San Mateo 4
4
Dosãtau Jesús khũgur auju ẽkhatarr
(Mr. 1:12-13; Lc. 4:1-13)
1Maimua ich Ẽwandam Akharaupai Jesús warp õor chukag chʉʉi warrjim aajem, ich garmua mepeer podju khaphʉ sĩerr aawai juau ogthom mam chi dosãtag ich khũgur auju ẽkhapieg. 2Mam ich appai cuarenta días y cuarenta noches bʉ̃ʉrjã thach khoba chirajim aajem. Maimua khãai khapan mag dichdimaawaita, i iek i jãsoo aadejim aajem. 3Magbaadem eeta dosãt chi dau lok beejim anaabá, i imeerkha i khũgur auwia Jooi dau na nem khaigbam waupiju ẽkhaag. Mag beewi irig, —Pʉ chadcha Ẽwandam Iewaa khai, magan mʉ dakhĩir mokdau mʉg thʉnʉm panag paabapʉi aichejim anʉm.
4Pari ichig magbaicheewai jũrr ichdeu chi dosãtag, —Ẽwandam iek phã sim gaai jaauwai, “Sĩi thach khoju appai khap amkhĩir irua maach ompaabajim” a sim. “Irua maach ompaatarran, thach appai khĩirjuju khãai, ich ipierraa wenʉrramkhĩirta maach ompaajim” a phã sim a chirajim aajem irig.
5Mag ijẽjẽb naawi, chi dosãtagta Ẽwandam Akharau ʉdʉraa Jesús arrpijim aajem, Jerusalenag. Mag athaadewi, Aai i jeeujem diheu ʉ̃r ʉ̃gthaa arrnaa, 6irig magjim anaabma, chi dosãtau:
—Pʉ chadcha Ẽwandam Iewaa khai, magan mʉg ee baubaad ajim anʉm. Pʉ chig aba khabahab. Ẽwandam iek phã sim gaai, “Ich Ẽwandamau ich chognaan pʉiju” a sĩebahab ajim anʉm, “pʉ thʉa wenʉrramkhĩir.” Maagwai mʉg ee pʉ baudʉkhiinjã, “amau sĩi amach jua eeta pʉ jãau aubajup, buju aimaau pʉ chig am ugua.” ¡Baubaad! ajim anʉm, chi dosãtau irig.
7Magbaawaita jũrr ichdeu chi dosãtag, —Ĩchab Ẽwandam iek phã sim gaai jaauwaijã, “Ẽwandamau chadcha pãach thʉaju awi oob nem parhoob amiet” a sĩebahab a chirajim aajem irua.
8Maimua ãbmiecha paawai deeu chi dosãtaupai durr pooma sim gaai i arrjim aajem. Mag durrsĩ gaaimua dawaa durr warpham magwe thum ag gaai nem thʉnʉm dʉi irig oopinaa, 9—Pua mʉ bʉkhʉrr phõbkhanaa mʉrʉgta Ẽwandamagamjo jeeumʉn, ar pʉchdeu nem oo sim thumaa mua pʉrʉgta deejugui ajim anaabá, chi dosãt garmua.
10Mamʉ mag nʉʉ paawaita Jesuu irig, —Ẽwandam iek phã sim gaai jaauwai, “Pãar Poron Ẽwandamau; ãba irigpaita jeeubat, maimua ãba i iekpaita ipierraa abat” a sim. Magnaa mag sĩebnaa pʉdeu pʉchta jopkhaa mʉ aigmua sĩiubaad a chirajim aajem irua.
Mag, bʉ̃ʉrjã i ipierraa abajim anaabá Jesuu.
11Magbaawain chadau chi dosãt sĩiubaadeewai i iek ich appai chirsijim aajem. Mag ich appai aadeewai Ẽwandam chognaanauta ʉ̃gtharmua beewi ʉu i khĩir jãsenkha naaichejim aajem.
Jesuu warrpem Galilea durr Ẽwandam iek jaaubaaderr
(Mr. 1:14-15; Lc. 4:14-15)
12Juan chi õor por choomie ya cárcel deg phãar wai nʉm a ũrbaadeewai, Jesús Galileaag majim aajem. 13Pari ich bãautarr phobor Nazaret eepai sĩeba, warag Capernaumag petajim aajem, thʉrrdo igaau joobaan, warrgar maach jooin Zabulonnaan Neftalinaan dʉi joobaajerr durr. 14Pari mag i mam matarran, Ẽwandam i jaaumie Isaías khararrau phã pʉarr eyaa obermkhĩir ajim. Mag irua phã pʉarr gaai mag sim:
15“Zabulonnaan joobaajerr perás maimua Neftalinaan joobaajerr perasta õor peerdʉju woun nʉrraju” a sim, “Jordán igaau thoom igar, phũas igaau, maimua khĩeb Galilea ee judionaan khabam khʉʉn joobaajem aram magwe.
