Versets bíblics populars de Han Kãme 1

Comparteix

“Hã ra Topẽ kuprĩg vỹ tỹ ãjag jagrẽ nĩnh ke mũ. Kỹ ti hã vỹ ãjag tar han ke mũ, ãjag tỹ inh kãmén jé. Jerusalém tá ãjag tóg inh kãmén ke mũ, ga tỹ Judéia tá ke gé, ga tỹ Samaria tá ke gé, ga fyn ja tá hã ke gé mỹr,” he tóg, Jesus ti.

Hã ra tóg ag mỹ: “vó, Topẽ hã vỹ ki kanhró nĩ. Ãjag tũ pijé',” he mũ. “Kurã ẽn ki kanhrãn ke tũ ãjag tóg nĩ, Topẽ tỹ ãjag pã'i mág fẽg mãn ke kurã ti,” he tóg.

Kejẽn tóg ag mré nĩ nĩ. Kỹ tóg ag mỹ: “ver Jerusalém tá kãpa tũg nĩ,” he mũ. “Tá nỹtĩ kỹ Topẽ tỹ ãjag mỹ nén tó ja jãvãnh nĩ, isỹ ãjag mỹ nén tó ja ẽn ti,” he tóg. “João vỹ goj tỹ ẽg kygpe ja nĩgtĩ,” he tóg. “Hã ra ãjag tóg kãnhmar Topẽ kuprĩg tỹ jagrẽ nỹtĩnh ke mũ. Sỹ ãjag kygpenh ken hã vẽ,” he tóg, Jesus ti.

Ti ter kar kỹ Jesus tóg ag mỹ vẽnh ven tỹ hẽn ri ke han ja nĩ, kurã tỹ 40 (ke) ki, ti tỹ ũn kuprẽg ja ẽn ag mỹ. Ag tỹ ti ve kỹ ti mré vẽmén kỹ ag tóg ti rĩr jẽ ki kanhrãn mũ, apóstolo ag. Ag mỹ tóg Topẽ tỹ tỹ ẽg pã'i nĩ kãmén mũ.

Ti tỹ tag tó kar kỹ tóg vãhã kynhmỹ tãpry mũ sir ag rĩnve, kỹ kanhkã góg vỹ ti kri rũm ke mũ sir, ti ve mãn tũ ag tóg nĩ sir.

Kỹ ag tóg kanhkã tugnỹm mũ, ag tỹ ti tĩg ven kỹ. Hã ra vãhã ũn régre ag tóg tá nỹtĩ, kur kupri rĩnh kỹ. Topẽ tỹ jẽgnẽ jafã ag vẽ. Kỹ ag tóg ag mỹ: “ha vé,” he mũ. “Ãjag ne tóg kanhkã tá ẽvãnh nỹtĩ nĩ'. Jesus vỹ vỹn kenh ke mũ. Ti tĩg ja ẽn ri ke han jé tóg ke mũ. Ti tỹ kanhkã ra tãpry vẽ, hã ra tóg tá kãtére mãn ke mũ gé,” he ag tóg.