Versets bíblics populars de Colossos 2

Comparteix

Ha vé, Jesus Cristo ki ge kỹ ãjag nỹtĩ, ẽg Senhor ki. Kỹ ti jykre hã han nĩ. Ti hã vỹ ẽg mỹ ga ri ke nĩ. Ti ki jãre han nĩ, ka jãre ẽn ri ke. Ti ki ge tovãnh tũg nĩ. Tag hã mẽ ãjag, ãjag tỹ ti vĩ mẽ vén kỹ. Kỹ to tar nỹtĩm nĩ, Topẽ mỹ vẽnh vĩ há tó kỹ.

Ha vé, vẽso jykrén. Inh mỹ tóg ũ tỹ ón kỹ ãjag krĩn kónãn sór ha mẽ tĩ. Ũ tóg krĩg tãn tó tĩ. Ũ tóg nén ũ tãn tó tĩ gé. Kỹ ũ tóg ẽprã ke jykre tó tĩ gé. Cristo jykre tũ vẽ, ẽprã ke jykre kar ti. Hã kỹ ũ tỹ ãjag mỹ tag tó sór mũ ag vĩ jẽmẽ tũg nĩ.

Vãsỹ ãjag tóg vẽser ri ke ja nỹtĩgtĩ, ãjag tỹ ti vĩ mranh tugrĩn. Hã ra Cristo tóg ãjag rĩn mãn ja nĩgtĩ, Topẽ mré hã. Ãjag mỹ tóg hur vẽnh pãte fón, ãjag tỹ vẽjykre kórég han ja ẽn ti tỹ. Ẽg név rá ẽn tỹ tóg tũ' hé huri, ẽg mỹ. Rán kỹ tóg nĩ ja nĩgtĩ, hã vỹ: ẽg tỹ ti vĩ mranh, he mũ. Tag to tóg ẽg to jũ ja nĩ vẽ. Hã ra Cristo tóg tỹ tũ' hé. Krunh to tóg ti sa, ẽg név ti. Kỹ tóg tỹ tũ' hé. Kajãm kãn tóg huri.

Cristo vỹ tỹ nén ũ kar kri ke nĩ. Pã'i kar kri ke vỹ tỹ ti nĩ. Ti fár vỹ ẽg ri ke ja nĩgtĩ, ti tỹ ga kri tĩ mũn kã. Hã ra tóg tỹ Topẽ jẽ nĩ, ti fár kã kã. Topẽ pẽ hã vẽ sir. Kỹ ãjag tóg ãjag tỹ ti ki ge kỹ há tãvĩ nỹtĩ gé sir.

Kỹ ũ tỹ vẽjẽn há to ãjag mỹ: “ã tỹ tag kon kỹ Topẽ tóg ã to jũnh mũ,” hen kỹ hã ra kri nĩm tũg nĩ. Kurã kórég tó sór ag tóg tĩ gé, fénhta kar, kysã sa tãg ke gé, vẽnh kán ke kurã ke gé. Vãsỹ ke ja vẽ, vẽjykre tag. Cristo kãtĩg ke jo ke ja vẽ. Cristo kãtĩg kỹ ẽg tóg vẽjykre tãg vég nỹtĩ ha.