Versets bíblics populars de Tiago 1

Comparteix

Inh kanhkã', ãjag tỹ Jesus tugrĩn nén ũ jagy ve kỹ to vẽnhmỹ nỹtĩ tũg nĩ. Mỹ sér nỹtĩm nĩ. Topẽ tỹ ãjag tỹ ti ki rã há han ja ve sór vẽ, hã kỹ ãjag tóg tag kar vég tĩ. Kỹ ti tovãnh sór tũg nĩ, kỹ ãjag tóg ti to tar nỹtĩnh mũ, ãjag tỹ nén ũ jagy vég mũ ra ti tovãnh tũ nĩn kỹ.

Ãjag tỹ nén ũ to jykrén tũ nĩn kỹ Topẽ mỹ to vĩm nĩ, ti tỹ ãjag kanhrãn jé. Ẽg kanhrãn jé tóg ke mũ. To tóg: “han ke tũ inh nĩ,” henh ke tũ nĩ. Ẽg to tóg fe há nĩ, hã kỹ tóg ẽg kanhrãn tag to há nĩ.

Inh kanhkã', tag to jykrén mág nĩ. Ũ tỹ nén ũ há kãmén kỹ jẽmẽ há han nĩ. Kãnhmar vĩ tũg nĩ. Kãnhmar jũ tũg nĩ gé.

Ãjag tỹ nén ũ jagy vég mũ ra to tar nỹtĩm nĩ, ãjag tỹ komẽr hã há nỹtĩ jé, Topẽ jykre ki króm há han kỹ. Komẽr hã ãjag tóg kygnẽnh ke tũ nĩ, nén ũ kar ki, ãjag tỹ ti to krónh ke tũ nĩ kỹ.

Kỹ Topẽ vĩ han kỹ nỹtĩm nĩ. Ãjag tỹ mẽg mũ ra ki króm tũ nĩn kỹ ãjag tóg krenkren ke tũ nĩ. Ón kỹ ãjag tóg: “kren jé sóg ke mũ,” henh ke mũ.

Kejẽn ũ tóg Jesus tugrĩn ẽg to jũ nĩ. Ẽg tỹ hã ra Topẽ tovãnh tũ nĩn kỹ tóg há tĩ. Kỹ ẽg Senhor tóg ẽg mỹ ẽg rĩr krỹg ja tũ ven ke mũ. Kỹ tóg ũ tỹ carreira ki ka féj tỹ coroa gỹjỹ he mũ ẽn ri ke nĩ sir. Ẽg Senhor vỹ ẽg mỹ: “rĩr krỹg ja tũ ve jé ãjag tóg ke mũ, ãjag tỹ iso há nỹtĩn kỹ,” he ja nĩgtĩ.

Topẽ hã ne ti pin kỹ ẽg mỹ nén ũ há kar han tĩ'. Nén ũ há tãvĩ han tóg tĩ, ẽprã ke ag mỹ. Ti hã tóg jẽngrẽ han'. Rã tỹ ẽg pũn tũ nĩn kỹ tóg fẽnja tĩ. Hã ra Topẽ tóg ge tũ nĩgtĩ. Ti pijé kejẽn ẽg ki rĩr tũ nĩgtĩ'. Ẽg ki rĩr tóg nĩ nĩ mỹr.

Ẽg tỹ mẽg mũ ra ki króm tũ nĩn kỹ ẽg tóg tag ri ke nỹtĩ, ha mẽ. Kejẽn ũ tóg vẽnh vég mũ, ki vẽnh ve jafãn ki. Kỹ tóg ti kakã vég mũ sir. Ve kar kỹ tóg to jykrén mãn tũ nĩ. Kỹ tóg ki kagtĩg' he mũ. Kỹ tóg fagrĩnh mỹ vẽnh ven ja nĩ sir. Ge ẽg nỹtĩ, ẽg tỹ Topẽ vĩ mẽg mũ ra ki króm tũ nĩn kỹ. Kỹ ẽg tóg fagrĩnh mỹ mẽ ja nĩ sir.

Ẽg tỹ ẽg jóg tỹ Topẽ to há nỹtĩn kỹ, kỹ ẽg tóg tag han ke mũ, ha mẽ: ũn panh ter mũ kar jagãgtãn kãn jé ẽg tóg ke mũ, ũn mén ter ja fag ke gé, ũn jagtar fag. Kỹ ẽg tóg nén ũ vẽnhmỹ han ke tũ nĩ gé sir. Topẽ kato tẽ mũ ag jykre han ke tũ ẽg tóg nĩ gé. Kỹ ẽg tóg ti mỹ kavéj tũ nỹtĩ sir.

Ãjag tỹ Topẽ vĩ mranh sór kỹ to: “Topẽ vỹ inh krĩn, sỹ ti vĩ mranh jé,” he tũg nĩ. Topẽ pijé vẽjykre pãno han tĩ'. Kỹ tóg ẽg krĩn kónãn tũ nĩgtĩ gé. Ẽg tỹ Topẽ vĩ mranh sór kỹn ge nĩ, ha mẽ: ẽg mỹ tóg há nĩ ve nĩ, kỹ ẽg tóg to én tĩ.

Ẽg Senhor tỹ Jesus mré ke ũ ag tóg jagtar nỹtĩ. Hã ra ag tóg ẽg Senhor ki ge kỹ nỹtĩn kỹ ũn riko ri ke nỹtĩ, ag tỹ tỹ Topẽ krẽ nỹtĩn kỹ. Kỹ tag to jykrén nĩ, ãjag mỹ sér tĩ jé.