Amos 1
1
1Tibɔr ti Amos u ye upihkpaal ki nyan ni Tekoa aatiŋ ni na nan len na sɔ. Ŋibin ŋilee waahr aan kitiŋ nin deŋ na, n‑yoonn ngbaan le Usia nan ye Juda aabɔrkpaan aan Jehoas aajapɔɔn Jeroboam mu nan ye Israel aabɔrkpaan na, le Uwumbɔr nan kpiir Israel aatiŋ aabɔr timina mɔmɔk tuk Amos.
2Le Amos len ke,
“Uwumbɔr ŋuun ni Sionn Aajool paab ke uchinn na;
uneel tar mpɔɔn pu ke utaal le aah gbeer na, ki nyan ni Jerusalem aatiŋ ni.
Inaa aah ŋmɔ timoor nin chee na mɔmɔk kuur a,
le Kamel Aajool paab kuur ki mann ke lipeel aamoor na.”
Uwumbɔr aah ga ji Israel aamaantɔtiib tibɔr pu na
Siria aatiŋ yaab
3Uwumbɔr len ke, “Damaskus#1.3: Damaskus ye Siria aatiyil la. yaab aah tun titunwanbir n‑yoonn mɔmɔk pu na, kina le ga cha m sil daa bitafal. Bi ŋa Gilead yaab mbiin sakpen. 4Kina pu na, m ga cha mmii wu ubɔrkpaan Hasael aabɔrdichal, ki see ubɔrkpaan Ben‑Hadad aadichal ŋi fɔk ki pɔɔ na mɔmɔk mmii. 5M ga gbaa wii Damaskus aatiŋ aabisamɔi mɔmɔk, le ki jenn nyan Afenn#1.5: Afenn aatataa ye “mbiin” la. Aafataŋ ni aanib ni Bef Edenn aayidaan. Le bi ga chur Siria aanib mɔmɔk tinaagbiir ki di bi buen Kir aatiŋ ni.”
Filistia aatiŋ yaab
6Uwumbɔr ki len ke, “Filistia yaab Gasa aatiŋ aah tun titunwanbir n‑yoonn mɔmɔk pu na, kina le ga cha m sil daa bitafal. Bi ŋa litimbol mɔln aanib mbiin ki di bi kooh tii Edom yaab. 7Kina pu na, m ga cha mmii wu Gasa aatiŋ aagon, ni kaadichal ŋi fɔk ki pɔɔ aan bi maa kiir bibaa na mɔmɔk. 8M ga chuu nyan Filistia yaab aatim Asdod ni Askelonn aayidam. M ga daa baatiŋ Ekronn aanib aatafal, le Filistia yaab bi mɔmɔk gur na ga kpoi.”
Taya aatiŋ yaab
9Uwumbɔr ki len ke, “Taya aatiŋ aanib aah tun titunwanbir n‑yoonn mɔmɔk pu na, kina le ga cha m sil daa bitafal. Bi ŋa ntimɔln aanib mbiin ki di bi kooh tii Edom yaab, kaa joo limaantɔl aajɔtiik ki bi nan puu tii tɔb na. 10Kina pu na, m ga cha mmii wu Taya aatiŋ aagon, ni kaadichal ŋi fɔk ki pɔɔ aan bi maa kiir bibaa na mɔmɔk.”
Edom aatiŋ yaab
11Uwumbɔr ki len ke, “Edom yaab aah tun titunwanbir n‑yoonn mɔmɔk pu na, le ga cha m sil daa bitafal. Bi tee mban ki ban bi ŋa binaabitiib Israel yaab#1.11: Edom yaab ni Israel yaab mu aayaaja nan ye Jakob la. mbiin ki ku bi, kaa san bi kinimbaak. Baaŋuul pɔɔ kaa sɔŋni kpala. 12Kina pu na, m ga cha mmii wu baatiŋ Temann aagon, ni baatiŋ Bosra aadichal ŋi fɔk ki pɔɔ aan bi maa kiir bibaa na mɔmɔk.”
Amonn aatiŋ yaab
13Uwumbɔr ki len ke, “Amonn yaab aah tun titunwanbir n‑yoonn mɔmɔk pu na, kina le ga cha m sil daa bitafal. Baah nan jaa kijaak ki ban ntim bi kpee baatiŋ pu na, bi nan ŋa Gilead yaab mbiin pam ki saa gber baapudam aapuu ki nyan mbipɔm. 14Kina pu na, m ga cha mmii wu baatiyil Raba aagon, ni baah maa ŋidichal ŋi fɔk ki pɔɔ kiir bibaa na mɔmɔk. Le bundaal butɔb ga fii na, iwiil ga li bi liyaadaal ngbaan, le kijaak ngbaan ga li pɔɔ ke kitaabuŋ na. 15Le baadim ga di baabɔrkpaan ni waaninkpiib buen tinaagbiir ni.”
S'ha seleccionat:
Amos 1: xonB
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
©1998, 2014 Wycliffe Bible Translators, Inc. All rights reserved.