Versets bíblics populars de Juan 14

Comparteix

De'oye pa'iyere mësarute i̱sicani saiyë. Yë'ë de'oye pa'iyere i̱siyë, mësarute. Iye yeja pa̱i de'oye pa'iye a'ë cajë i̱siyeje̱ pa'yere i̱sima'ë pa'iyë. Ca'rama'pë pa'ijë̱'ë, cui'ne co'a ju̱'ima'pë pa'ijë̱'ë.

Caquëna, Jesupi capi: “Yë'ë a'ë, ma'a cui'ne yë'ë a'ë, nuñerepa cui'ne yë'ë a'ë, pa'iye. Yë'ëja̱'a ti̱'añe pa'iji, ja'quëre. Peoji, yequëre ti̱'añe.

Ai co'a ju̱'ima'pë pa'ijë̱'ë. Diusuni necaiquë api cuasajë pa'ijë̱'ë. Cui'ne yë'ëreje̱ necaiquë api cuasajë̱'ë.

Ja̱je pa'iquëta'are de'o joyopi ja'quë yë'ë mami do'ire jëjo daoja̱'quë api. Ja̱ëpi mësarute co̱cai cui'ne oicohua'i pa'ijëna, yëhuoja̱'quë api, si'aye ye'yaquë. Cui'ne si'aye yë'ë case'ere cuasa ñajaiñe necaija̱'quë api.

Ta̱'ñe asaquëpi cui'ne yë'ë cua̱ñese'e sehuoquë yo'oquëpi, yë'ëre oiye i̱ñoji. Ja̱je pa'ina, yë'ë ja'quëpi i̱teje̱ oija̱'quë api. Oina, yë'ëje̱ i̱te oija̱'quë a'ë. Ja̱je oi yë'ëpi i̱na tsio dani yë'ëse'e i̱ñoja'quë a'ë.”

Mësaru ja̱'re si'anë pa'ija̱'quëre yequëre jëjo daojë̱'ë caquë ja'quëre se̱si'i, mësarute co̱cai cui'ne quëcoye necaija̱'quëre. Ja̱ë cato nuñerepa ca joyo pa'ija̱'quë api. Iye yeja pa̱i ja̱ëte pa ti̱'añe peoji, i̱te ñama'cohua'i cui'ne i̱te asama'cohua'i. Ja̱je pa'iquëta'are mësaru cato asayë, i̱te. Cui'ne i̱pi mësaru ja̱'re pa'iji. Pa'isiquëpi ti mësaru ja̱'re pani huesëja̱'quë api.

Mësarupi yë'ë mamina cajë se̱to yë'ëpi yo'oja̱'quë a'ë. Mamaquëpi pëca ja'quë de'oquërepa pa'iyere i̱ñoja'quë caquë. Yë'ë mamina cajë se̱jëna, yë'ëpi yo'oja̱'quë a'ë, si'aye mësaru yëjë se̱ñe pa'ito.

Mësarupi yë'ëre oicohua'i pani yë'ë cua̱ñese'ere sehuocaijë̱'ë.

Ja'quë ma'tëmo huë'e cato jaiye pa'iji, pa'i hue̱'ña. Ja̱je pa'ima'co pa'ito, yë'ëpi mësarute tsoe quëara'huë. Ja̱je pa'iye sëte yure cato saiyë, mësaru pa'ija̱'to ne de'huacasi'i caquë.

Saisiquëpi pa'i hue̱'ña ne de'hua tëjini ja̱ maca co'i co̱ja'quë a'ë, mësarute sasi'i caquë. Saëna, mësaruje̱ yë'ë pa'i hue̱'ñare pa'ija̱jë caquë.

Caquëna, Tomáspi capi: “Ëjaë, yëquë huesëyë, më'ë sai hue̱'ña. ¿Me më'ë saija̱'a ma'aje asaye'ni?”