miqyail ngaol. Aqyu juq neq, haq sil heeq phaq-ail tsaq nail phaq bhai maq haq sil mail, neema eeq nail ngaol. Aqyu juq neq, miltsaq bhai tavq lai nail juq bhai taivq-ail saol-nvq nail ngaol. 20Ngadao neq, nqtavq bha tavq lai nail tsaol-aq ngaol. Hevq kovq nail gaq Heeqphaq Yeiqsul Khali al dao nee mail dov lee nail bhai, ngadao noeq thunq nail ngaol. 21Aivq neq, yaoq phaq yaoq-ao nee bhai aivq nail kov-uvq bhai bhi jaol bhi jiav-a nail bhaqaoq bhai juq khi, seiqleiq khaoqsail eeq dee dee nail aivq nail aqmaol khe-ai pevq lal dai, luq ail seil ail nia nail ngadao nail aqmaol bhai aqsivq lav phal lavq-a nail ngaol.
S'ha seleccionat:
Pillilpiv 3: aeu
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2016, Wycliffe Bible Translators, Inc. All rights reserved.