Versets bíblics populars de Eksodosy 32

Comparteix

ARY rehefa hitan’ny olona fa efa ela ka tsy mbola nidina avy tao an-tendrombohitra ihany Mosesy, dia niangona ho eo amin’i Arona izy ka nanao taminy hoe: Mitsangàna, ka anaovy andriamanitra izahay, hitarika antsika eo aloha; fa ilay Mosesy iny, izay lehilahy nitondra antsika niakatra avy tany amin’ny tany Egypta, dia tsy fantatray izay nanjo azy.

Ary hoy Jehovah tamin’i Mosesy: Mandehana midina hianao; fa efa nanao ratsy ny olonao izay nentinao niakatra avy tany amin’ny tany Egypta. Nalaky nivily niala amin’ny làlana izay nasaiko nalehany izy ka efa nanao ombilahy kely an-idina ho azy; ary efa niankohoka teo anatrehany sy namono zavatra hatao fanatitra taminy izy ka nanao hoe: Io no andriamanitrao, ry Isiraely, izay nitondra anao niakatra avy tany amin’ny tany Egypta.

Ary raha hitan’i Arona izany, dia nanao alitara teo anoloany izy; ary dia niantso Arona ka nanao hoe: Andro firavoravoana ho an’i Jehovah rahampitso. Dia nifoha maraina koa ny olona ka nanatitra fanatitra odorana sy nitondra fanati-pihavanana; ary nipetraka hihinana sy hisotro ny olona, dia nitsangana hilalao.

ARY nony maraina dia hoy Mosesy tamin’ny olona: Efa nanao fahotana lehibe hianareo; ary ankehitriny, dia hiakatra ho ao amin’i Jehovah aho, fa angamba hahazo manao fanavotana ny amin’ny fahotanareo.