Romanos 6
6
Cristodeerãpa pꞌekꞌau kꞌachia oodaamaa pꞌanapata
1Parãdepemapa iidii: “Tachi Akꞌõrepa Cristode ijãapataarã pꞌekꞌau kꞌachia wẽe akꞌɨ bɨ pɨrã, ¿pꞌekꞌau kꞌachia waapɨara oodaipia bɨ–ekꞌã, mãgá Akꞌõrepa waapɨara tachi pia akꞌɨmerã?” 2¡Mãga–e! Cristode ijãadakꞌãri, tachi pꞌekꞌau kꞌachia ooyaa bɨ kꞌapꞌɨa piu pɨkꞌaji. Mãga bɨta, ¿sãga waapɨara pꞌekꞌau kꞌachia oodaima? 3¿Kꞌawada–e pꞌanɨkꞌã? Jesucristode ijãadakꞌãri, poro choopijida akꞌɨpidaitꞌee iru ome araa pꞌanɨ. Mãgá araa pꞌanadairã iru ome, iru piukꞌãri tachi pꞌekꞌau kꞌachia wẽpapiitꞌee, tachi jida aukꞌa piu pɨkꞌajida. 4Ma awara tachi ijãapataarãpa poro choopidakꞌãri mãgá akꞌɨpidaitꞌee tachi piu pɨkꞌadapꞌedaa Cristo ome, jaradai tachi aukꞌa ɨa pɨkꞌajida iru ome. Ichiaba jaradai Tachi Akꞌõre Waibɨapa tachi aukꞌa pꞌirabai pɨkꞌapiji iru pꞌirabaipidakꞌa, mãgá awara pꞌanapataadamerã irua kꞌinia bɨkꞌa.
5Cristo ome araa pꞌanɨ kꞌaurepa, tachi aukꞌa piu pɨkꞌajida pɨrã iru ome, mãgara aukꞌa pꞌirabaidaitꞌee mãikꞌaapa iru ome pꞌekꞌau kꞌachia wẽe pꞌanapataadaitꞌee, irua kꞌinia bɨkꞌa. 6Kꞌawa pꞌanɨ Cristode ijãadai naaweda pꞌekꞌau kꞌachia ooyaa pꞌanapachida. Mamĩda ijãadakꞌãri mãikꞌaapa araa pꞌaneedakꞌãri iru ome, ma pꞌekꞌau kꞌachia ooyaa bɨ kꞌapꞌɨa kurusode piu pɨkꞌaji iru kꞌapꞌɨa ome. Mãgá uchiajida ma pꞌekꞌau kꞌachia ooyaa bɨ kꞌapꞌɨa jua ekꞌariipa, waa tachimaa kꞌachia oopinaamerã. 7Tachi eperã kꞌapꞌɨa piukꞌãri, ne–inaa waa tachimaa oopi–e pai, pia wa kꞌachia. Mãga pɨkꞌa tachi pꞌekꞌau kꞌachia ooyaa bɨ kꞌapꞌɨa piu pɨkꞌakꞌãri Cristo kꞌapꞌɨa ome, ne–inaa kꞌachia waa tachimaa oopi–e pai. 8Tachi pꞌekꞌau kꞌachia ooyaa bɨ kꞌapꞌɨa mãgá piu pɨkꞌada perã Cristo kꞌapꞌɨa ome, ijãa pꞌanɨ Cristopa tachi kꞌaripaitꞌee pꞌanapataadamerã irua kꞌinia bɨkꞌa, aukꞌa pꞌirabai pɨkꞌadapꞌedaa perã iru ome. 9Tachi ijãapataarãpa kꞌawa pꞌanɨ Cristo piupꞌeda chokꞌai pꞌirabaida perã, waa piu–e paitꞌee. 10Piuda apai piuji pꞌekꞌau kꞌachia jõmaweda wẽpapiitꞌee. Ma piudakꞌãriipa ichita chokꞌai bapari ooitꞌee Akꞌõrepa oopi bɨkꞌa. 11Parã ichiaba mãgá pꞌanapataadaipia bɨ, parã pꞌekꞌau kꞌachia ooyaa bɨ kꞌapꞌɨa piu pɨkꞌada perã Jesucristo kꞌapꞌɨa ome. Mapa ichita iididaipia bɨ Jesucristomaa, irua parã kꞌaripamerã oodaitꞌee Tachi Akꞌõrepa kꞌinia bɨkꞌa. Mãgá ne–inaa kꞌachia oo amaadaipɨ.
12Oonáatɨ ma pꞌekꞌau kꞌachia ooyaa bɨ kꞌapꞌɨapa oopi kꞌinia bɨkꞌa parãmaa. Mãgɨ́ kꞌaurepa ne–inaa kꞌachia kꞌĩra tꞌãdoo oopata. Mamĩda ma kꞌapꞌɨa jõitꞌeepɨ. 13Ne–inaa kꞌachia oopináatɨ pãchi juamaa, bɨɨrɨmaa, itꞌaimaa, taumaa. Jĩpꞌa pãchi kꞌapꞌɨa bɨ́tɨ Tachi Akꞌõre jua ekꞌari, irua ne–inaa pia oopimerã ma kꞌapꞌɨamaa. Pꞌanapatáatɨ kꞌapꞌɨa chiwidi iru pꞌanɨkꞌa, parã aukꞌa pꞌirabai pɨkꞌadapꞌedaa perã Cristo ome, iru kꞌapꞌɨa chiwidi pꞌirabaikꞌãri. 14Mãga ooruta pɨrã, waa pꞌana kꞌiniada–e paitꞌee pãchia pꞌekꞌau kꞌachia ooyaa bɨ kꞌapꞌɨa jua ekꞌari. Cristopa parã uchiapidakꞌa Tachi Akꞌõre Ũraa pꞌãda jua ekꞌariipa, aukꞌa uchiapii ma kꞌachia ooyaa bɨ kꞌapꞌɨa jua ekꞌariipa. Mãgá Tachi Akꞌõrepa parã kꞌaripa kꞌinia bɨ, parã kꞌinia iru bapari perã.