16Magbaawain sĩi khĩ thʉnʉm ee naajerr khʉʉn aarta õt bʉ arar aimamjota aju.
Peerdʉju khaugba aawai pod ʉ̃gthar oberbaju aajerr khʉʉn atheeta edau aardʉbaademjota aju.” (Is. 9:1-2)
17Magtarr aigmua Jesuu ich Aai i jajawagmamua, “Pãach khaibag isegwia, Ẽwandamagta chugpaapi jeeubat, maimua irigta ʉdʉraa pãach Porkhapibat” aajeejim aajem õrag.
Do ʉamien jayap Jesuu ich dʉi phe arrtarr
(Mr. 1:16-20; Lc. 5:1-11)
18Biek ãb Jesús thʉrrdo Galilea igaau nʉrrʉmua, õor numí ooimajim aajem. Makhʉʉn khod ãbam khʉʉn ajim: aaijã ãba, ãdjã ãba. Am thʉ̃r, ãb Simón ajim, ich mapai ĩchab Pedro a thʉ̃r sĩejim. Maagwai ãbakhai Andrés a thʉ̃r sĩejim. Amach do ʉamien arr aawai, irua ooimaawai, atarraai bar khodjorrajim aajem. 19Mag oobaimaawai Jesuu amag, —Mʉ dʉi wettarrau ajim anʉm. Ich jãg pãach mʉg sĩi do ʉa gaaipai nʉmjo, mʉg atag jũrr mʉ iek õrag jaau gaaipaita nʉisijugui ajim anʉm amag.
20Magbaawai amach atarraai phepʉawi chadcha i dʉi ereubaadejim aajem.
21Maimua mag Galilea igaau mamua ag atag deeu ũwaai õor numí ooimajim aajem, agjo ãbam khodpai. Makhʉʉn Santiago ajim aajem Juan dʉi, jooi Zebedeo chaain. Makhʉʉnjã do ʉamien arr aawai, irua ooimaawai, amach red thʉrrdʉ sĩsidʉmta kha naajim aajem, bote ee amach aai dʉi. Mag oobaimaa, makhʉʉnagjã Jesuu, 22“Mʉ dʉi wettarrau” abarm bʉrre sĩi amach redjã khaugba, bote dʉi amach ayag pʉawi i dʉi wetjim aajem.
Õor pom thʉnʉmʉg Jesuu maach peerdʉajem iek jaautarr
(Lc. 6:17-19)
23Mag nʉrrʉmua Galilea igaau Jesuu jaau phʉʉrdʉ nʉrraajeejim aajem, phobordam khekhedʉm ee judionaan Ẽwandam iek jaaujem di sĩsidʉmpierr. Mag jaau nʉrrʉmʉn maach peerdʉajem iekta jaaunaa ĩchab Ẽwandamagta dich Porkhapiju aai nʉm aajeejim aajem. Mag nʉm dʉi õor amach khamor machagpierr ich aig wai bee nʉmʉn monaaupʉinaa sĩi kha mamachdogpa chugpaapʉi maajeejim anaabá. 24Siria durram magwe Jesús mag nʉrrʉmʉn bĩi wejorr aawai, õor khamor machag khĩirpierram khʉʉnta i aig waibeejeejim anaabá: sĩi khajapham khamor machag paraam khʉʉn, kha mamachdog paraam khʉʉn, dosãt ben paraam khʉʉn, por benmie paraam khʉʉn maimua bʉ wa jua khãijã jʉserm khʉʉnpa waibeemamʉn, Jesuu monaaupʉi maajeejim anaabá. 25Õor pooma Galilea durram khʉʉn, Decápolis durr phobor nʉnʉidʉm eem khʉʉn, Jerusalenpien, Judea durram khʉʉn maimua Jordán i atag ed obeerjem garm khʉʉnpa Jesús ẽudee pos aajeejim aajem.
S'ha seleccionat:
San Mateo 4: noaA
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2011, Wycliffe Bible Translators, Inc. All rights reserved.