1 Korinto 13
13
1Anong un gway apfalinaꞌ an munhapit hi numpfino-ob-on an hapit chi takhu, wenno hapit chi angher, nu ma-id matikhaw hi pamhod u hana i-ibpfaꞌ an takhu ja unaꞌ amat hi khangha an homoꞌleng. 2Ja anong un gway apfalinaꞌ an mangpa-innila hana impa-innilan Apo Jos ay ha-in, ja anilaꞌ an amin anong un hana agkhuy empfaag Apo Jos hi uchumna, ja anong un otong hitay pammatiꞌ ta kayaꞌ an mangpaꞌ-igwin hachi pfuludna, muti ma-id matikhaw hi pamhod ay tay piꞌtakhuwaꞌ, ja ma-id chamchama herpfiꞌ. 3Ja anong un u pun-ichat an amin chi gwa ay ha-in hana napubli, ja apfulutoꞌ an mapalikhatan hitay achor u ta gway eh-ehnger u, muti nu agkhuy narpu hi pamhod ja ma-id oh-ohha hi lagpfuꞌ.
4Hini atikhan an gway pamhod ni ohan takhu ja na-anuh ja ma-uloy. Achi omaamoh ja achi mumpahija ja achi mumpa-akhaja. 5Ja achi na aton chi hay umipapfa-in, ja achi mumpapilit ay ni penhod na, ja achi mabmapfungot, ja achi na-uluꞌ. 6Hini gway pamhod na ja achi mun-an-anla nu gway napukhit hi ma-at, ti hay pun-an-anlaana ja hana magpong. 7Ja hini gway pamhod na, ja achi humikha an manganuhan hana aton chi takhu ay hija. Munchunu hana ibpfa na an takhu ja gway namnama na an pomhod hini peꞌ-at cha. Ja anong un napukhit hini aton cha ay hija, ja una an-anuhan.
8Hini pamhod ja achi mapogpog. Achi amat hana apfalinan an ichat ni Espiritu Santo, an amat ay ni aton an mumpadtu, ja hini apfalinan an munhapit hi natnat-on an hapit, ja hini panginnilaan hay hana penhod Apo Jos an ipa-innila, an mapogpog an amin hay hato. 9Ti hana anila ta-o ja gway tumunaana. Ja anong un hana nipadtu ja gway tumunaana. 10Nu umali hini ma-id akuchangana ja mapogpog an amin hay hato apfalinan.
11Amat chin a-ung-ungngaꞌ, an hana hapit u ja hapit chi ung-ungnga, ja amat hina khu hini atoꞌ an munnomnom. Muti ad ugwani an immilokhaꞌ ja tenaynaꞌ hana khun aton chi ung-ungungnga. 12Ja amat hina khu ay chita-o an namati, an agkhuy ta-o emmanapot ay ni panginnilaan ta-o ay ni omaꞌ-atan Apo Jos. Hay pannig ta-o ay hija ja amat ay ni angah an matikhaw hi na-uhpuwan an chagkhar. Muti umali han arkhaw an humango ta-o hot mattag hini pannig ta-o. Ay chuy an arkhaw ja ma-id mahpay akuchangan tay panginnilaaꞌ ay hija, ti un miꞌpadchung ay ni nanginnilaana ay ha-in.
13Hotti munchochodcha hitay tolo, an hini pammati, ja namnama, ja hini pamhod. Muti hini napfarpfalor ay cha tay an tolo ja hini pamhod.
S'ha seleccionat:
1 Korinto 13: ifu
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2004, Wycliffe Bible Translators, Inc. All rights reserved.