Pɨ, kꞌai esclavo
15Parãdepemapa jarai: “Mãgara, Cristopa ooda kꞌaurepa ɨtꞌaa wãdaitꞌee pɨrã, oonaadáma Tachi Akꞌõre Ũraa pꞌãdade jara bɨkꞌa. Oodáma tachia oo kꞌiniata.” ¡Mãga–e! 16¿Kꞌawada–e pꞌanɨkꞌã esclavopa oopari chiparipa oopi bɨkꞌa? Ne–inaa kꞌachia oopiru pɨrã, kꞌachia oopari mãikꞌaapa kꞌachiade baaipari. Mãga pɨkꞌa bɨ parã pꞌekꞌau kꞌachia ooyaa bɨ kꞌapꞌɨa jua ekꞌari pꞌanadakꞌãri. Jõdee ma esclavo chiparipa chi esclavomaa ne–inaa pia oopiru pɨrã, pia oopari mãikꞌaapa chiparipa kꞌachia wẽe akꞌɨpari. Mãga pɨkꞌa bɨ Tachi Akꞌõre jua ekꞌari pꞌanadakꞌãri. Pɨ ¿kꞌai esclavoma; pꞌekꞌau kꞌachia ooyaa bɨ kꞌapꞌɨa esclavo wa Tachi Akꞌõre esclavo? 17Mɨa gracias jarapari Tachi Akꞌõremaa, ɨ̃rá irua oopiparikꞌa oo kꞌinia pꞌanadairã pãchi tꞌãripa. Mãga oo kꞌinia pꞌanɨ Tachi Akꞌõrepa pedee pia jara pëida Cristode ũridapꞌedaa perã iru mimiapataarã itꞌaideepa mãikꞌaapa irude ijãadapꞌedaa perã. 18Mãgá uchiajida ma pꞌekꞌau kꞌachia ooyaa bɨ kꞌapꞌɨa jua ekꞌariipa mãikꞌaapa Tachi Akꞌõre jua ekꞌari pꞌaneejida. 19(Nãgɨ́ jarateerude mɨa “esclavo” jara bɨ parãpa pipɨara kꞌawaadamerã kꞌãata mɨa jara kꞌinia bɨ.) Naaweda pãchi pꞌekꞌau kꞌachia ooyaa bɨ kꞌapꞌɨa jua ekꞌari esclavoorãkꞌa pꞌanapachida. Mamĩda ɨ̃rá pãchi kꞌapꞌɨamaa oopidaipia bɨ ne–inaa pia kꞌĩra tꞌãdoo, Tachi Akꞌõrepa kꞌiniata, ma–itꞌee Akꞌõrepa parã awara bɨda perã.
20Parã atꞌãri pãchi pꞌekꞌau kꞌachia ooyaa bɨ kꞌapꞌɨa jua ekꞌari esclavoorãkꞌa pꞌanadakꞌãri, ũridaamaa pꞌanapachida Akꞌõrepa oopi kꞌinia bada parãmaa. Jĩpꞌa oo kꞌinia pꞌanapachida kꞌachia beerãpa oopatakꞌa. 21¿Kꞌãare piata atajidama mãga pꞌanadapꞌedaa pari? Mãga pꞌanadapꞌedaa paara pãchi piurutamaa, atuakꞌajida kꞌachia beerã atuapatakꞌa. Ma awara ɨ̃rá ijãapata perã, kꞌĩra nejasia pꞌanɨ kꞌĩsiadakꞌãri ma kꞌachia oopatapꞌedaade. 22Mamĩda Tachi Akꞌõrepa parã ichideerã papiji mãikꞌaapa parã uchia ataji ma pꞌekꞌau kꞌachia jua ekꞌariipa, waa esclavoorãkꞌa pꞌananaadamerã. Ichia parã mãgá awara bɨda perã, ichia kꞌinia bɨkꞌa pꞌanapataadai mãikꞌaapa ɨtꞌaa wãdai pãchi jai–idaadakꞌãri. 23Wãara pꞌekꞌau kꞌachia oopataarã piudakꞌãri, atuadaitꞌee. Mamĩda Cristode ijãapataarã ɨtꞌaa wãdaitꞌee mãikꞌaapa ichita pꞌanapataadaitꞌee Tachi Waibɨa Jesucristo ome, Tachi Akꞌõrepa mãga kꞌinia bairã.
S'ha seleccionat:
Romanos 6: sjaB
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
©2005, 2010, 2015 Wycliffe Bible Translators, Inc. All rights reserved.