Versets bíblics populars de Lako Yani 32

Comparteix

Ni ra sa raica na tamata ni sa rui berabera na nona lako sobu mai na ulunivanua o Mosese, era a soqoni vata yani vei Eroni ka kaya vua, “Eda sa sega ni kila na ka sa yaco vei Mosese, o koya ka kauti keda tani mai Ijipita; mo bulia mada kina vei keda e dua na kalou me liutaki keda.”

Sa qai kaya vei Mosese o Jiova, “Mo vakatotolo ka lesu sobu tale, baleta ni ra sa cakava na i tovo vakasisila ka vakanadakui au o ira na nomu tamata, o ira o sa liutaki ira tani mai Ijipita. Era sa gole tani vakasauri mai na sala au a vakarota vei ira me ra muria: era sa bulia e dua na luve ni bulumakau ka caka ena koula sa vakawaicalataki ka cuva kina, ka vakacaboisoro talega kina. Era sa tukuna tiko ni sai koya oqo na nodra kalou ka kauti ira tani mai Ijipita.

Ni sa raica na ka oqo o Eroni, sa qai cakava e dua na i cabocabonisoro ena mata ni luve ni bulumakau koula. A sa qai kacivaka yani, “Ena vakayacori ni mataka e dua na solevu me vakarokorokotaki kina o Jiova.” Ena kida ni mataka ka tarava, era sa kauta mai eso na manumanu me vakacabori me i soro kama kei na i soro ni veivinakati. Era sa qai dabe sobu na tamata me ra kana ka gunu, ka la'ki tini sara ena mateni kei na ka vakasisila ni veidauci.

Ena siga ka tarava, a qai kaya vei ira na tamata o Mosese, “O ni sa vakayacora e dua na i valavala ca levu. Ia au sa na cabe cake tale vei Jiova; de dua au na rawa ni kerea na veivosoti ena vuku ni nomuni valavala ca.