Versets bíblics populars de Hebreu 12

Comparteix

Ha vé, ũ tỹ ẽg jo Topẽ tovãnh tũ ag vỹ e tãvĩ nỹtĩ. Ẽg pénĩn ag e nỹtĩ, ẽg ve kỹ. Kỹ tóg há tĩ, ẽg tỹ Topẽ japry jagma mũ há han ke ti. Ẽg tỹ corrida han ri ke ti nĩ. Ẽg tỹ tỹ vaj kỹ corrida han ken kỹ ẽg tóg ũri vẽnhkán há han ke mũ. “Ne nỹ isar han mũ, corrida to?“ he ẽg tóg tĩ. Ẽg tỹ nén han ke mũ ẽn tovãnh ẽg tóg tĩ, Topẽ jykre ri ke ti nĩ, tag ti. “Tag mỹ Topẽ to isar han mũ vỹ?“ hem nĩ, ãjag tỹ nén han ke mũ ẽn kar to. Jesus hã mĩ ẽkrén nĩ. Ti hã vỹ ẽg tỹ Topẽ ki rã han. Kỹ tóg ẽg tỹ ti tovãnh ke tũ han ẽn ki kanhró nĩ gé. Krunh to sa kỹ tóg ter mỹr. Ag tỹ ti to é he mũ ra tóg ti mỹ tỹ nén ũ tũ tĩ. Ti tỹ kar kỹ nén venh ke ẽn mĩ tóg ẽkrén ja nĩ, nén tỹ ti mỹ sér nĩnh ke ẽn mĩ. Hã kỹ tóg ũri Topẽ pẽgja tá nĩ nĩ.

Ti tỹ ẽg mrãnmrãn ẽn kã tóg ẽg mỹ sér tũ tĩ ver. Ẽn kã tóg ẽg mỹ jagy tĩ. Kar kỹ ẽg tóg vãhã vég tĩ, ti há nĩ ja ti. Kỹ ẽg tóg vẽjykre há han ẽn ki kanhrãn mũ sir. Jagnẽ krĩ kuprãg ki ẽg kanhrãn mũ gé sir.

Vẽnh kar mré vẽjykre kuryj han sórm nĩ. Kỹ Topẽ vĩ han kỹ kygnẽ sór tũg nĩ. Ẽg tỹ tag to vãsãn tũ nĩn kỹ ẽg pijé ẽg jóg mág venh ke mũ'.

Jesus mĩ ẽkrén nĩ. Ẽprã ke kar ag vỹ ti kato vĩ ja nĩgtĩ, ũ tỹ Topẽ vĩ mranh mũgtĩ ẽn ag. Ge ra tóg Topẽ to krónh ke ja tũ nĩgtĩ. Ti ki ẽkrén kỹ to krónh krónh ke tũg nĩ. To: “ron inh mũ,” he tũg nĩ gé.

Kỹ tóg há tĩ, ẽg tỹ Topẽ mỹ: “há ti nĩ, ã tỹ ẽg mỹ nén han mũ ti,” hen kỹ. Ẽg jamã tãg vỹ inhhã ragra kenh ke tũ pẽ nĩ. Kỹ tóg há nĩnh mũ gé, ẽg tỹ Topẽ rãnhrãj han há han kỹ, ti tỹ ti mỹ sér tĩ jé.

Hã kỹ ti tỹ ãjag mrãnmrãn tag to tar nỹtĩm nĩ. Ãjag kanhrãn jé ke vẽ. Topẽ tỹ ãjag mỹ: “inh krẽ,” he vẽ. Ẽg panh vỹ ẽg mrãnmrãn kỹ ẽg kanhrãn ja nĩgtĩ gé. Vẽnh kar jykren hã vẽ. Topẽ vỹ ti krẽ mrãnmrãn kỹ ag kanhrãn tĩ, ẽg kar.

Kỹ Topẽ vỹ pĩ tỹ nén ũ kar kugprũg mũ ri ke nĩ.

Kỹ ẽg panh tóg ẽg to ti jykre fi ja nĩgtĩ. To jykrén kỹ tóg ẽg mrãnmrãn tĩ kejẽn, ẽg sĩn kã. Kejẽn tóg ti tỹ kygnẽ kỹ nĩ ra ẽg kanhrãn sór tĩ gé. Hã ra Topẽ tỹ ẽg mrãnmrãn kỹ tóg to jykrén há han tĩ inhhã. Ti tỹ ẽg kanhrãn há han sór vẽ, ẽg tỹ ti ri ke há tãvĩ nỹtĩ jé.

Ha vé, Topẽ vĩ mranh tũg nĩ. Ãjag tỹ ti vĩ mranh sór mũ tag kato vãsãnsãn nĩ, ke tũ nĩ mũ ra ãjag tóg to ter ke mũ.